1-3. Aha ma na mambahen piga-piga sanina botou mandapot parubahan tugas?

SI ROBERT pakon si Mary Jo istrini mangkatahon, “Dobkonsi 21 tahun hanami mangidangi gabe misionaris, borit-boritan ma namatorasnami. Sasintongni, malas do uhurnami mangurus sidea. Tapi pusok do homa uhurnami manadingkon ianan penugasannami, halani marosuh hanami mangidangi ijai.”

² Si William pakon si Terrie istrini mangkatahon, “Tangis do hanami dob mambotoh lang boi be mandalankon tugas halani masalah kesehatan. Sasintongni marosuh do hanami mangidangi Jahowa i nagori na legan. Tapi sonari lang be tarbahen hanami sonai.”

³ Si Aleksey mangkatahon, “Ibotoh hanami do anggo sidea na masogam bani Saksi sihol manutup kantor cabang. Tapi sanggah masa ai, totap do tarsonggot hanami halani maningon manadingkon Betel.”

4. Bani artikel on, sungkun-sungkun aha ma na laho iulas hita?

⁴ Sobali ai, bahat do sanina botou na mangidangi sepenuh waktu mandapot parubahan tugas, tarmasuk ma na mangidangi i Betel. * Halani marosuh bani tugasni, tontu lang urah sidea manadingkon ai. Jadi, sonaha sidea boi mambahen penyesuaian? Sonaha nasiam boi mangurupi sidea? Balosni sungkun-sungkun ai boi mangurupi ganupan  hita sanggah dong parubahan ibagas hagoluhanta.

5. Sanggah dong parubahan tugas, aha ma pengaruhni ai hubanta?

⁵ Lang soal hita mangidangi i lapangan atap pe i Betel, tontu marusaha do hita mangkaholongi halak ijai, sonai homa iananni. Tontu pusok do uhurta porini ipindo ase hita manadingkon penugasanta. Gabe siholan ma hita bani sanina botou ijai. Ra do homa haru pangahapta sonaha ma holi sidea tarlobih anggo sidea iparburu. (Mat. 10:23; 2 Kor. 11:28, 29) Leganni ai, sanggah mandapot parubahan tugas, ra do lang urah pindah hu ianan na legan halani maningon mambahen penyesuaian bani hasomalan ijai. Gari mulak pe hu nagori sandiri, ra do homa sonai pangahapta. Si Robert pakon si Mary Jo mangkatahon, “Halani domma dokah mangidangi i nagori na legan, songon na legan do pangahapnami sanggah mulak use hu nagorinami.” Dong do homa na haru pangahapni halani parduiton. Jadi, sonaha ma mangatasi ai?

6. Sonaha hita boi totap dohor bani Jahowa?

⁶ Totap ma dohor bani Jahowa. (Jak. 4:8) Sonaha carani? Halani “Sitangihon tonggo” do Jahowa, porsaya ma hu Bani. (Ps. 65:3) Bani Psalmen 62:9 ihatahon, “Lungkari [atap, patugah] ma uhur nasiam i lobei-Ni.” Jahowa marjanji tarbahen-Si do “lobih humbani na pinindonta barang na piningkiranta”. (Ep. 3:20) Lang pitah aha na ipindo hita na laho pasirsiron-Ni hubanta. Ra do homa iurupi Jahowa hita marhitei cara na lang ongga ibayangkon hita.

7. (a) Aha do na boi mangurupi hita ase totap dohor bani Jahowa? (b) Domu bani Heber 6:10-12, aha do hasilni anggo hita setia mangidangi Jahowa?

⁷ Ase boi totap dohor bani Jahowa, basa ma Bibel bai ganup ari janah rimangi ma isini. Sada sanina na ongga gabe misionaris mangkatahon, “Bahen nasiam ma parlajaran Bibel kaluarga ampa persiapan, songon na ibahen nasiam sanggah lape mandapot parubahan tugas.” Leganni ai, bahen ma na sidearan sanggah nasiam mangidangi rap pakon sanina botou i kuria na baru. Idingat Jahowa do ganup halak na setia mangidangi-Si, hassi  pe lang tarbahen sidea songon na hinan.​—Basa Heber 6:10-12.

8. Sonaha podah bani 1 Johannes 2:15-17 mangurupi nasiam ase ulang mangindahi habayakon?

⁸ Ulang pindahi habayakon. Ulang paturut holsoh-holsoh ni dunia on mambahen nasiam lang be mangidangi Jahowa. (Mat. 13:22) Porini adong kaluarga atap hasoman na mangojur nasiam ase mangindahi habayakon, ulang tangihon ojuran sisonai. (Basa 1 Johannes 2:15-17.) Porsaya ma bani Jahowa. Marjanji do Ia laho pasirsirhon haporluanmu ‘domu bani panorangni’. Urupan-Ni do homa nasiam ase toguh marhaporsayaon.​—Heb. 4:16; 13:5, 6.

