1-3. Aha do na mambahen angka donganta na dohot tu dinas sepenuh waktu gabe manadingkon penugasan ni nasida?

DONGANTA na marsaripe, i ma si Robert dohot si Mary Jo mandok, “Las hian do rohanami gabe misionaris. Alai dung 21 taon hami melayani, nunga lam matua jala lam suda gogo natua-tuanami nadua. Las do rohanami mangurus nasida. Alai lungun do rohanami ala ingkon manadingkon inganan penugasan naung dihaholongi hami.”

² Donganta na asing, i ma si William dohot si Terrie mandok, “Dung diboto hami ndang boi be hami mulak tu penugasannami ala marsahit, gabe tangis ma hami. Hape lomo hian do rohanami marbarita di negara na asing. Alai saonari ingkon ditadingkon hami do i.”

³ Donganta si Aleksey mandok, “Nunga diboto hami na laho ditutup angka halak na so marlomo ni roha do kantor cabang di negaranami. Alai tingki masa i, tarsonggot jala lungun do rohanami ala ingkon laho sian Betel.”

4. Sungkun-sungkun aha do na laho taulas di parsiajaran on?

⁴ Asing ni angka pengalaman naung dipaboa nangkin, godang do angka donganta na asing na dohot tu dinas sepenuh waktu manang na karejo di Betel na ingkon manadingkon penugasan ni nasida. * Tontu ndang mura di nasida laho manadingkon penugasan na dihalomohon roha ni nasida. Aha ma na boi mangurupi nasida mangadopi situasi na muba i? Songon dia hamu boi mangurupi nasida? Angka alus ni sungkun-sungkun  on boi mangurupi hita sude mangadopi situasi na muba di parngoluon.

5. Aha do pengaruhna tu hita tingki muba penugasanta?

⁵ Manang aha pe tugasta, di Betel manang di lapangan, tontu tahaholongi do angka dongan dohot inganan penugasanta. Alai tingki muba situasi di ngolunta, tontu lungun do rohanta molo ingkon manadingkon penugasan i. Olo do gabe masihol hita tu angka dongan na tatadingkon, manang gabe mamingkirhon nasida tarlumobi ala adong penganiayaan di inganan i. (Mat. 10:23; 2 Kor. 11:28, 29) Maol do mangihuthon hasomalan di inganan na baru, nang pe i di negaranta sandiri. Si Robert dohot si Mary Jo mandok, “Gabe asing do dihilala hami hasomalan dohot cara marbarita mamangke bahasanami sandiri. Gabe songon penduduk asing do hami di negaranami sandiri.” Ra, adong piga-piga donganta gabe suda godang hepengna tingki mandapot tugas na baru. Boi do i mambahen nasida gabe marsak jala marmetmet ni roha. Aha do na boi mangurupi nasida?

6. Songon dia carana asa tongtong togu parale-aleonta tu Jahowa?

⁶ Tongtong ma togu parale-aleonta tu Jahowa. (Jak. 4:8) Songon dia carana? Pos ma rohanta tu Debata, i ma “sitangihon tangiang.” (Ps. 65:3) Psalmen 62:9 mandok, “Usehon hamu ma rohamuna tu jolona.” Boi do bahenon ni Jahowa “gumodang sian na tapangido dohot na tapingkiri.” (Eps. 3:20) Ndang holan na tapangido di tangiangta na dilehon Jahowa tu hita. Alai boi do Ibana mangurupi hita pasaehon parsoalan na taadopi marhite cara na so hea tapingkirhon hian.

7. (a) Asa tongtong togu parale-aleonta tu Jahowa, aha do na ingkon taulahon? (b) Hombar tu Heber 6:10-12, aha do hasilna molo tongtong hita setia marhobas tu Jahowa?

⁷ Asa tongtong togu parale-aleonta tu Jahowa, jaha ma Bibel ganup ari jala rimangi ma na tajaha i. Sahalak donganta na hea gabe misionaris mandok, “Tongtong ma bahen ibadat keluarga dohot persiapan tu parpunguan songon na diulahon hamu di penugasan najolo.” Jala ringgas ma marbarita di huriamuna na baru. Sai diingot Jahowa do naposona na tongtong setia marhobas tu Ibana, nang pe ndang sarupa be songon najolo.​—Jaha Heber 6:10-12.

