1-3. Wat da sohn reezn wai ful-taim servants mait haftu chaynj dehn asainment?

WAHN mishineri kopl weh naym Robert ahn Mary Jo seh: “Afta wi mi spen 21 yaaz eena wi mishineri asainment, di too a wi payrents dehn mi geh reeli sik. Wi mi hapi fi tek kyaa a dehn. Bot wi mi sad fi lef di plays weh wi mi lov soh moch.”

² William ahn Terrie seh: “Wen wi mi laan dat wi helt noh wahn alow wi fi goh bak tu wi asainment, wi mi baal. Wi jreem fi serv Jehoava eena wahn difrent konchri mi oava.”

³ Aleksey seh: “Wee mi noa dat di govament mi waahn kloaz dong di branch aafis wehpaat wi mi-di serv. Bot ih mi stil shak wi wen ih mi hapm ahn wi mi haftu lef Betel.”

4. Weh kweschanz wi wahn diskos eena dis aatikl?

⁴ Aalso, wahn lata ful-taim servants, inkloodin dehn wan weh serv da Betel, mi geh nyoo asainment. * Dehnya faytful bradaz ahn sistaz mait fain it haad fi lef wahn asainment weh dehn lov ahn cherish. Bot, weh ku help dehn fi deel wid di chaynj? How yoo ku help dehn? Di ansaz tu dehnya kweschanz ku help aala wi wen wi ekspeeryens chaynjiz eena wi laif.

5. How wahn chaynj a asainment ku afek wi?

⁵ Weda wi di serv da Betel er eena eni faam a ful-taim servis,  ih nachral fi wi lov di peepl an eevn di plays wehpaat wi di serv. Soh wi mait feel reeli sad if wi haftu lef wi asainment. Wi mis wi bradaz ahn sistaz weh wi lef bihain, ahn wi wori bowt dehn, espeshali if wi mi haftu lef bikaaz a persikyooshan. (Mach. 10:23; 2 Kor. 11:28, 29) Aalso, ih mait bee reeli haad fi goh tu wahn nyoo plays bikaaz wi mait haftu ajos tu wahn nyoo kolcha. Wi ku eevn feel dis way wen wi goh bak tu di saym plays wehpaat wi mi groa op. Robert ahn Mary Jo seh: “Bikaaz wi mi-di serv eena wahn nada plays fi soh lang, wi mi feel laik farinaz eena wi oan konchri. Wi neva fameelya nohmoh wid wi oan kolcha an eevn how fi preech eena di langwij weh wi groa op di taak.” Sohn bradaz ahn sistaz weh geh wahn chaynj a asainment mait ga ekspens weh dehn neva ga bifoa. Dehn mait feel frayd, diskorij, ahn mait di wori. Weh ku help?

6. How wi ku stay kloas tu Jehoava?

⁶ Stay kloas tu Jehoava. (Jay. 4:8) How wi ku du dat? Wi ku du dat if wi chros eena hihn az di “Wan weh hyaa wi pryaaz.” (Ps. 65:2) Di skripcha da Psalm 62:8 seh: “Poar owt yu haat fronta hihn.” Jehoava ku du “faar way moa dahn weh wee kud eva aks fa er eevn tink.” (Ifee. 3:20) Jehoava noh onli gi wi weh wi aks hihn fa eena wi pryaaz. Bot hihn mait solv wi prablemz eena wayz weh wi neva ekspek.

7. (a) Weh wahn help wi fi stay kloas tu Jehoava? (b) Akaadn tu Heebrooz 6:10-12, weh wahn bee di rizolt if wi kantinyu fi serv Jehoava faytfuli?

⁷ Fi mek wi stay kloas tu Jehoava, wi need fi reed di Baibl evri day ahn meditayt pahn weh wi reed. Wahn brada weh yoostu bee wahn mishineri seh: “Yu need fi kip wahn regyula skejul a famili wership ahn meetin preparayshan, jos laik weh yu yoostu du eena yu asainment bifoa.” Aalso, yu need fi kip di du aal weh yu kud eena di preechin werk eena yu nyoo kangrigayshan. Jehoava memba dehn wan weh faytful ahn kantinyu serv hihn, eevn if dehn kyaahn du az moch az dehn yoostu du eena di paas.—Reed Heebrooz 6:10-12.

8. How 1 Jan 2:15-17 ku help yu fi foakos pahn weh moa impoatant eena yu laif?

⁸ Kip yu laif simpl. Noh mek di woriz a Saytan werl “choak” yu ahn stap yu fahn  serv Jehoava. (Mach. 13:22) Noh lisn tu peepl weh noh serv Jehoava er tu frenz er relitiv hoo seh yu need fi mek moa moni fi mek yu ku liv beta. (Reed 1 Jan 2:15-17.) Chros eena Jehoava, hoo pramis fi gi wi weh wi need “wen wi need it.” Hihn wahn help wi fi kip wi fayt schrang, fi feel kaam, ahn hihn wahn gi wi di mateeryal tingz weh wi need.—Heeb. 4:16; 13:5, 6.

