CACEKIWEN LALAKAW 34
Samaan mananam to faelohay a katayalan
O moecelay ko Kawas, cowa ko mamapawan to nano demak namo ato paihkalan namo a olah pakayni i ngangan Ningra.—HIPRAY 6:10.
RADIW 60 Paˈicelen Ningra Ho Tanoktok Kiso
KALIMLAAN NO LALAKAW *
1-3. Hano o roma mieminay to toki misakafah a salikaka, miliyas to katayalan no niyah alatek?
CI LOPOTE aci Mariya sanay: “Maedeng 21 miheca, lipahakay kami malo milakowitay to riyar a mitosilay. Kawra ikor misaaliay to dadimokosen ko wama wina niyam. O ˈinorong ko midimokosay to wama wina, kawra miliyas to kaolahan a katayalan, mararomay kami.”
2 Ci Wilim aci Teri sanay: “Tiya mafanaˈ to tatiihay ko tireng no niyah cato ka ngaˈay patikol i katayalan isalakat i, tomangicay kami. Cowato ka ngaˈay padadotoc palaˈosi to mitokelan, i roma kitakit matayal saki Yihofaan.”
3 Ci Alikes sanay: “Mafanaˈay kami sapiˈedefaw ko misafelitay to katayalan no Fenpo, kawra tiya soˈlin mifekad ko demak i, mapacieci kami miliyas to Pitil i, kamayan a mafahkaˈ kami.”
4. Oniya lalakaw wa milengo to maanan salicay?
4 Cowa ko fafekangay aca salikaka, ˈalomanay matayalay i Pitil, anca mieminay to toki misakafah a salikaka, manilnilay tayra i faelohay katayalan. * Pakayra cangranan, miliyas to kaolahan a katayalan cowa ko madoloay. Samaan cangra mananam to faelohay kitiraan hani? Wa samaan kiso padama cangranan hani? Milengo toniya salicay iraay ko sadama to ˈalomanay, samanen o mamafalic ko kaˈorip no mita alatek.
SAMAAN MANANAM TO FAELOHAY A KITIRAAN
O mieminay to toki misakafah a salikaka ano mafalic ko katayalan i, hano cowa ko madoloay? (Nengnengen ko saka 5 fatac) *
5. Ano mafalic ko katayalan ira ko masamaanay a pifiyor kitaanan hani?
5 Ano itinito i kilac anca i Pitil a matayal, mamaolah to itiraay a tamdaw, anca ora pala. Ano mapacieci kita a miliyas, maedeng masomaday. Maˈilolay kita to itiraay a salikaka, patado cangranan a calemcem, mangalef ko pakayniay sapalak ko sapiliyas i, tada mahaenay. (Matay 10:23; 2 Korinto 11:28, 29) Roma i, mifalic to faelohay katayalan anca minokay i nalacolan, iraay ko cowa ko kananaman a demak. Ci Lopote aci Mariya sanay: “Maedeng matawalto kami to kaˈorip no nalacolan, cowa to kananam to sowal nangra, hato romato a kitakit tamdaw kami.” O roma salikaka mafalic ko katayalan i, fahal sanay malifa ko pasangar no sakaˈorip. Misiˈayaw to hatiniay pakayraan, wa cariraw a matoled cangra alatek. Itiya, sasamaan cangra miremo to pasangaray hani?
Ingiden ato tadiˈecen ci Yihofa (Nengnengen ko 6-7 fatac) *
6. Samaan kita a miingid ci Yihofaan?
6 Ka piingid ci Yihofaan. (Yakop 4:8) Papakasoˈlinen ita ci Yihofa ‘o mitengilay to satolon a tatapangan.’ (ˈOlic 65:2) Itini ˈOlic 62:8 pakalalokay kitaanan mifowah to nafalocoˈan i ˈaˈayaw no Kawas. O mamalaˈosi ni Yihofa i, “ikakaay no nilongocan ato niharatengan ita a maamaan a demak.” (Ifiso 3:20) Cowa ko pafeli aca Ningra to misaalian ita, wa tano cowa ko maharatengay ita a pakayraan padama kitaanan, misaysay to pasangaray alatek.
7. (1) Pakayni sapiingidaw ci Yihofaan, wa ngaˈayho midemak to maanan hani? (2) Pakayni Hipray 6:10-12, ano padadotoc to madimadi kita, wa ira ko maanan a epoc hani?