8. Songon dia hata di 1 Johannes 2:15-17 mangurupi hamu asa manjumolohon na rumingkot?

 ⁸ Jumolohon ma angka na rumingkot. Unang ma paloas holso ni roha mambahen hamu gabe ndang manomba Jahowa. (Mat. 13:22) Ra, adong do dongan, keluarga, manang halak na so manomba Jahowa na naeng mangurupi hamu. Didok nasida, ingkon dipapungu hamu do godang hepeng asa lam denggan ngolumuna. Alai unang ma tangihon nasida. (Jaha 1 Johannes 2:15-17.) Pos ma rohanta tu Jahowa na marjanji mangalehon na tahaporluhon di tingki na pas. Diurupi Ibana do hita asa tongtong togu haporseaonta jala ndang mabiar. Lehononna do angka na tahaporluhon ganup ari.​—Heb. 4:16; 13:5, 6.

9. Hombar tu Poda 22:3, 7, boasa unang marutang hita molo ndang porlu, jala aha do na boi mangurupi hita mambahen keputusan na denggan?

⁹ Unang ma marutang molo ndang porlu. (Jaha Poda 22:3, 7.) Olo do ra suda godang hepengta ala pinda tu inganan na baru. On boi mambahen hita gabe marutang. Alani i, manat ma asa unang sampe marutang hamu laho manuhor angka barang na so porlu. Ra maol do tahilala manontuhon sadia godang hepeng na tapinjam tingki masa situasi na maol, songon mangurus keluarga na marsahit. Molo masa i, ingot ma “tangiang dohot elek-elek” boi mangurupi hamu mambahen keputusan na denggan. Dialusi Jahowa do tangiangmuna marhite mangalehon hadameon na boi “manjaga roha dohot pingkiranmuna” asa boi dibahen hamu keputusan na denggan.​—Plp. 4:6, 7; 1 Ptr. 5:7.

10. Songon dia carana asa boi hamu mandapot dongan na baru?

¹⁰ Tongtong ma marale-ale dohot dongan na burju. Paboa ma pangkilalaan dohot pengalamanmuna tu angka dongan, tarlumobi tu na hea mangadopi situasi na sarupa. Molo diulahon hamu i, boi ma dame pangkilalaanmuna. (Pjm. 4:9, 10) Tongtong ma marale-ale dohot angka donganmuna di huria najolo. Jala, lului ma dongan di huriamuna na baru. Ingot ma, ingkon burju do hita asa boi mandapot dongan. Songon dia carana asa boi hamu mandapot dongan na baru? Paboa ma angka pengalamanmuna na denggan saleleng marhobas tu Jahowa asa boi diida nasida las ni rohamuna. Ra, ndang sude dongan di huria mangantusi las ni rohamuna marhobas tu Jahowa. Alai sai adong do angka dongan na olo mambege pengalamanmuna i jala gabe dongan na burju. Alai unang ma pagodanghu paboa taringot dirimuna dohot angka naung diulahon hamu. Jala unang ma dipaboa hamu angka pengalaman na boi mambahen na asing marmetmet ni roha.

11. Songon dia do carana asa tongtong marlas ni roha parsaripeonmuna?

¹¹ Molo ditadingkon hamu penugasanmuna  ala marsahit dongan saripemuna, unang ma salahon ibana. Jala molo hamu do na marsahit, unang ma sai salahon hamu dirimuna jala unang ma didok rohamu nunga dibahen hamu kecewa dongan saripemuna. Ingot ma, sada daging do hamu jala nunga marjanji hamu tu Jahowa laho masihaholongan manang aha pe na masa. (Mat. 19:5, 6) Asing ni i, molo ditadingkon hamu penugasan ala marianakkon hape ndang direncanahon, patudu ma tu ianakhonmuna na rumingkot do ibana sian penugasanmuna najolo. Jotjot ma paboa tu ianakhonmuna molo ibana “silehon-lehon” sian Debata. (Ps. 127:3-5) Jala, paboa ma angka pengalaman na denggan sian penugasanmuna najolo. Molo diulahon hamu i, boi do gabe taronjar rohana dohot tu dinas sepenuh waktu songon hamu.

12. (a) Songon dia do hita boi mangurupi donganta asa tongtong dohot tu dinas sepenuh waktu? (b) Songon dia hita boi mangurupi nasida asa marlas ni roha di inganan na baru?

¹² Tapujihon do godang huria dohot angka dongan na mangurupi donganta na asing asa tongtong dohot tu dinas sepenuh waktu. Dijujui nasida do asa tongtong donganta i di penugasanna, marhite mangalehon na dihaporluhon manang mangurus keluarga ni nasida. (Gal. 6:2) Molo adong donganta na mandapot tugas na baru tu huriamuna, unang ma didok rohamu na adong hasalaan na dibahen nasida. * Alai urupi ma nasida asa boi marlas ni roha di inganan na baru. Jangkon ma nasida. Ra, ala marsahit ndang godang be na boi diulahon nasida. Nang pe songon i, tongtong ma puji angka naung diulahon nasida. Marale-ale ma dohot nasida. Marsiajar ma  sian parbinotoan, pelatihan, dohot pengalaman ni nasida.

