1—3. Ӧйин толо берип иштеп турган ака-эјелерге кезикте нениҥ учун ижин артыргызарга келижет?

«БИС миссионерлер болуп 21 јыл иштегенис. Бу сӱрекей јакшы ӧйлӧр болгон. Је биске јажай берген ада-энелеристи кичеерге келижерде, олорго болужарга кӱӱнзеген де болзоос, је сӱреен јараган јерлерди артыргызарга кӱӱнзебеген болгоныс» — деп, Роберт ле Мэри-Джо эске алынгылайт.

² «Уйадай берген су-кадыгыстаҥ улам ижисти бӱдӱрип болбозыс деп билип ийеристе, кӧзистиҥ јаажын тудуп болбогоныс. Бис гран ары јанында иштеерге јаантайын кӱӱнзегенис, је эмди анайып иштеер арга јок болгон» — деп, Уильям ла Терри куучындайт.

³ Алексей ака айдат: «Ӧштӱлердиҥ бистиҥ филиалды бӧктӧп саларга турганын билер де болгон болзоос, је качан филиалды чыннаҥ ла бӧктӧп ийерде, биске ончобыска анаҥ јӱрерге келижерде, тӱҥей ле андый солынта сакыбаган јанынаҥ болгон деп билдирген».

4. Бис бу јӧрмӧлдӧ нени шӱӱжерис?

⁴ Мындый учуралдарды Бет-Элде иштеп турган эмезе агару иштиҥ ӧскӧ дӧ бӱдӱминде иштеп турган муҥдар тоолу ака-эјелер куучындап берер аргалу. Бу ака-эјелерге сӱӱген ижин артыргызарга јеҥил эмес болгон *. Олорго мындый солынталарга эптежерге нени эдер керек? Слер олорго канайып болужар аргалу? Бу сурактардыҥ каруулары, сакыбаган јанынаҥ болгон солынталарды ӧдӧргӧ, бистерге ончобыска болужар.

5. Кӧчӱштеҥ улам кандый кӱчтер болордоҥ айабас?

⁵ Бис кайда да иштезеес — Бет-Элде эмезе ӧйин толо берип иштейтен агару иштиҥ ӧскӧ дӧ бӱдӱмдеринде иштезеес, кожо иштеген улуска да, керек дезе иштеген јериске де тыҥ ӱренип каладыс. Оныҥ учун јӱрӱп јатсаас, олорды јӱрегистеҥ айрып јаткандый билдирер болор. Биске сӱӱген улузысты артыргызарга коркышту ачу болот. Бис анчада ла истежӱлердеҥ улам јӱрӱп јаткан болзоос, олор учун тыҥ санааркаар болорыс (Матф. 10:23; 2 Кор. 11:28, 29). Анайда ок агару иштиҥ ӧскӧ бӱдӱмине кӧстӧлзӧӧс эмезе айылыстӧӧн јанарга келишсе, биске чек ӧскӧ айалгаларга эптежерге келижердеҥ айабас. Темдектезе, Роберт ле Мэри-Джо деген эш-нӧкӧрлӧр мынайда куучындайт: «Биске бойыстыҥ ла культурабыс ӧскӧ албатыныҥ культуразындый билдирген. Тӧрӧл тилиске јарлаарга да эби-јок болгон. Бойыстыҥ орооныста да болзоос, бойысты туш улус деп сескенис». Кӧчӱштеҥ улам кезик ака-эјелер акча-манатка јединбей барат. Мынаҥ улам олор бойлорын кору јок артканын, бойына бӱдӱнбей турганын ла нени эдерин таппай барганын сезет. Мындый ӧйдӧ олорго не болужар аргалу?

6. Иеговала јуук колбуны кичеерге нени эдер керек?

⁶ Иеговала јуук колбуларыгарды кичеегер (Иак. 4:8). Је мыны канайып эдер? Бойыгардыҥ сезимдеригерди «мӱргӱӱлдердиҥ Угаачызына» куучындап туругар (Сар. 65:2). Сарын 62:8-те айдылганыла «јӱрегеерде не барын Иеговага чыгара айдыныгар». Иегова «нени сураганыстаҥ эмезе сананганыстаҥ чик-јок кӧпти эдер аргалу» (Еф. 3:20). Кудай биске сураганыстаҥ да кӧпти берип јат. Ол бистиҥ кӱчтеристиҥ аайына канайып чыгып салганына кайкаар болорыс.