7 Pakayni sapiingidaw ci Yihofaan, wa miˈosi kita to Fangcalay Cudad to romiˈamiˈad hanaca midotim to maˈosiay a lalakaw. O cecay na milakowitay to riyar mitosil a salikaka sanay: “Wa micerid to pakalomaˈay pidoko ato misaday to saˈopo, malecad ko demak to salakatay a katayalan.” Roma i, malacafay to faelohay kasakopang fanekfek a mitosil. Soˈlin cato ka lecad to salakatay a adihay ko midemakan, ano padadotoc a madimadi, cowa ko mamatawal ko Kawas kitaanan.—ˈOsien ko Hipray 6:10-12.
8. Haratengen ko 1 Yohani 2:15-17 a limoˈot, hano papadama kitaanan a madolo ko kaˈorip hani?
8 Ka padadotoc a madolo ko kaˈorip. Pakayni cariraw no hekal, aka pisawac a midoko ci Yihofaan. (Matay 13:22) Wa miroero kitaanan ko cowa pidoko to Kawas anca ngaˈayay ko harateng a salawina, miowing kitanan micangacang to sadipot no payci i hekal ni Satan, aka a makayhid. (ˈOsien ko 1 Yohani 2:15-17.) Tadiˈecen ita ci Yihofa, samanen mikiˈokay Cingra mamidimokos kitaanan, patanektek to pakasoˈlinay falocoˈ ita, rihaday ko falocoˈ, awa ko kacangoˈotan.—Hipray 4:16; 13:5, 6.
9. (1) Pakayni Taneng 22:3, 7, hano hamaan cikiyam kita hani? (2) O maanan ko papadama kitaanan inaneng ko pisaˈosi?
9 Hamaan cikiyam. (ˈOsien ko Taneng 22:3, 7.) Adihayay ko mapalakay payci a malinah, madoloay a cikiyam ko tamdaw. Sapilowanaw to saroero patikol to kiyam, hamaan pakiyam miˈaca to cowa ko kalimlaan a dafong. Ano tahacada kita to saroero i, tinakoen mihimaw to adadaay a paro no lomaˈ, pasangaray misaˈosi to hahakowa ko cacaliwen a payci. Ano mahaen ko pakayraan, ‘mitolon a micangacang’ wa ngaˈay padama kitanan inaneng ko misaˈosian, samanen papafeli ci Yihofa to rihaday, midipot to ‘falocoˈ ato ponoˈ’ no mita, padama kitanan ihkal ko piharateng to demak.—Filipi 4:6, 7; 1 Pitiro 5:7.
10. Samaan kita ngaˈ ira ko faelohay a widang hani?
10 Ngaˈay ko kalalaˈed to widang ato paro no lomaˈ. Paladaˈen ko ngaˈayay widang iso to nafalocoˈan ato nalifetan, mangalef ko malecaday tisowanan ko malifaay a tamdaw. O mamisayal tisowanan konini. (Patnakay 4:9, 10) Kalimlaan ko palahadan iso a kalawidang i salakatay katayalan, kawra misaaliay kiso no hatini to faelohay a widang. Haratengen, sapisawidangaw to tao, isalakat kiso malo widang no tao ngaˈ ngaˈay. Sasamaan ko demak hani? Ngaˈayay paladaˈen iso ko tao to nalifetan no niyah matayal saki Yihofaan, mahapinang no tao to lipahakay kiso. I lalomaˈ no kopang cowa ka cipinang ko roma tamdaw to hano fanekfek kiso mirienang to misakafahay, kawra iraay ko masemeray to ngaˈayay taˈarawan iso a salikaka, malo ngaˈayay a widang no miso. Kawra hamaan pahiyo to malaˈosiay no niyah a demak, hamaan sasowal saan to malonayay a harateng.
11. Ano mafalic to katayalan i, samaan padadotoc to lipahakay a raramod hani?
11 Ano pakayniay tatiih no tireng no ramod ko piliyas iso to katayalan no niyah, aka a miroroh to tihi. Ano o tireng no niyah ko tatiihay, aka a makesem, miharateng to patoleday ko niyah to ramod. Haratengen, o ‘cecayay ko tireng’ namo, na miketonay to sowal i ˈaˈayaw ni Yihofa, ano samaanto ko pakayraan oha mamadadama. (Matay 19:5, 6) Ano fahal sanay a mapoyapoy ko sapiliyas to katayalan, pasifanaˈen ko wawa, pakayni tamowanan, mikikakaay a kalimlaan cingra to katayalan namo. Ceriden pasowal ko wawa, o sapafeli no Kawas a ‘sapatelong’ tamowanan cingra. (ˈOlic 127:3-5) Paladaˈen cingra to kalimlaan a nalifetan namo matayal i salakat. O papakalalok konini cingranan minanam to taˈarawan namo, ngaˈay ko pisaka dademak to kaˈorip matayal saki Yihofaan.
