1-3. Ano an pirang dahilan kun taano ta tibaad kaipuhanon kan mga naglilingkod nin bilog na panahon na magbago nin asignasyon?

“PAGKATAPOS nin 21 taon nin maugmang paglilingkod mi sa samong asignasyon bilang misyonero, nagkahilang an gabos ming magurang,” an sabi ni Robert asin Mary Jo. “Maugma kami na atamanon sinda. Pero, nakakamundo na bayaan an lugar na namutan mi nang marhay.”

² “Kan maaraman mi na dai na kami makakabalik sa samong asignasyon huli sa samong salud, nagparahibi kami,” an sabi ni William asin Terrie. “Tapos na an pangarap ming maglingkod ki Jehova sa ibang nasyon.”

³ “Aram ming gusto kan mga nagpepersegir sa samo na ipasara an sangang opisina kun sain kami naglilingkod,” an sabi ni Aleksey. “Pero nabigla pa man giraray kami kan nangyari iyan asin kinaipuhan ming maghali sa Bethel.”

4. Anong mga hapot an pag-uulayan niyato sa artikulong ini?

⁴ Siring man, dakul na naglilingkod nin bilog na panahon, kaiba na an mga naglilingkod sa Bethel, an tinawan nin bagong mga asignasyon. * Tibaad madipisilan an maimbod na mga tugang na ini na bayaan an minamahal nindang asignasyon. Ano an makakatabang sa sainda na maatubang an pagbabago? Paano mo sinda matatabangan? An simbag sa mga hapot na iyan makakatabang sa sato gabos na maatubang an mga pagbabago sa kamugtakan kan satong buhay.

5. Ano an puwedeng magin mga epekto sa sato pag nagbago an satong asignasyon?

⁵ Kita man naglilingkod sa langtad o sa Bethel, posibleng mapamahal na marhay sa sato an mga tawo asin maski na ngani an lugar kun sain kita naglilingkod. Kun kinaipuhan niyatong bayaan iyan huli sa ano man na dahilan, namumundo kitang marhay. Nami-miss niyatong marhay an mga nabayaan ta, asin naghahadit kita dapit sainda, lalo na kun kinaipuhan tang maghali huli sa persekusyon. (Mat. 10:23; 2 Cor. 11:28, 29) Dugang pa, an pagkaigwa nin bagong asignasyon—o dawa ngani an pagbalik sa sadiring lugar—sa parati nangangahulugan na kaipuhan niyatong mag-adjust sa kultura. “Dai na kami tuod sa sadiri ming kultura asin maski ngani sa paghuhulit sa samong kinagimatan na lengguwahe,” an sabi ni Robert asin Mary Jo. “Pagmati mi bako na kaming taga digdi samo.” An iba na nagkaigwa nin bagong asignasyon tibaad biglang mapaatubang sa dai inaasahan na mga problema sa pinansiyal. Tibaad makamati sinda nin kadaihan nin kasiguruhan, kahaditan, asin pagkadisganar. Ano an makakatabang?

6. Paano kita makakapagdanay na harani ki Jehova?

⁶ Magdanay na harani ki Jehova. (Sant. 4:8) Paano niyato magigibo iyan? Paagi sa pagtitiwala niyato sa saiya bilang an “Paradangog nin pamibi.” (Sal. 65:2, NW) “Sabihon nindo sa saiya an laog kan saindong puso,” an sabi kan Salmo 62:8. (NW) Kayang gibuhon ni Jehova “an lampas pang marhay kisa sa gabos na bagay na puwede tang hagadon o isipon.” (Efe. 3:20) Bako lang an espesipikong ipinapamibi ta an puwede niyang itao sa sato. Puwede niyang gibuhon an dai niyato inaasahan, lampas pa sa puwede niyatong maisip, tanganing solusyunan an satong mga problema.

7. (a) Ano an makakatabang sa sato na magdanay na harani ki Jehova? (b) Sigun sa Hebreo 6:10-12, ano an magigin resulta kan satong padagos na maimbod na paglilingkod ki Jehova?

