MUTWE WAKULILONGESA 34
Chize Muwahilila ni Chiteli Chaha
“Zambi hi chihenge ko, akavulame milimo yenu ni zango lize nwalwezele ku jina lienyi.”—HEPRE. 6:10.
MWASO 38 Zambi Makutakamisa
CHIKUMA CHILEMU *
1-3. Mumu liaka amwe waze ali mu mulimo wa shimbu lieswe mahasa kuhichika mulimo wo?
ROBERT ni Mary Jo kakalakalile ngwe mishionaliu ha miaka 21. Hachino, yisemi jo eswe yayiza. Ayo yamba ngwo: “Tunakawahilila muze twayile ni kufunga yisemi jetu, chipwe chocho, tunakanenganyana mumu lia kuhichika chifuchi ni atu waze te twakuzanga.”
2 William ni Terrie no kakalakalile mu chifuchi cheka. O yamba ngwo: “Muze twanyingikine ngwetu, kutuchi kuhiluka nawa mu mulimo wetu hamukunda wa yikola, yitulila chinji. Nyonga lize twapwile nalio lia kukalakalila Yehova mu chifuchi cheka yilihwa.”
3 Aleksey yoze te wakukalakala ku Mbetele yamba ngwenyi: “Twanyingikine ngwetu, nguvulu te kanazange kuyika Mbetele yetu. Alioze muze yino yalingiwile, ni kuhichika Mbetele, tulieswe twevwile yikola ku mbunge.”
4. Yihula yika mutukumbulula ha mutwe uno?
4 Tunyongenu nawa hali tununu a ma Mbetelita ni mandumbu akwo waze atambwile yiteli yaha. * Anji akuli mandumbu wano ashishika, kuhichika mulimo uze te akuzanga chinji kuchakapwile chashi. Mba yika muyihasa kwakwasa ha kwalumuka chacho? Kuchi mutuhasa kwakwasa? Makumbululo a yihula yino, mahasa kutukwasa tulieswe muze yimwe muyalumuka ku mwono wetu.
YIZE MUTULINGA NYI YUMA MUYALUMUKA
Mumu liaka chakukaliwa kuli mandumbu waze ali mu mulimo wa shimbu lieswe kuhichika milimo yo? (Tala paragrafu 5) *
5. Ukalu uka mutuhasa kupwa nawo muze matwaha chiteli chaha?
5 Mu mulimo wa shimbu lieswe, chipwe ku Mbetele hanji mu munda, twakupwa ni masepa anji nawa twakuzanga yihela yacho. Hachino, muze mutufupiwa kuhichika mulimo wacho hamukunda wa yimwe, mbunge yakupwa mutetela. Twakwivwa usona wa mandumbu waze twakuhichika ni kulihulumba hali ayo, chipi-chipi nyi twakatukile ku chihela chacho mumu lia yihungumiona. (Mateu 10:23; 2 Kori. 11:28, 29) Chikwo nawa, kutayiza chiteli chaha, muchihasa kukaliwa mumu hi twejilila ni chako cha kuze tuli. Chino nawa muchihasa kulingiwa nyi mutufuna kumahetu. Robert ni Mary Jo, yamba ngwo: “Te hitunavulama chako chetu, nawa te kutushi kuhasa kwambujola mu limi lietu. Amu twakalakalile miaka yinji mu chifuchi cheka, mu chifuchi chetu twapwile ni kulivwa ngwe tuli yilambala.” Amwe waze akutambula yiteli yaha mahasa kupwa mu ukalu ukwo, ngwe kulanda yuma yize te keshi ni kunyonga. Yino muyihasa kwahongesa, kwachiza sambukila ni utakamiso. Mba yika muyihasa kwakwasa?
