VEMBIMBILIYA mu sangiwa ovolandu omanu valua va ‘kalavo omanu ndetu.’ (Tia. 5:17) Ndeci, tu pondola oku kuata elomboloko lieci Paulu a yonguile oku popia lolondaka vi sangiwa ku Va Roma 7:21-24 viokuti: “Eci ndi yongola oku linga eci ciwa, cĩvi ceci. . . . Ngongo yange we!” Olondaka evi vi tu lembeleka eci tu liyakavo lekambo lietu lioku lipua.

Paulu wa tukulavo catiamẽla kovina vikuavo a liyaka lavio. Kelivulu lia Va Galatia 2:20, eye wa popia hati: “Omõla a Suku, . . . wa ndi sola kuenje wa lieca olumue mekonda liange.” Paulu wa ci kolelele! Ove hẽ o ci kolelavo? Pamue ka ci leluka.

Nda okuti handi tu sumua omo liakandu tua linga osimbu, pamue ci tu tateka oku tava okuti Yehova o tu sole kuenda o tu ecela kuenje ci tĩla calua oku tava kocilumba ca Yesu. Yesu o yongola okuti tu tenda ocisembi lonjila yipi? Nye ci pondola oku tu kuatisa? Tu konomuisi apulilo a-a avali.

Yesu o yongola okuti tu tenda ocilumba caye ndombanjaile yimue a eca. Ekolelo lipi tu kuete? Sokolola kulandu u sangiwa kelivulu lia Luka 23:39-43. Ulume umue, wa valeliwa kuti ponele ya Yesu. Eye wa popia hati, kosimbu wa lingainga ovina vĩvi. Citava okuti elinga liaco, lia luile momo vana va linga ocina cimue cĩvi calua ovo lika va sesamelele oku valeliwa kuti. Ulume waco wa sakalalele calua kuenje wa pinga ku Yesu hati: “Njivaluke eci iñila Vusoma wove.”

Yesu wo tambulula hẽ ndati? Sokolola ohenda Yesu a yeva eci a vandekela kulume ongangala. Ndaño okuti wa kalavo oku tala ohali, eye wa memenako loku lembeleka ulume poku popia hati: “Ocili, ndu ku sapuila etaili siti, o ka kala kumue lame Vocumbo Celau.” Yesu nda wa ivaluisa ulume okuti ‘Mõlomunu weya . . . oku eca omuenyo waye ndocisembi.’ (Mat. 20:28) Pole, limbuka okuti Yesu locisola wa lekisa kulume esilivilo liocisembi caye. Eye wa lekisavo ukamba poku tukula olondaka viokuti “ove” “lame.” Eye wamisako oku sapuila ulume okuti o kala vocumbo celau palo posi.

Ocili okuti, Yesu wa yonguile okuti ulume waco, o limbuka okuti wa ponduile oku kuatisiwa locisembi caye. Nda Yesu wa liyeva ndoco longangala okuti ka ya kuatele epuluvi lioku vumba Suku, eye o lekisavo ohenda ku Kristão una wa papatisiwa o kasi oku vumba Suku. Nye ci tu kuatisa oku tava okuti ocisembi ca Yesu ci pondola oku tu kuatisa komuenyo wetu ndaño kosimbu tua linga ekandu?

Upange woku kunda Paulu a linga, wa lekisa okuti eye wa kuata elomboloko liokuti Yesu wo fila. Ndamupi? Eye hati: “Ndi pandula Kristu Yesu Ñala yetu, una wa nyĩha unene, omo a ndi tenda okuti nda koleliwa poku ñundika upange owu, ndaño nda kala ukuakupembula, ukuakulambalala kuenda ukuakutondala.” (1 Tim. 1:12-14) Upange woku kunda Paulu a linga, wo kuatisa oku limbuka okuti Yesu u kuetele ohenda, ocisola kuenda wo kolela. Yesu wa ecavo kokuetu ocikele coku kunda olondaka viwa. (Mat. 28:19, 20) Ndamupi ocikele cetu coku kunda ci tu kuatisa oku limbuka okuti Yesu wa tu filavo?

Albert okuti ndopo a tiuka ku Yehova noke lioku pita 34 kanyamo tunde apa a tundisiwa wa popia hati: “Sia la ivala ovina vĩvi nda linga kosimbu. Pole, eci ñasi kupange woku kunda, ndi liyeva ndupostolo Paulu okuti nda tambula ocikele caco ku Yesu. Poku ci sokolola ci ndi nenela esanju kuenda oku kolela kelavoko lio kovaso yoloneke.”—Osa. 51:3.

Allan wa lingaile ovina vĩvi kuenda viungangala osimbu ka kũlĩhĩle ocili, wa popia hati: “Handi nda siata oku sokolola kovina vĩvi nda lingila omanu. Olonjanja vimue ci ndi sumuisa calua. Pole, mandula Yehova wa ecelela okuti omunu ukuakandu ndame o kundila omanu vakuavo olondaka viwa. Eci ndi mola ndomo omanu va tava kolondaka viwa, ndi limbuka ohenda kuenda ocisola ca Yehova. Ndi limbuka okuti Yehova o numa oku ka kuatisa omanu vana va siata oku linga ovina vĩvi.”

Eci tu kasi kupange woku kunda tu linga ovina viwa kuenda tu kuata ovisimĩlo viwa. Eci ci tu kuatisa oku limbuka okuti Yesu o tu kuetele ohenda, ocisola kuenda wa tu kolela.

Osimbu oluali lũvi lua Satana ka lua nyõlehele, pamue utima wetu u ka amamako oku tu vetela evelo omo liovina vĩvi tua linga kosimbu. Nye ci pondola oku tu kuatisa oku yuvula ovisimĩlo viaco?

Jean o kasi loku liyaka locitangi coku livetela evelo omo lioku ambata olonjila vivali eci a kala umalẽhe wa popia hati: “Ame ndi sole ‘Suku una wa velapo, okuti ovitima vietu vi sule.’” (1 Yoa. 3:19, 20) Ndeci Jean, tu pondolavo oku liyeva ciwa omo lioku limbuka okuti Yehova la Yesu va kũlĩha okuti tua kuakandu. Ivaluka okuti, Yehova la Yesu locisola calua va eca ocisembi, komanu vana vakuakandu, pole, ka va cecele komanu vana va lipua.—1 Tim. 1:15.

Etu tua kolela okuti ocisembi ci kuete esilivilo lialua kokuetu eci tu sokolola konjila ndomo Yesu a tata omanu ka va lipuile eci va likolisilako kupange woku kunda una eye a handeleka oku linga. Nda wa linga ndeci Paulu, o ka popiavo hati: Yesu “wa ndi sola kuenje wa lieca olumue mekonda liange.”