⁷ Tanganing magdanay na harani ki Jehova, basahon an Kasuratan aroaldaw asin hurop-hurupon iyan. Sinabi nin sarong dating misyonero: “Papagdanayon an regular na iskedyul nin pampamilyang pagsamba asin pag-andam para sa pagtiripon, arog kan ginigibo mo sa dati mong asignasyon.” Padagos man na makikabtang nin lubos sa paghuhulit kan maugmang bareta sa saimong bagong kongregasyon. Ginigirumdom ni Jehova an mga padagos na maimbod na naglilingkod sa saiya, dawa dai na ninda kayang gibuhon an gabos na nagigibo ninda kaidto.—Basahon an Hebreo 6:10-12.

8. Paano makakatabang sa saimo an mga tataramon sa 1 Juan 2:15-17 na mapagdanay na simple an saimong buhay?

 ⁸ Pagdanayon na simple an saimong buhay. Dai tugutan na ‘mapuot’ kan mga kahaditan kan kinaban ni Satanas an saimong espirituwal na mga aktibidad. (Mat. 13:22) Dai magpadara sa panggigipit kan kinaban o kan mga amigo o mga kapamilya—dawa marahay man an saindang intensiyon—na maghinguwang umasenso sa sistemang ini ni Satanas. (Basahon an 1 Juan 2:15-17.) Magtiwala ki Jehova, huling nanunuga siya na itatao niya an gabos niyatong pangangaipo sa espirituwal, emosyonal, asin materyal “sa mga panahon na kaipuhan ta an tabang.”—Heb. 4:16; 13:5, 6.

9. Sigun sa Talinhaga 22:3, 7, taano ta mahalagang likayan an dai kinakaipuhan na utang, asin ano an makakatabang sa sato na makagibo nin madunong na mga desisyon?

⁹ Likayan an dai kinakaipuhan na utang. (Basahon an Talinhaga 22:3, 7.) Puwedeng magin magastos na marhay an pagbalyo, asin pasil sanang magkautang. Tanganing mabawasan an utang, dai mangutang para lang mabakal an mga bagay na dai mo man talaga kaipuhan. Pag nasa nakaka-stress kitang sitwasyon, arog baga pag nag-aasikaso sa may hilang na mahal sa buhay, tibaad madipisilan kitang magdesisyon kun gurano kadakul an kaipuhan niyatong utangon. Sa siring na mga sitwasyon, girumdumon na an “pamibi asin pagngayo-ngayo” makakatabang sa saimo na makagibo nin madunong na mga desisyon. Bilang simbag sa saimong mga pamibi, kayang itao sa saimo ni Jehova an katuninungan na “magbabantay sa [saimong] puso asin kaisipan,” na makakatabang sa saimo na kalmadong pag-isipan an mga bagay-bagay.—Fil. 4:6, 7; 1 Ped. 5:7.

10. Paano kita magkakaigwa nin bagong mga amigo?

¹⁰ Magdanay na dayupot sa mga tawong marahay an impluwensiya sa saimo. Sabihon sa dayupot mong mga amigo an saimong mga sabuot asin inaagihan, lalo na sa mga nakaeksperyensiya na man kaiyan. Makakatabang iyan na magrahay an pagmati mo. (Par. 4:9, 10) An mga nagin amigo mo sa dati mong asignasyon, mga amigo mo pa man giraray. Ngunyan na nasa bago kang asignasyon, kaipuhan mong magkaigwa nin bagong mga amigo. Tandaan na tanganing magkaigwa ka nin amigo, kaipuhan na magin mainamigo ka man. Paano ka magkakaigwa nin bagong mga amigo? Iistorya sa iba an magagayon mong eksperyensiya sa paglilingkod ki Jehova tanganing mamatian ninda na maugma ka sa paglilingkod ki Jehova. Dawa kun dai nasasabutan kan iba mong kakongregasyon kun taano ta gustong-gusto mo an bilog na panahon na paglilingkod, tibaad maparani sa saimo an iba huli sa saimong halimbawa dangan magin marahay mong mga amigo. Alagad likayan an sobrang pagparaistorya kan dapit sa mga nagibo mo, asin kan dapit sa negatibong mga sabuot na tibaad namamatian mo.

