1-3. Mam mevé me ne bo na bobejañe béziñ be telé ésaé é ne ngum aval?

ROBERT ba ngal Marie Jo ba jô na: “Bebiaé bangan bese be nga mane bo mintutuñ éyoñe jia, valé bi boya ésaé bemissionnaire mimbu 21. Bi mbe bi wô’ô mvaé ya tuñulu be. Ve bi nga wô’ô mintaé nlem éyoñ bi kôlô’ô vôm bi mbe bi bo’o ésaé jangan, amu bi mbe bi maneya yembane bi too wôé.”

² William ba Terrie ki ba jô na: “Bi nga bôé ñyôn éyoñ bi nga yemelane na bia yiane telé ésaé amu bi nji beta be mvo’é minsôn. Nsôñane wongane ya ke saé si fe ve bo momo.”

³ Aleksey ki a jô na: “Bi mbe bi yeme’e na besiñ bangan ba kômbô dibe Béthel, vôm me mbe me saék. Ve nlem ô nga taé ma éyoñ é nga sili na bi kôlô Béthel.”

4. Bia zu jeñe biyalane ya minsili mivé ayé’é di?

⁴ Abui bobejañ a besita e nga wô’ôtan ane bobejañe ba éyoñ é nga sili na be telé ésaé nkpwa’a mefan é ne ngum aval, nge ke ji ya Béthel. * Bitôtôlô Bekristene bite bi ne yen ayaé ya jô’é ésaé ba nye’e abui. Jé é ne volô be na be dañe nju’u ôte? Aval avé ô ne su’u be? Biyalane ya minsili mite bi ne volô bia bese éyoñ mam méziñ ma tyendé binyiñ biangan.

5. Minju’u mivé mia so éyoñe mintyendan mia kui?

⁵ Éyoñ bia bo ésaé é ne ngum aval vôm éziñ, bi wô’ô mane yembane bôte ya vôm ate a vôm ate émien. Nge jam éziñ da zu bo na bi kôlô, nlem ô ne taé bia angôndô ya abui. Ane ô vaa na bobejañ ba li’i ba jembane bia, bia tyelé fe minleme yôb asu dap, e dañe dañ nge bia te tup amu étibela’a. (Mt. 10:23; 2 Bec. 11:28, 29) Nde fe e nji bo tyi’ibi ya beta taté ésaé vôme mfe, amu bi maneya yembane metume ya vôm bia so; jam ete e ne bo ayaé to’o éyoñ bia bulane nlame wongan. Marie Jo ba Robert ba jô na: “Bi nji kui na bi beta yemban a metume ya jale dangan, e mbe fe é ntoo bia ayaé ya kañete nkobô wongan. Bi mbe bi wô’ôtane ve ane bi ne beyeñ.” Bobejañe béziñ be nga telé ésaé é ne ngum aval ba yiane taté na ba nyoñ ngap a miñyiane miap bebien. Jam ete e ne bo na be bi biyebe, na be ko woñ, a na be bili atek. Jé é ne volô be?

6. Aval avé bi ne ke ôsu a kabetane Yéhôva?

⁶ Kele’e ôsu a kabetane Yéhôva. (Jc. 4:8) Bi ne de bo aya? Éyoñ bia ba’ale ndi nleme na a ne “Nyô a wô’ô meye’elan.” (Bs. 65:2) Besam 62:8 a jô na: “Kula’ane mam me ne mia minlem asu dé.” Yéhôva a ne bo “a dañe mam mese bia sili nge simesan.” (Beép. 3:20) A ye ke ve bia ve abim bia sili nye. A ne fe bo bo mam bi nji bunane me na a volô bia.

7. (a) Jé ja ye volô bia na bi kabetane Yéhôva? (b) Behébreu 6:10-12 a liti na bibotane bivé bia ye bi nge bia ke ôsu a kabetane Yéhôva?

