ZIAZIA KEKEAPAI hi be afugo agu aboro ‘nahi dungu apai wakina rani.’ (Yak. 5:17) Ni kpiapai, si taata furani ani rugutirani na gupai Pauro aaida ka gumbaha ho ko ape agu afugo ni du ni kekehe rogo ARomo 7:21-24, si naya: “Mi nikpi nyemu manga wenepai, gbegberẽpai nimbedi na mi. . . . Rungorungo boro nga mi!” Ho ani asovura ni kuti gaani zangarengba, si nipa wasa ka ino gupai nga gu ruru kumba nangia Pauro aabi tiko abi kina wai ani abi tirani a.

Ono Pauro aima fura a tipa kura gene berewe ko aabi tiko ngbaha. Ko aya: “Wiri Mbori, . . . nakpi nyemu re, ki fu tiko tipa re.” (Gara. 2:20.) Pauro aima du na kido kuti gipai re! Ya mo mo nabi tiro wa gure? Si nawira gupai nga mo naabingo tiro wa gure dedede te.

Ka ani abi tirani nga nyakingo parani te, mbiko agu aingapai ani amangihe bakuru kusayo, si ima rengba ka mbu furani ti kura aregbo ka ida kuti gupai nga Yekova ima kpinyemu rani na ko ima mbupai furani, na si ima rengba kadu ni mbumbuhe gbe furani ani bi ga Yesu motumo tumorii ni gamahe furani. Ya mo Yesu naida gupai nzunzu nga ani naabi motumo tumorii ni gamahe? Kangia wo duhe, ginipai rengbe ka undo rani ani naabihe ni gamahe? Ani wisigingo pai tipa agu asanahe ue re.

Nirengo, Yesu naida gupai nga ani naabi gako motumo tumorii ni gamahe furani. Waigu rengbe ani ka ida kuti gupai nga rengo du? Oni berẽnga pa gupai du ni kekehe rogo Ruka 23:39-43. Kumba ni asiasi ko ti ngua pati Yesu. Ko ima ida kuti gupai nga ko aima manga gbegberẽpai. Si ima rengba kadu nga kerepai du ko amangihe bambiko kina agu aboro namanga kere gbegberẽ apai i aimo yo ngba gi gene re. Gi kumba re rogo kere bakabangirise, na ko zungodi Yesu ki ya: “Mo tíngidi pa re ho mo ka da ni ku rogo ga ngbi.”

Waigu Yesu nakaragapai? Mo berẽnga pako ko ni aria riko rogo igirã yo tipa ka ngana gu kumba re. Wa vura duhe nga Yesu rogo igirã, ko momu ti ngbako na ki fu gu kidohe fu gu kumba re nga: ‘Ya mi foro ni rengo areme, ani adú na mo Paradiso yo.’ Yesu aima rengba ka tingida gu kumba re gbua na gupai nga “Wiri boro aye . . . ka tumo dungu yo ni ungako.” (Mt. 20:28) Ono tie kuba gure, ko afura ngba wene gene tipa gako motumo tumorii tipa kina boro gu gumba re. Ko afura na gu kumba re wa bakureako na ki mangisunge na agu afugo nga “ani” na “mo.” Na ko aya fu gu kumba re wẽ ko nika raka rogo paradizo auru kpotosende.

Zanga kapa, Yesu aaida gu kumba re rugutiko na gupai nga gu motumo tumorii ko aandu ka fuhe barambeda nika undoko aundo a. Ka si du nga Yesu adu na bipai wa gure tipa boro tiandika nga guko naadunga na momu beko ka iriso Mbori ya, ko ima rengba nirengo kadu na bipai wa gure kisusi tipa gu Kristano naima zio bapatiza nga guni nairiso Mbori. Ginipai tie rengbe ka undo rani ani sonosi gu bipai re tipa tirani si ki vura du vurũ nga ani amangi aingapai bakuru kusayo?

Ga Pauro sunge tungusapai aima du na maapai kurii wai ko aabi ga Yesu motumo tumorii. Wai du si adu wo? Ko aya: “Mi natambua gu ko naunda re, nga kina Kristo Yesu gaani Gbia, mbiko ko aberẽ he ya irarengo nga mi, ki asia pa gako sunge fere. Mi avura du mbata ni iragberangba yo ni irarungosi boro, ni iragbarasapai.” (1 Tim. 1:12-14) Mbiko gupai nga Yesu afu sunge fu Pauro, ko aima du na gu kido nga Yesu aima yugo inapai fuko, ki ima kpinyemuko na kidu na kido kutiko. Wakina gure a, Yesu aima fu sunge furani dunduko ni basasa. (Mt. 28:19, 20) Ya mo gu sunge re rengbe kadu na maapai kurii rani a?

Albert, nga guko naakaraga tiko fuo Yekova bambeda kusayo fuo kusayo ko rogo dungurati tipa agarã naima mbeda kuti 34 aya: “Mi natingidapa gimi aingapai ti aregbo dunduko. Ono ho du mi ni gene tungusapai yo, mi nabihe nga Yesu ima fu sunge fere wakina gu ko afuhe fu Pauro. Si nanyakasa re na kini sare mi du na ruru bipai tipa tire, tipa gimi raka awere na kumbatayo.”​—Tam. 51:3.

Allan, nga guko nanaaraka gu raka nga ga tiandika gbiati zuu mbata fu ko wiriki rengo aya: “Mi naberãpa agu aimisiri kindi mi aye na ni kuti aboro. Ti kura aregbo, si nasa re mi du rogo bakere gberãrago. Ono mi nafu tambuahe fu Yekova nga guko nambu boro ingapai wa mi were mi naatungusa wene pangbanga fu aboro. Ho mi abi wai ni aboro aida na wene pangbanga, si natingida re na pa wai du Yekova ni wene ko na ki ngia boro nyemuse. Mi nabihe nga ko namangasunge na mi tipa mi undo agu aboro naima manga gbegberẽ apai a.”

Ho du ani ni gene sunge tungusapai yo, si nasa rani ani naamanga weneapai na kini berẽ wene aberã. Si nakido rani na pa ga Yesu inapai, nyemuse gbiati gako kido kuti rani.

Kpotoraniyo ima rengba kaa kitangbanga rani kindi mbiko agu aingapai ani amangihe kusayo, da kuti gu regbo i nika gbarasa gi ga Satana gbegberẽ zegino re. Ginipai nika undo rani ani sovura kuti gipai re?

Jean nga guri kpotoriyo ninaafuda ri dedede mbiko gu raka biriki ri aarakaha mbata kusayo mburi tooni aya, “Mi ima kpinyemu gupai nga, ‘Mbori nga bahe ti kpotorani yo.’” (1 Yo. 3:19, 20) Ani ima rengba ka gbia wasa a ti ino gupai nga aYekova na Yesu inipai wenengai tipa gaani aingapai kisusi rani. Oni tingidi gupai nga, i afu motumo tumori ni nyemuse, fu agu aboro ingapai saberã yo, angianga fu rengberengbe aboro ya.​—1 Tim. 1:15.

Ani naida kuti gupai nga gipai re nga rengo ho ani aberã ni kurii gu gene Yesu amangipai ngbaha na kpakpa aboro na ho ani amanga ai gupai ni rengbe ani ka mangaha tipa ka manga gu sunge ko afuhe furani. Ka ani mangihe wo, ani ima rengba ka ya wa kina Pauro wẽ: Yesu ‘nakpi nyemu re, ki fu tiko tipa re.’