11. Paano nindo mapapagdanay na maugma an saindong relasyon bilang mag-agom?

 ¹¹ Kun kinaipuhan mong bayaan an asignasyon mo huling nagkahilang an agom mo, dai siya pagbasulon. O kun ika an nagkahilang, dai makonsiyensiya, na iniisip na napamundo mo an saimong agom. Tandaan na kamo “sarong laman,” asin nanuga kamo ki Jehova na aatamanon nindo an lambang saro ano man an mangyari. (Mat. 19:5, 6) Kun kinaipuhan nindong bayaan an saindong asignasyon huli sa dai plinanong pagbados, siguraduhon na ipamati sa aki nindo na mas mahalaga siya sa saindo kisa sa asignasyon nindo kaidto. Asiguraron an saindong aki na para sa saindo, “regalo” siya hali sa Diyos. (Sal. 127:3-5, NW) Iistorya man sa saiya an magagayon nindong eksperyensiya sa saindong asignasyon kaidto. Puwede iyan na makapahiro sa saindong aki na gamiton man an saiyang buhay sa maugmang paglilingkod ki Jehova arog kan ginibo nindo.

12. (a) Paano niyato matatabangan an mga nasa bilog na panahon na paglilingkod na makapagpadagos sa saindang asignasyon? (b) Paano kita makakatabang na mas mapadali an pag-adjust ninda sa bagong asignasyon?

¹² Nakakaugma huling dakul na kongregasyon asin mga indibidwal an ginigibo an makakaya ninda para tabangan an mga nasa bilog na panahon na paglilingkod na magdanay sa asignasyon ninda. Ginigibo ninda ini paagi sa pagpakusog sa sainda na magpadagos sa saindang gibuhon, pagsuportar sa pinansiyal o sa iba pang materyal na bagay, o paagi sa pag-asikaso sa nabayaan nindang mga kapamilya. (Gal. 6:2) Kun may mga naglilingkod nin bilog na panahon na tinawan nin bagong asignasyon asin sa kongregasyon nindo inasignar, dai pag-isipon na indikasyon iyan na bako sindang epektibo sa saindang trabaho o na may nagibo sindang sala. * Imbes, tabangan  sindang mas mapadali an pag-adjust ninda. Mabuot sindang akuon asin komendaran sinda sa paglilingkod ninda, dawa kun limitado na ngunyan an kaya nindang gibuhon huli sa maluyang salud. Midbidon sinda. Makanuod sa dakul nindang kaaraman, inakong mga pagsasanay, asin eksperyensiya.

13. Ano an maitatabang niyato sa mga natawan nin bagong asignasyon?

¹³ Sa primero, tibaad kaipuhanon kan mga tinawan nin bagong asignasyon an tabang mo tanganing makahanap nin harong, masasakayan, trabaho, asin iba pang mga pangangaipo. Tibaad kaipuhan man ninda nin impormasyon dapit sa pang-aroaldaw na mga bagay, arog kan pagbayad nin buhis asin pag-asikaso nin insurance. An pinakaimportante, kaipuhan ninda bako na kahirakan mo sinda, kundi sabuton sinda. Tibaad nasasakitan sindang atubangon an problema sa salud ninda o kan saindang kapamilya. Tibaad nagmumundo sinda sa pagkagadan nin mahal sa buhay. * Asin dawa dai ninda ipinapahiling, tibaad mamundo sinda huling napupungaw sinda sa mga amigo ninda sa dating asignasyon. Kaipuhan nin panahon tanganing mapangganahan an mga emosyon na iyan na sa parati nakakaribaraw.