⁷ Asu na ô ke ôsu a kabetane Yéhôva, e ne nya mfii na ô lañ a bindi Mejô me Zambe môse ôse. Mojañ éziñ a mbe missionnaire a jô na: “E ne mfi ya ba’ale mbamba nta’ane mam asu ayé’é ya nda bôt a nkômesane bisulan, fo’o ve aval ô mbe ô bo’o éyoñ ô mbe ô bo’o ésaé é ne ngum aval.” E ne fe mfi na ô bo mam mese ô ne ngule ya bo asu na ô kañete a ayôñ ése mfefé akônda wôé. Yéhôva a ne étyi te vuane ba bese ba ke ôsu a kañe nye, to’o be nji beta bi ngule ya bo abim be mbe be bo’o melu mvus.​—Lañe’e Behébreu 6:10-12.

8. Aval avé kalate 1 Jean 2:15-17 a volô bia na bi bo teke jeñe beta be mam?

 ⁸ Te jeñe beta be mam. Te kañese na mam ma tyelé bôte minleme yôbe mbia émo nyi me bo na ô kate kôme bo Yéhôva ésaé. (Mt. 13:22) Bôte be nji kañe Yéhôva, bemvôé bôé, nge ke bôte ya nda bôte jôé be ne lebe wo na ô jeñ abui moné asu na wo fe ô yené ane môt; te vô’ôlô nja’a be. (Lañe’e 1 Jean 2:15-17.) Futi’i ndi nleme jôé ése ve be Yéhôva étam, nnye a ka’ale na a ye jalé miñyiane miañ ya nsisim a mi ya minsôn ‘mbamba éyoñ.’​—Beh. 4:16; 13:5, 6.

9. Minkana 22:3, 7 a liti na bia yiane sa’ale bikôla amu jé, a jé é ne volô bia na bi nyoñe mbamba mintyi’an?

⁹ Te nyoñe bikôla zezé. (Lañe’e Minkana 22:3, 7.) E ne sili abui moné éyoñ bia yiane kôlô vôm bi mbe bi bo’o ésaé é ne ngum aval, ajô te mojañ éziñ a ne simesane na a yiane nyoñ bikôla. Asu na ô bo teke nyiine bikôla, te nyamete biôm bi nji bo wo nya mfii. Éyoñ nlem ô tyele wo yôp amu ébu’a ya nda bôte jôé ja kon, ô ne kate yemelan abim moné wo yiane kôlé asu na é saéban. Aval biyoñ ete, te vuane na “meye’elan a nja’an” bi ne volô wo na ô nyoñ mbamba mintyi’an. Yéhôva a ne ve wo mvo’é jé, nje éte ja ye ‘ba’ale nleme wôé a asimesane dôé,’ ndembene wo ye bo ngule ya nyoñe mintyi’ane nlem ô bôô wo si ne mieññ.​—Beph. 4:6, 7; 1 P. 5:7

10. Jé ô ne bo asu na ô bi mimfefé bemvôé?

¹⁰ Ba’ale élat a bemvôé bôé. Laan a benyo bemvôé, e dañe dañ ba be tebeya aval été ô tele, kate’e be aval wo wô’ôtan, kate fe be minju’u wo tôbane mie. Nalé a ne volô wo na ô bo teke yene mam ve abé abé. (Ec. 4:9, 10) Ô ne ke ôsu a ba’ale amvôé dôé a bôte ya vôm ô mbe. Ve da sili fe na ô bi mimfefé bemvôé vôm ô zuya tabe. Te vuane na, asu na ô bi bemvôé, womien wo yiane nyoñ ngab a bôte bevok. Jé ô ne bo asu na ô bi bemvôé? Kañete’e bôte bibotan ô nga bi, a bo’o na be wô’ôtane na, ésaé wo bo Yéhôva ja soo wo abui mevak. Bobejañ béziñ be ne bo teke wô’ amu jé wo nye’e ésaé nkpwa’a mefan, ve bevo’o be ne jeñe na be tu’a vô’ôlô wo a bo bemvôé bôé. Te vu bôte be wô’ô kute tôé be jô’ô na: ‘Me nga bo jame si jame ka ékôane Yéhôva, éyoñ éte ba bele fe vaa ma!’

