LU BIBLIA ridúʼndanu ni guníʼ ca hombre ni bizuubaʼ stiidxa Dios ni gupa «sentimientu cásica laanu» (Sant. 5:17). Casi guníʼ apóstol Pablo: «Casi naa gacaladxe gune ni jneza, rutaagu pecadu naa. [...] Pobre de naa» (Rom. 7:21-24). Biaʼsi nga ni guníʼ hombre riʼ. Ora gudxíʼlunu ca debilidad stinu, ni guniʼbe riʼ riguixhedxini ladxidoʼno.

Peru laaca bizeeteʼ Pablo xi biʼniʼ sentir pur guendaguti stiʼ Jesús. Lu Gálatas 2:20 guniʼbe: «Xiiñi Dios [...] nadxii naa ne bidii xpida pur naa». Ne nánnabe zaqué ni. ¿Ñee zaqueca riníʼ íquenu la? Zándaca nuu biaje gápanu duda.

Pa riníʼ íquenu qué risácanu pur ca pecadu ni bíninu ante, zándaca zaca nagana para laanu guni crenu maʼ biʼniʼ perdonar Jiobá laanu ne nadxii laanu. Ne jma nagana zaca para cada tobi de laanu gúʼyanu rescate ca casi ti regalu. ¿Dxandíʼ racalaʼdxiʼ Jesús guidúʼyanu ni zacá la? Pa zacá ni, ¿xi zacané laanu para guidúʼyanu ni zacá yaʼ? Guicábinu chupa pregunta zeeda raríʼ.

Jesús racalaʼdxiʼ guicaanu sacrificiu stiʼ casi ti regalu ni cudiibe cada tobi de laanu. ¿Xiñee nuunu seguru de laani yaʼ? Guiníʼ íquenu ni zeeda lu Lucas 23:39-43. Tobi de ca hombre ni cá lu yaga, cueʼ Jesús que, nanna bichee. Zándaca bíʼnibe xiixa nabé malu purtiʼ castigu naná gucuaabe que para binni ni jma malu ni. Cumu nuube xizaa pur modo cayacanabe que la? gunábabe Jesús: «Bietenalaʼdxiʼ naa ora guiuuluʼ lu reinu stiluʼ».

¿Xi bicabi Jesús laabe yaʼ? Guiníʼ íquenu pabiáʼ naná modo biniibi íquebe para biiyadxibe lú hombre malu que. Neca naná nuu ladxidoʼbe, bíʼnibe stipa pur guxidxinebe hombre que ne gúdxibe laa: «Dxandipeʼ cayabeʼ lii yannadxí: Ziuuneluʼ naa ndaaniʼ Paraísu». Ñanda nusietenalaʼdxiʼ si Jesús laabe beeda para gudii «xpida para ilá stale binni» (Mat. 20:28). Peru gucanebe hombre malu que guiene para laapeʼ nga sacrificiu que. Gúdxibe laa ne guendarannaxhii «ziuuneluʼ naa» ne bizeetebe xi zabeendú hombre que pur rescate que: zanda guibani ndaaniʼ ti paraísu lu Guidxilayú.

Qué ñapa hombre malu que oportunidad de ñuni ni ná Dios. Ni gucalaʼdxiʼ Jesús ñene hombre riʼ nga sacrificiu ni chigudiibe que zácani ti regalu para laa. Yanna, pa Jesús gucalaʼdxiʼ ñene hombre riʼ ni, ne stale razón racaláʼdxibe guiene ti xpinni Cristu ni maʼ guyuunisa ni ne runi ni ná Dios. ¿Xi zacané cada tobi de laanu guni crenu zabeendunu ni galán pur sacrificiu stiʼ Jesús neca bicheʼnu dxiqué yaʼ?

Gunna Pablo guti Jesús pur laa, purtiʼ gunabaʼ Jesús laabe guni predicarbe xcaadxi  binni. Guniʼbe: «Cayacané Jesucristu Señor stinu naa cayune dxiiña riʼ. Ne rudiee diuxquixe laa saca bisisaca naa biaʼ para gune xhiiñaʼ. Biʼni be ni neca unié laabe chiqué, uzaya nanda ca xpinni be, ne udinde nia laacaʼ» (1 Tim. 1:12-14). Pur dxiiñaʼ gucuaabe que bisihuinni ni biá Jesús laabe, gunnaxhii ne gupa confianza laabe. Laaca maʼ bidii Jesús cada tobi de laanu dxiiñaʼ de guni predicarnu stiidxaʼ Reinu (Mat. 28:19, 20). ¿Ñee rúʼyanu ni casi biiyaʼ Pablo ni la?

Guidúʼyanu ni bizaaca Albert, ni guca expulsar raca 34 iza peru maʼ biguetaʼ ra nuu Jiobá. Nabe: «Ca donda stinneʼ zuhuaa cani nezaluáʼ guiráʼ ora. Peru ora runeʼ predicar, runeʼ sentir maʼ bidii Jesús naa ti dxiiñaʼ cásica ni gucuaa Pablo. Yanna maʼ nayecheʼ nabaneʼ pur cani cayuneʼ ne nannaʼ galán zie ni naa» (Sal. 51:3).

Allan guca ti hombre ni nabé ridxiichi nagueenda ne biʼniʼ stale guendaquéiquiiñeʼ ante gunibiáʼ ni dxandíʼ. Laabe bizeetebe: «Qué ganda gusiaandaʼ guiráʼ cosa malu bineʼ. Nuu biaje riuaaʼ triste. Peru rudieeʼ xquíxepeʼ Jiobá, purtiʼ rudii lugar chiné ti binni ruchee casi naa ca noticia nacubi stiʼ ra nuu xcaadxi binni. Ora ruuyaʼ modo ricabi binni mensaje ca, rusietenalaʼdxiʼ ni naa pabiáʼ nachaʼhuiʼ ne rannaxhii Jiobá. Runeʼ sentir riquiiñebe naa para gacaniáʼ xcaadxi binni ni nabani casi bibaneʼ».

Ora runi predicarnu riquiiñenu stipa stinu para gúninu ni jneza ne guiníʼ íquenu cosa galán. Riuʼnu seguru riá Jesús laanu, nadxii ne napa confianza laanu.

Zándaca ladxidoʼno ugaaniruʼ donda laanu pur ca cosa malu bíninu dxiqué ne dede dxi guinitilú sistema stiʼ Binidxabaʼ riʼ. ¿Xi zanda gacané laanu gudxiilunu cani runi sentirnu yaʼ?

Jean caquiiñeʼ gudxiilú ni runi sentir purtiʼ ruchiiñaruʼ xquendabiaaniʼ laa, pur ca cosa nagaʼchiʼ biʼniʼ dxi nahuiiniʼ. Laa guníʼ: «Riuuladxeʼ ca diidxaʼ riʼ “jma nandxóʼ Dios que” ladxidoʼno» (1 Juan 3:19, 20). Laaca ratadxí ladxidoʼno gánnanu riene Jiobá ne Jesús nácanu binni ruchee. Guietenaláʼdxinu guendarannaxhii ca nga bicaa laacabe gudiicabe rescate ca para binni ruchee ni gaca arrepentir ne cadi para binni perfectu (1 Tim. 1:15).

Ziuʼnu seguru naca rescate ca ti regalu para cada tobi de laanu pa gúninu chupa cosa: guiníʼ ique chaahuinu tratu bidii Jesús binni ruchee ne gúninu stipa pur guni cumplirnu ne dxiiñaʼ ni maʼ bidiibe laanu. Zacá la? zanda guininu casi Pablo: Jesús «nadxii naa ne bidii xpida pur naa».