1-3. Ikkefa ekkóch popun a siwil wisen chókkewe mi angang ngeni Jiowa full-time?

IEI met Robert me Mary Jo ra erá: “Mi apwapwa ám fiti angangen misineri ren úkúkún 21 ier, nge semem kewe me inem me rúúemén iei ra apwangapwang. Aua pwapwa le túmúnúúr, nge a mmen áweires ám likitaló ewe leeni aua fókkun aúcheani.”

² William me Terrie ra erá: “Atun aua silei pwe ause tongeni liwin ngeni wisem pokiten ám semmwen, aua kechiw. Seni lóóm aua fókkun mochen angang ngeni Jiowa lón pwal eú fénú, nge iei, ause chúen tongeni.”

³ Aleksey a erá: “Aua fen silei pwe chón oputem ra fókkun mochen esipaaló ewe keangen ofesilap, ewe ia ua angang ie, nge aua chúen máirú atun ra esipaaló, me a lamot ngenikem ám aupwe towu seni Bethel.”

4. Ikkefa ekkewe kapas eis sipwe pélúweniir lón ei lesen?

⁴ Pwal chómmóng chókkewe mi angang ngeni Jiowa full-time kapachelong ekkewe mi angang Bethel, a siwil wiser. * A tongeni fókkun áweires ngeni pwiich kana mi tuppwél ar repwe towu seni wiser mi aúchea ngeniir. Met a tongeni álisiir le eérenaaló ewe siwil? Ifa usun ka tongeni álisiir? Pélúwen ekkena kapas eis ra tongeni álisikich atun a fis ngeni pwisinkich och siwil lón manawach?

5. Met a tongeni fis ngenikich ika epwe siwil wisach?

⁵ Ese lifilifil ika sia fiti angangen afalafal full-time are sia  angang lón Bethel, nge sia poputá le tongei aramas pwal mwo nge sani ewe leeni sia álillis ie. Ina popun atun a fis pwe sipwe ló seni ikewe sia álillis ie, sia fókkun letipechou. Sipwe pwosiiti pwiich kewe, me eli sipwe pwal aúrekiir, ákkáeúin ika ewe popun sia ló seniir pokiten riáfféúmwáál. (Mat. 10:23; 2 Kor. 11:28, 29) A pwal tongeni weires ika sipwe mwékút ngeni pwal eú fénú me káé eú mineféén eéreni. Sia pwal tongeni meefi ena atun sia liwiniti pwúkún fénúach we. Robert me Mary Jo ra erá: “Ause chúen eéreni pwisin eérenien leeniem we pwal mwo nge ám afalafal lón pwúkún ám fós. Pokiten aua nóm lón pwal eú fénú ren fansoun langattam, aua meefi pwe ause chúen silei pwúkún leeniem we.” Ekkóch pwiich kewe mi siwil wiser, eli epwe wor ar osukosuk ren pekin moni. Neman repwe lólilen, núkúnúkúngaw, me lichippúng. Met epwe tongeni álisiir?

6. Ifa usun sipwe tongeni pacheéch ngeni Jiowa?

⁶ Pacheéch ngeni Jiowa. (Jas. 4:8) Ifa usun sipwe tongeni féri ena? Ren ach lúkúlúkú pwe i a “aüselinga iotek.” (Kölf. 65:2) Kölfel 62:8 a erá: “Oupwe pwäri ngeni ämi weires meinisin.” Jiowa a tongeni féri mettóch “meinisin lap seni mine sia tongeni tüngor ika ekieki.” (Ef. 3:20) Jiowa ese chék awora met sia tingorei lón ach kewe iótek. Nge eli epwe pwal ataweei ach kewe osukosuk lón ewe esin napanap sise fókkun ekieki.

7. (a) Met epwe álisikich le pacheéch ngeni Jiowa? (b) Me ren Ipru 6:10-12 epwe ifa mwirilóón ach sópweló le akkangang ngeni Jiowa fán tuppwél?

