1-3. Ka burí uagu mosu lubéi hígiruni saragu lubúeingu Bungiu heseriwidun lidan dan dayarüti?

HARITAGUA lágili Robert tuma Mary Jo, lárigiñe meha heseriwidun kei misioneru luagu 21 lubuidun irumu, aba hasandirun hagübürigu. Ariñagatiña: “Hínsiñeti meha woun wóunigiruniña wagübürigu. Gama lumoun, gáriti meha woun wígiruni fulasu le hínsiñebei woun saragu ani dariguadiwa meha woungua ñein”.

² Ariñagatiña amu feru maríeitiña gíritiña William tuma Terrie: “Dan le wíchugunbei fe siñabei lan wagiribudun lidoun fulasu le ñein lubéi weseriwida ladüga luriban átuadi, aba wañuurun ayahuaha. Ñein lagumucha weseriwidun lidan amu ageiraü”.

³ Ariñagati Alexéi: “Subudi wamuti meha busén hamá wáganiñu lun hadourunun sukursáli to ñein nubéi. Gama lumoun wéiritimati ligari dan le habihini le habusenrunbei, aba wáfuridun tídangiñe Beteli”.

4. Kaba burí álügüdahani wóunaba lidan arütíkulu le?

⁴ Mámarügüñanu íbirigu ha agagibudagua luma iseri gádantiña. Susereeli giñe aban katei ítarati houn saragu milu betelitagu luma houn amu íbirigu ha eseriwidubaña lidan dan dayarüti. * Másiñati hénrengu lan houn íbirigu úaraguatiña ha hígiruni hadasin le hínsiñebei houn ani héchuhaña luagu. Ka gayaraabei líderaguniña? Ka gayaraabei wadügüni hawagu? Líderagubadiwa lóunabagüle álügüdahani le danme le wagagibudagun luma asansiruni lidan wabagari.

5. Ka gayaraabei lasuseredun dan le lasansirun weseriwidun?

⁵ Dandu anhein weseriwiduña lubéi Betelirugu o lidan amu eseriwiduni, chülüti dan lun hínsiñedun gürigia woun luma fulasu le ñein lubéi weseriwida. Ligíati dan le mosu lan wígiruni weseriwidun lidan ítaga fulasu, gáriti woun. Álugatiwa hawagu ha wígirubaña warigiñegua, nidiheri wagía hawagu, dántima le mosu lan wáfuridun lídangiñe fulasu ligía ladüga lamahadúniwa lun wapurichihan ñein (Mat. 10:23; 2 Ko. 11:28, 29). Anihein dan dan le wagumeserun eseriwida lidan aban fulasu dúnguatiwa luma amu échuni, íbini dan le wagiribudun le ñein lubéi meha wawinwanda. Ariñagati Robert tuma Mary Jo: “Méchuhadiwa meha luagu wechun ani ámuti meha wasandiragun woungua dan le wapurichihan lidan wañeñe guánarügü. Genegeti meha woun mésebehadiwa lan wageira”. Luéigiñe amu oubaü, másiñati wagagibudagun sódini luma maseinsuni. Háfuga wasandiragun woungua lau machouruni ani lau maguraasuni. Ka gayaraabei líderaguniwa lidan kesi le?

6. Ida liña werederun yarafañu lun Heowá?

⁶ Werederun yarafañu lun Heowá (Sant. 4:8). Ida luba wadügüni? Wafiñerun luagu, lugundun ‘aganba lumuti afurieiduni!’ (Sal. 65:2). Ariñagati Sálumu 62:8: “Hadimureha lidan furíeigi lau sun hemenigin!”. Gabafuti Heowá “lun ladügün gibe sügǘ lau le wamuriahabei o le lan wasaminarubei” (Efe. 3:20). Mámarügüñein le wamuriahabei luma lidan furíei líchiga woun. Lun laransehani waturobulin, gayaraati ladügün somu katei le magurabun wamuti o le masaminarungubei wamuti.

7. a) Ka gayaraabei líderaguniwa lun werederun yarafañu lun Heowá? b) Según Ebüréu 6:10-12, kaba wibiha ánhawa asigira eseriwida lun Heowá lau úaraguni?

