ICIPANDE CA KUSAMBILILAMO 34
Ifyo Twingaba ne Nsansa nga Twakwata Umulimo Umbi
“Lesa taba uushalungama, takalabe umulimo wenu no kutemwa uko mwalangile kwi shina lyakwe.”—HEB. 6:10.
ULWIMBO 38 Akamukosha
IFYO TWALASAMBILILA *
1-3. Finshi fimo ifingalenga ababomba umulimo wa nshita yonse baleka ukubomba umulimo uo balebomba?
BA Robert na bena mwabo ba Mary Jo balandile abati: “Ilyo twabombele bumishonari pa myaka 21, abafyashi besu bonse bane balilwele. Twalile mu kubasakamana. Lelo twalyumfwile ububi pantu twalifumine ku calo ico twatemenwe nga nshi.”
2 Ba William na ba Terrie batile: “Ilyo twaishibe ukuti tatwali no kutwalilila ukubomba umulimo wesu pa mulandu wa kuti twalelwalilila, twalililile. Twalefwaisha ukutwalilila ukubombela Yehova mu calo cimbi, lelo tatwali no kutwalilila.”
3 Ba Aleksey balandile abati: “Twalishibe ukuti abaletucusha balefwaya ukwisala umusambo apo twalebombela. Kanshi ilyo baisele umusambo, twalingile ukufumapo kabili calitukalipe sana.”
4. Mepusho nshi twalaasuka muli cino cipande?
4 Na kabili aba bwananyina na bambi abengi nga nshi abalebomba umulimo wa nshita yonse ukubikako fye na balebombela pa Bethel balibapeele imilimo imbi. * Aba bamunyinefwe na bankashi aba cishinka kuti cabakosela ukuleka ukubomba imilimo iyo batemwa nga nshi. Finshi bengacita pa kuti babeleshe imilimo imbi? Finshi mufwile ukucita pa kuti mubafwe? Amasuko ya aya mepusho kuti yatwafwa bonse nga ca kuti ifintu fyayaluka mu bumi.
IFYO MWINGACITA IFINTU NGA FYAYALUKA
Mulandu nshi nalimo cingafisha ababomba umulimo wa nshita yonse ukuleka umulimo babomba? (Moneni paragrafu 5) *
5. Ni finshi fingacitika nga ca kuti abalebomba umulimo wa nshita yonse baleka ukubomba uyo mulimo?
5 Nampo nga tubombela mu muputule, ni fwe bamishonari, nelyo ni fwe bapainiya baibela, nangu nga tubombela pa Bethel, kuti twatemwa abantu abekala mu ncende tubombela e lyo ne ncende yine. Kanshi tulaba no bulanda sana nga twafuma uko tubombela. Tulafuluka bamunyinefwe na bankashi, kabili tulasakamana pa fyo bakashala maka maka nga ca kuti icalenga tufumeko ni co abantu baletucusha. (Mat. 10:23; 2 Kor. 11:28, 29) Na kabili ilingi line nga twakwata umulimo umbi nelyo nga twabwelela ku mwesu, kuti catukoselako pa kuti tubeleshe imikalile ya kuli iyi ncende. Ba Robert na bena mwabo ba Mary Jo batile: “Twalilabile imikalile ya ku calo cesu kabili caletukosela no kubila imbila nsuma mu lulimi lwesu. Twaleumfwa kwati tuli beni mu calo cesu.” Bamo abaleka ukubomba umulimo balebomba nomba balatendeka ukushita ifintu ifyo bashaleshita kale. Nalimo tabeshiba ne fya kucita kabili balafuupuka. Finshi bengacita pa kuti babelele imikalile iipya?