7. а) Иеговала јуук колбуларысты кичеерге не болужар? б) Еврейлерге 6:10—12-ле болзо, биске Иеговага нениҥ учун оноҥ ары чындык иштеер керек?

⁷ Иеговала јуук колбугарды кичеерге, кажы ла кӱн Агару Бичикти кычырып, оны тереҥжиде шӱӱп сананыгар. Алдында миссионер болгон бир ака куучындайт: «Билелик бажырыштыҥ графигин буспагар ла туштажуларга белетенип туругар. Солынталар болордоҥ озо канайып јӱргенигер, анайып ла јӱрерге албаданыгар». Анайда ок јаҥы јууныгарла јарлаар ишке эрчимдӱ туружыгар. Иегова ого чындык иштеп јӱрген улусты да, алдындагызына кӧрӧ кӧпти эдип болбой тургандарды да, ундыбай јат. (Еврейлерге 6:10—12 кычырыгар.)

8. 1 Иоанн 2:15—17-деги сӧстӧр јӱрӱмисти уурлатпаска канайып болужар?

 ⁸ Јӱрӱмигерди уурлатпагар. Кудайга иштеерге турганысты јадын-јӱрӱмниҥ санааркаштары «туй базып» койбозын (Матф. 13:22). Тӧрӧӧндӧрӧӧрдиҥ ле најылараардыҥ јакшы сананып, акча-манады јеткил јӱрӱмге кӱӱнзедип турганына кирбегер. (1 Иоанн 2:15—17 кычырыгар.) Оныҥ ордына слерди керектӱ ӧйдӧ ич-кӧгӱс јанынаҥ, эмоциональный ла акча-манат јанынаҥ јеткилдеп салар деп сӧзин берген Иеговага иженигер (Евр. 4:16; 13:5, 6).

9. Укаа сӧстӧр 22:3, 7-ле болзо, кереги јок тӧлӱге нениҥ учун кирбес керек? Чын тӱп-шӱӱлтеге келерге биске не болужар?

⁹ Кереги јок тӧлӱге кирбегер. (Укаа сӧстӧр 22:3, 7 кычырыгар *.) Кӧчӱштеҥ улам акча-манат јанынаҥ јаан чыгым болот, оноҥ улам тӧлӱге кире берердеҥ айабазыс. Оныҥ учун слерге тыҥ ла керек јок немени кредитке албагар. Слерде тыҥ стресс болуп турган болзо (темдектезе, оору тӧрӧӧнигерди кичееп турган болзогор), тӧлӱге канча кире акча алатанын сананарга кӱч болот. Мындый ӧйдӧ чын тӱп-шӱӱлтеге келерге, мӱргӱгенигер ле јайнап сураганаар болужар. Ол тушта Иегованыҥ берген амыры «јӱректеригерди ле сагыжыгарды» кичееп, ӱзе немени меҥдебезинеҥ шӱӱп сананарга болужар (Флп. 4:6, 7; 1 Петр 5:7).

10. Јаҥы најылар табарга нени эдер керек?

¹⁰ Најылар табып аларын ундыбагар. Бойыгардыҥ сезимдеригерди ле кӱчтеригерди јуук најыларыгарга, анчада ла андый кӱчтерди ӧткӧн улузыгарга, куучындап турзагар, слерге јеҥил болор (Јарл. 4:9, 10). Слер алдында најылар болгон улусла оноҥ ло ары најылажарыгар, је эмди слерге јаҥы најылар табар керек. Најыларлу болорго турган болзоос, бойыска јакшы најы болор керек деп ундыбагар. Је јаҥы најылар табарга нени эдер керек? Бай ченемелигерле ака-эјелерле ӱлежип туругар. Анайып олор Иеговага иштеп јӱргенеердеҥ алып турган сӱӱнчигерди кӧрӱп турар. Јуунда кезик ака-эјелердиҥ ӧйин толо берип иштейтен аргага кӧрӱми слердийинеҥ башка да болзо, је кезик ака-эјелер слердиҥ јакшы темигерди кӧрӱп, слерле најылажар болор. Је мында јаҥыс бойыс керегинде кӧп куучындап, бойыска јаан ајару этпеске ле јӱк ле јаман неме керегинде куучындабаска ајарыҥкай болор керек.