Chili chilemu kukolesa usepa wetu ni Yehova ni kujikijila muli iye (Tala maparagrafu 6-7) *
6. Kuchi mutuhasa kukolesa usepa wetu ni Yehova?
6 Kolesa usepa we ni Yehova. (Tia. 4:8) Kuchi mutuhasa kuchilinga? Ha kufuliela ngwetu, Yehova kakwivwa yilemba yetu. (Samu 65:2) Mukanda wa Samu 62:8, unambe ngwo: ‘Zukwilenu mbunge jenu kuli iye.’ Yehova “mahasa kulinga kuhiana chikolo chize cheswe mutwita, hanji chize mutunyonga.” (Efwe. 3:20) Yehova keshi kutwaha wika yuma yize twakumwita mu yilemba. Iye nawa mahasa kuhwisa yipikalo yetu mu mutapu uze te kutushi ni kushimbwila.
7. (a) Yika muyitukwasa mba tununge ni kukundama kuli Yehova? (b) Kulita ni A-Hepreu 6:10-12, yika mutuzukako nyi twanunga ni kuwayila Yehova ni ushishiko weswe?
7 Chuma chikwo chize muchikukwasa kukolesa usepa we ni Yehova, chili kutanga Mbimbiliya hita tangwa ni kupukuna ha yize unatange. Umwe ndumbu yoze wapwile mishionaliu yamba ngwenyi: “Nyi wakatuka mu mulimo uze te wa kulinga, nihindu nunga ni kulinga uwayilo wa mu usoko ni kululieka kukunguluka ngwe chize te wakulinga kunyima.” Chikwo nawa, lihane chinji mu mulimo wa kwambujola hamwe ni chikungulwila chize uli. Yehova kakwiwuluka waze akununga ni kumuwayila ni ushishiko weswe, chipwe ngwe keshi kuhasa kulinga yize apwile ni kulinga.—Tanga A-Hepreu 6:10-12.
8. Kuchi maliji tunawane ha 1 Yoano 2:15-17, mahasa kutukwasa twashiwise mwono wetu?
8 Pwako ni mwono washi. Kanda wecha yipikalo ya hano hashi ha Satana hanga yikukwike kuwayila Yehova. (Mateu 13:22) Kanda ufuliela akwa-hashi, chipwe masepa ni asoko waze akulihulumba hali yena ha kukukolweza hanga ufupe chinji mbongo hano hashi ha Satana. (Tanga 1 Yoano 2:15-17.) Fuliela muli Yehova. Mumu iye kanalakenya kutwaha yeswayo mutufupiwa ku ufulielo, ku manyonga ni ku musunya “ha mwaka wa chikala.”—Hepre. 4:16; 13:5, 6.
9. Kulita ni Yishima 22:3, 7, mumu liaka hi chipema ko kutambula mikuli chamutambwila, nawa yika muyihasa kutukwasa mba tukwate yiyulo yipema?
9 Kanda utambula mikuli chamutambwila. (Tanga Yishima 22:3, 7.) Kwaluka chimwe chakufupiwa mbongo jinji, kashika muchihasa kupwa chashi kutambula mikuli. Hachino, mba wehuke mikuli, watamba kukeya hanga uhone kutambula mikuli ya yuma yize kuwafupiwile. Nyi twapwa mu ukalu, ngwe wa kufunga mutu yoze unayiji, muchihasa kupwa chikalu kunyingika mikuli yize mututambula. Ha yikuma yino, iwuluka ngwe “kulemba ni kuliumba” muchihasa kukukwasa hanga ukwate yiyulo yipema. Yehova makumbulula yilemba ye ha kukwaha sambukila yize ‘muyifunga mbunge ni kunyonga che.’ Hachino, muhasa kulihumikiza ha yikuma yacho.—Fwili. 4:6, 7; 1 Petu. 5:7.
