GONDO 34
Nzila yo wonisana ni kutxitxa ka siavelo
“Txizimu kha txi nga ni tshofu. Kha txi na kudivala mthumo wanu, ni lirando li mi nga li kombisa ka ditina da txona.”—VAHEB. 6:10.
NDANDO 38 Txizimu txi na kutsanisa
ATI HI NO TI GONDA *
1-3. Nji txani txi nga mahako to vanathu va va ku ka mthumo wa mbimo yotshe ti sunga ku ve leka siavelo?
ROBERT NI MARY JO va womba tiya: “Msana ko va hi di hetile 21 wa malembe hi txi thuma kota varumiwa, votshe vaveleki vathu va khatile kulwala. Ti txi hi tsakisa ku va khatalela. Kambe ti hi karatete kukhukha mu hi nga ti thuma kona.”
2 William ni Terrie va khona: “Mbimo yi hi nga ziva to hi na mbi sikota kutshumela ka txiavelo txathu ngu mhaka ya malwati hi to dila. Mixuwo yathu i di yo thumela Jehovha ka matiko a hahanze, kambe se ti si na kukoteka.”
3 Mwanathu Aleksey a khene: “Hi txi ti ziva to wukoma wu ti lava kuvhala hofisi ya didhavi a mu ni nga ti thuma kona. Kambe, mbimo yi toneto ti nga humelela hi wikile msana ni ku ti lavile hi huma Bhetele.”
4. Ngu sihi siwotiso si hi no bhula ngu sona?
4 Vanathu vo tala va va nga di ka mthumo wa mbimo yotshe ko fana ni Bhetele va mananile ni kutxitxa ka siavelo. * Vanathu vonevo vo thembeka ti nga va karatela kuleka txiavelo txi va nga txi txi dhunda ngutu. Nji txani txi nga va vhunako kuwonisana ni kutxitxa koneko? Awe u nga va vhunisa kutxani? Tixamulo ta siwotiso soneso ti nga hi vhuna hotshethu ngako hi txi manana ni kutxitxa koneko.
NGAKO TXIAVELO TXI TXI GUMA MWENDO KUTXITXA
Ngu kutxani ti nga karatako mbimo yi txiavelo txi gumako? (Wona ndimana 5) *
5. Kutxitxa mwendo kuguma ka siavelo ku nga hi gwesisa kutxani?
5 Mwendo hi thumela Bhetele mwendo ka mthumo wumwani wa mbimo yotshe, ti nga maha hi di tolovete wukhalo wonewo mwendo ku va ni vangana vo tala ka wukhalo wonewo. Ngako hi txi thuka hi khukha ha pandiseka ngutu. Hi nga va xuva vanathu, hambi kukarateka ngu vona ngutu-ngutu i di to hi khukha ngu mhaka ya kuxaniswa ngu vakaneti. (Mat. 10:23; 2 Vak. 11:28, 29) Kuengetela ka toneto, hi txi txitxa txiavelo hi ya thuma kumwani mwendo txi txi guma, ti nga hi karatela ku ya tolovela wukhalo wa wuphya. Robert ni Mary Jo va khona: “Hi ti yi divate ni nzila yo txhumayela ka wukhalo wu hi nga kula ka wona nguko ti txi hi karatela kutxhumayela ngu lidimi lathu. Hi txi tipfa nga ho va va ditiko dimwani.” Vamwani va va mananako ni kutxitxa ka siavelo va nga manana ni txikarato txa timale. Va nga tipfa va si na themba ni ku va di ni dikhodho. Nji txani txi nga va vhunako?
Nda lisima kuzumba hafuhi ni Jehovha ni ku mthemba (Wona tindimana 6-7) *
6. Hi nga maha txani kasi ku hi si zumbe kule ni Jehovha?
6 U nga zumbe kule ni Jehovha. (Jak. 4:8) Hi nga mahisa kutxani toneto? Ti lava hi themba Jehovha hi khumbula to ene “wa engisa mikombelo yathu.” (Mas. 65:2) Dibhuku da 1 Pedro 5:7 di womba tiya: “Vekani masoni ka Txizimu kotshe kukarateka kwanu.” Txizimu txi nga ‘sikota kumaha sasingi ngutu kupinda asi hi txi kombelako mwendo asi hi si pimisako.’ (Vaef. 3:20) Jehovha kha gwiteli ko maha ati hi mu kombelako dwe. Ene a nga maha to pinda ti athu hi ti pimisako kasi kululamisa sikarato sathu.