11. Эш-нӧкӧригерле колбугарды ӱребеске, кандый јастыра кӧрӱмдӱ болбос керек?

¹¹ Слерге эш-нӧкӧригердиҥ су-кадыгынаҥ улам агару ишти артыргызарга келишкен болзо, оны бурулабагар. Ол эмезе бойоордыҥ оорый бергенеердеҥ улам, эш-нӧкӧригер агару ишти артыргысты деп, бойыгарды база бурулабагар. Слер экӱ «јаҥыс эт-кан» болгоноорды  ла Иеговага, кандый да айалгада болуп калзаар, бой-бойоорды кичееп јӱререер деп, берген сӧзигерди ундыбай јӱригер (Матф. 19:5, 6). Эмезе слер сакыбаган јанынаҥ балалу болуп калганаардаҥ улам ижигерди артыргызып салган болзогор, балагар бойын слерге кандый ла иштеҥ баалу деп кӧрӱп турзын. Оны — «Иегованыҥ энчизи» деп, бӱдӱмјилеп туругар (Сар. 127:3—5). Ого слердиҥ ижигер јилбилӱ болгонын куучындап туругар. Кийнинде ол Кудайга иштееринде андый ла амадулар тургузарга кӱӱнзеер болор.

12. а) Ӧйин толо берип иштеп тургандарга ижин улалтарга канайып болужарга јараар? б) Кӧчӱп келген ака-эјелерге јеҥил болзын деп, нени эдерге јараар?

¹² Ӧйин толо берип тургандарга узак иштеерге болужып турган кӧп јуундарды ла кезик ака-эјелерди мактап јадыбыс. Олор бу ака-эјелерди агару ижин улалтарга кӱӱнзедип, акча-јӧӧжӧ јанынаҥ болужат, анайда ок ыраагында јадып турган тӧрӧӧндӧрин кичеерге болужат (Гал. 6:2). Слердиҥ јуунга, агару иштиҥ кандый бир бӱдӱмине ӧйин толо берип турушкан ишчилер ийилген болзо, олорды ижин бӱдӱрип болбогон эмезе јастыра керек эткен деп сананбагар *. Кӧчӱп келген ака-эјелерге јаҥы айалгаларга эптежерге јеҥил болзын деп болужып туругар. Олордыҥ келгенине сӱӱнип турганыгарды кӧргӱзигер. Су кадыгынаҥ улам олор, алдындагызына кӧрӧ, кӧп иштеп болбой турган да болзо, албаданып эдип турган ижи учун мактап туругар. Олорло јууктада таныжып алыгар. Андый ака-эјелердиҥ билгирлери де кӧп, ченемели де бай. Оныҥ учун олордоҥ ӱренигер!

13. Слердиҥ јууныгарга кӧстӧлгӧн улуска канайып болужарга јараар?

 ¹³ Кӧчӱп келген улуска тура, машина, иш, јӱрӱмге керектӱ тудунар-кабынар немелер керек болот. Олорго не болужып бербес? Анайда ок олорго темдектезе, налогторды канайып тӧлӧӧрин эмезе страховканы канайып јазадып аларын јартап берерге јараар. Олорды карамдаар керек эмес, карын оҥдоор керек. Айса болзо, олор бойлоры эмезе тӧрӧӧндӧри оорый бергенинеҥ улам санааркап турган болор. Эмезе јуук кижизин јылыйтканынаҥ улам кунугып турган болор *. Анайда ок, айтпай да турган болзо, иштеген јеринде арткан кӧгӱс билезин јоктоп турган болор. Мындый башка-башка тереҥ сезимдерди ӧдӱп чыгарга, бир канча ӧй керек болот.

14. Јербойыныҥ јарчылары јаҥы айалгаларда јарлап баштаган эјеге канайып болушкан?

