1-3. ¿Chucoch an muʼ bʌ i cʌyob i melbeñob i yeʼtel Jehová tiʼ pejtelel ora?

ROBERT yicʼot Mary Jo miʼ cʼajtesañob chaʼan cheʼ bʌ añix 21 jab ochemob bajcheʼ misionero, tsaʼ lajal cʼamʼayob jiñi tat i ñaʼ. Miʼ tsictesañob: «Tijicñayon lon cheʼ mij lon j cʌntañob. Pero wen chʼijiyem tsaʼ lon cubi cheʼ tsaʼ loqʼuiyon lojon yaʼ baqui mi lon c wen mulan ajñel yicʼot muqʼuix bʌ lon j qʼuel bajcheʼ lon cotot».

² Yambʌ xñujpuñel, William yicʼot Terrie, miʼ yʌl: «Cheʼ baqui ora tsaʼ lon cubi chaʼan maʼañix mi caj c mejlel lon ti sujtel yaʼ baqui woli lon c melben i yeʼtel (troñel) Jehová come tsaʼ cʼamʼayon lon, tsaʼ lon cucʼta lon c bʌ. Tiʼ pejtelel ora tsaʼ lon c ñaʼta c melben lon i yeʼtel Jehová ti yambʌ país, pero wʌle bʌ ora maʼañix tsaʼ chʌn mejli lon c mel».

³ Alexéi miʼ tsictesan: «Cujil lojon chaʼan jiñi yumʌlob yomob i ñupʼ jiñi sucursal yaʼ baqui añon lon. Wocolʌch tsaʼ lon cubi cheʼ baʼ ora tsaʼʌch mʌjli i chaʼañob i tsaʼ loqʼuiyon lon ti Betel».

4. ¿Chuqui ti cʼajtiya tac mi caj lac jacʼ ti ili temaj?

⁴ Mach jiñobic jach ili hermanojob am bʌ ñʌmʼayob cheʼ an chuqui miʼ qʼuextʌyel tiʼ cuxtʌlelob. Lajal an cʼotem ti ujtel tiʼ tojlel jiñi añoʼ bʌ ti Betel yicʼot yañoʼ bʌ woli bʌ i melbeñob i yeʼtel Jehová tiʼ pejtelel ora. * An i tajol wocolʌch miʼ yubiñob ili xucʼul bʌ hermanojob chaʼan miʼ cʌyob jiñi eʼtel muʼ bʌ i wen mulañob. ¿Chuqui miʼ mejlel i coltañob? ¿Chuqui miʼ mejlel lac mel tiʼ tojlelob? I jacʼbal ili cʼajtiya tac miʼ cʼʌjñibʌyel lac chaʼan ti lac pejtelel cheʼ an chuqui miʼ qʼuextʌyel ti laj cuxtʌlel.

5. ¿Bajcheʼ miʼ ticʼlañonla cheʼ mi laj cʌy lac mel jumpʼejl eʼtel?

⁵ Mi woli lac melben (chaʼliben) i yeʼtel Jehová ti Betel o yambʌ eʼtel tiʼ pejtelel ora miʼ cʼotel laj cʼuxbin jiñi wiñicob xʼixicob (quixtañujob) yicʼot lac wen mulan yaʼ baqui añonla. Jin chaʼan, mi tsaʼ loqʼuiyonla yaʼ baqui woli lac melben i yeʼtel Jehová, cʼuxʌch mi la cubin. Mi lac wen ñaʼtan jiñi hermanojob yicʼot mi laj cʼojoʼtañob, ñumento mi tsaʼ loqʼuiyonla come tsaʼ caji i contrajintel jiñi eʼtel woli bʌ lac mel (Mt. 10:23; 2 Co. 11:28, 29). Cheʼ jeʼel, yaʼ baqui mi lac majlel yom mi lac ñʌmʼan ti jumpʼejl tsijiʼ bʌ cultura, anquese yaʼ mi lac chaʼ cʼotel ti lac lumal. Robert yicʼot Mary Jo miʼ yʌlob: «Tsaʼ cʼoti lon cubin chaʼan mach lon j cʌñʌyix jiñi lon j cultura yicʼot chaʼan lecojix mi cubin lon c bʌ cheʼ mi lon c chaʼlen subtʼan ti lon c tʼan cujil bʌ. Mach lon c lumalix yubil». Yambʌ jaʼel jiñʌch cheʼ mi lac waʼ taj wocol tiʼ caj taqʼuin. Tajol maʼañic mi lac ñaʼtan chuqui yom melol yicʼot mi lac taj laj cʼunlel. ¿Chuqui mi caj i coltañonla mi cheʼ mi la cujtel bajcheʼ iliyi?

