BAIBOL na vọnre vẹ eta rẹ ihwo re “epha” kerẹ avwanre. (Jems 5:17) Kerẹ udje, avwanre se vwo ẹruọ rẹ oborẹ eta ri Pọl mudiaphiyọ ọke rọ vwọ ta eta rehẹ Rom 7:21-24: “Ọke me vwọ guọnọ emu esiri ru, umwemwu kọye ro ovwẹ obọ. . . . Orharhe rẹ ohwo re me epha!” Ọke re de nene jẹgba muabọ, ọ vwerhen oma a vwọ riẹn nẹ Pọl ji nene jẹgba muabọ jovwo re.

Pọl je ta ota kpahen iroro ri shephiyọ. O vwo imuẹro nẹ Jesu vwo ẹguọnọ kpahen ọyen, rọ vwọ ta: “Ọmọ rẹ Ọghẹnẹ . . . guọnọ ovwẹ rọ da vwẹ oma rọye kẹ vwẹ.” (Galesha 2:20) Ọtiọyen ọ je “epha” kẹ wẹ? Ọ dia ọkieje yen ọ vwọ dia ọtiọye-en.

Siẹrẹ ẹwẹn de kpokpo avwanre fikirẹ imwemwu re ru wanre, ọ sa bẹn re vwo rhiabọreyọ ẹguọnọ vẹ evwoghovwo ri Jihova. Ọ je sa bẹn re vwo ni ọtanhirhe ri Jesu kerẹ okẹ ra vwọ kẹ avwanre komobọ. Jesu ghene guọnọ nẹ avwanre ni ọtanhirhe na kerẹ okẹ? Ọ da dia ọtiọyen, kẹ die yen sa chọn avwanre uko vwo no ọtiọyen? E gbe jẹ a fuẹrẹn enọ ivẹ yena.

Vwọrẹ uyota, Jesu ghene guọnọ nẹ avwanre ni ọtanhirhe na kerẹ okẹ romobọ. Diesorọ o vwo mu avwanre ẹro? Vwẹ ẹro roro obo ra niyẹnrẹn rọyen vwẹ Luk 23:39-43. Ọshare ọvo ra kanre mu urhe rẹ oja kẹre Jesu, rhọnvwere nẹ ọyen riabe rẹ umwemwu. Obo ro ruru na brare mamọ, ọyensorọ ra vwọ kanrọ mu urhe. Ẹwẹn kpokpo ọshare na mamọ, ọtiọyena, ọ da rẹ Jesu: “Karohọ ovwẹ vwẹ ọke wo de te uvie rẹ ogangan wẹn na.”

Die yen Jesu kpahen kẹ? Vwẹ ẹro roro oborẹ oma miavwerọ te, ọke rọ vwọ kuomarhẹriẹ vwo ni opharo rẹ ọshare na. Dede nẹ Jesu hẹ ẹdia rẹ ọmiaovwẹ ọgangan, ọ je davwẹngba hwẹ je vwẹ imuẹro nana kẹ ọshare na: “Uyota me ta kẹ owẹ, nonẹ na me vẹ owẹ dia vwi Paradais.” Jesu rha sa karophiyọ ọshare na nẹ “Ọmọ rẹ ohwo rhere . . . rere o vwẹ arhọ rọye tan ihwo buebu.” (Mat. 20:28) Ukperẹ ọtiọyen, vwẹ idjerhe rẹ ẹguọnọ Jesu kanrunumu oborẹ ọtanhirhe rọyen na shekpahen ọshare na komobọ. Ọ ta ota kẹ kerẹ ugbeyan ọke rọ vwọ reyọ eta na “me” vẹ “owẹ” vwo ruiruo. Jesu djunute erere romobọ ro se te ọshare na obọ womarẹ ọtanhirhe na, rọ vwọ vuẹ nẹ ọ sa dia vwẹ iparadaisi.

Aphro herọ-ọ, Jesu guọnọre nẹ ọshare na riẹn nẹ izobo rọyen na che fierere kẹ. Jesu de se vwo ẹwẹn nana kpahen ọshare yena ro vwo uphẹn rọ vwọ ga Ọghẹnẹ-ẹ, o muẹro nẹ o che ru ọtiọyen vwọ kẹ Onenikristi ro bromaphiyame re. Die yen sa chọn avwanre uko vwo vwo imuẹro nẹ izobo rẹ ọtanhirhe ri Jesu na che fierere kẹ avwanre komobọ, dede nẹ avwanre ru imwemwu vwẹ ọke rọ wanre?

