TE Biblia jamal ya yal bin-utʼil la yaʼiy sbaik chaʼoxtul j-abatetik yuʼun Dios te «pajal mayuc quiptic soc» (Sant. 5:17). Jun ejemplo, jaʼ te bin la yal te jpuk-kʼop Pablo: «Aunque coʼtanuc ya jpas te bin lec [...] ay ta jtojol te bin chopole [...]. ¡Cʼux obol jba!» (Rom. 7:21-24). Ta melel, ayniwan jich kaʼiyoj jbatik-euk. Kʼalal ay wokol ya kaʼiytik stsalel te mulil ay ta jtojoltike, ya yakʼ smukʼul koʼtantik snaʼel te bin la yal te Pabloe.

Te Pablo jaʼnix jich la yakʼ ta naʼel te bayal skʼoplal kʼot ta yoʼtan te la yakʼ sba ta lajel te Jesuse. Jich la yal ta Gálatas 2:20: «Te Snichʼan Dios [...] cʼuxon ta yoʼtan soc [...] la yacʼ sba ta jcuenta». Te Pablo mero schʼuunej yoʼtan te la yakʼ sba ta lajel te Jesús ta stojole. ¿Jichbal schʼuunej koʼtantik-euk? Ayniwan ma jichuk ya yal koʼtantik.

Teme maʼyuk akʼoplal ya awaʼiy aba ta skaj te muliletik la apas ta nameye, ayniwan ma schʼuun awoʼtan te kʼuxat ta yoʼtan te Jehová sok te la spasbatix perdone. Sok kʼaxtoniwan wokol ya awaʼiy te ya schʼuun awoʼtan te jaʼ ta atojol te la yakʼ sba ta lajel te Cristo, te jaʼ amajtʼane. ¿Yabal skʼan Jesús te ya schʼuun awoʼtan te jaʼ ta atojol te la yakʼ sba ta lajele? Teme jiche, ¿bin ya skoltayat yuʼun jich ya schʼuun awoʼtan? Kilbeytik sujtib te cheb jojkʼoyeletik ini.

Te Jesús ya skʼan te jich ya awil te jaʼ amajtʼan te la yakʼ sba ta lajel ta atojole. ¿Bin yuʼun ya xjuʼ ya schʼuun awoʼtan? Kiltik te bin ya yal Lucas 23:39-42; 23:43, TNM sok jnop kaʼiytik bin-utʼil kʼot ta pasel te bin ya yale. Jtul winik te jipil ta teʼ ta stsʼeel te Jesús, la yal ta jamal te ay smule. Tulan-niwan te smule, melel te kastigo yak ta yichʼele, jaʼ te bitʼil ya yichʼ pasbeyel te jmilawetik te kʼax chopolike. Te winik ini te jkʼaxel smeloj yoʼtan yuʼun te bitʼil aye, jich la skʼanbey sok spisil yoʼtan te Jesuse: «Naʼawon te cʼalal ya xtalat ta banti ay te cuentahinel awuʼune».

¿Bin la spas te Jesús? Nopa awaʼiy te yakat ta yilel te Jesús, ya awil te ya sut sba ta yilel te winik manchukme kʼax wokol ya yaʼiy. Manchukme ya xlajix yuʼun te skʼuxul yejchʼene, ya spas tulan yuʼun ya stseʼejin sok jich ya yalbey sok yutsil yoʼtan te winike: «Yoʼtik jamal ya kalbat, yame ajokinon ta Nichimal Kʼinal». Te Jesús juʼ te jaʼnax la sjultesbey ta yoʼtan te winik te «tal yacʼ sba ta lajel scuenta yuʼun ya xweht scolel bayelic» (Mat. 20:28). Pero ma jichuk la spas, melel la skoltay te winik te yakuk xkʼot ta yoʼtan te jaʼ ta stojol te ya xbajtʼ yakʼ sba ta lajele. Sok yutsil yoʼtan jich la yalbey: «Yame ajokinon». Ma jaʼuknax-abi, te Jesús la yalbey yaʼiy te winik te ya sta jun majtʼanil ta swenta te ya yakʼ sba ta lajele, jaʼ te ya xkuxin ta Nichimal Kʼinal ta Balumilale.

Te chopol winik-abi ma juʼix yuʼun yakʼel ta ilel teme ya skʼan ya x-abatin ta stojol te Diose. Pero ta melel, te Jesús la skʼan te yakuk schʼuun yoʼtan te winik ini te jaʼ smajtʼan ya xkʼot te bitʼil ya yakʼ sba ta lajel te Jesuse. Teme jich la skʼan Jesús ta stojol te winik ini, jaʼnix jich ya skʼan ta stojol te j-abat yuʼun Dios. Jich yuʼun, ¿bin ya skoltayotik yuʼun ay jkʼoplal ya kaʼiy jbatik manchukme ay jpasojtik muliletik ta namey?