9. Domu bani Podah 22:3, 7, mase lang pala hita manginjam duit anggo lang porlu, anjaha aha do na boi mangurupi hita mambahen haputusan na dear?

⁹ Ulang manginjam duit anggo lang porlu. (Basa Podah 22:3, 7.) Bahat do biaya na iporluhon sanggah pindah hita. Halani ai, ra do gabe tarpingkir hita laho marutang. Tapi ase lang bahat utangmu, ulang ma manginjam duit laho mamboli barang na lang ihaporluhon. Umpamani, sanggah dong kaluarganta na boritan, ra do gabe gulut pingkiran janah lang ibotoh hita sadiha bahat duit na porlu ipinjam. Anggo sonai situasinta, dingat ma ‘pangindoan ampa tonggo’ boi mangurupi hita mambahen haputusan. Boi do ibalosi Jahowa tonggomu marhitei mambere hadameion, ase boi ham mambahen haputusan na dear.​—Pil. 4:6, 7; 1 Ptr. 5:7.

10. Sonaha carani ase dapot hita hasoman na baru?

¹⁰ Totap ma dohor bani kaluarga ampa hasoman i kuria. Ra do adong hasoman na ongga mangahapkon situasi songon ham. Ase lumbang uhurmu, patugah ma bani sidea sonaha pangahapmu ampa hasunsahanmu. (Par. 4:9, 10) Hassi pe sanina botou i kuria na hinan totap ope gabe hasomanmu, marusaha ma marhasoman pakon sanina botou i kuria na baru. Sonaha carani? Saritahon ma pangalamanmu na dear sanggah mangidangi, ase ibotoh sidea sonaha malas ni uhurmu. Hassi pe lang ganup sanina botou mangarusi pangahapmu ibagas dinas sepenuh waktu, tapi ra do adong na sihol mambotoh roh bahatni. Ujungni boi ma gabe orot parhasomananmu. Tapi, jaga ma! Ulang sai isaritahon ham pasal dirimu, aha na dob ibahen ham sanggah mangidangi, pakon aha na lang iharosuhkon ham.

11. Sonaha ase parhajabuan ni nasiam totap martuah?

¹¹ Anggo nasiam lang be boi mangidangi sepenuh waktu halani boritan pasangan goluhmu, ulang ma isalahkon ham ia. Porini ham do na boritan, ulang ma maretek  ni uhur halani iagan ham domma mambahen sunsah pasanganmu. Dingat ma “sada daging” do nasiam. Sanggah marhajabuan, domma marjanji nasiam i lobei ni Jahowa anggo nasiam totap marsisarihon lang soal aha na masa. (Mat. 19:5, 6) Porini nasiam manadingkon penugasan halani hamil istrimu, pastihon ma anggo niombahmu mambotoh pontingan do ia marimbangkon penugasanmu hinan. Gati ma patugah anggo ia “sada upah” humbani Naibata. (Ps. 127:3-5) Saritahon ma homa pangalaman ni nasiam sanggah ibagas penugasan hinan. Anggo sonai ibahen nasiam, ra do gabe tarojur niombahmu ai mangidangi sepenuh waktu songon na ibahen nasiam ondi ai.

12. (a) Sonaha hita mangurupi sanina atap botou na mangidangi sepenuh waktu ase totap mandalankon tugasni? (b) Sonaha hita mangurupi sidea ase urah mambahen penyesuaian?

¹² Bahat do kuria, sonai homa sanina botou marusaha mangurupi janah mangojur sidea na mangidangi sepenuh waktu ase totap mandalankon tugasni. Umpamani, ibere sanina botou do duit atap aha na iporluhon. Anjaha halani sidea daoh humbani kaluargani, iurupi kuria do homa mangurus kaluargani ai. Dear tumang do na ibahen sidea ai! (Gal. 6:2) Anggo adong sanina botou na mangidangi sepenuh waktu itugaskon hu kuriamu, ulang ma iagan nasiam halani dong hasalahanni ase ipindahkon sidea. * Tapi, urupi ma sidea ase urah mambahen penyesuaian. Dear ma mangalo-alo sidea janah marusaha lambin mananda sidea. Halani bahat  palatihan ampa pangalaman ni sidea, boi do hita marlajar humbani sidea. Puji ma aha na dob ibahen sidea hassi pe sonari ra do lang bahat na boi ihorjahon sidea halani masalah kesehatan.

