1-3. Roi risai monda ḇefrur naek srar ḇefarmyan oras nakam sibur fararur sena?

ROBERT ma Mary Jo sufawar ḇo suyoḇe, ”Nusmai marasrisen ro fararmyan nuḇena ḇe misionaris ro swaf taun ri 21. Mboi mura ido, sinan nuḇeskoya skosambraḇ wer ḇa. Numarisen numam faduru skokame. Ḇape, nuḇesneso kaku nubur moḇ numarisen kaku nufarmyan ro ya.”

² William ma Terrie sukofen, ”Fafisu nufawi jadi fa nukaḇer ḇe fararur nuḇena wer ḇa snar nudafdufe, nukanes. Numarisen ker nufarmyan ḇe Yahwe ro sup bondi na, mboi kirine nupok nufruri wer ḇa.”

³ Aleksey doḇe, ”Nkofawi kwar pamarenta imbe idwarek fararur ro kantor cabang nkoḇedi, moḇ yafarmyan ro ya. Ḇape, fyor roi anna ndarirya beri ḇo fandun fa nkobur Betel, nkoḇsneso rawo.”

4. Fakfuken rosai na kawos ro farkarkor ine?

⁴ Naek srar anskoine monda ḇa, ḇesesya ḇefaraur ro oras nakam, ro Betel sya kako saksmai fararur ḇebabo. * Imbude samswen ḇe naek srar ansine fa sibur fararur simarisen kaku nane. Rosai na ḇefnoḇek si fa siryaḇ pdef? Rariso wafnoḇek si rai? Kankarem faro fakfuken suine na nafnoḇek kokame fafisu roi ḇeradine nkur kankenem koḇena.

5. Fafisu kona fararur ḇesren ḇebabo, samswen risai monda na kosmai ya?

⁵ Kofarmyan ro Betel ḇaido ro fararur ḇesren ḇesena ke,  na koswar kaku naek srar, snonkaku ḇesesya, ma kako moḇ kofarmyan ro ya. Inja, fyor kobur fararur koḇedi ido na koḇesneso kaku. Iba syadi fyor kobur mob anya snar ḇaḇewayam ido, na koswar kaku naek srar si, ma komkakwarek si. (Mat. 10:23; 2 Kor. 11:28, 29) Oso wer ido, na samswen ḇe ko fa kofarmyan ro moḇ ḇese snar fandun fa kofarkor budaya ḇebabo. Samswen ḇeradine kosmai na kako fyor kokaḇer ḇe mnu marin koḇedi. Robert ma Mary Jo suyoḇe, ”Numarisen ḇa kwar faro roi ḇero mnu marin nuḇedi ḇaido nuḇaryas ro wos mankun nuḇedi. Snar nufarmyan fyoro ro sup bondi inja numnis ra mandaman ro sup marin nuḇedi.” Ḇesesya wer sna samswen snar fandun fa sisae kumpan, roi skara na ro ḇepondi ḇa. Imbude na seḇirḇar ma sesanekar. Inja, rosai nari ḇefnoḇek naek srar ansine?

6. Moḇsa na kofanam pdef ḇe Yahwe I rai?

⁶ Kofanam pdef ḇe Yahwe. (Yak. 4:8) Moḇsa kofrur na rai? Kuker kokyar kaku faro Yahwe ḇe ”Manḇerower nadi”. (Mz. 65:2) Mazmur 62:8 ikofen, ”Wasbawer roi ḇero snembri ḇe I.” Yahwe na ”ifrur rosai kam nasyadi ro rosai konadi ma korna roḇa kokarana”. (Ef. 3:20) Yahwe na ḇyuk rosai kor ro nadi koḇena monda ḇa. Iba syadi, na ifrur fa kosaebur samswen koḇena kuker roi kokara ḇa na.

7. (a) Rosai nari ḇefnoḇek ko fa kofanam pdef ḇe Yahwe? (b) Imnis ro Ibrani 6:10-12, barakas rosai kosmai ya snar kofarmyan ḇe Yahwe kuker soasuser?