⁷ Líderagubadiwa giñe lun yarafañu wamá lun Heowá, lau waliihanu Bíbülia sagü weyu, ráramagua wagía asaminara luagu le waliihabei. Ariñagati aban binadu misioneru: “Mégeiwati lun ladügǘn áhuduraguni lun Bungiu kei iduheñu luma lun waranserun lubá adamuridaguni súnwandan, ítara kei meha dan le lídangidiwa binadu weseriwidun”. Lanwoun lira, adüga waméi sun wayaraati lun wapurichihan úara hama lílana iseri damuriguaü. Mabulieidun lubaña Heowá ha eseriwidubaña lun lau úaraguni, íbini siñá  lan hadügün saragu kei meha (aliiha huméi Ebüréu 6:10-12).

8. Ida liña líderaguniwa dimurei le lídanbei 1 Huan 2:15-17 lun mibe lan wámati?

⁸ Mibe lan wámati. Mígira wamá lun ladügün idiheri lánina ibagari le lídanbei ubóu le lábugiñebei lubafu Satanási lun meseriwidun wamá lun Heowá (Mat. 13:22). Madüga wamá gasu lau le hariñagubei umadagu, iduheñu o amu gürigia woun, íbini genege lan busén hamá buiti woun lun buidu lan lidin woun lidan ubóu le (aliiha huméi 1 Huan 2:15-17). Afiñe wamá luagu Heowá le füramase haalibei woun líchugubei lan sun “wemegeiru” woun lun here lan wafiñen, lun buidu lan wasandiragun woungua luma lun wibihini le wemegeirubei (Ebü. 4:16; 13:5, 6).

9. Según Ariñawagúni 22:3, 7, ka uagu súdini lubéi lun madúeiha wamá dan le mama lan mosu wadügüni ani kaba íderaguawa lun wanúadirun buidu kaba lan wadüga?

⁹ Madúeiha wamá dan le mama lan mosu wadügüni (aliiha huméi Ariñawagúni 22:3, 7). Gayaraati ladügün láguyun gürigia lidoun amu fulasu lun lafayeirun saragu seinsu luma lun labuinchun lau dúeiti. Ligíati mafuredeha wamá seinsu lun wagañeiha katei le memegeirun wamuti. Dan le wásügürün lídangiñe aban sügǘ le ruti idiheri woun, kéiburi hóunigiruniwa iduheñu ha sándibaña, másiñati hénrengubei lan woun wanúadirun átiribei lan seinsu wafurendeirun. Lidan aban sügǘ ítarati, buiti lun waritaguni gayara lan líderaguniwa wafurieidun lun Bungiu lun wasubudiruni kaba lan wadüga. Ábameti líchuguni Bungiu lidarangilan woun lun lóunigirunu wanigi luma sun wasaminan, ani líderagubadiwa lun wasaminaruni katei lau darangilaü (Fili. 4:6, 7; 1 Fe. 5:7).

10. Kaba íderagua adüga iseri umadagu?

¹⁰ Buidulá wanaagun woungua hama waduheñu luma hama wamadagu. Ayanuha wamá luagu le wasandirubei luma luagu le asuseredubei woun houn wamadagu, hámatima ha sügühañabaña lídangiñe le wásügürübei. Ladügüba katei le lun buidu lan wasandiragun woungua (Apur. 4:9, 10). Íbini mabulieidun wamaniña wamadagu ha lídanbaña fulasu le ñein lubéi meha weseriwida, mégeitiwa wáluahan iseri umadagu. Lun lira lunti wadügün umadagu. Abahüdaha waméi abiniruni le ru láalibei Heowá woun lun hasubudiruni ugundani le wawagubei dan le weseriwidun lun. Íbini ua lan gunfuranda hamani fiu íbirigu ubebeni le wasandirubei lau weseriwidun lidan dan dayarüti, másiñati ñéinbaña lan ha busenbaña heseriwidun lun Heowá lidan dan dayarüti ladüga wani hénpulu ábati gamadagua wamá hama. Gama lumoun duari wamá luéi werederun ayanuha luágurügü le wadügübei o luagu luriban wasandiragun woungua.