SASAMAAN KO SALIKAKA MIHADAK TO SADAMA
12. (1) Samaan kita padama to misakafahay salikaka materek i katayalan nangra? (2) Samaan kita padama cangranan kaliki mananam to faelohay kitilaan?
12 ˈAlomanay salikaka misaˈicelay padama to misakafahay materek i katayalan, tada kahemekanto konini. Somowalay cangra to sapakalalok a sowal, padama to sakaˈorip a payci, anca pacafay midimokos to paro no lomaˈ no salikaka. (Kalatiya 6:2) Ano manilnilay ko misakafahay tayni i kasakopang namo i, cowa ka ngaˈay ko demak nangra mansa mafalic ko katayalan, anca mararaway, hamaan haenen ko harateng. * Padamaen cangra kaliki a mananam to faelohay kitiraan. Soˈlin caka ngaˈay ko tireng nangra, cowa ka hakowa ko mademakay, hemeken a mihamham cangra, pakahemek to nano tayal nangra i salakat. Tongalen ko kafanaˈ cangranan, minanam cangranan, samanen kadofahay ko sifanaˈ ato nalifetan nangra, micadaayho to sapa hatatanam.
13. Sasamanen ita padama ko mafalicay ko katayalan a salikaka hani?
13 Malinah i faelohay pala koniya salikaka i, misaaliay to sadama iso ngaˈ makilim ko matatodongay a pikilomaˈan, kamawmahan, kakalicen, ato sakaˈorip a dafong. Alatek coka fanaˈ cangra to sasamaan misaysay to kalo a demak i kaˈorip, tinakoen palali anca miˈaca to pawsiyen. Kawra sakakaay a saali nangra, o noka cipinang iso to nafalocoˈan nangra. Alatek iraay ko adada nangra ato salawina nangra, hanaca masomaday to kapatay no paro no lomaˈ alatek. * Pakayni ecato ka ˈaraw ko kangaˈay a widang hato mararomay cangra alatek. O hatiniay a demak, misaaliay to toki ngaˈ mamasayar.
14. Mikitini faelohay kasakopang malifokay no fafahiyan salikaka ko maanan sadama?
14 Ngaˈayay kalacafayen iso ko mafalicay ko katayalan a salikaka mitosil, maˈaraw ko ngaˈayay a taˈarawan iso, ano mihaen wa kaliki cangra mananam i faelohay kitiraan. Cecay fafahiyan salikaka na halafinay matayal i roma kitakit, sanay cingra: “Salakat misikayay kako to pacekiwan to romiˈamiˈad, kawra itini faelohay pala, pasangaray paˈaraw i tamdaw to Fangcalay Cudad anca ika. Miakoˈiday kako to itiniay salikaka mitahidang takowanan mirienang to pilisoˈ ato pipacekiw nangra, maˈaraw ako ko fanekfek ato timolo nangra, ato ka cakatan ko pacekiwan nangra, tawlikay ko harateng ako. Minanamayto kako sasamaan i faelohay kilac masasowal to tamdaw. Oniya demak padamaay takowanan miliyaw a lipahak.”
KA PADADOTOC A MISAˈICEL
Minokay i nalacolan misaˈicel tano masasiromaay pakayraan mitosil (Nengnengen ko 15-16 fatac) *
15. Samaan kiso ngaˈay ko katayal saki Kawas i faelohay katayalan hani?
15 Itini faelohay katayalan o ngangaˈay ko katayal iso saki Kawas. Hamaan pakayni kafalic no katayalan, miharateng to cowa ka ngaˈay ko midemakan no niyah, ecato ka mahaen o salakatay a ciepoc. Hapinangen to samanay ci Yihofa midimokos tisowanan nohatini, ka padadotoc a mitosil. Saka 1 hahekalan a Krisciyang ano talacowato, ‘milasilay to ngaˈayay lihaf no fangcalay kimad,’ ngaˈayay todongen iso ko madimadiay a taˈarawan nangra. (Dmak 8:1, 4) Misaˈicel kiso mitosil wa ira ko ngaˈayay minaroˈan. Tinakoen, malaplapay ko roma misakafahay i cecay kitakit, tayra i ngataay malecaday ko sowal a kilac, taˈangayay ko saali itira. Ikor no pina folad, adihayay ko mapatirengay a kasakapot, hanaca kalikiay macakat ko ˈaloman no tamdaw.