⁷ Infa kofanam pdef ḇe Yahwe, kowasya Refo ras ḇe ras ma kokarauser na pdef. Manbesrar oso ḇefarmyan ḇe misionaris ro randak iwara doḇe, ”Kofrur pdef nadi ro kina, kofasos pyum fananjur na, raris kofrur kwar ro ḇepon iwara rofyor kuffarmyan kaker.” Oso wer ido, komyaren koḇaryas abar ḇepyum fnoḇek sidang ḇebabo koryur ro ya. Yahwe ipok ḇyefnder ḇa snonkaku ḇefarmyan ḇe I kuker soasuser sya, baboine sifrur nabor raris randak ya wer ḇa.​—Wasya Ibrani 6:10-12.

8. Rariso wos ḇero 1 Yohanes 2:15-17 na nafnoḇek ko fa kokenem syadadi ḇa?

⁸ Kokenem syadadi ḇa. Ro Setan dunya ḇyedine, snonkaku ḇebor simkakwarek  fandun ro rasras na. Ḇape, komewer roi anna nafnai fa kofarmyan ḇe Yahwe I wer ḇa. (Mat. 13:22) Imbude snar siswar ko, bati ma kina koḇesya sidif ko fa kosewar pipi nabore insama kokenem pyum. Kopampum ḇeri dafdifer sena. (Wasya 1 Yohanes 2:15-17.) Kokyar faro Yahwe, snar ḇyeasas kwar nari fyasos roi nakam ro ”rofafisu koḇefandunya”. Nari ifnoḇek ko fa kona kakyar ḇesambraḇ, koknone, ma ḇyuk fandun koḇena ro rasras.​—Ibr. 4:16; 13:5, 6. 

9. Ro Amsal 22:3, 7, rosai ḇefnai fa koḇenyaki awer fa kokoḇes roi kofandun kaku ḇa na, ma rosai na ḇefnoḇek ko fa kun snemuk ḇepyum na?

⁹ Kopok koḇenyaki awer. (Wasya Amsal 22:3, 7.) Kora ḇe moḇ ḇese ido na kosae pipi kermkun ḇa, nafnai fa koḇenyaki pipi nabore. Insama nane ndarirya ḇa, kokoḇes awer roiebor kofandun kaku ḇa na kuker koḇenyaki ḇaido koḇak fawawas. Fafisu koḇesanekar snar komamwarek kina ḇeduf ya, na samswen fa kofawi mnis barbor ro pipi koḇenyaki na ḇa. Ro fafisu ḇeradine, koswarepen nadi nafnoḇek Au fa wun snemuk ḇepyum. Yahwe na kyarem nadi Bena kuker ḇyuk ḇaḇeaski ḇefaduru ”sne ma kakara” Bedi. Bon ya, na kwara kuker kananon rosai fandun fa wafur ya.​—Flp. 4:6, 7; 1 Ptr. 5:7.

10. Nyan ya rariso insama kakna bati ro sidang ḇebabo?

¹⁰ Kofaduru ḇaḇebati ḇepyum na. Fawar roi ḇaḇir na ma samswen Bena faro bati ḇepyum bansi, iba syadi bati ḇesmai fafisu ḇemnis ra Au. Wafrur na ido, snembri na iprei kaku. (Pkh. 4:9, 10) Na ḇebati pdef kuker naek srar ro sidang waryur ḇepon anya. Ḇape, ro sidang ḇebabo, fandun fa swewar bati ḇesesya wer. Imbe wakna bati ḇepyum ido, fandun fa wafrur pyum. Nyan ya rariso? Fawar ḇe ḇesesya farfyar ḇepyum wasmai ro fararmyan ḇe Yahwe I. Rarirya sakḇaḇir raryaḇ Bena kako. Ro sidang naek srar ono sisya sifawi mnis ḇa roi ḇefnai wamarisen syadi wafarmyan ro oras nakam. Ḇape, imbude ḇesesya siḇe sifawi ma simarisen sḇebati kuker Au. Mboi, wawos nabor awer ḇekur Au ma roi wasmai kwar ro fararmyan Bena ḇaido roi ḇefrur fa wararyaḇ ḇa.