11. Ida luba wasigirun gúndaañu keisi maríeitiña?

¹¹ Anhein maríei wabéi ani aba wígiruni weseriwidun lun Heowá ladüga lasandirun aban wádangiñe, míchiga waméi duru luagu ni aban wádangiñe. Ánheinti wagía lubéi sándibei masandiragua  wamá woungua lau duru ni lun wasandirun charaadiwa lan houn wámari. Haritagua waméi ítara waña lan kei “ábanrügü gürigia” ani füramase haadiwa lan lun Heowá wóunigiraguba lan wámagua súnwandan (Mat. 19:5, 6). Luéigiñe amu oubaü, anhein ladüga lubéi dageinaü magurabunti wígirei weseriwidun, chóurugüda waméi lun wasaani súdinitima lan woun sügǘ lau eseriwiduni le meha ñein wabéi. Ariñaga wamá lun súnwandan, ariha wamani kei aban idewesei lúmagiñeti Heowá (Sal. 127:3-5). Ayanuha wamá luma luagu lubuidun wásügürüni lidan weseriwidun lidan dan ligía, lugundun gayaraati línchahani katei le lun layusuruni libagari lun leseriwidun lidan dan dayarüti kei meha wadügüni.

12. a) Ida luba wíderaguniña íbirigu ha eseriwidubaña lidan dan dayarüti lun hasigirun lidan heseriwidun? b) Ka gayaraabei wadügüni lun ménrengun lan asansiruni houn?

¹² Anihein saragu damuriguaü, ítara kei saragu íbirigu, ha adügübalin hayaraati lun híderaguniña íbirigu ha lídanbaña dan dayarüti lun hasigirun lidan heseriwidun. Kei hénpulu, rútiña gurasu houn lun hasigirun lidan heseriwidun, rútiña seinsu houn o amu katei le hemegeirubei ani góunigi hamutiña giñe íbirigu haduheñu ha eseriwidubaña lidan dan dayarüti. Sun áfaaguni le wéiriti lebegi (Gal. 6:2). Ka gayaraabei wadügüni ánhaña achülüra hádangiñe íbirigu ha eseriwidubaña lidan dan dayarüti lidoun damuriguaü le ñein wabéi? Masaminara wamá ladüga lan magunfulirun hamá íbirigu ha buidu lau heseriwidun o adügaña lan somu katei wuribati lasansirubei heseriwidun. * Le lunbei wadügüni, adüga wamá lun ménrengun lan asansiruni houn. Resibi wamaña lau ínsiñehabuni ani ariñaga wamá  houn gunda wamá lau le hadügübei, íbini adüga lan luriban hátuadi lun meseriwidun hamá kei meha. Áfaagua wamá lun wasubudiruniña buidu. Furendei wamá lídangiñe hasubudin, furendei wamá giñe lídangiñe furendei le ibiha hamaalibei luma le winwan hamaalibei lidan heseriwidun.

13. Ida luba wíderaguni aban íbiri le ibihibei aban iseri dasi lidan leseriwidun?

¹³ Dan le lachülürün íbiri ligía, háfuga megei lan líderawagun lun ladarirun halíaba lan leredera, kaba lan ida laweiyasuha, ladarirun wadagimanu o amu katei. Háfuga mosu lan lafuranguagüdüniwa lun ka burí lan katei lunbei gabaroun lani súnwandan, kéiburi luáguti lafayeihóun liseinsuna gumadi, o luáguti tasagahóun somu gárada. Gama lumoun, létima lemegeirubei lun gunfuranda wamani, mámarügü lun lagudemedagun woun. Háfuga wuriba lan látuadi o látuadi somu liduhe. Másiñati giñe lasufuriruña lan ladüga lounwen somu liduhe. * Íbini mariñagun lani, háfuga hiru lan ladüga áluga lan hawagu lumadagu. Barüti saragu dan lun gayara lan lásügürün burí katei le.

