MUBBAYIBBELE muli zikozyano zyiingi zyabakombi baLeza bakali kusyomeka bakali kulimvwa “mbubonya mbotulimvwa.” (Jak. 5:17) Muchikozyano, tulakonzya kwaamvwisisisya majwi Pawulu ngaakaamba muli Baroma 7:21-24 aati: “Ciindi nendiyanda kucita cibotu, icibi cilaandime. . . . Maawe ndemucaangu!” Chiindi nitulwana aachibi chili mulindiswe, kulatuumbulizya kuziba kuti mwaapostolo Pawulu anguwe wakali kulimvwa mbuuli ndiswe.

Alubo Pawulu wakaamba mbaakali kulimvwa. Muli Bagalatiya 2:20, wakati Jesu ‘wakandiyanda akulyaaba akaambo kandime.’ Pawulu wakali kwaasyoma majwi aaya. Mbulimvwa na anduwe? Amwi teembulimvwa pe.

Kuti katulimvwa kuti tatugwasyi akaambo kazibi nzitwakachita chiindi, tulakonzya kubonaanga Jehova tatuyandi pe akuti taakatulekelela pe. Alubo kulakonzya kutuyumina kubona kuti chinunuzyo chaJesu chilabeleka kulindiswe. Jesu uyanda kuti tuchibone oobo na chipo chachinunuzyo? Niinzi chikonzya kutugwasya kuti tutabi amaboneno aali boobo? Atwiilange-lange mibuzyo eeyi.

Jesu uyanda kuti umwi awumwi wesu achibone kachiyandikana chipo chakwe. Niinzi chinga chilatugwasya kuti tube amaboneno aali boobu? Yeeya makani aali muli Luka 23:39-43. Mwaalumi uligankamidwe kumbali lyaJesu. Wazumina kuti wakabisya. Kweelede ulaamulandu mupati nkaambo bantu bakali kuchita zibi zipati mbabo bakali kujayigwa munzila eeyi. Kali muchiimo eechi chiyumu, wakumbila Jesu kuti: “Ukandiyeeye waakunjila mu Bwami bwako.”

Jesu wamusandula biyeni mwaalumi ooyu? Ulakonzya kumubona mumizeezo kalikuchengulusya mutwe kuti amulange kumeso. Nikuba kuti Jesu uli mumachise mapati pesi wamwemwetela mpawo wabuzya mwaalumi ooyu kuti: “Ncobeni sunu ndikwaambila kuti, uyooba andime mu Paradaiso.” Jesu walikunookonzya kubuzya mwaalumi ooyu kuti ‘Mwanaamuntu wakaboolela kuti azoope buumi bwakwe kuti bube chinunuzyo chakununuzya biingi.’ (Mt. 20:28) Pesi wabona na kuti Jesu wakatondeezya kuti chinunuzyo chakwe chakali kubeleka kumwaalumi ooyu? Wakatondeezya kuba aandaba anguwe naakabelesya bbala liti “uyooba” aliti “andime.” Alubo wakabuzya mwaalumi ooyo kuti wakali kuyoopona muparadayizi aanyika.

Zili aantanganana kuti Jesu wakali kuyanda kuti mwaalumi ooyo amvwisisisye kuti lufu lwaKristu lwakali kuzoomugwasya. Kuti kakuli Jesu wakalimvwa oobo kuchigwebenga eechi chakatajana mweenya wakukomba Leza, kweelede kuti ulimvwa zyiindilide kumuKristu wakabbabbatizigwa uukomba Leza. Pesi niinzi chikonzya kutugwasya kuti tusyome kuti chinunuzyo chaKristu chilakonzya kugwasya umwi awumwi wesu nikuba kuti kuli zibi nzitwakachita chiindi?

Akaambo kakuti Jesu wakapede Pawulu mulimu wakukambawuka, Pawulu wakamvwisisisya kuti Jesu wakamufwida. Lufu lwaJesu lwakamugwasya biyeni? Wakapandulula kuti: “Ndilamulumba Kristo Jesu Mwami wesu, ooyo wakandipa nguzu, nkaambo wakandibona kuti ndilasyomeka kwiinda mukundipa mulimo wakucita, nokuba kuti musyule ndakali sikusampaula Leza asikupenzya bantu bakwe alimwi asikasampusampu.” (1 Tim. 1:12-14) Mulimu Pawulu ngwaakapedwe wakamugwasya kubona luzyalo, luyando alusyomo Jesu ndwaakalaalo kulinguwe. Jesu utupede mulimu wakukambawuka. (Mt. 28:19, 20) Mulimu ooyu tawupi kuti tumvwisisisye kuti Jesu wakafwida umwi awumwi wesu na?

Albert, wakali waba aaminyaka iisika ku34 kagwisidwe mumbungano wakati: “Chibi changu chili kunembo lyangu lyoonse. Nindilikukambawuka, nga ndalimvwa mbuuli mwaapostolo Pawulu nkaambo andime Jesu wakandipa mulimu wakuchita. Mulimu ooyu upa kuti ndibe aamaboneno aali kabotu atala andime, abuumi bwangu alyajuunza.”—Int. 51:3.

Katanayiya kasimpe, Allan wakali kuchita milandu mipati kayandisya zyakulwana. Wakati: “Ngandaziyeeya zibi nzindakachitila bantu. Zimwi ziindi ngazyandikataazya loko mumizeezo. Pesi ndilamulumba Jehova nkaambo wakazumizya muntu uuli mbuuli ndime kuti akambawukile bamwi makani mabotu. Kubona bantu kabachincha kundiyeezya kuti Jehova mubotu akuti ulaaluyando. Ngandabona kuti ulikubelesya muntu uuli mbuuli ndime kuti ndigwasye bamwi bapona mbuuli mbundakabede chiindi.”

Kukambawuka kutugwasya kuti tubelesye manguzu eesu kuti tuchite zintu zibotu akuba aamizeezo mibotu. Alubo kutondeezya kuti Jesu ulaaluzyalo, luyando akuti ulatusyoma.

Myoyo yesu inookkala kayitupa mulandu akaambo kazibi nzitwakachita kusikila nyika yaSaatani izoonyonyoonwe. Niinzi chikonzya kutugwasya kuti tuzunde kulimvwa oobo?

Jean uunga walipa mulandu akaambo kabuumi mbwaakali kupona kachili muniini ulaayandisya majwi aati “Leza mupati kwiinda myoyo yesu.” (1 Joh. 3:19, 20) Andiswe kulakonzya kutuumbulizya kuziba kuti Jehova aJesu balizi kuti tuli bantu bali aachibi. Utalubi kuti bakatupa chinunuzyo kutali kuti chigwasye bantu batakwe chibi pesi kuti chigwasye bantu bali aachibi bachincha.—1 Tim. 1:15.

Kuyeeyesesya atala anzila Jesu njaakabajataayo bantu balaachibi, kupa kuti tube aachoonzyo chakuti chinunuzyo chilabeleka kuli umwi awumwi wesu chiindi nitubeleka changuzu mumulimu ngwatupede. Kwiinda mukuchita oobo, anduwe ulakonzya kwaamba mbuuli Pawulu kuti: Jesu ‘wakandiyanda akulyaaba akaambo kandime.’