11. Rosai fandun fa wafrur insama farḇakḇuk Bedi ismai payamyum?

¹¹ Wabur fararur ḇesren bena snar swambri iduf ido, ḇuk sasar ḇe i awer. Oroḇaido, Au iso ḇeduf ya ido, kwara awer wafrur sasar kwar ma wafrur swambri ifafko kwar. Waswarepen, muma muḇe ”ḇaken oser” kwar, ma mukofen kwar ro ḇarpon Yahwe samswen risai  monda ḇekur mu nari muswar yae mu. (Mat. 19:5, 6) Rwir fararur ḇesren Bedi snar mukara ḇa ḇo binswa Bedi fyadores ido, mam mnis insama romawa Bedi ifawi ima fyandun syadi ro fararur ḇesren wuf ro ḇeponi. Wafnoḇek i fa ikyar ima ’fakamaman’ ro Allah diri. (Mz. 127:3-5) Fawar ḇe i kako farfyar ḇepyum kaku wasmai kwar fafisu wafarmyan ro oras nakam. Rarirya, na wafnoḇek i fa imarisen dakfarmyan ḇe Yahwe ro oras nakam kako.

12. (a) Rariso na kofnoḇek ḇefarmyan ro oras nakam sya insama sifarmyan pdef? (b) Skur fararur ḇebabo faro si ido, moḇsa na kofnoḇek si rai fa siryaḇ pdef?

¹² Komarisen kaku, sidang ḇebor ma naek srar sya sḇuk fafnoḇek faro ḇefarmyan ro oras nakam sya insama sifarmyan pdef. Sifrur na kuker sisambraḇser si, sḇuk pipi ḇaido roi sfandun na. Oso wer, sifarmyan ro moḇ ḇebinkwan ido, na simamwarek pyan kina sesi. (Gal. 6:2) Ḇefarmyan ro oras nakam ansine fyor skur fararur ḇebabo faro si ma sikren ḇe sidang Bedi ido, kwara awer fararwei nane snar sifrur sasar kwar ḇaido suf pyum fararur sena ro ḇepon ya ḇa. * Ḇesyaḇo, wafnoḇek si insama siryaḇ pdef. Kirine sisambraḇ wer ḇa fa sḇuk nabor syadi ro fararmyan, mboi waser pyum si ma buk wos sandik faro roi sifrur kwar ro fararmyan. Mambir pyum si. Farkor nabor ro fawawi sena, farkarkor siso na, ma farfyar sena.

13. Fafnoḇek risai na koḇuk ḇe naek srar ḇesmai fararur ḇebabo na?

¹³ Randak ya, ḇefarmyan ro oras nakam  ḇesmai fararur ḇebabo sifandun fafnoḇek Bedi fa sisewar rum, transportasi, fararur, ma roi ḇesena sfandun na. Imbude fandun fa sifawi roi ḇero rasras na, raris nyan sḇakwarek listrik ma war na. Ḇape, ḇefandun syadi ya iso kosewar fa kofawi pyum roi ḇekur si. Imbude sidufe ḇaido smamwarek kina ḇeduf sya. Oroḇaido sfafardun snar snonkaku siswar ya imar. * Sikofenḇair ḇa mboi imbude sisneso kaker snar siswarepen ker naek srar ḇero moḇ sifarmyan ro ya ro ḇeponi. Sakkara roi oser ḇa, ma sifandun oras isof nakam nambran kuker payamyum.