6. ¿Bajcheʼ miʼ mejlel la cajñel ti lʌcʼʌl la quicʼot Jehová?

⁶ Yom lʌcʼʌl mi la cajñel tiʼ tojlel Jehová (Stg. 4:8). ¿Bajcheʼ mi lac mel? Laʼ lac ñopben i coltaya, come jiñʌch muʼ bʌ i ñʌchʼtʌbeñonla la coración (Sal. 65:2). Jiñi Salmo 62:8 miʼ yʌl: «Cʼajtibenla Dios ti wocol tʼan pejtel chuqui wolaʼ ñaʼtan ti a pusicʼal». Jehová ñumento chuqui miʼ mejlel i mel ti lac tojlel mach cojach chuqui mi laj cʼajtiben yicʼot muʼ bʌ lac ñaʼtan (Ef. 3:20). Mach cojach miʼ mel chuqui mi laj cʼajtiben ti oración. Chaʼan miʼ tojʼesan lac wocol, miʼ mejlel i mel mach bʌ pijtʌbilic bʌ lac chaʼan.

7. a) ¿Chuqui mi caj i coltañonla chaʼan lʌcʼʌl mi la cajñel tiʼ tojlel Jehová? b) Cheʼ bajcheʼ miʼ yʌl Hebreos 6:10-12, ¿baqui bʌ i wenlel mi lac taj cheʼ mi lac chʌn melben i yeʼtel Jehová ti lac xucʼtʌlel?

⁷ Muʼ bʌ caj i coltañonla jaʼel chaʼan lʌcʼʌl mi la cajñel la quicʼot Jehová jiñʌch cheʼ mi lac pejcan jiñi Biblia ti jujumpʼejl qʼuin yicʼot mi lac wen ñaʼtan. Juntiquil tsaʼ bʌ ajñi bajcheʼ misionero ti wajali miʼ yʌl: «Ñuc i cʼʌjñibal cheʼ maʼañic mi laj cʌy lac mel lac chʼujutesaya ti familia yicʼot lac chajpan lac bʌ chaʼan lac tempa bʌ tac, cheʼ bajcheʼ tsaʼ lac mele ti jiñi eʼtel am bʌ lac chaʼan ti ñaxan». Cheʼ jaʼel, laʼ lac chʌn chaʼlen wersa lac chaʼlen subtʼan yaʼ ti tsijiʼ bʌ laj congregación. Jehová maʼañic miʼ ñajʌyel i chaʼan jiñi muʼ bʌ i melben i yeʼtel ti xucʼul, anquese mach cheʼix cʼamel miʼ mel bajcheʼ ti ñaxan (pejcan Hebreos 6:10-12).

8. ¿Bajcheʼ miʼ coltañonla jiñi tʼan tac am bʌ ti 1 Juan 2:15-17 chaʼan mach cabʌlic chuqui yom an lac chaʼan?