13. Songon dia hita boi paradehon na porlu tu angka dongan na mandapot tugas na baru?

¹³ Ra, angka dongan na mandapot tugas na baru porlu do diurupi mangalului jabu, kendaraan, parkarejoan dohot na asing. Ra porlu do diboto nasida inganan laho manuhor sipanganon manang barang na mura. Alai na rumingkot, porlu do taantusi situasi ni nasida. Olo do ra marsahit nasida manang keluargana. Manang, lungun rohana ala marujung ngolu sisolhotna. * Nang pe ndang dipaboa nasida, ra masihol do nasida tu angka dongan di huria nasida najolo. Alani i, porlu do tingki asa boi muse nasida marlas ni las roha.

14. Songon dia angka dongan di huria mangurupi sahalak donganta borua na mandapot tugas na baru?

¹⁴ Molo rap hamu marbarita jala gabe sitiruon na denggan, boi do hamu mangurupi nasida marlas ni roha. Sahalak donganta borua naung martaon-taon marhobas di negara na asing mandok, “Di penugasanku najolo, ganup ari do ahu manguluhon parsiajaran Bibel. Alai di inganan na baru on, manjahahon ayat sian Bibel manang patuduhon video pe maol do tingki marbarita. Alai, ditogihon angka dongan di huria do ahu tu kunjungan kembali dohot tu parsiajar Bibel ni nasida. Ala huida ringgas jala marsitutu nasida manguluhon parsiajaran Bibel, gabe denggan do pingkiranku taringot angka halak di inganan na baru on. Huparsiajari ma carana mamungka pangkataion. Sude on mambahen ahu marlas ni roha muse.”

15. Songon dia do asa boi hamu marhasil tingki mandapot tugas na baru?

¹⁵ Boi do hamu marhasil tingki mandapot tugas na baru. Alani i, tongtong ma ingot songon dia Jahowa mangurupi hamu di ngolumuna jala tongtong ma marbarita. Unang ma didok rohamu ala adong do na sala na diulahon  hamu umbahen na mandapot tugas na baru hamu, manang unang ma didok rohamu ndang mararga be dirimuna. Tiru ma halak Kristen di abad na parjolo. Didia pe nasida, dibaritahon nasida do “barita na uli taringot tu hata ni Debata.” (Ul. 8:1, 4) Molo ringgas hamu marbarita, hilalaonmuna ma hasil na denggan. Contohna, adong angka perintis na diusir sian sada negara jala pinda tu pulo na mangkaporluhon parbarita di bahasa ni nasida. Piga-piga bulan dungkon i, gabe adong ma kelompok di bahasa ni nasida.

16. Songon dia hamu boi marlas ni roha tingki mandapot tugas na baru?

¹⁶ “Las ni roha mida Jahowa, i do haroroan ni gogo tu hamu.” (Neh. 8:10) Marale-ale tu Jahowa do silas ni roha na umbalga di hita, ndang tugas na dilehon tu hita, nang pe mansai lomo rohanta tu tugas i. Alani i, tongtong ma jonok tu Jahowa, pangido ma bisuk dohot tudu-tudu asa tongtong marlas ni roha. Tontu las do rohamu di penugasanmuna najolo ala marsitutu hamu mangurupi angka halak disi. Suang songon i ma, tongtong ma marsitutu hamu mangulahon tugasmuna na baru. Urupan ni Jahowa do hamu asa marlas ni roha mangulahon i.​—Pjm. 7:10.

17. Aha do na ingkon taingot taringot tugasta saonari?

¹⁷ Ingot ma, salelengna do hita marhobas tu Jahowa. Alai ra, tugas na taulahon saonari ndang taulahon be di tano na imbaru. Si Aleksey na dipaboa di mula ni parsiajaran on paboahon molo tugasna na baru mangalatik ibana tu ari na naeng ro. Didok ibana, “Porsea do ahu tu Jahowa dohot tu tano na imbaru na dijanjihon. Alai songon na leleng dope i huhilala. Saonari, mansai solhot do ahu tu Jahowa jala huhilala nunga jonok be tano na imbaru i.” (Ul. 2:25) Manang aha pe tugasta saonari, tongtong ma jonok hita tu Jahowa. Ndang tadingkononna hita, jala urupanna do hita asa tongtong marlas ni roha, aha pe manang didia pe tugasta.​—Jes. 41:13.