11. Aval avé ô ne ba’ale nda alu’u jôé éyoñ mintyéndan mia te kui?

¹¹ Nge wo te telé ésaé é ne ngum aval amu môt mia nye mi ne nlu’an a te fame ôkon, te ve nye bijô. Aval ete da da, nge wo wo kon, te ve womiene bijô, a te  simesan na wo wo te bo na nyo nnôm nge nyo ngal a telé ésaé é ne ngum aval. Te vuane na mi ne “nsône wua,” a na mi nga bo ngaka’a mise me Yéhôva na, môt ase ya be mia a ye nyoñe ngab a nyô mbok éyoñe ya mvaé a ji ya minjuk. (Mt. 19:5, 6) Nge é ne ke na mia te telé ésaé amu minga a te be’e abum, te mia ve’ele bo na mone wônan a buni na a te mia zu ndaman ésaé, a yiane yeme na a ne nya mfii a dañe ésaé mia to mi bo’ok. Lita’ané nye na mia yene nye ane dase da so be Yéhôva. (Bs. 127:3-5) Katané fe nye mbamba be mam bese Yéhôva a nga bo asu denan, éyoñ mi mbe mi bo’o ésaé é ne ngum aval.

12. (a) Jé bi ne bo asu na ba ba bo ésaé é ne ngum aval na be bo te telé je? (b) Nge wo yeme mojañ a teléya ésaé éte, jé ô ne bo asu na mam me bo nye tyi’ibi?

¹² Abui mekônda a abui bobejañ da jeñe a mezene mese na Bekristen ba bo ésaé é ne ngum aval be kee ésaé jab ôsu. Ba ve be ngule nyôl, ba su’u be a biôm bi mo, ba ve fe be moné, ba nyoñe ngab a bibu’a ya menda me bôte map. (Beg. 6:2) Nge ba te lôme mojañ a te telé ésaé é ne ngum aval akônda dôé, te simesane na ba te foñesô nye amu a te dimine bo ésaé nge ke amu a te bo ékob éziñ. * Volô’ô nye na mam me bo nye tyi’ibi. Nyoñe’e nye a ôsesa, se’e nye asu mbamba ésaé a mbe a bo’ok, to’o a vo’o beta bo je den éko éziñ amu a nto nkôkon. Jeñe’e na ô kôme yeme nye. Jeñe’e na ô yem abime ñyeman a bili, ésaé a nga yé’é, a mam mefe a yeme bo.

13. Mvolan ôvé bi ne ve mojañ a te télé ésaé é ne ngum aval?

 ¹³ Mojañ a telé ésaé é ne ngum aval a ne fe yi mvolan asu na a bi étaba’a, asu ésaé, nge ke bone be mam befe. E ne sili na bi kate nye aval mam ma boban vôm bi too, ane mimôse bidi bi ne abui makit, nge ke aval a ne bi mon abôta si ya bé jôme ya di. E nji dañe bo mfi ve na bi wô’ô nye éngôngol, bia yiane fe jeñe na bi tebe été jé. Éko éziñ émien nge ki ébu’a ya nda bôte jé ja kon. E ne fe bo bo na nlem ô ne nye ntya’an amu a te dimili môt a nye’e. * Nge ke na bobejañe ya vôm a so ba jembane nye abui, to’o a kate ke de môt. E ne sili abui éyoñ asu na a dañe mam mese ntyéndan ôte wo te soo me ényiñe jé.