 ⁸ Mach lac sʌclan cabʌl lac chubʌʼan. Mach la cʌcʼ chaʼan jiñi cʼojol tac i chaʼan bʌ i pañimil (mulawil) Satanás miʼ mʌctañonla lac melben i yeʼtel Jehová (Mt. 13:22). Mach lac ñʌchʼtan jiñi la camigojob yicʼot lac familia o yambʌ quixtañujob cheʼ miʼ subeñoñobla chaʼan yom mi lac sʌclan cabʌl taqʼuin ti ili pañimil (pejcan 1 Juan 2:15-17). Laʼ lac ñop Jehová muʼ bʌ i yʌcʼ i tʼan chaʼan cheʼ «baʼ ora añ lac wocol» mi caj i yʌqʼueñonla i cʼʌjñibal bʌ lac chaʼan. Mi caj i coltañonla chaʼan pʼʌtʌl mi yajñel lac ñopoñel (chʼujbiya), chaʼan mi lac taj lac ñʌchʼtʌlel yicʼot jiñi chubʌʼañʌl tac (He. 4:16, Jiñi tsijiʼ bʌ wen tʼañ chaʼañ estudio; He. 13:5, 6).

9. Cheʼ bajcheʼ miʼ yʌl Proverbios 22:3, 7, ¿chucoch mach yomic mi lac yilol otsan lac bet, i chuqui miʼ mejlel i coltañonla chaʼan wen chuqui mi lac yajcan lac mel?

⁹ Mach lac yilol otsan lac bet (pejcan Proverbios 22:3, 7) Cheʼ mi laj qʼuextan baqui mi lac chumtʌl, an i tajol cabʌl mi laj cʼʌn taqʼuin yicʼot ti ora miʼ mejlel la cotsan lac bet. Jin chaʼan, mach lac mʌn chuqui tac jach muʼ bʌ lac tsʼitaʼ toj majlel cheʼ bʌ mach i cʼʌjñibalic lac chaʼan. Cheʼ mi lac ñusan jumpʼejl wocol muʼ bʌ i yʌqʼueñonla cʌlʌx pensar bajcheʼ i cʌntʌntel juntiquil lac familia cʼam bʌ, tajol wocol mi la cubin chaʼan mi lac ñaʼtan jaypʼejl taqʼuin mi caj lac betan. Cheʼ baʼ ora miʼ yujtel jiñi, yomʌch mi laj cʼajtesan chaʼan cheʼ mi lac pejcan Jehová ti «oración» miʼ mejlel i coltañonla chaʼan wen chuqui mi lac yajcan lac mel. Jehová mi caj i yʌqʼueñonla jiñi ñʌchʼtʌlel muʼ bʌ caj i cʌntan lac pensar yicʼot lac pusicʼal yicʼot chaʼan wen jach mi lac ñaʼtan chuqui yom melol (Fil. 4:6, 7; 1 P. 5:7).

10. ¿Chuqui mi caj i coltañonla chaʼan mi lac taj tsijiʼ bʌ la camigojob?

¹⁰ Yom wen añonla la quicʼot la camigojob yicʼot lac familia. Laʼ lac suben jiñi la camigojob bajcheʼ mi la cubin lac bʌ yicʼot chuqui woli lac ñusan, ñumento jiñi am bʌ i ñusayob jaʼel. Jiñʌch muʼ bʌ caj i coltañonla chaʼan wen mi la cubin lac bʌ (Ec. 4:9, 10). Anquese muʼto lac bej pejcan jiñi la camigojob tsaʼ bʌ lac tajayob ti la queʼtel ti ñaxan, wersajʌch chaʼan yom mi lac taj tsijiʼ bʌ la camigojob. Jin chaʼan, yom mi lac sujtesan ti la camigojob jiñi yambʌlob. Laʼ lac subeñob chuqui ti bendición an i yʌqʼueyonla Jehová chaʼan cheʼ jiñi miʼ qʼuelob chaʼan tijicñayonla cheʼ mi lac melben i yeʼtel. Anquese an hermanojob maʼañic bʌ miʼ chʼʌmbeñob i sujm chucoch mi lac wen mulan jiñi i melol i yeʼtel Jehová tiʼ pejtelel ora, an yambʌlob muʼ bʌ caj i mulañob i ñumen ñaʼtan chaʼan jiñi eʼtel yicʼot mi caj i sujtelob ti la camigojob. Pero yom mi laj cʌntan lac bʌ chaʼan maʼañic mi laj cʌlʌx qʼuel lac bʌ ti ñuc chaʼan pejtelel am bʌ lac mele tiʼ troñel Jehová yicʼot mach lac chʼʌm ti ñuc jiñi chʼijiyemlel am bʌ ti lac tojlel.