10. Kuchi mutuhasa kulikata ni masepa aha?
10 Pwako ni usepa upema kuli masepa ni kuli asoko je. Chili chipema kulweza masepa je chize unevu ni yize unapalika ku mwono, chipi-chipi kuli waze no apalikile mu yuma yacho. Chino muchihasa kukukwasa hanga ulivwe kanawa. (Chilu. 4:9, 10) Masepa waze wapwile no mu mulimo we ukulu, nihindu manunga ni kupwa masepa je. Haliapwila, amu hi wecha mulimo wacho, unafupiwa kulikata ni masepa akwo. Iwuluka ngwe, mba upwe ni masepa apema, ni yena watamba kupwa sepa mupema. Kuchi muhasa kupwa ni masepa jacho? Lweza akwenu yiwape yize hiunazuku mu mulimo wa Yehova. Nawa solola ngwo wakuwahilila ha kulingila Yehova. Amwe mu chikungulwila chenu, hanji keshi kunyingika mumu liaka wa kuzanga chinji mulimo wa shimbu lieswe, alioze akwo mahasa kunyingika ni kupwa masepa je. Chipwe chocho, kanda uhanjika chinji hali yena mwene hanji ha yuma yize walingile mu mulimo wa Yehova. Nawa kanda uhanjika-hanjika yuma yipi yize wapalikile mu mulimo wacho.
11. Yika muhasa kulinga hanga ulo wenu ununge ni uwahililo?
11 Ha mashimbu amwe, waze alimbata nyi umwe mayiza, o mahasa kukatuka mu mulimo wa shimbu lieswe. Nyi yino ye yalingiwile kuli yenu, kanda usuma mulonga mukwenu-lunga hanji mukwenu-pwo yoze wayijile. Chikwo nawa, nyi yena mwe wayijile, kanda ulisuma mulonga ha kunyonga ngwo yena mwe wapihishile yuma. Nyingikenu ngwenu, nuli “musunya umuwika,” nawa nunakalakenya kuli Yehova ngwo, munulifunga umwe ni mukwo chipwe ngwe mukulingiwa yeswayo ku mwono wenu. (Mateu 19:5, 6) Nyi nwakatukile mu mulimo wa shimbu lieswe, hamukunda wa ufumba uze te kunushi ni kushimbwila, sololenu kuli mwanenu ngwo kali mulemu chinji kuhiana mulimo wacho. Nihindu mulwezenu ngwo, iye kali ‘chiwape’ cha kuli Zambi. (Samu 127:3-5) Chikwo nawa, mulwezenu yuma yeswe yipema yize nwamwene mu mulimo wacho. Chino muchihasa kumukolweza hanga neye alinge mulimo wa shimbu lieswe.
CHIZE MANDUMBU AKWO MAHASA KUKWASA
12. (a) Kuchi mutuhasa kukwasa waze ali mu mulimo wa shimbu lieswe hanga anunge mu mulimo wo? (b) Yika mutuhasa kulinga hanga tukwase waze atambula yiteli yaha?
12 Chili chipema kumona chize mandumbu mu yikungulwila yinji, anakwase waze ali mu mulimo wa shimbu lieswe. Amwe kakukolweza waze ali mu mulimo wa shimbu lieswe, hanga anunge mu mulimo wacho. Akwo kakwakwasa hakwaha yuma ya ku musunya hanji kukwasa asoko jo. Hachino, waze ali mulimo wa shimbu lieswe mahasa kununga mu mulimo wo. (Ngala. 6:2) Nyi ndumbu yoze uli mu mulimo wa shimbu lieswe matambula chiteli chaha, ni kumutuma mu chikungulwila chenu, kanda unyonga ngwo kapihisa yimwe hanji ngwo kalinga upi. * Shimbu unyonge chocho, mukwase hanga apwe ni nyonga lipema ha yize yalingiwa ku mwono wenyi. Mutambule ni zango nawa muchichimieke ha yeswayo malinga, chipwe ngwe haliapwila keshi kukalakala chinji mumu lia musongo. Sako tachi hanga umunyingike kanawa. Nyi wachilinga, muhasa kulilongesa yuma yinji ha chilweza, chinyingi ni fumbo lienyi.