7. a) Nji txani txi no hi vhuna kuzumba hafuhi ni Jehovha? b) Ngu kuya ngu Vahebheru 6:10-12, hi na wuyelwa ngu txani hi txi simama hi thumela Jehovha ngu kuthembeka?
7 Kasi kuzumba hafuhi ni Jehovha, lera Bhiblia ditshiku ni ditshiku ni kualakanyisisa ngu ti u nga lera. Mwanathu mmwani i ku kale a txi thuma kota murumiwa a khene: “Simama ni txiemiso txako txa wukhozeli wa mwaya ni txo lulamisela mitshangano nga ti u nga ti mahisa tona u di ngadi ka txiavelo txako txa kale.” Txhumayela kumweko ni dibanza adi se u ku ka dona. Jehovha kha va divali ava va simamako ve mu thumela ngu kuthembeka, hambi va si ti koti kumaha ati va nga txi maha kale.—Lera Vahebheru 6:10-12.
8. Mapswi aya ma ku ka 1 Johani 2:15-17 ma nga hi vhunisa kutxani ti to hi hehukisa wutomi?
8 Hehukisa wutomi. U nga leke sithikamezo sa mafu awa a Sathani si “kama” mithumo yako ya moya. (Mat. 13:22) U nga leke ditiko mwendo maxaka ni vangana ve kukuzetela kulava male yo tala. (Lera 1 Johani 2:15-17.) Themba Jehovha, ene a thembisa to a na hi vhuna ngu didhawa da moya, da matipfelo ni da nyama “ngu mbimo yi yi fanelako.”—Vaheb. 4:16; 13:5, 6.
9. Ngu kuya ngu Mavingu 22:3, 7, ngu kutxani ti di ni lisima kwa mbi lomba male ti si sungi? Hi nga vhunwa ngu txani ti to hi maha sisungo sa wutxhari?
9 U nga lombe male ti si sungi. (Lera Mavingu 22:3, 7.) Kurura ku nga thuka ku kudyela male yo tala, se ta hehuka kulomba male ti si sungi. Kasi ku u vayilela sikweneti, u nga lombe male ti to u xava asi ti si sungiko ku si xava. Ti nga karata kuwona to i male muni hi nga lombako ngako hi di jujekile msungo ngu sikarato so fana ni kulwalelwa. Ka siemo so nga soneso, u nga divale to ‘mkombelo’ wu nga kuvhuna kumaha sisungo sa wutxhari. Jehovha a xamula mikombelo yako ngu ku kuninga kudikha aku ku no ‘veketa mbilu yako ni mialakanyo yako,’ e kuvhuna kumaha sisungo sa sinene.—Vaf. 4:6, 7; 1 Pedro 5:7.
10. Hi nga va manisa kutxani vangana?
10 Vana ni vangana va vanene. Bhula ni vangana vako ngu matipfelo ni sikarato si u mananako naso, ngutu-ngutu ava va nga nga manana ni sikarato so nga soneso. Ngako u txi maha toneto u na tipfa kwati. (Ekl. 4:9, 10) Vangana va u nga ti navo ka txiavelo txako i ngadi vangana vako. Kambe, ka txiemo txa txiphya ti na lava u mana vangana va vaphya. Khumbula ti to kasi ku u mana vangana ti lava u va ni maseko. U nga mahisa kutxani? Bhula ni vangana vako ngu makatekwa ya Jehovha a nga kuninga, kasi ku ve ti wona to u thumela Jehovha ngu litsako. Hambi i di ti to vamwani dibanzani kwako kha va kuwoni kuhiseka kwako ngu mthumo wa mbimo yotshe, kambe vamwani va nga lava kutekelela txikombiso txako se ve va vangana vako. Ti wonele ku mbimo yotshe u si zumbeli kubhula ngu tako dwe, mwendo kuzumbela kudila-dila ngu sikarato.
11. U nga maha txani kasi kusimama u va ni litsako ni mkatako?
11 Ngako txiavelo txako txi di gumile nguko mngana wako wa wukati a nga ti lwala, u nga mu sole. Kambe ngako i ti awe u nga ti lwala u nga tipfi mnando u pimisa to mkatako a na kusola. Khumbula to konkuwa mi “nyama yimweyo,” ni ku mi thembisile Jehovha kukhatalelana hambi ku txi humelela tihi ni tihi. (Mat. 19:5, 6) I di ti to mi to leka txiavelo ngu mhaka ya txirumbo txo mbi txi rinzela, mahani to mwanana wanu e pfisisa to ene mbwa lisima ngutu kupinda txiavelo txi mi nga ti natxo. Gelani mwanana wanu to ene i “thomba” yo ta ngu ka Txizimu. (Mas. 127:3-5) Kambe mi nga divale ku mu gela makatekwa ya mi nga ma mana ka txiavelo txonetxo. Mi txi maha toneto mi na kuzeta mwanana wanu e belela mthumo wa mbimo yotshe kufana ni nanu.