14. Aval avé bobejañe ya akônda be nga volô sita éziñe na a ba’ale ava’a dé ésaé Yéhôva?

¹⁴ Éyoñ wo kañete a bobejañe bete, ô va’a be ngule nyul, mbamba éve’ela wôé a ne bo na be bo teke yene mam ve abé abé. Sita éziñ a nga saé abui mesi a jô na: “Vôm me mbe me taté be, me mbe me ye’ele bôte Kalate Zambe môs ôse. Ve vôm me ne éyoñ ji, ma kate bi fane ya lañe môt ve éfuse Kalate Zambe nge liti nye vidéo. Bekañete ya akônda dam be wô’ô kee ma minjomane miap a meyé’é map. Éyoñ ma yene ane biwôlô bi bobejañ a besita bite bia kui na bi wulu meyé’é ya Bible, nalé a ve ma ngule ya ke ôsu a kañete. Me nga taté na ma yé’é aval me ne taté minlañ a bôt. Nalé a volô ma na me ba’ale ava’a dam.”

15. Jé ô ne bo asu na ô wume bibuma vôme wo bo ésaé?

¹⁵ Ô ne wume mbamba bibuma vôm ba te lôme wo. Te ve’ele simesane na wo te telé ésaé amu ô ne asuk nge ki amu wo volô ki jôm. Beme’e ôsimesane wôé avale Yéhôva a su’u wo den. Jeñe’e na ô vu Bekristene  ya ntete mimbu ôsu. Mbe bete, éyoñ be nga ‘mialan, be nga ke minlam a kate bôte mejô me Zambe.’ (Mam. 8:1, 4) Nge wo ve ngule ya kañete, ô ne wume mbamba bibuma. Be nga titane bekpwa’a mefan béziñ vôm be mbe be too, ane be nga tyi’i na ba ke su’u ésaé si éfe, amu be mbe be kobô’ô nkobô ya wôé, bekañete ya nkobô ôte ki be jemba’ane si éte. Mvuse bone bengon, abui bôt e nga zu su’u mon angôs bekpwa’a mefan bete be nga bôndé.

16. Jé ô ne bo asu na ô bo ésaé mfefé akônda wôé a mevak?

¹⁶ “Ava’a Yéhôva nde e ne ngule jenan.” (Neh. 8:10) Yéhôva nnye a ne Môt ôsu a bo na bi bi avak, sa ke ésaé bia bo, to’o bia nye’e ésaé éte aya. Ajô te, kele’ ôsu a ba’ale mbamba élat a Ésaa wôé, ô ja’é nye fe’e jé, ô ye’elane fe nye na a liti wo zen a na a su’u wo. Te vuane na, ô mbe ô nye’e ésaé vôme wo so amu ô mbe ô bili nkômbane ya volô bôte ya wôé. Nge nne fe wo saé a été nsisim éte éyoñe ji, Yéhôva a ye volô wo na ô nye’e fe ésaé mfefé akônda wôé.​—Ec. 7:10.

17. Je bia yiane ba’ale a lat a ésaé bia bo den?

¹⁷ Ba’ale na, wo ye ke be’e mbe’e éziñ ékôane Yéhôva nnôm éto, ve ésaé bia bo Yéhôva je ja ye tabe nnôm éto a nnôm éto. Mfefé émo, bia ye bi fane ya bo abui mam asu Yéhôva. Aleksey bia te jôô nye yôp a nga jô na mintyéndan mite mi nga volô nye na a wôn éyoñ minju’u mife mi nga kui nye ényiñ. A jô na: “Me mbe me too ndi na Yéhôva a ne vevea Zambe, a na mfefé émo wo ye so. Ve me mbe me yene’e ve ane môs Yéhôva wo langan. Éyoñe ji ki, a ne ve ane bia Yéhôva bi lôan a mis, a ne fe ane mfefé émo wo ye so akiti.” (Mam. 2:25) Sa ke ésaé bia bo nje é ne jôm, jam da dañe mfi é ne élate jangan a Yéhôva. A ye ke li’i bia étam môs éziñ, ve a ye volô bia na bi ba’ale ava’a dangan nté bia bo nye ésaé a ngule jangan ése.​—És. 41:13.