14. Ida liña híderagunu íbirigu aban íbiri lun téchudun lidan iseri fulasu le ñein lubéi teseriwida?

¹⁴ Lidan burí sun dan ligía, gayaraati ladügün ídemuei le wíchugubei luma wani hénpulu lun échudeina lan lidan iseri leseriwidun. Ariñagatu aban íbiri to eseriwiduboun luagu saragu irumu lidan amu ageiraü: “Lidan binadu neseriwidun, rútina meha aturiahani tídangiñeti Bíbülia sagü weyu. Ánheinti lidan iseri neseriwidun hénrenguti meha nun íbini lun naliihan aban bérusu tídangiñeti Bíbülia o narufudun aban bidéu lidan apurichihani. Gama lumoun, agunbiraha hamutina meha dandu íbirigu eyeriñu kei hiñaruñu ha lídanbaña iseri nadamuridagun agiribuda abisidahaña gürigia luma íchiga aturiahani úara hama. Narihini ubebeni luma ganigi le harufudubei íbirigu ha lau híchugun aturiahani houn gürigia ha awanserubaña, íderagua lumutina lun buidu lan nasandiragun nungua. Furendeihadina apurichiha lidan iseri fulasu le ñein lubéi neseriwida. Seremei sun katei le, ábaya gunda nan”.

15. Ida luba gunda wamá lidan aban iseri eseriwiduni?

¹⁵ Gayaraati gunda wamá lidan aban iseri eseriwiduni.  Masaminara wamá wuribarügü liña lan wadügüni wawadigimari lasansirubei weseriwidun, masaminara wamá giñe wagiribuduña lan warigóun. Áfaagua wamá warihini ida liña lan líderaguniwa Heowá ani sigí wamá apurichiha. Áyeiha wamaña kristiánugu úaraguatiña ha awinwandubaña lidan furumiñeti sígulu, “aba hapurichihani uganu buiti le ñein lumuti houdin” (Adü. 8:1, 4). Ánhawa asigira apurichiha, másiñati buídubei lan lidin woun. Kei hénpulu, aban habugún fiu prekursorugu lídangiñe aban ageiraü ani aba háguyun lidoun amu le ñein lubéi mégeiwa lan lapurichihóun lidan hererun. Lídanrügü fiu hati, aba ñein lan aban iseri sétanu le aganwoundubei lau lóufudagun.

16. Kaba íderaguawa lun gunda wamá lidan iseri weseriwidun?

¹⁶ Ariñagati Neemíasi houn huríu ugundani lan le líchugubei Bungiu haramudaguagülebei (Neem. 8:10). Meberesenga anhein hínsiñe lubéi fulasu le ñein lubéi weseriwida woun, mama ladüga lira lun gúndaabadiwa lan, le lunbei ladügün lun gunda wamá, wamadagua luma Heowá. Ligíati ítarameme wamá éibuga luma Wabungiute afiñeñu líchuguba lan lichú au woun, adundehani ani líderagubadiwa. Haritagua waméi le lan adügübei lun hínsiñe lan binadu weseriwidun woun wíchaagun meha woungua tídangiñe sun wanigi lun wíderaguniña gürigia. Líderagubadiwa Heowá lun wasandiruni ligiaméme lidan iseri weseriwidun anhein wadüga tídangiñe sun wanigi (Apur. 7:10).

17. Ka lunbei gabaroun wamani luagu dasi le wadügübei guentó?

¹⁷ Lunti gabaroun wamani weseriwiduña lan lun Heowá lun súnwandan, ánheinti dasi le wadügübei guentó lúnrügüñein murusun dan. Lídanme iseri ubóu, háfuga sun wagía lasansiruba ligaburi weseriwidun. Saminati Alexéi, le uágubei wayanuha lidan lagumeseha arütíkulu, le lan lawinwandubei guentó laranseruñein lan lubá ámuñegü. Ariñagati: “Súnwandan subudi nani inarüniti lan Heowá luma iseri ubóu, gama lumoun saminatina meha dise lan Heowá nuéi ani dísegili lan iseri ubóu. Guentó ariha numuti Heowá nubá nubá ani sanditina yarafatimahali lan iseri ubóu” (Adü. 2:25). Meberesenga halía lan weseriwida, sigí wamá éibuga luma Heowá. Maweiyasunbei ígirawa; lubaragiñe lira, líderagubadiwa lun gunda wamá lidan wadügüni sun wayaraati lidan weseriwidun lun, meberesenga halía lan (Isa. 41:13).