VAMWANI VA NGA VA VHUNISA KUTXANI?
12. a) Hi nga maha txani ti to hi vhuna va va mananako ni kutxixa ka siavelo ti to ve simama ve thumela Jehovha? b) Hi nga maha txani ti to hi va vhuna ve tolovela?
12 Ta tsakisa kuziva to mabanzani vanathu va maha totshe kasi kuvhuna vanathu va va mananako ni kutxitxa ka siavelo kusimama ve thumela Jehovha. Vona va maha toneto ngu ku va kuzeta ku ve simama ni mthumo wa mbimo yotshe, va va vhuna ngu male, silo simwani, mwendo ku va vhuna ngu kuxayisa vaveleki vawe ava va zumbako kule. (Vag. 6:2) Ngako ava va ku ka mthumo wa mbimo yotshe txi txi guma txiavelo ve ta thumela dibanzani kwako, u nga pimisi ti to ko va ni ta walo va nga maha se vo tsayiswa. * Hahanze keto, va vhuni ve tolovela. Va hoyozele ngu manza mambidi u txi va ndunduzela ngu mthumo wawe, hambi va si swi ve maha to tala ngu mhaka ya malwati. Maha wungana navo. Londola kugonda to tala ka wusikoti wawe.
13. Hi nga maha txani kasi kuvhuna va vo ngadi kuhoka dibanzani kwathu va va nga manana ni kutxitxa txiavelo?
13 Vanathu va va mananako ni kutxitxa siavelo u nga va vhuna va di ngadi kuhoka dibanzani kwako kasi ku ve mana wukhalo wo zumba ka wona, mabelelo ya maxapa. Mwendo hi nga va komba tinzila to ya sitolo govani mwendo kumwani. Kha ti lavi ku hi zumbela kudila navo, kambe hi zama kupfisisa txiemo txawe. Ti nga maha va txi wonisana ni malwati awe vapune mwendo va txi lwalelwa ngu dixaka. Mbimo yimwani va nga maneka va di pandisekile ngu kufelwa. * Ni ku, ti nga maha va txi pandiseka ngu kukhumbula vangana vawe ka txiavelo txi txi nga guma. Ti nga teka mbimo kala ku za ve tolovela matipfelo oneyo.
14. Vanathu va m’vhunisile kutxani mwanathu ku e tolovela txiavelo txakwe txa txiphya?
14 Ngako u txi va seketela ni ku va vekela txikombiso txa txinene ti na va vhuna ku ve tolovela. Mwanathu mmwani wa txisikati awu a nga thuma ka ditiko da hahanze a khene: “Ka txiavelo txango txa kale ni ti tsimbitisa sigondo ditshiku ni ditshiku. Kambe konkuwa ka txiavelo txiya ni ku natxo ti ti ni karatela kumana ni mkhanjo wo tula Bhiblia mwendo kukombisa vhidhiyo. Hambi keto, vanathu va ti ni ramba ka maendo ni ka sigondo sawe. Kuwona txibindi ni kuhiseka ka vanathu va txi tsimbitisa sigondo si si vekako mihando ti ni vhuni kuva ni mawonelo a manene. Se ni gondile kukhata mabhulo. Totshelele tiya ti ni vhunile kuwuseta litsako langu.”
U NGA WONE MSANA
Lava tinzila to andisa mthumo wo txhumayela ka wukhalo wako (Wona tindimana 15-16) *
15. U nga vhunwa ngu txani ti to u humelela ka txiavelo txako?
15 Phela u nga sikota kuhumelela ka txiavelo txako. U nga pimisi to aku u nga manana ni kutxitxa ka txiavelo u to mbi thuma kwati. Veka mapimo ako ka makatekwa ya Jehovha a ku ningako u simama u txhumayela. Etetela txikombiso txa Makristu a kale. Ova mu ma nga ti kona ma ti “tsimbila ve nuwela dipswi da mahungu a manene.” (Mith. 8:1, 4) Mizamo yako yo simama u txhumayela yi nga vhuna ngutu. Ngu txikombiso, vanyaphandule va va nga ti hingilwe ka ditiko do kari va yite ka dimwani amu ni kona ku nga ti ni txilaveko txo txhumayela ngu lidimi lawe. Kha ta swela, ku ve ni mitxawa ya yiphya yi yi nga ti xalela mitshangano.