9. (a) Akaadn tu Proverbs 22:3, 7, wai ih impoatant dat wi noh baro moni if wi noh haftu, ahn weh ku help wi fi mek waiz disizhanz?

⁹ Noh baro moni if yu noh haftu. (Reed Proverbs 22:3, 7.) * Ih ku kaas wahn lata moni fi moov fahn wan plays tu di ada, ahn dis ku kaaz wi fi en op di hoa moni. Fi mek wi ga les ekspens, wi noh fi baro moni fi bai tingz weh wi noh need. Ih ku bee haad fi mek wi disaid humoch moni fi baro wen wi di deel wid wahn sichuwayshan weh di schres wi owt. Fi egzampl, wen wi di tek kyaa a wahn sik famili memba. Eena wahn sichuwayshan laik dat, memba dat if yu ‘pray an aks Gaadʼ fi help, ih ku help yu fi mek di rait disizhanz. Jehoava ku ansa yu pryaaz; hihn ku gi yu wahn kaina pees weh wahn “wach oava [yu] haat ahn [yu] main,” soh dat yu ku disaid wat da di bes ting fi du.—Fil. 4:6, 7; 1 Peet. 5:7.

10. How wi ku mek nyoo frenz?

¹⁰ Stay kloas tu peepl weh wahn gi yu gud advais. Taak tu yu kloas frenz bowt how yu di feel ahn di chalenjiz weh yu di fays, espeshali if dehn maita mi gaahn chroo di sayhn ting. If yu du dis, ih mait help yu feel beta. (Eccl. 4:9, 10) Di frenz weh yu mi mek eena yu asainment bifoa wahn kantinyu fi bee yu frenz. Bot now, eena yu nyoo asainment, yu need fi mek nyoo frenz. Memba dat fi mek yu ga wahn fren, yu need fi bee frenli. How yu ku mek nyoo frenz? Tel adaz bowt di gud ekspeeryens weh yu mi ga eena Jehoava servis soh dat dehn ku si yu jai. Som eena di kangrigayshan mait noh andastan wai yu lov ful-taim servis, bot adaz mait waahn noa moa ahn dehn wahn geh fi bee yu gud frenz. Bot noh taak tu moch bowt yuself er bowt di tingz yu mi du eena Jehoava servis, ahn noh foakos pan eni bad feelinz yu mait ga.

11. How yu ku kip yu marij hapi?

¹¹ If yu mi haftu lef yu asainment bikaaz a yu hozban er waif helt, noh blaym dehn far it. Pahn di ada han, if yoo da-mi di wan weh mi ga helt prablemz, noh feel gilti ahn tink dat yu let yu hozban er waif dong.  Memba, unu da “laik wan persn,” ahn wen unu mi geh marid, unu mi pramis Jehoava fi tek kayr a eech ada noh mata weh hapm. (Mach. 19:5, 6) If yu mi lef yu asainment bikaaz yu mi wahn ga wahn baybi weh yu neva plan fa, mek shoar yu chail noa dat hihn moa impoatant tu yoo dan yu asainment. Aalwayz tel yu chail dat yu si ahn az wahn “gif fahn Jehoava.” (Ps. 127:3-5) Aalso, tel yu chail bowt di wandaful ekspeeryens dehn weh yu mi ga eena yu asainment. Wen yu du dis, ih ku moov yu chail fi yooz ih laif eena Jehoava servis jos laik weh yoo mi du.

12. (a) How wi ku help wi bradaz ahn sistaz eena ful-taim servis fi kantinyu eena dehn asainment? (b) How wi ku help dehn fi ajos tu dehn nyoo asainment?

¹² Ih nais fi si dat wahn lata kangrigayshan ahn difrent bradaz ahn sistaz di help dehn bradaz eena ful-taim servis fi stay eena dehn asainment. Dehn du dis eena lata difrent wayz. Fi egzampl, dehn inkorij dehn, dehn gi dehn mateeryal tingz weh dehn mait need, ahn dehn help dehn tek kyaa a dehn famili membaz bak hoam. (Gal. 6:2) If som bradaz ahn sistaz eena ful-taim servis geh wahn nyoo asainment fi serv da fi yoo kangrigayshan, noh tink dat da bikaaz dehn mi du sohnting rang. * Insted, help dehn fi ajos eeziya. Gi dehn wahn waam welkom ahn komen dehn fi di werk weh dehn mi du, eevn if dehn kyaahn du az moch bikaaz a helt prablemz. Geh fi noa dehn. Laan fahn di lata nalij, chraynin, an ekspeeryens weh dehn ga.