16. Sasamaan kiso milifok to lipahak i faelohay katayalan?
16 Itini Nihimiya 8:10 sanay: “O pipalipahak no Tapang tamowanan ko sakaciˈicel namo.” Ano samaanto ko kaolah iso to katayalan no niyah, o sakalipahak ita mikitiniay i kalalaˈed ita ci Yihofaan. Mihaenay o aingiden ita ci Yihofa, micangacang Cingranan to taneng, sakayat ato sapadama. O sakaolah iso to salakatay a katayalan, samanen fanekfekay kiso a padama to itiraay a tamdaw. Mihaenay ano misarocod kiso to tayal nohatini, o papadamaen ni Yihofa kiso a maolah toniya katayalan.—Patnakay 7:10.
17. Pakayni i nohatiniay a kataylan, haharatengen ita ko maanan hani?
17 Haratengen, o tatahadaˈoc kita matayal saki Yihofaan, kawra o katayalan anini o cecayay liyad. Itini faelohay hekal, wa mafalic ko katayalan ita alatek. Masowalay i satapangan ci Alikes pakasoˈlinay, o malifetay ningra nohatini o papadama cingranan misaday to kafalic no ikor. Sanay: “I salakat, pakayni takowanan o soˈlinay ci Yihofa ato faelohay hekal, kawra hato mara:ayayho. Nohatini, hato maˈarawayto ako ci Yihofa i ˈaˈayaw no mata ako, dotoc a ciyataw ako o faelohayto a hekal.” (Dmak 2:25) Ano icowato kita a matayal saki Yihofaan, ka padadotoc a miingid Cingranan, cowa ko mamifalah cingra kitaanan. Misarocod kita a dademak, o papadamaen Ningra kita itini faelohay katayalan matama ko lipahak.—Isaya 41:13.
RADIW 121 Maloka Pakalalolalok
^ 5段 Latekay, o mieminay to toki misakafah a salikaka miliyas to katayalan no niyah, anca manilnil tayra i faelohay katayalan. Oniya lalakaw wa milengo to masiˈayaway nangra a pasangaray, ato sasamaan cangra kaliki mananam to faelohay kitiraan. Wa milengoho ko lalakaw, sasamaan ko roma tamdaw pakalalok ato padama to hatiniay a salikaka, ato iraay ko maanan a safalod no Fangcalay Cudad ngangaˈay padama kitaanan, o kahacecay tamdaw miremo to kafalic.
^ 4段 Ano maraod ko mihecaan no ˈalomanay ciˈinorongay a salikaka, wa paikenen ko tayal i kaemangay salikaka. Nengnengen ko Mikecolay Saka 9 Folad 2018, “Matoˈasay a Krisciyang—Kalimlaan ni Yihofa ko Madimadi Iso,” ato Mikecolay Saka 10 Folad 2018, “Tahalifa to Kafalic, Kamayan Mitafo to Rihaday.”
^ 12段 Malinah ko salakatay i faelohay kasakopang i, o kakaliki mitilid to sapisiwkay a tikami ko malohemay malitengay, mihaen cato ka keton ko tayal nangra misakafah, malohemay malitengay anca dama sikawdan.
^ 13段 Nengnengen ko Katalipaˈelal! Saka 3 Liyad 2018, “Samaan Kita Misiˈayaw to Kapatay no Salawina?”
^ 57段 TATODONG NO COKA: Cowato ka ngaˈay malo milakowitay to riyar a mitosil ko cecay mararamoday, tangoˈolay cangra miliyas to itiraay a salikaka.
^ 59段 TATODONG NO COKA: Minokayto i nalacolan, mitolon koniya mararamoday, micangacang ci Yihofaan padama cangranan miremo to masakenaay pasangaray.
^ 61段 TATODONG NO COKA: Itini sapadama ni Yihofa, miliyaway koniya mararamoday miemin to toki misakafah, misaka dademakan nangra ko mananamay a sowal milakowit to riyar pasayra i malinahay a pacarcar a tamdaw mitosil.