11. ¿Bajcheʼ miʼ bej mejlel lac taj lac tijicñʌyel ti lac ñujpuñel?

¹¹ Mi tsaʼ laj cʌyʌ jiñi eʼtel am bʌ lac chaʼan ti ñaxan come tsaʼ cʼamʼa jiñi lac piʼʌl, mach lac suben chaʼan i mul. I mi joñonla jiñi tsaʼ bʌ cʼamʼa, mach yomic mi lac ñaʼtan chaʼan lac mul yicʼot  chaʼan maʼañic tsaʼ mejli lac tsʼʌctesan jiñi yom bʌ lac piʼʌl. Laʼ laj cʼajtesan chaʼan añonjachla ti juntiquil yicʼot chaʼan tsaʼ la cʌqʼue lac tʼan Jehová chaʼan mi caj lac lajal cʌntan lac bʌ cheʼ baʼ ora an wocol o maʼañic (Mt. 19:5, 6). Yambʌ jiñʌch cheʼ miʼ tilel la calobil. Pero mach lac suben chaʼan i mul tsaʼ laj cʌyʌ jiñi eʼtel. Laʼ lac suben chaʼan jiñʌch muʼ bʌ lac ñumen qʼuel ti ñuc i mach jiñic jiñi eʼtel tsaʼ bʌ laj cʌyʌ. Laʼ lac suben ti bele ora chaʼan jumpʼejlʌch majtañʌl tsaʼ bʌ i yʌqʼueyonla Jehová. (Sal. 127:3-5). Cheʼ jaʼel, laʼ lac suben chuqui tac wen tsaʼ lac ñusa ti jiñi eʼtel come jiñʌch muʼ bʌ i mejlel i ñijcan chaʼan miʼ melben i yeʼtel Jehová tiʼ pejtelel ora, cheʼ bajcheʼ tsaʼ lac mele joñonla.

12. a) ¿Bajcheʼ miʼ mejlel laj coltan jiñi hermanojob muʼ bʌ i chaʼleñob eʼtel tiʼ pejtelel ora chaʼan maʼañic miʼ cʌyob jiñi eʼtel? b) ¿Chuqui miʼ mejlel lac mel chaʼan mach wocolic miʼ yubiñob jiñi tsijiʼ bʌ i yeʼtelob?

¹² An cabʌl congregación tac yicʼot cabʌl hermanojob am bʌ i bajñel ñaʼtayob chaʼan miʼ coltañob jiñi woli bʌ i melbeñob i yeʼtel Jehová ti pejtelel ora chaʼan maʼañic miʼ cʌyob. Jumpʼejl ejemplo, miʼ ñuqʼuesʌbeñob i pusicʼal chaʼan miʼ bej melob jiñi eʼtel, miʼ coltañob ti taqʼuin o chuqui cʼʌjñibal bʌ i chaʼañob o miʼ cʌntʌbeñob jiñi i familia cʼamoʼ bʌ. Cheʼ miʼ melob ili tac, yom mi lac wen qʼuelob ti ñuc (Gá. 6:2). ¿Chuqui miʼ mejlel lac mel mi juntiquil hermano tsaʼ bʌ i cʌyʌ i melben i yeʼtel Jehová tiʼ pejtelel ora miʼ cʼotel yaʼ ti laj congregación? Mach yomic mi lac ñaʼtan chaʼan tsiʼ cʌyʌ jiñi eʼtel tiʼ caj maʼañic tsaʼ mejli i mel ti wen o chaʼan tsiʼ mele mach bʌ weñic. * Yom jach mi laj coltañob chaʼan miʼ ñʌmʼañob yaʼ ti tsijiʼ bʌ congregación. Cheʼ bʌ miʼ cʼotelob, laʼ lac pejcañob ti uts bʌ tʼan yicʼot laʼ lac subeñob chaʼan weñʌch pejtelel tsaʼ bʌ i mele tiʼ tojlel  Jehová, anquese mach wen cʼoqʼuix i maʼañix bajcheʼ cʼamel miʼ mejlel i mel bajcheʼ ti ñaxan. Laʼ lac chaʼlen wersa chaʼan mi laj cʌn jiñi hermano. Laʼ laj cʌn pejtelel chuqui yujil, bajcheʼ wen chajpʌbil yicʼot chuqui tac ñusʌbil i chaʼan.