Tufwile ukupalama kuli Yehova kabili tulingile ukumucetekela (Moneni paragrafu 6 na 7) *
6. Finshi tulingile ukucita pa kuti tutwalilile ukupalamina kuli Yehova?
6 Tufwile ukutwalilila ukupalamina kuli Yehova. (Yako. 4:8) Finshi tulingile ukucita pa kuti tutwalilile ukupalamina kuli Lesa? Tufwile ukucetekela Yehova ‘uumfwa ipepo.’ (Amalu. 65:2) Pa Amalumbo 62:8 patila: “Mupongolweleni ifyaba mu mitima yenu.” Yehova kuti acita “ukucila na pa fyo twingalomba nangu pa fyo twingatontonkanya.” (Efes. 3:20) Yehova alatupeela ukucila na pa fyo tumulomba nga tulepepa kuli ena. Kuti atucitila ne fyo tushileenekela, ukucila na pa fyo twingatontonkanyapo pa kuti ubwafya tukwete bupwe.
7. (a) Finshi tulingile ukulacita pa kuti tutwalilile ukupalama kuli Yehova? (b) Ukulingana na fintu ilembo lya AbaHebere 6:10-12 lilanda, finshi fikacitika nga twatwalilila ukubombela Yehova ne cishinka?
7 Pa kuti tutwalilile ukupalamina kuli Yehova, tulingile ukulabelenga Baibolo cila bushiku kabili tufwile ukulatontonkanya sana pa fyo tulebelenga. Munyinefwe umo uwabombelepo bumishonari alandile ati: “Mufwile ukutwalilila ukukwata amapepo ya lupwa kabili mulingile ukulapekanya ifyo tusambilila nga tulelongana nga filya fine mwalecita kale.” Na kabili mufwile ukulabila imbila nsuma pamo na ba bwananyina aba mu cilonganino ico mwayamo. Yehova talaba abatwalilila ukumubombela ne cishinka, nangu ca kuti te kuti babombeshe nga fintu balebombesha kale.—Belengeni AbaHebere 6:10-12.
8. Bushe amashiwi yaba pali 1 Yohane 2:15-17 kuti yamwafwa shani ukwangusha imikalile?
8 Muleyangusha imikalile. Tamufwile ukuleka amasakamika ya mu calo ca kwa Satana yalenga mwaleka ukubombela Yehova. (Mat. 13:22) Mwilaumfwa ifyo abantu abashibombela Yehova balemweba, kabili ifibusa nangu balupwa nga balemweba ukuti mufwile ukukwata indalama ishingi pa kuti muleikala bwino, mwilabomfwila. (Belengeni 1 Yohane 2:15-17.) Mulecetekela Yehova uwatulaya ukuti akulatupeela fyonse ifyo tukabila “pa nshita tulekabila ubwafwilisho.”—Heb. 4:16; 13:5, 6.
9. Ukulingana na Amapinda 22:3, 7, mulandu nshi cishawamina ukukongola indalama na lintu mushileshikabila? (b) Finshi fingalenga twaishiba ifya kucita?
9 Mwilakongola indalama na lintu mushileshikabila. (Belengeni Amapinda 22:3, 7.) Nga mulekuuka kuti mwakabila indalama ishingi, kabili kuti mwakwata inkongole. Kanshi pa kucefyako inkongole, mwilakongola pa kuti mushite ifyo mushilekabila no kukabila. Nga ca kuti tuli na masakamika, nalimo pa mulandu wa kuti tulesakamana lupwa wesu uulwele, nalimo kuti catwafya ukwishiba bwino indalama isho tufwile ukukongola. Nga caba ifi, muleibukisha ukuti “ukupepa no kupapaata” kuti kwalenga mwaishiba ifya kucita. Yehova kuti amupeela umutende ‘uwingalinda imitima yenu na matontonkanyo yenu.’ Uyu mutende kuti walenga mwateka umutima ilyo muletontonkanya pa fyo mufwile ukucita.—Fil. 4:6, 7; 1 Pet. 5:7.