⁷ Ren ach sipwe pacheéch ngeni Jiowa, mi lamot ach sipwe állea Paipel iteiten rán me ekilonei. Iei alon emén mi piin misineri: “Kopwe chék sópweló lón óm schedule fán iten famili fel me ammólnatá ekkewe mwich usun chék met ka féfféri lón wisom me lóóm.” Pwal och, kopwe fiffiti óm we mineféén mwichefel lón ewe angangen afalafala ewe pwóróus allim ren úkúkún óm tufich. Jiowa a chechchemeni chókkewe mi sópweló le angang ngeni fán tuppwél inaamwo ika rese chúen tongeni angang ngeni lón ewe napanap ra fen angang ngeni me lóóm.​—Álleani Ipru 6:10-12.

8. Ifa usun minne a mak lón 1 Johannes 2:15-17 epwe álisikich le ámecheresi nónnómun manawach?

⁸ Ámecheresi nónnómun manawom. Kosap mut ngeni osukosuken án Satan ótót  epwe “amopu” óm angang ngeni Jiowa. (Mat. 13:22) Kosap aúseling ngeni chókkewe rese angang ngeni Jiowa are chienom kewe are chón óm famili mi tongeok nge ra erenuk óm kopwe alapaaló woum lón án Satan ei ótót pwe kopwe tongeni eáni eú manaw mi núkúnúkéch. (Álleani 1 Johannes 2:15-17.) Lúkúlúk wóón Jiowa, pokiten a pwonei pwe epwe awora meinisin “lon fansoun ach osupwang.” Epwe álisikich pwe epwe péchékkúl ach lúkú, meefi kinamwe, me epwe awora osupwangach.​—Ipru 4:16; 13:5, 6.

9. Me ren Än Salomon Fos 22:3, 7 pwata a fókkun lamot ach sipwe túmúnúkich seni liwinimmang ese lamot, me met epwe tongeni álisikich le kefiléch?

⁹ Kosap liwinimmang ika ese lamot. (Álleani Än Salomon Fos 22:3, 7.) A tongeni mémmóng án emén epwe mwékút ngeni pwal eú leeni, me epwe tongeni mecheres an epwe wor an liwinimmang. Ina popun kosap liwinimmang wóón ekkewe mettóch rese wesewesen lamot. A tongeni weires ach sipwe filatá úkúkún moni sipwe liwinimmang wóón ika sia nóm fán aúrek, áwewe chék ika sia túmúnú chón ach famili mi semmwen. Lón ekkena atun sipwe chechchemeni pwe ach “iotek o tüngor” ngeni Kot, epwe álisikich le kefiléch. Jiowa epwe pélúweni ach kewe iótek ren an fang ngenikich kinamwe mi ‘tümwünü lelukach me ekiekich,’ mi álisikich le kefiléch.​—Fil. 4:6, 7; 1 Pet. 5:7.

10. Ifa usun sipwe tongeni kúnékún chiechiach minefé?

¹⁰ Ririéch ngeni chiechi mi múrinné. Fóffós ngeniir usun met ka meefi me ekkewe weires ka nóm faar, nge ákkáeúin kopwe fós ngeni chókkewe a fis ngeniir minne a fis ngonuk. Ika ka féri ena, eli epwe tongeni álisuk le meefi kinamwe. (SalAf. 4:9, 10) Chókkewe ka chiechiéch ngeniir ikewe ka piin nóm ie, iir repwe chúen chiechiom. Nge iei lón wisom we minefé, a lamot kopwe kút chiechiom minefé. Chechchemeni pwe ika ka mochen an epwe wor chienom, a lamot kopwe pwal chiechiéch ngeni ekkewe ekkóch. Ifa usun kopwe tongeni kút chiechiom? Apwóróusa ngeni ekkewe ekkóch usun ekkewe fansoun mi apwapwa lón óm angang ngeni Jiowa pwe repwe tongeni kúna óm pwapwa. Ekkóch lón ewe mwichefel eli resap weweiti pwata ka fókkun pwapwaiti óm angang ngeni Jiowa full-time, nge neman ekkóch ra mochen silei usun me repwe mochen wiliti chiechiom. Nge kopwe túmúnú pwe kosap kon fóffós usun pwisin en are ekkewe mettóch ka féri lón óm angang ngeni Jiowa are met ka lichippúng ren.