¹⁴ Анайда ок кӧчӱп келген ака-эјелерге слердиҥ темигер ле болужыгар керек. Кӧп јылдар гран ары јанында иштеген бир эје мынайып куучындаган: «Алдында мен Агару Бичикле ӱредӱлерди кажы ла кӱн ӧткӱрер болгом, је эмди јаҥы јерде улуска библиялык ӱлгерди кычырып ийерге эмезе кӧрӱлме де кӧргӱзип берерге чек келишпей јат. Је јербойыныҥ јарчылары мени такып барарына эмезе ӱредӱлер ӧткӱрерине кожо алар болгон. Агару Бичикле јакшы ӱредӱлерлӱ, эрчимдӱ иштеп турган мындый јалтанбас ака-эјелердиҥ теми меге јаҥы јерге чын кӧрӱмдӱ болорго болушкан. Анайып, јербойыныҥ улузыла куучын баштаарга ӱренип алгам. Мынаҥ ала ойто сӱӱнчилӱ иштеп баштагам».

15. Слерге јаҥы јуунга јаан туза экелерге не болужар?

¹⁵ Слер јаҥы јуунга јаан туза экелер аргалу. Мен эмдиги ижимди јазап эдип болбой тургам эмезе менеҥ туза ас деп сананбагар. Иегованыҥ болужын кӧрӧргӧ албаданыгар ла јарлаар ишке оноҥ ло ары туружыгар. Баштапкы чакта јаткан чындык христиандардаҥ тем алыгар. Не де болуп калза, олор бир де токтобой «Кудайдыҥ сӧзин јарладылар» (Ап. ижи 8:1, 4). Слердиҥ албаданганаар калас болбос.  Темдектезе, бир ороонноҥ сӱрдӱрип ийген пионерлер јанындагы ороондӧӧн кӧчӧрдӧ, ӱренип алган тили анда керектӱ болуп калган. Тоолу ла айдаҥ бу јерде улам сайын ӧзӱп туратан, јаҥы бӧлӱктер тӧзӧлгӧн.

16. Јаҥы ижигерди сӱӱй берерге слерге не болужар?

¹⁶ Неемия 8:10-до мынайда айдылат: «Иегованыҥ сӱӱнчизи — слердиҥ шибеегер». Агару иштиҥ кандый бир бӱдӱмине кӧстӧлгӧнигерди канайып та тыҥ баалап турган болзогор, сӱӱнчини озо ло баштап ижигердеҥ эмес, је Иеговага иштеп турганаардаҥ алыгар. Оноҥ ло ары Иеговала кожо јӱрӱгер, анайда ок јӧпти, токуналды ла болушты оноҥ алыгар. Ундыбагар: слер бойыгардыҥ алдындагы агару ижигерди улуска акту јӱрегердеҥ болужарга турганаардаҥ улам сӱӱп баштаганаар. Эмдиги јаҥы ижигерди акту јӱрегердеҥ бӱдӱрзегер, оны да кыйалта јогынаҥ сӱӱй береригер. Иегова слерге болужар (Јарл. 7:10).

17. Биске не керегинде ундыбас керек?

¹⁷ Иегованыҥ организациязында кандый бир ишке кӧстӧлгӧнис јӱк удурумга болот, је Иеговага иштегенис дезе, чактыҥ-чакка болор деп, ундыбай турактар. Јаҥы телекейде биске кажыбыска ла јаҥы иштер берилер. Јӧрмӧлдиҥ бажында айдылган Алексей ака, оныҥ јӱрӱминде болуп турган солынталар оны келер ӧйгӧ белетейт деп, алаҥзу јогынаҥ бӱдӱп јат. Ол айдат: «Мен Иегова бар болгонында ла јаҥы телекей болорында, бир де алаҥзыбагам. Је Иегова да, јаҥы телекей де меге тӱҥей ле бир кичинек ыраагында деп билдиретен. Је эмди мен Иегованы чек ле кӧзимниҥ алдында деп кӧрӧдим, анайда ок удабас ла бистиҥ јӱрӱмис райдагы јӱрӱмге солынар деп, бир де алаҥзыбай јадым» (Ап. ижи 2:25). Айдарда, бис кандый да иш бӱдӱрип турган болзоос, оноҥ ло ары Иеговала кожо јӱректер. Ол бисти качан да таштабас ла бис кайда да иштеп турзаас, канча да кире ийде-кӱчтӱ болзоос, сӱӱнчилӱ болорго болужар (Иса. 41:13).