10. Finshi tufwile ukucita pa kuti tupange ifibusa?
10 Muleba pamo na bantu abengamukoselesha. Muleebako abanenu ifyo mumfwa e lyo na mafya mukwete, maka maka abakwatapo amafya nga ayo mukwete. Nga mulecita ifi kuti muleumfwako bwino. (Luk. Mil. 4:9, 10) Abali ifibusa fyenu uko mwalebombela bakatwalilila ukuba ifibusa fyenu. Nomba nga mwatendeka ukubombela kumbi mufwile ukupanga ifibusa fimbi. Muleibukisha ukuti pa kuti mukwate ifibusa tamulingile ukuifinya. Finshi mufwile ukucita pa kuti mupange ifibusa fimbi? Muleebako abantu ifisuma ifyalecitika ilyo mwalebombela Yehova pa kuti bamone ukuti mwalesekelela ilyo mwalebombela Yehova. Nangu ca kuti bamo mu cilonganino te kuti beshibe ico mwatemenwa umulimo wa nshita yonse, bambi bena kuti bafwaya ukwishibilapo na fimbi pali uyu mulimo kabili kuti baba ifibusa fyenu. Lelo tamufwile ukulaitakisha nelyo ukulalanda sana pa milimo iyo mwabombela Yehova, kabili tamulingile ukulalanda pa fyabipa nalimo ifyamucitikilapo.
11. Finshi mufwile ukucita pa kuti muleba ne nsansa na bena mwenu?
11 Nga ca kuti ico mwalekele ukubomba umulimo wa nshita yonse ni co abena mwenu balelwala, mwilamona kwati e balengele. Kabili nga ni mwe mwalelwala, mwilaipeela umulandu wa kuti ni mwe mwalenga abena mwenu baleke ukubomba umulimo wa nshita yonse. Muleibukisha ukuti muli “mubili umo,” kabili ilyo mwaupene mwalilapile kuli Yehova ukuti mukalasungana ilyo ifintu fili bwino na lintu mukwete amafya. (Mat. 19:5, 6) Nga ca kuti icalengele muleke ukubomba umulimo ni co abena mwenu balimite, muleeba umwana wenu ukuti alicindama ukucila no mulimo mwalebomba. Mulemweba ukuti mumumona ukuti “cilambu” ico Lesa amupeela. (Amalu. 127:3-5) Na kabili mulemwebako ifisuma ifyacitike ilyo mwalebomba umulimo wa nshita yonse. Nga mulecita ifi, umwana wenu na o kuti alafwaya ukubomba umulimo wa nshita yonse.
IFYO ABA BWANANYINA BAMBI BENGACITA PA KUBAFWA
12. (a) Finshi twingacita pa kuti twafwe ababomba umulimo wa nshita yonse na pa kuti batwalilile ukubomba? (b) Finshi tufwile ukucita pa kuti tubafwe babeleshe bwangu imikalile iipya?
12 Icawama ca kuti aba bwananyina mu filonganino ifingi balafwa ababomba umulimo wa nshita yonse. Balabafwa ukulingana na apo bengapesha pa kuti batwalilile ukubomba umulimo wabo. Balabakoselesha ukutwalilila ukubomba umulimo wabo, balabapeelako indalama nelyo ifintu fimbi ifyo bakabila, kabili balabafwako ukusunga balupwa lwabo abashala uko batula. (Gal. 6:2) Nga ca kuti abalebomba umulimo wa nshita yonse babatuma mu cilonganino mwaba, mwilamona kwati icilengele ni co balifililwe ukubomba nelyo ni co balilufyenye nomba balebasalapula. * Lelo mulebafwa pa kuti babelele bwangu imikalile iipya. Mulebapokelela bwino kabili mulebatasha pa milimo babomba, nangu ca kuti pali ino nshita te kuti babombeshe pa mulandu wa kuti balalwalilila. Mulebeshiba bwino. Mulesambililako ifyo baishiba, imilimo basambilila, e lyo ne fyo bacitapo.