13. Ukwaso ukwo uka uze mutuhasa kuhana kuli mandumbu waze atambula yiteli yaha?
13 Ku uputukilo, mandumbu waze atambula yiteli yaha mahasa kufupiwa ukwaso ha kuwana zuwo, mulimo ni yuma yikwo nawa. Ayo hanji mafupiwa ukwaso hanga anyingike yuma chize yinende mu chifuchi. Chakutalilaho, chize mafweta lijimu ni chize mayuka ha ukwaso wa nguvulu. Chuma chilemu, hi kwevwila keke ko, alioze kulisa muchihela cho. Ayo ene, hanji umwe wa kuli asoko jo kali ni misongo. Hanji mahasa kupwa kananenganyana mumu lia kufwisa mutu yoze te azanga. * Chikwo nawa, chipwe ngwe niumwe kaamwene, nihindu mahasa kunenganyana mumu lia usona wa masepa waze apwile no mu mulimo wo utangu. Chakumbata mashimbu mba akumbe manyonga wano.
14. Kuchi mandumbu amwe akwashile umwe pangi hanga ejilile ni chiteli chenyi chaha?
14 Hachino, ukwaso ni chilweza che chipema muyihasa kukwasa mandumbu jacho hanga ejilile ni mwono waha. Umwe pangi yoze wakalakalile ha miaka yinji mu chifuchi cheka yamba ngwenyi: “Kuze angutumine chitangu, te nakusongwela malongeso a Mbimbiliya hita tangwa. Alioze, muze angutumine kweka, te chishi kuhasa kutangila mutu Mbimbiliya mu munda chipwe kusolola chinema. Alioze mandumbu amu chikungulwila chaha, kapwile ni kungusanyika mutuya ni kumeneka atu waze te akuhanjika no ni kusongwela malongeso jo a Mbimbiliya. Muze namwene zango ni hamu lia mandumbu wano, ni chize te akusongwela malongeso a Mbimbiliya waze anasenya kulutwe, chocho yingupwa ni nyonga lialita. Yingunyingika chize munguputuka kuhanjika ni atu mu njiza yaha. Yino yeswe yangukwashile kupwa nawa ni uwahililo.”
NUNGA, KANDA UFUNA KUNYIMA!
Fupa majila akwambulwila chinji sango lipema kuze uli (Tala maparagrafu 15-16) *
15. Kuchi muhasa kuyuka mu mulimo we waha?
15 Yena muhasa kuyuka chinji mu mulimo we waha. Kanda umona kwalumuka cha mulimo we ngwe kuwakalakalile kanawa hanji ngwo haliapwila kuushi nawa ni ulemu. Lihulikile ha chize Yehova anakukwase, nawa nunga ni kwambujola sango lipema. Imbulula akwa-Kristu ashishika aku sekulu yitangu, waze te akwambujola sango lipema kweswako apwile. (Yili. 8:1, 4) Nyi mununga ni kwambujola, muhasa kuyuka chinji. Chakutalilaho, mapionelu waze te akukalakala mu chimwe chifuchi kahuminemo, chocho yaya mu chifuchi chize chapwile hakamwihi. Kuze ayile, kwapwile ni kufupiwa akwa-kwambujola waze akuhanjika limi lia mu chifuchi muze akatukile. Ha kupalika cha amwe tukweji, yikupwa yizavu yinji nawa yizavu yacho yiyitatuka ni kawashi.
16. Yika muyikukwasa kupwa ni uwahililo mu mulimo we waha?
16 Mbimbiliya yinambe ngwo: “Tachi jenu jinejila ku uwahililo wa Mwene wetu.” (Nehe. 8:10) Kwamba pundu, mutuhasa kuzanga chinji mulimo wetu. Alioze, uwahililo wetu watamba kwiza ha kuwayila Yehova, hi ha mulimo uze twakulinga ko. Hachino, nunga ni kukolesa usepa we ni Yehova, mwite mana, usongwelo ni ukwaso. Iwuluka ngwe, wazangile mulimo we ukulu mumu walihanyine ni mbunge yeswe hanga ukwase atu waze apwileko. Kashika, sako mbunge ku mulimo we waha nawa lihulikile ha chize Yehova makukwasa hanga uuzange.—Chilu. 7:10.