13. ¿Bajcheʼ miʼ mejlel laj coltan juntiquil hermano muʼ bʌ i cʌy i melben i yeʼtel Jehová tiʼ pejtelel ora?

¹³ Ti ñaxan, tajol jiñi hermano yom coltʌntel chaʼan miʼ taj baqui miʼ chumtʌl, baqui miʼ chʼʌm jiñi carro, miʼ taj jumpʼejl eʼtel o yan tac bʌ. Tajol yom mi lac tsictesʌben bajcheʼ miʼ mejlel jiñi tojoñel o yan tac bʌ. Ñumen ñuc bʌ i cʼʌjñibal jiñʌch cheʼ mi lac chʼʌmben i sujm chuqui woliʼ ñusan, mach chaʼañic jach mi lac pʼuntan. Tajol cʼam o juntiquil tiʼ familia. O wen chʼijiyem come an majqui tsaʼ chʌmi (sajti) i chaʼan. * Anquese maʼañic miʼ sub, tajol chʼijiyem jaʼel come miʼ wen cʼajtesan jiñi i yamigojob. Mach ti ora miʼ mejlel i cʌy i yubiñob i bʌ bajcheʼ jiñi i an i tajol mach yujilobic chucoch cheʼ miʼ yubiñob.

14. ¿Bajcheʼ tsiʼ coltayob jiñi hermanojob juntiquil hermana chaʼan miʼ ñʌmʼan yaʼ tiʼ tsijib territorio?

¹⁴ Ti jiñi bʌ ora, jiñi laj coltaya yicʼot wem bʌ lac melbal miʼ mejlel i coltan chaʼan miʼ ñʌmʼan yaʼ baqui miʼ cʼotel. Juntiquil hermana tsaʼ bʌ i melbe i yeʼtel Jehová ti cabʌl jab ti yambʌ país miʼ yʌl: «Yaʼ baqui tsaʼ ajñiyon, mi cʌcʼ estudio chaʼan Biblia ti jujumpʼejl qʼuin. Pero yaʼ baqui tsaʼ cʼotiyon wocol tsaʼ cubi, jinto jaʼel chaʼan mic pejcan jumpʼejl texto o mic pʌs jumpʼejl video yaʼ ti subtʼan. Pero jiñi hermanojob yicʼot hermanajob yaʼ ti tsijiʼ bʌ j congregación, miʼ pʌyoñob majlel chaʼan tiʼ melol revisita tac yicʼot estudio. Cheʼ bʌ tsaʼ j qʼuele chaʼan ili hermanojob wen bʌxoʼ bʌ yicʼot chʼejloʼ bʌ añobʌch i estudio woli bʌ i colelob tiʼ chaʼan bʌ Dios, tsiʼ coltayon chaʼan wen jach chuqui mic ñaʼtan. Tsaʼ j cʌñʌ bajcheʼ mic tech tʼan yicʼot wiñicob xʼixicob ti jiñi tsijiʼ bʌ territorio. Wocolix i yʌlʌ chaʼan pejtelel iliyi, tsaʼ chaʼ cʼoti cubin c tijicñʌyel».

15. ¿Bajcheʼ miʼ mejlel lac tajben i wenlel jumpʼejl tsijiʼ bʌ eʼtel?