11. Ifa usun ámi pwúpwúlú epwe chék pwappwapwa?

¹¹ Ika a lamot oupwe ló seni wisemi pokiten pwúlúwom we a semmwen, kosap tipi ngeni ewe emén. Are ika a uruk eú semmwen, kosap  pwal mengiringir me ekieki pwe ka elichippúngú pwúlúwom we. Chechchemeni pwe ámi oua “eu chök inis” me oua pwonfengen mwen mesen Jiowa pwe oupwe túmúnúfengenikemi ese lifilifil met epwe fis. (Mat. 19:5, 6) Ika ka ló seni wisom we pokiten weiweitáán án pwúlúwom we pwopwo, oupwe ereni néúmi we pwe a mmen aúchea lap seni wisemi we. Alúkúlúkú néúmi na fán chómmóng pwe i “eu liwin mi öch” seni Kot. (Kölf. 127:3-5) Nge oupwe pwal ereni usun ekkewe fansoun mi éch oua pwapwaiti lón wisemi. Ika oua féri ena, iwe oupwe tongeni apéchékkúla le áeá manawan lón an angang ngeni Jiowa usun chék met oua féri.

12. (a) Ifa usun sipwe tongeni álisi chókkewe mi angang ngeni Jiowa full-time le sópweló lón wiser? (b) Ifa usun sipwe tongeni ámecheresi ar repwe eérenaaló ar mwékút ngeni wiser we minefé?

¹² Chómmóng mwichefel me pwisin emén me emén pwiich kewe ra álisi chókkewe mi angang ngeni Jiowa full-time ar repwe sópweló lón wiser. Ra féri ena ren ar apéchékkúler le sópweló lón ar angang, álisiir lón pekin moni are pwal ekkóch álillis lón pekin aion are ren ar álillis le túmúnú chón ar famili. (Kal. 6:2) Ika chókkewe mi angang ngeni Jiowa full-time ra kewis pwe repwe álillis lón ach we mwichefel, iwe sisap ekieki pwe an siwil wiser a wewe pwe rese féréchú wiser are ra féri och mettóch ese pwúng. * Nge sipwe fen álisiir le ámecheresi ar mwékút. Etiwaéchúúr me apúnger ren ewe angang ra féri, inaamwo ika ar apwangapwangen inis a aúkú met ra tongeni féri iei. Alapaaló ach sissileer. Káé seni ar  watteen sile, minne ra fen káé, me minne ra kúna lón manawer.

13. Met sókkun álillis sia tongeni awora ngeni chókkewe mi angei minefé wiser?

¹³ Eli atun chókkewe ra kerán mwékút ngeni wiser we minefé, a lamot ngeniir óm kopwe álisiir le kúnékún imwer, silei ia repwe ló ie ren met sókkun waa repwe fiti, kúnékún ar angangen moni, are pwal ekkóch mettóch. Eli epwe pwal lamot ar repwe silei ekkewe mineféén mettóch, áwewe chék ren ar repwe mééni takises are pekin insurance. Nge met a kon lamot ngeniir, ina óm achocho le weweiti nónnómur. Eli ra weires ren pwisin ar apwangapwang are apwangapwangen emén chón ar famili. Eli ra chúúpwúl ren málóón emén attongeer. * Me inaamwo ika rese kan fóffós usun, nge eli repwe letipechou pokiten ra pwosiiti chiechier kewe ewe ia ra álillis ie akkomw. A lamot ngeniir fansoun ren ar repwe tongeni likiitú fán meefier kewe mi tongeni osukosuker.