13. Finshi tulingile ukucita pa kuti twingafwa aba bwananyina abatendeka ukubomba umulimo umbi?
13 Aba bwananyina abo batuma ukuya mu kubombela ku cilonganino cimbi, kuti mwabafwako ukusanga umwakwikala, imyendele, incito, ne fintu fimbi ifyo bengakabila. Na kabili nalimo kuti bafwaya mwabebako ifyo ifintu fyaba, pamo nga ifya kulipila imisonko ne fyo bengacita ifintu fimbi. Ne cacindamisha ico mwingabacitila kubalangulukilako, te kulabalilila ubulanda. Nalimo balecula pa mulandu wa kulwalilila nelyo pa mulandu wa kuti lupwa wabo alalwalilila. Limbi baleloosha lupwa wabo uwafwa. * Na kabili nalimo bali no bulanda pantu balafuluka aba bwananyina abo bali nabo uko balebombela kale, nangu ca kuti nalimo te kuti balande no kulanda. Palapita inshita pa kuti baleke ukuba no bulanda kabili ilingi line ubu bulanda bulabapelenganya no kubapelenganya.
14. Finshi aba bwananyina balecita pa kwafwa nkashi umo pa kuti abeleshe bwangu mu icifulo ico aile mu kubombelamo?
14 Nga mulebila imbila nsuma na ba bwananyina abaisa mu cilonganino umo mwaba kabili nga mulebacitila ifisuma, kuti babelesha bwangu imikalile iipya. Nkashi umo uwabombeele ku calo cimbi pa myaka iingi, atile: “Ku calo nalebombela, naletungulula amasambililo ya Baibolo ayengi cila bushiku. Nomba kuno, calenkosela no kubelengela umuntu Baibolo nelyo ukutambisha umuntu vidio. Lelo aba bwananyina balensenda nga balebwelela kubo babilileko imbila nsuma. Ifyo bamunyinefwe na bankashi aba cishinka balebombesha pa kuti balesambilisha abantu Baibolo, fyalelenga ndetontonkanya ifisuma pa cifulo nalebilamo imbila nsuma. Nalisambilile ifya kutendeka ukulanda na bantu mu cifulo nalebilamo imbila nsuma. Ifi fyonse fyalelenga ndeba ne nsansa na kabili.”
TWALILILENI UKUBOMBESHA!
Mulebila imbila nsuma mu nshila ishalekanalekana pa kuti mulebombesha mu cifulo icilonganino mwaba cibombela (Moneni paragrafu 15 na 16) *
15. Finshi mwingacita pa kuti mulebomba bwino mu cifulo mwaya mu kubombela?
15 Kuti mwalabomba bwino na mu cifulo cimbi. Mwilatontonkanya ukuti tamwalebomba bwino umulimo wenu kabili mwilamona kwati nomba te kuti mubombeshe. Mulebikako amano pa kuti mulemona ifyo Yehova alemwafwa. Mulepashanya Abena Kristu aba mu nshita ya batumwa. Konse uko bali “baile balebila imbila nsuma ya cebo ca kwa Lesa.” (Imil. 8:1, 4) Nga mwatwalilila ukubila imbila nsuma, abantu kuti basambilila icine. Ku ca kumwenako, bapainiya abo batamfishe mu calo cimo baile ku calo icali mupepi ukwali abantu abengi sana abalanda ululimi ulo aba bapainiya balelanda. Mu myeshi ya kupenda fye, amabumba ayengi aya balanda ulo lulimi yalipangilwe.
16. Finshi fingalenga mulesekelela na lintu mwatendeka ukubomba umulimo umbi?
16 Baibolo itila: “Ukusekelela muli Yehova e bucingo bwenu.” (Nehe. 8:10) Icikalamba icifwile ukulenga tulesekelela sana ni bucibusa bwesu na Yehova, te mulimo tubomba nangu twingautemwa shani. E ico pa kuti tulesekelela, tulingile ukupalama sana kuli Yehova e lyo no kushintilila sana pali ena. Muleibukisha ukuti icalengele mutemwe umulimo mwalebomba ni co mwaleafwa sana abantu. Nga mulebomba no mweo onse umulimo uo mulebomba pali ino nshita, Yehova akamwafwa pa kuti na o muutemwe.—Luk. Mil. 7:10.