14. Moḇsa binbaryas sya sifnoḇek imbesrar oso fa iryaḇ pdef ro fararur ḇebabo na rai?

¹⁴ Na wafnoḇek si kako fa siryaḇ kuker wor si fa sḇaryas kayam ma swambraḇser si kuker wafasnai nyan ḇepyum. Imbesrar oso ḇefarmyan fyoro kwar ro sup bondi doḇe, ”Ro moḇ yafarmyan ro ḇeponi, yafarkin farkarkor Refo ro oras nakam. Kirinema fyor yaḇaryas ro moḇ ḇebabo, samswen kaku fa yawasya mnuk ro Refo ḇaido yafasnai vidio ḇe bena rum ya. Ḇape, binbaryas ḇero dinesya sor ker aya fa yaso si fyor sifrur rarama kaḇer ma sḇuk farkor Refo. Snar yamam soasuser ma raryaḇ sena fa sḇuk farkor Refo, nafnai fa yaryaḇ syadi fa yaḇaryas ro moḇ ine. Yafarkor kwar moḇsa yarandak awawos kuker snonkaku ḇero dine sya rai. Nanekam nafnoḇek aya fa yaryaḇ kaḇer.”

15. Rariso na wasmai bon ḇepyum ro fararur ḇebabo Bena?

¹⁵ Na wasmai bon ḇepyum ro fararur ḇebabo Bena. Kwara awer fararur ḇebabo wasmai ine snar wafrur sasar kwar, ma kirine sfandun Au wer ḇa. Kwara kada moḇsa Yahwe ifnoḇek Au ro kirine rai, ma waḇaryas pdef. Waso nyan snonkaku Kristen ḇero abad randak sya. Kowasya ido ”simbran ro sup ḇesiper ma sḇaryas  Ankankinem Ḇeḇye”. (Farfyar 8:1, 4) Swewar pdef fa ḇaryas ido, na wasmai bon ḇepyum. Imnis raris, perintis ḇeḇeso siyaw si fa sibur sup oso inja sikren ḇe sup ḇefanam ya. Ro sup ḇebabo ani, fandandun naisya fa sḇaryas ro wos perintis ansi sḇukidawos na. Ro swaf paik riḇeḇeso monda, raryur ḇeḇuk wos ani neḇefrur ma neryewen.

16. Rariso na nwa raryaḇ pdef fafisu wasmai fararur ḇesren ḇebabo?

¹⁶ Nehemia ikofen ḇe snonkaku Yahudi, raryaḇ ḇerama ro Yahwe naiso samambraḇ sena. (Neh. 8:10.) Koswar kaku fararur ḇesren koḇena mboi raryaḇ koḇena neknam kaku ro na ḇa. Raryaḇ ḇeba koḇena isoine snar kona wis kuker Yahwe I. Inja, insama koryaḇ fandun fa kofanam pdef ḇe Yahwe, kokyar faro fawinanem, farkankin, ma fafnoḇek Ḇyeja. Waswarepen, wamarisen kaku fararur ḇesren Bedi ro ḇepon iwara snar wafnoḇek snonkaku ḇero diansya kuker sne ḇesiper. Inja kirine, wafrur kuker sne ḇesiper fararur Bedi ro moḇ ḇebabo ma na mam moḇsa Yahwe ifnoḇek Au fa wamarisen syadi faro fararur Bena kako.​—Pkh. 7:10.

17. Rosai fandun fa koswarepen ḇekur fararur ḇesren koḇena ro kirine?

¹⁷ Fandun fa koswarepen, fararur ḇesren koḇedi ro kirinema nakain fyoro ḇa, ḇape na kofarmyan ḇe Yahwe isof fyoro-fyoro. Ro dunya babo, na kosmai fararur ḇeḇesebur fararur koḇedi ro baboine. Aleksey, ḇeyap kwar anya, ikofen fararwei ro fararur ḇyedi fyasos i faro fararwei nari ḇeḇesya ro ras ḇarpon naiwama. Doḇe, ”Yafawi kwar, Yahwe ima isya kaku ma dunya babo kako. Ḇape, insape ro kirine yaḇaḇir yafanam syadi ḇe Yahwe ma yakyar dunya babo isya fyanam kaku kwar.” (Farfyar 2:25) Fararur ḇesren rosai kuf ya, komarisen kofanam pdef ḇe Yahwe. Ro moḇsaiso kofarmyan ro na, Yahwe nari ipok ibur ko ḇa, ma nari ifnoḇek ko fa kofarmyan pdef ḇe I kuker raryaḇ.​—Yes. 41:13.