13. Weh kaina help wi ku gi tu wi bradaz ahn sistaz weh geh wahn nyoo asainment?

 ¹³ At fers, di bradaz ahn sistaz weh geh wahn nyoo asainment mait need yu help fi fain wahn plays fi liv, wahn way fi get rong, wahn jab, an ada tingz weh dehn need. Dehn mait aalso need op-tu-dayt infamayshan bowt evriday mataz, laik how fi pay dehn bilz ahn how fi geh Intanet. Bot di moas impoatant ting weh dehn need fahn yu da fi yu chrai fi andastan dehn sichuwayshan. Dehn er sombadi eena dehn famili mait ga helt prablemz weh dehn di fain haad fi deel wid. Dehn mait di moarn oava di det a wahn famili er fren. * An eevn if dehn noh taak bowt it, dehn mait feel sad bikaaz dehn mis dehn frenz weh dehn mi ga eena dehn laas asainment. Dehn mait feel kanfyooz ahn need taim fi werk tingz owt.

14. How sohn loakal poblishaz mi help wahn sista fi ajos tu ih nyoo asainment?

¹⁴ If yu preech wid dehn an inkorij dehn bai yu gud egzampl, yu ku help dehn fi ajos tu dehn nyoo asainment. Wahn sista weh mi serv fi wahn lata yaaz eena wahn neks konchri seh: “Eena mi asainment bifoa, Ah yoostu kandok Baibl stodiz evri day, bot eena mi nyoo asainment, ih mi haad fi eevn geh wahn chaans fi oapm di Baibl er fi shoa wahn veedyo eena di minischri. Bot di bradaz ahn sistaz eena mi nyoo kangrigayshan mi aks mi fi goh wid dehn pahn dehn ritern vizit ahn Baibl stodiz. Wen Ah si dehn faytful ahn haad-werkin bradaz ahn sistaz kandok Baibl stodiz, ih mi mek Ah feel beta bowt di teritori. Ah mi laan how fi staat wahn kanvasayshan eena di nyoo teritori. Aala dis mi help mi fi bee hapi agen.”

15. How yu ku ga sokses eena yu nyoo asainment?

¹⁵ Yoo ku ga sokses eena yu nyoo asainment. Noh tink dat yu neva du gud werk eena di asainment weh yu mi ga er dat yu ga les valyu now. Tink bowt aal di difrent wayz weh Jehoava di help yu now  ahn kantinyu fi preech. Kapi di egzampl a di faytful Kristyanz eena di taim a di apasl dehn. Noh mata wehpaat dehn mi deh, dehn “gaan aal bowt ahn staat preech di mesij.” (Aks 8:1, 4) If yu kantinyu fi preech, yu mait ekspeeryens gud rizolts. Fi egzampl, sohn painyaaz weh di govament mi kik owta wahn konchri mi moov tu wahn nada konchri weh mi deh kloas tu wehpaat dehn mi aalso need help eena fi dehn langwij. Eena jos wahn fyoo monts, wahn lata peepl mi jain di nyoo groop eena di langwij weh di painyaaz dehn mi-di preech eena.

16. How yu ku fain jai eena wahn nyoo asainment?

¹⁶ “Di jai a Jehoava da yu schrent.” (Neh. 8:10, ftn.) Wi graytis jai shuda kohn fahn wi rilayshanship wid Jehoava, noh fahn wi asainment, eevn if wi lov it. Soh if wi waahn ga jai, wi shuda stay kloas tu Jehoava, kantinyu fi pen pahn hihn fi wizdom, gaidans, ahn sopoat. Memba dat yu mi lov yu asainment weh yu mi ga bifoa bikaaz yu mi du yu bes fi help di peepl wehpaat yu mi asain. Soh put yu aal intu yu nyoo asainment ahn si how Jehoava wahn help yu fi lov it tu.—Eccl. 7:10.

17. Weh wi mos memba bowt wi nyoo asainment?

¹⁷ Wi mos memba dat wi wahn serv Jehoava fareva, ahn weh wi du fi hihn now mait noh bee weh wi wahn du fi hihn eena di nyoo werl. Aleksey, weh wi mi menshan erliya, bileev dat fi hihn chaynj a asainment di pripyaa hihn fi dat. Hihn seh: “Ai mi aalwayz noa dat Jehoava ahn di nyoo werl reel, bot sohnhow dehn mi seem faar away. Now Ah reeli kloas tu Jehoava, an ih feel laik if di nyoo werl deh rait rong di kaana.” (Aks 2:25) Noh mata wat da wi asainment, mek wi stay kloas tu Jehoava. Hihn wahn neva lef wi, hihn wahn help wi fi fain jai eena wateva wi ku du eena fi Hihn servis, noh mata wehpaat wi deh.—Isa. 41:13.