Iruo rẹ aghwoghwo ri Jesu vwọ kẹ Pọl djobọte ẹro ro vwo ni izobo rẹ ọtanhirhe ri Jesu. Idjerhe vọ? Ọ da ta: “Me kpẹvwẹ Kristi Jesu Ọrovwavwanre, rọ kẹ vwẹ ogangan nana, kidie o ni vwe fo ohwo rẹ uyota, ro vwo se vwe phihọ iruo rọye, dede na dẹvure jovwo me phọpherọ mi kpokpiro me da harhọ.” (1 Tim. 1:12-14) Iruo rẹ aghwoghwo ri Pọl na nẹrhẹ imuẹro rọyen kpahen arodọnvwẹ vẹ ẹguọnọ ri Jesu ganphiyọ, ọtiọyen ji te ẹroẹvwọsuọ rọyen kpahen Jesu. Jesu je vwẹ iruo rẹ aghwoghwo na vwọ kẹ avwanre ohwo ọvuọvo. (Mat. 28:19, 20) O ji se djobọte avwanre kirobo ro djobọte Pọl?

Albert ro rhivwin bru Jihova rhe omarẹ ikpe 34 ra vwọ djẹ nẹ ukoko nu, da ta: “Ọkieje yen me vwọ karophiyọ imwemwu mẹ. Ẹkẹvuọvo, kerẹ ọyinkọn Pọl me dahẹ iruo rẹ aghwoghwo na, ki mi no nẹ Jesu vwẹ iruo rẹ aghwoghwo na kẹ vwẹ komobọ. Iruo na bọn vwẹ gan, je nẹrhẹ mi vwẹ ẹro abavo vwo ni oma mẹ, akpeyeren mẹ, vẹ akpọ rẹ obaro mẹ.”—Une 51:3.

Allan ro yeren akpọ rẹ ozighi tavwen ọ kẹ mrẹ uyota na vughe da ta: “Me je karophiyọ omaẹwan re me so kẹ ihwo. Ọkievo ọ nẹrhẹ ofu dje vwe. Ẹkẹvuọvo, me kpẹvwẹ Jihova nẹ ọ vwẹ uphẹn kẹ orumwemwu kerẹ omẹvwẹ nẹ o ghwoghwo iyẹnrẹn esiri na kẹ ihwo efa. Me da mrẹ oborẹ ihwo kerhọ rẹ iyẹnrẹn esiri na wan, ọ nẹrhẹ me karophiyọ ẹguọnọ vẹ uyoyovwin ri Jihova. Mi no nẹ Jihova reyọ ovwẹ vwọ vwẹ ukẹcha kẹ ihwo ri ji ru erọnvwọn ebrabra jovwo re.”

Iruo rẹ aghwoghwo na nẹrhẹ avwanre ruẹ obo ri yovwirin, ọ je nẹrhẹ e vwo iroro abavo. Ọ nẹrhẹ avwanre vwọ imuẹro nẹ Jesu vwo ẹguọnọ, gbe arodọnvwẹ, je vwẹroso avwanre.

A ke ghwọrọ eyeren rẹ Eshu na no, ẹwẹn rẹ avwanre che rhe kpokpo avwanre fikirẹ imwemwu re ru wanre. Die yen sa chọn avwanre uko vwo phi iroro tiọyena kparobọ?

“Jean rẹ ẹwẹn kpokpo fikirẹ akpọ rẹ ophiẹnvwe ro yerin ọke rọ vwọ hẹ eghene, da ta: “Oma vwerhen ovwẹ nẹ ‘Ọghẹnẹ rho nọ udu avwanre.’” (1 Jọn 3:19, 20) Kerẹ Jean, oma je sa vwerhen avwanre nẹ Jihova vẹ Jesu riẹnre nẹ avwanre irumwemwu. Karophiyọ nẹ ọ dia fikirẹ ihwo re gbare yen Jesu vwo ghwu-u, ẹkẹvuọvo, fikirẹ irumwemwu ri kurhẹriẹ.—1 Tim. 1:15.

O se mu avwanre ẹro nẹ ọtanhirhe na okẹ romobọ siẹrẹ e de roro kokodo kpahen oborẹ Jesu nene irumwemwu yerin wan, vẹ ọke ra da davwẹngba avwanre eje vwo ruiruo rẹ aghwoghwo ri Jesu vwọ kẹ avwanre na. Avwanre de ru ọtiọyen, ka sa vwẹrokere Pọl ta: Jesu “guọnọ ovwẹ rọ da vwẹ oma rọye kẹ vwẹ.”