14. Paano tinabangan kan lokal na mga parahayag an sarong sister na maka-adjust sa bago niyang asignasyon?

¹⁴ Miyentras tanto, an suporta saka halimbawa mo makakatabang sa sainda na maka-adjust. “Sa dati kong asignasyon, aroaldaw akong may Bible study,” an sabi nin sarong sister na dakul na taon na naglingkod sa ibang nasyon. “Sa bago kong asignasyon, dipisil dawa an makabasa nin teksto o makapahiling nin video sa ministeryo. Pero an mga parahayag sa bago kong kongregasyon inagda ako na ibanan sinda sa saindang pagdalaw liwat saka mga study. An mahiling na nagkokondukta nin progresibong mga pag-adal sa Bibliya an maigot asin makusog an buot na mga tugang nakatabang sako na magin mas positibo an pananaw sa ministeryo. Nakanuod ako kun paano makakapuon nin pag-uulay sa bagong teritoryo. Gabos ini nakatabang sa sako na magin maugma giraray.”

15. Paano ka magigin mapanggana sa bago mong asignasyon?

¹⁵ Makakaya mong magin mapanggana sa saimong bagong asignasyon. Dai pag-isipon na  dai mo nagibo nin tama an dati mong asignasyon o na nabawasan an halaga mo. Isipon an dakul na paagi na tinatabangan ka ni Jehova ngunyan, asin padagos na maghulit. Arugon an maimbod na mga Kristiyano kan inot na siglo. “Idtong mga nagkasuruway-suway nagpasiring sa manlain-lain na lugar, na nagpapahayag kan maugmang bareta.” (Gibo 8:1, 4) An saimong mga paghihinguwa na padagos na maghulit puwedeng magbunga nin marahay na mga resulta. Halimbawa, an mga payunir na pinahali sa sarong nasyon nagbalyo sa kaharaning nasyon na igwa man nin dakulang pangangaipo sa saindang lengguwahe. Sa laog sana nin pirang bulan, nagkaigwa nin bagong mga grupo na marikas an pag-uswag.

16. Paano ka magigin maugma sa bago mong asignasyon?

¹⁶ ‘An kaugmahan ni Jehova iyo an saimong kakusugan.’ (Neh. 8:10) An satong kaugmahan dapat na nakadepende panginot na ki Jehova asin bako sa satong asignasyon, dawa pa napamahal na iyan sa sato. Kaya padagos na maglakaw kaiba ni Jehova, na nag-aasa sa saiya para sa kadunungan, paggiya, asin suporta. Girumdumon na namutan mo an dati mong asignasyon huling ginibo mo an saimong pinakamakakaya tanganing tabangan an mga tawo duman. Kaya gibuhon mo man an bilog mong makakaya sa bago mong asignasyon dangan hilingon kun paano ka tatabangan ni Jehova na mamutan man iyan.—Par. 7:10.

17. Ano an dapat niyatong tandaan dapit sa satong asignasyon ngunyan?

¹⁷ Dapat niyatong tandaan na an paglilingkod ta ki Jehova daing sagkod, alagad an satong asignasyon ngunyan temporaryo sana. Sa bagong kinaban, gabos kita tibaad magkaigwa nin bagong asignasyon. Si Aleksey, na nasambitan sa kapinunan, nagtutubod na an mga pagbabago na naeeksperyensiyahan niya ngunyan inaandam siya para sa mga pagbabago sa maabot na panahon. “Aram ko man na totoo si Jehova asin an bagong kinaban,” an sabi ni Aleksey. “Pero ngunyan, nahihiling ko mismo si Jehova sa atubangan ko saka namamatian kong haranihon na an bagong kinaban.” (Gibo 2:25) Ano man an satong asignasyon, lugod na padagos kitang maglakaw kaiba ni Jehova. Dai niya nanggad kita babayaan, imbes tatabangan niya kitang magin maugma sa paggibo kan ano man na makakaya ta sa paglilingkod sa saiya—sain man iyan.—Isa. 41:13.