17. Yika twatamba kunyingika hakutwala ku yiteli yize tuli nayo musono?
17 Kanda uvulama ngwe, kuwayila Yehova chili chuma chize mutulinga ndo ku miaka yeswe. Alioze yiteli yize tuli nayo yili ya mashimbu akehe. Mu chifuchi chaha, yetweswe hanji makatwaha yiteli yeka. Aleksey, yoze twavuluka ku uputukilo, katayijile ngwenyi, yeswe yize yinalingiwa kuli iye yinamululieka hakutwala kulutwe lia matangwa. Yamba ngwenyi: “Te ngunanyingika ngwami, Yehova kwali nawa chifuchi chaha muchikeza, alioze te nakumona ngwe Yehova kusuku ali ni yami. Ni chifuchi chaha te chakusoloka ngwe kusuku chili. Haliapwila, nakuhasa kumona Yehova kulutwe liami, nawa chifuchi chaha hi chakundama.” (Yili. 2:25) Kashika, chipwe ngwe makwaha chiteli cheka, nihindu kolesa usepa we ni Yehova. Iye kechi kakwehuka nilimwe tangwa. Alioze, manunga ni kupwa hamwe ni yena nawa makukwasa uwahilile mu mulimo wenyi—chipwe ngwe mulinga yeswayo hanji mupwa kweswako.—Iza. 41:13.
MWASO 90 Tulikolwezenu Umwe ni Mukwo
^ kax. 5 Ha mashimbu amwe, mandumbu waze ali mu mulimo wa shimbu lieswe mahasa kuhichika mulimo uze akwete hanji kutambula yiteli yeka. Mutwe uno muulumbununa kapinda yoze mandumbu jacho akupalika, ni yize muyaakwasa ha kwalumuka chacho. Chikwo nawa, muusolola chize mandumbu akwo mahasa kwakwasa ni kwakolweza. Yiyulo yize mutuwana ha mutwe uno, muyitukwasa tulieswe muze yimwe muyalumuka ku mwono wetu.
^ kax. 4 Chizechene nawa, mandumbu amwe waze te akwete yiteli, muze akumbanyishine yimwe miaka, yahana yiteli yo kuli akweze. Tala chikuma, “Funga Sambukila ya ku Mbunge Chipwe Muze Yimwe Muyalumuka ku Mwono we” ha Kaposhi wa Kutalila wa Outubro 2018.
^ kax. 12 Muze ndumbu yoze uli mu mulimo wa shimbu lieswe matambula chiteli chaha, makulwana a mu chikungulwila chize akatuka, katamba kutuma kawashi-washi mukanda uze mumujimbula mu chikungulwila muze aya (carta de apresentação), hanga anunge ni yiteli ngwe pionelu, mukulwana hanji kavumbi.
^ kax. 13 Tala chikuma, Ukwaso Upema Kuli Yoze Wafwisa (“A melhor ajuda para quem perdeu alguém”), ha Despertai! No. 3 2018.
^ kax. 57 ULUMBUNWISO WA YIZULIE: Alunga ni pwo kahichika mulimo wo wa mishionaliu, nawa ni kunenganyana cheswe kanalishika ni mandumbu amu chikungulwila cho.
^ kax. 59 ULUMBUNWISO WA YIZULIE: Haliapwila kali mu chifuchi cho, kanalembe kuli Yehova ni kumwita ukwaso hanga ahase kukumba kapinda yoze ali nenyi.
^ kax. 61 ULUMBUNWISO WA YIZULIE: Ni ukwaso wa Yehova, o hafuna nawa mu mulimo wa shimbu lieswe. Ayo kanazachisa limi lize alilongesele mu mulimo wa mishionaliu hanga ambujole kuli yilambala waze ali mu njiza ya chikungulwila cho.