13. Sonaha hita boi mangurupi sidea na mandapot parubahan tugas?

¹³ Somalni, sidea na mandapot parubahan tugas porlu iurupi laho mandarami ianan ni sidea tading ampa parhorjaan. Porlu do homa ibotoh sidea hatorangan pasal sonaha manggalar pajak, ija marbalanja, mambuat angkot, ampa hasomalan i ianan ai. Tapi na sipontingan, marusaha ma mangarusi situasi ni sidea. Ra do sidea atap kaluargani dong na boritan. Ra do marpusok ni uhur ia halani matei na hinaholonganni. * Hassi pe lang ipatugah sidea, ra do homa pusok uhurni halani siholan bani hasoman-hasoman i kuria na hinan. Halani ganupan ai, ra do lang boi sidea mintor mambahen penyesuaian.

14. Sonaha parbarita mangurupi hasomanta na pindah hu kuria ni sidea?

¹⁴ Anggo iarahkon ham sidea marbarita janah ipatuduh ham siusihan na madear, lambin urah ma sidea mambahen penyesuaian. Hasomanta na martahun-tahun mangidangi i nagori na legan mangkatahon, “Bani kuriaku hinan, tiap ari dong do halak na huurupi marlajar Bibel. Tapi ijon, gari mambasahon Bibel atap mamutarhon video tumang lang urah. Iarahkon parbarita ijon ma ahu ase dihut sanggah sidea mangajari halak marlajar Bibel. Tarojur do ahu dob mangidah haringgason ampa habaranion ni sidea sanggah mangidangi. Pos uhurhu boi do hubahen na sisonai. Marlajar ma ahu sonaha mamungkah parsahapan ijon. Ujungni gabe marmalas ni uhur ma use ahu.”

15. Sonaha nasiam boi marhasil ibagas pangidangion?

¹⁵ Ulang ma iagan ham parubahan on tarjadi halani lang dear ham mandalankon  tugas. Pingkirhon ma sonaha Jahowa mangurupi ham sonari. Tiru ma halak Kristen bani abad na parlobei. Ija pe sidea tading, “isiar sidea ma sab tanoh ai lanjar mangambilankon ambilan na madear”. (Lah. 8:1, 4) Anggo totap ham marbarita, pos ma uhurmu marhasil do ham mangidangi i ianan na baru. Dong siusihan humbani piga-piga parintis na iusir hun nagorini. Pindah ma sidea hu nagori na mamorluhon bahat parbarita na sarupa bahasani pakon sidea. Jadi ibahen ma kalompok ijai. Hasilni, dob piga-piga bulan lambin tambah do bilangan ni kalompok ai.

16. Sonaha ham boi totap marmalas ni uhur mandalankon tugas na baru?

¹⁶ Bibel mangkatahon, “Malas ni uhur ibagas Jahowa, ai do gogoh bani nasiam.” (Neh. 8:11) Hassi pe marosuh hita mangkorjahon tugasta, tapi sedo ai na parohkon malas ni uhur na banggal. Parhasomanan na orot pakon Jahowa do na boi mambahen hita totap marmalas ni uhur. Halani ai, padohor ma dirimu bani Jahowa. Marpangunsandeian ma hu Bani laho mandapot pangurupion ampa hapentaran. Dingat ma ondi ai domma ibahen ham na sidearan laho mangurupi halak i penugasanmu na hinan. Ai do na mambahen marosuh tumang ham bani tugasmu ai. Jadi sonari bahen ma homa na sisonai i penugasanmu na baru. Ahapkon ma sonaha Jahowa mangurupi ham ase marosuh homa bani tugas ai.​—Par. 7:10.

17. Aha ma na maningon idingat hita pasal tugasta?

¹⁷ Dingat ma, totap do hita mangidangi Jahowa, tapi anggo tugasta boi do mubah-ubah. Si Aleksey na ipatugah bani awal ni artikel mangkatahon anggo parubahan tugasni sonari on pasirsirhon ia laho mandalankon tugas i lobei ni ari. Nini do, “Huidah do anggo Jahowa in tongtong i lobeihu janah dohor mando dunia baru ai.” (Lah. 2:25) Jadi, lang soal tugas aha pe na ihorjahon hita, totap ma dohor bani Jahowa. Seng ongga tadingkon-Ni hita. Sai urupan-Ni do hita ase totap marmalas ni uhur sanggah mangkorjahon tugas aha pe ibagas pangidangion.​—Jes. 41:13.