¹⁵ Miʼ mejlel lac taj lac wenlel ti jumpʼejl tsijiʼ bʌ eʼtel. Mach lac ñaʼtan chaʼan mach weñic tsaʼ lac mele jiñi eʼtel am bʌ lac chaʼan ti ñaxan yicʼot chaʼan mach añix laj cʼʌjñibal. Laʼ laj qʼuel bajcheʼ  woliʼ coltañonla Jehová i laʼ lac chaʼlen wersa ti subtʼan. Laʼ lac lajin jiñi xucʼul bʌ xñoptʼañob ti ñaxam bʌ siglo, «tsaʼ pam ñumiyob ti subtʼan», mach yʌlʌyic baqui añob (Hch. 8:1, 4). Mi mucʼʌch lac bej chaʼlen subtʼan, mi caj lac tajben i wenlel. Jumpʼejl ejemplo, junmojt precursorob tsaʼ chojquiyob loqʼuel ti jumpʼejl país i tsaʼ majliyob ti chumtʌl ti yambʌ tejclum baqui yomto xsubtʼañob ti jiñi tʼan yujiloʼ bʌ. Maʼañic jaypʼejl uw tsaʼ ñumi, tsaʼ tejchi cabʌl grupo tsaʼ bʌ coli ti ora.

16. ¿Chuqui mi caj i coltañonla lac mulan jumpʼejl tsijiʼ bʌ eʼtel?

¹⁶ Nehemías tiʼ sube jiñi judíojob: «Jiñʌch laʼ pʼʌtʌlel cheʼ tijicñayetla ti lac Yum» (Neh. 8:10). Anquese mi lac wen mulan yaʼ baqui woliyonla ti eʼtel, mach yaʼic chucul jiñi lac tijicñʌyel, yaʼ cʌyʌl cheʼ i yamigojonla Jehová. Jin chaʼan, laʼ chʌn ajñiconla tiʼ tojlel jiñi lac Dios i laʼ lac ñop chaʼan mi caj i yʌqʼueñonla lac ñaʼtʌbal, miʼ tojʼesañonla yicʼot miʼ coltañonla. Laʼ laj cʼajtesan chaʼan tsaʼ cʼoti lac mulan jiñi eʼtel am bʌ lac chaʼan ti ñaxan come ti jumpʼejl lac pusicʼal tsaʼ laj colta yambʌ quixtañujob. Jehová mi caj i coltañonla chaʼan cheʼʌch miʼ cʼotel la cubin ti jiñi tsijiʼ bʌ la queʼtel mi ti jumpʼejl lac pusicʼal mi lac mel (Ec. 7:10).

17. ¿Chuqui yom mi laj cʼajtesan chaʼan jiñi eʼtel am bʌ lac chaʼan ili ora?

¹⁷ Yom mi laj cʼajtesan chaʼan tiʼ pejtelel ora mi caj lac melben i yeʼtel Jehová, pero jiñi eʼtel am bʌ lac chaʼan ili ora, jumucʼ jach. Pero yaʼ ti tsijiʼ bʌ pañimil, tajol jiñi muʼ bʌ caj lac mel tiʼ tojlel Jehová mach lajalic bajcheʼ jiñi woli bʌ lac mel ti ili ora. Alexéi, tsaʼ bʌ lac taja ti tʼan tiʼ tejchibal ili temaj, miʼ ñop chaʼan jiñi woli bʌ i chumtan ili ora mi caj i cʼʌjñibʌyel i chaʼan ti talto bʌ qʼuin. Miʼ yʌl: «Ti bele ora an c ñaʼta chaʼan añʌch Jehová yicʼot chaʼan mucʼʌch caj i tilel jiñi tsijiʼ bʌ pañimil, pero mach lʌcʼʌlic mi cubin c bʌ tiʼ tojlel Jehová i chaʼan mach orajic mi caj i tsʼʌctesan i tʼan chaʼan jiñi tsijiʼ bʌ pañimil. Ti wʌle bʌ ora, wen lʌcʼʌl añon quicʼot Jehová i mi cubin chaʼan mach jalix yom chaʼan miʼ tilel jiñi tsijiʼ bʌ pañimil» (Hch. 2:25). Mach yʌlʌyic chuqui ti eʼtel woli lac mel, yom mi lac chʌn ajñel la quicʼot Jehová. Maʼañic baʼ ora mi caj i cʌyonla, mi caj i coltañonla chaʼan tijicña mi lac mel jiñi i yeʼtel cheʼʌch bajcheʼ cʼamel mi lac mejlel ti baqui jach (Is. 41:13).