16. U nga li manisa kutxani litsako ka txiavelo txako txa txiphya?
16 “Kutsaka ka MKOMA mtamo wanu.” (Neh. 8:10) Kukhata, ti lava hi mana litsako ka Jehovha i si nga ka txiavelo txathu, hambi i di ti to ha txi dhunda ngutu. Ngu toneto, simama u tsimbila ni Jehovha u zumba hafuhi nayo ni ku mthemba. Khumbula to u ti dhunda txiavelo txako ngu mhaka ya ku u nga ti maha totshe kasi ku u vhuna vanathu. Ngu kufana, veka mapimo ako ka txiavelo txi u ku natxo konkuwa se u na wona to Jehovha a na kuvhuna ku u txi dhunda.—Ekl. 7:10.
17. Ti lava hi khumbula txani mayelano ni siavelo sathu?
17 Ti lava hi khumbula to mthumo wathu ka Jehovha mbwa mbimo yotshe, kambe siavelo sathu nza mbimonyana. Ka mafu a maphya, hi na ta manana ni kutxitxa ka siavelo. Aleksey, awu hi nga bhula ngene a womba to kutxitxa ku a nga manana nako ku mu vhuna ku e ti lulamisela mbimo yi yi tako. Ene a khene: “Ani ni ti ti ziva to Jehovha waho ni ku mafu a maphya ma nata, kambe mbimo yimwani ti ti woneka nga o va mloro dwe. Konkuwa ni tipfa ni di hafuhi ni Jehovha ni ku i si nga kale hi na bela ka mafu a maphya.” (Mith. 2:25) Ti si nga ni mhaka ni txiavelo txathu, he simameni hi tsimbila ni Jehovha. Kha na mbi hi tshotsha, ene a na hi vhuna kumana litsako mbimo yi hi mahako ati hi nga ti kotako ka mthumo wakwe ova mu hi ku kona.—Isaya 41:13.
NDANDO 136 Jehovha a na ku ‘hakela’
^ par. 5 Mbimo yimwani vanathu va va ku ka mthumo wa mbimo yotshe ti nga lava ve leka txiavelo mwendo kumana txiavelo txa txiphya. Ka msungo wuwa hi na bhula ngu sikarato si vanathu vonevo va wonisanako naso ni tinzila ti ti nga va vhunako kuwonisana ni sikarato soneso. Hi na tshumela hi wona to vamwani va nga maha txani kasi ku va tsanisa ni ku va vhuna, ni ku Bhiblia yi nga hi vhunisa kutxani kuwonisana ni kutxitxa koneko.
^ par. 4 Vanathu vamwani va va nga kula ava va ku ni wutixamuleli wa hombe, va ningete siavelo ka vanathu va i ku nga di vaphya. Wona misungo ya timhaka yi yi ku: “Irmãos mais velhos—Jeová dá valor à lealdade de vocês” ka A Sentinela ya Setembro wa 2018 ni “Simama u va ni kudikha ti si nga ni mhaka ni kutxitxa ka siemo” ka Muwoneleli wa Outubro wa 2018.
^ par. 12 Madhota a dibanza amu mwanathu wo kari a nga ti thumela kona ngu txikuluveta ma fanete me bhala dipapilo do ya ka dibanza di a yako ka dona, eto ti na mu vhuna ku a si sweli kusimama e thuma kota nyaphandule, didhota mwendo dilanda da wuthumeli.
^ par. 13 Wona mlongoloko wa timhaka wu wu ku “Como lidar com a dor da morte”, ka Despertai! ya wu 3 ya 2018.
^ par. 57 TITXHAMUSELO TA MIFOTA: Mpatwa wumwani awu ti ko sunga wu leka txiavelo txa wona ka ditiko da hahanze wu txi salisa vanathu.
^ par. 59 TITXHAMUSELO TA MIFOTA: Ngu msana se va ti wuyile ditikoni kwawe, mbimo yotshe ve khongela ka Jehovha kasi ku e va vhuna kuwonisana ni sikarato sawe.
^ par. 61 TITXHAMUSELO TA MIFOTA: Ngu kuvhunwa ngu Jehovha, vona va wuyela ka mthumo wa mbimo yotshe. Vona va thumisa lidimi li va nga li gonda mbimo yi i nga ti varumiwa ti to ve txhumayela ka valuveli ka dibanza di va nga avelwa ka dona.