Kʼalal te Jesús la yakʼbey yaʼtel ta scholel skʼop Dios te Pablo, jich la schʼuun yoʼtan te jpuk-kʼop te jaʼ laj te Jesús ta stojole, melel jich la yal: «Ya calbe  wocol te Cajwaltic Cristo Jesús te la yaʼbon yip coʼtan, como la yil te jun coʼtan, hich la yaʼbon quichʼ caʼtel ta stojol, aunque ha jbohlcʼoptaywanejon, jʼutsʼinwanejon soc jʼixtaʼcʼoptaywanejon ta nahil to» (1 Tim. 1:12-14). Kʼalal akʼbot yaʼtel ta scholel skʼop Dios te Pabloe, kʼot ta yoʼtan te naʼbot yoʼbolil sba yuʼun te Jesús, te kʼux aʼiybil yuʼun sok te lek skʼoplal yuʼune. Jaʼnix jich te joʼotik akʼbil kaʼteltik yuʼun te Jesús ta scholel te skʼop Diose (Mat. 28:19, 20). ¿Jichbal ya kaʼiy jbatik bitʼil te Pabloe?

Kiltik te bin kʼax ta stojol te Albert te mato jaluk sujt tal ta stojol Jehová te kʼalal jteb ma staix 34 jaʼbil yichʼoj lokʼesel ta kongregasion. Jich ya yal: «Spisil-ora ya jnaʼulan te muliletik la jpase. Pero te kʼalal ya xlokʼon ta scholel te skʼop Diose, jich ya kaʼiy te yakʼojbon kaʼtel te Jesús jich bin-utʼil te Pabloe. Kʼax tseʼel koʼtan ya kaʼiy jba yuʼun, jaʼnix jich ya skoltayon yuʼun ma jaʼuk ya xbajtʼ ta koʼtan snopel te bin chopol jpasoj, te lek ya kil jkuxlejal sok te ay bin lek ya jmaliy ta pajel chaʼbeje» (Sal. 51:3).

Te Allan jaʼ jtul winik te bayal bintik kʼax chopol la spas te kʼalal mato snopoj-a te smelelil kʼope. Jich ya yal: «Ay yato xjul ta koʼtan te bayal machʼatik la kutsʼine. Ay ya jmel koʼtan yuʼun. Pero ya kalbey bayal wokol te Jehová te ya yakʼbon jchol te lek yachʼil kʼop ta stojol te ants winiketik manchukme jmulawilon. Kʼalal ya kil te ya smulanik te skʼop Dios te ants winiketike, ya sjultesbon ta koʼtan te kʼax lek yoʼtan sok te ay yutsil yoʼtan te Jehovae. Jich ya kaʼiy te ya stuunteson te Jehová ta skoltayel te ants winiketik te jich stalelik-a te bitʼil joʼone».

Kʼalal ya jcholtik te skʼop Dios jaʼ ya xbajtʼ ta koʼtantik stuuntesel te kiptik ta spasel te bin lek sok ta snopel te bintik lek. Te spasel te aʼtelil-abi, ya yakʼ te ya schʼuun koʼtantik te ya snaʼ yoʼbolil jbatik te Jesús, te kʼux aʼiybilotik sok te lek jkʼoplaltik yuʼune.

Te koʼtantike yaniwan yalulanbotik te ayto jmultik ta skaj te bin chopol la jpastik ta nameye, jaʼtoniwan ya jkux koʼtantik te kʼalal ya xlaj te chopol balumilal yuʼun te Satanás. ¿Bin ya skoltayotik te kʼalal ya yalulanbotik koʼtantik te ay jmultike?

Te Jean jteb ma spisil-ora ya x-albot yoʼtan te ayto smul yuʼun te bintik chopol la spas ta yachʼixil te kʼalal j-abatix yuʼun Dios-a. Pero jich ya yal: «Mero ya jmulan te ya yal te Biblia te “ha cʼax mucʼ te Dios te bin utʼil te coʼtantic”» (1 Juan 3:19, 20). Jaʼnix jich te joʼotik ya yakʼ smukʼul kʼinal kaʼiytik te ay ta yoʼtan Jehová sok Jesús te jmulawilotike. Juluk ta koʼtantik te ta swenta skʼuxul yoʼtanik te la smanbeyik skolel te ants winiketik te ya sujtes yoʼtanike, ma jaʼuk la smanbeyik skolel tojil ants winiketik (1 Tim. 1:15).

Swenta ya xjuʼ ya schʼuun koʼtantik te jaʼ jun majtʼanil te la kichʼtik akʼbeyel ta jujuntul te stojol kolele, ya skʼan ya jnopilan ta koʼtantik bin yilel la yil Jesús te jmulawil ants winiketik sok te ya jpastik tulan ta spasel te kaʼteltik yakʼojbotike. Teme jich ya jpastike, ya xjuʼ jichnix ya kaltik bitʼil te Pablo: «Cʼuxon ta yoʼtan [te Jesús] soc [...] la yacʼ sba ta jcuenta».