14. Ifa usun pwiich kewe lón eú mwichefel ra álisi emén fefin Chón Kraist le eérenaaló wisan we minefé?

¹⁴ Ika ka fiffitiir le afalafal me apéchékkúler ren óm féffér múrinné, ka tongeni álisatá ar eérenaaló nónnómur minefé. Iei met emén chienach fefin mi piin angang ngeni Jiowa full-time ren fansoun langattam lón pwal eú fénú a erá: “Lón wisei we me lóóm, ua káé ngeni sókkopaten aramas iteiten rán. Nge lón wisei we minefé, a weires ngeniei ai upwe pwal mwo nge állea ngeni emén eú wokisin are akkattola ngeni emén eú video lón ewe angangen afalafal. Nge pwiich kewe lón ai we mineféén mwichefel ra etiwaei ai upwe fitiir le chuuri néúr kewe chón káé me return visit. Ai kúna tuppwélún pwiich kewe me ar angang weires le káé ngeni aramas, a apwapwaaei. Ua káé ifa usun upwe poputááni ai pwóróus ngeni aramas lón ai we minefé territory. Ekkena mettóch ra álisiei le pwapwasefál.”

15. Ifa usun ka tongeni sópwéch lón wisom we minefé?

¹⁵ Ka tongeni sópwéch lón wisom we minefé.  Kosap ekieki pwe kese féréchú wisom we me lóóm are kese chúen aúchea. Kopwe ekieki usun chómmóngun án Jiowa álisuk iei me akkafalafal. Ákkáppirú ekkewe popun Chón Kraist mi tuppwél. Ese lifilifil ia ra ló ie, “ra fetalfeil ekis meinisin o afalafala ewe kapasen Kot.” (Föf. 8:1, 4) Ika ka achocho le sópweló le afalafal kopwe sópwéch. Áwewe chék, ekkóch pioneer mi késúló seni ewe fénú ra nóm ie, ra mwékút ngeni pwal eú fénú kkan ngeniir mi pwal osupwangen chón afalafal ie lón ewe fós ra eáni. Mwirin fitu maram, a fisitá minefé kúmi lón ewe fós ekkena pioneer ra eáni me chómmóng aramas ra poputá le fiti.

16. Ifa usun kopwe tongeni pwapwa lón wisom we minefé?

¹⁶ “Ewe pwapwa seni ewe Samol mi Lapalap epwe apöchökülakemi.” (Ne. 8:10) A lamot pwe ach pwapwa epwe feito seni ach riri ngeni Jiowa, nge esap seni ewe wis sia wiseni, inaamwo ika sia mmen aúcheani. Iwe, ika sia mochen ach sipwe chék pwappwapwa, sipwe ririéch ngeni Jiowa me lúkúlúk wóón an tipachem, emmwen, me álillis. Chemeni pwe ka sani wisom we lóóm pokiten ka achocho úkúkún óm tufich le álisi aramas. Iwe kopwe unusen achocho lón wisom we minefé me kúna ifa usun Jiowa epwe álisuk le pwal aúcheani.​—SalAf. 7:10.

17. Met sipwe chemeni usun wisach iei?

¹⁷ Sipwe chechchemeni pwe ach angang ngeni Jiowa epwe tori feilfeiló, nge ewe wis sia eáni iei temporary chék. Lón ewe ótót sefé, neman kich meinisin epwe siwil ewe wis sia eáni. Aleksey, ewe sia fen fós usun, a meefi pwe minne a fis ngeni iei a ammólnatá fán iten ena. Iei met a erá: “Ua fen silei pwe Jiowa i wesewesen emén me ewe ótót sefé epwe fókkun fis, nge me rei usun itá ra ekis towau. Nge iei ua fókkun ririéch ngeni Jiowa me usun itá ewe ótót sefé a fókkun arapakkanoto.” (Föf. 2:25) Ese lifilifil wisach, nge sipwe ririéchúló ngeni Jiowa. Esap fókkun likitikicheló, nge epwe álisikich ach sipwe pwapwa lón ach angang ngeni I, ese lifilifil ia sia nóm ie.​—Ais. 41:13.