17. Finshi tulingile ukulaibukisha pa mulimo uo tubomba pali ino nshita?
17 Tuleibukisha ukuti tukatwalilila fye ukubombela Yehova, lelo imilimo tubomba yena tayakatwalilile. Mu calo cipya, bonse fye nalimo tukatendeka ukubomba imilimo imbi. Ba Aleksey abo tulandilepo kale, balandile ukuti ifi umulimo uo balebomba wayalwike fyalenga baipekanya ku fyo imilimo ikaluka mu calo cipya. Batile: “Nalishibe ukuti Yehova eko aba e lyo no kuti icalo cipya cikabako, lelo nalemona ukuti Yehova ali akatalamukila kuli ine e lyo ne calo cipya naco caliko apatali. Nomba nalipalama sana kuli Yehova, kabili ng’umfwa ukuti icalo cipya cili mupepi sana.” (Imil. 2:25) Kanshi nangu umulimo tulebomba wingaba shani, tufwile ukutwalilila ukupalama kuli Yehova. Takatushe, kabili akalatwafwa pa kuti tukalesekelela mu milimo yonse iyo tulebomba konse uko twingaba.—Esa. 41:13.
ULWIMBO 90 Mulekoseleshanya
^ para. 5 Inshita shimo bamunyinefwe na bankashi ababomba umulimo wa nshita yonse kuti baleka ukubomba imilimo iyo balebomba, nelyo kuti bakwata umulimo umbi. Muli cino cipande twalalanda pa mafya ayo bakwata na pa fyo bengacita pa kuti babeleshe umulimo uo batendeka ukubomba. Na kabili twalalanda pa fyo aba bwananyina bengacita pa kubakoselesha na pa kubatungilila. Twalalanda na pa mashinte ya mafunde aya mu Baibolo ayo twingakonka nga ca kuti fimo fyayaluka mu bumi bwesu.
^ para. 4 Ifi fine e fyo caba na kuli bamunyinefwe abalebomba imilimo imo. Ilyo bakumenye imyaka imo balilekeele bamunyinefwe abali bacili na maka iyo milimo. Moneni icipande icitila “Bamunyinefwe Abakoloci—Yehova Alatasha pa fyo Mumubombela ne Cishinka,” mu Ulupungu lwa kwa Kalinda ulwa September 2018, ne citila “Twalilileni Ukusekelela na Lintu Ifintu Fyayaluka,” mu Ulupungu lwa kwa Kalinda ulwa October 2018.
^ para. 12 Baeluda ababa mu cilonganino umo aba aba bwananyina balebombela kale, bafwile ukwangufyanya ukulembela baeluda ababa mu cilonganino umo baya mu kubombela kalata ya kubalondolola pa kuti bakatwalilile ukubomba bupainiya, bueluda, nelyo ubutumikila ukwabula no kupoosa inshita.
^ para. 13 Moneni ifipande fyaba muli Loleni!, Na. 3 iya mu 2018.
^ para. 57 UBULONDOLOSHI BWA CIKOPE: Abaupana abo bebele ukuleka umulimo wa bumishonari bali no bulanda ilyo baleshalikapo aba mu cilonganino mu calo balebombela.
^ para. 59 UBULONDOLOSHI BWA CIKOPE: Abaupana abalebomba bumishonari nomba bali mu calo cabo, balepepa no mukosha kuli Yehova pa kuti abafwe ukushipikisha amafya ayo bakwete.
^ para. 61 UBULONDOLOSHI BWA CIKOPE: Yehova ayafwa abaupana ukutendeka umulimo wa nshita yonse na kabili. Ilyo balebila imbila nsuma mu cifulo icilonganino babamo cibombela, baleshimikila umwaume uwafuma ku calo cimbi imbila nsuma mu lulimi basambilile ilyo balebomba bumishonari.
