1-3. San a wantu sani di sa meke son sama á poi du a fuuten diniwooko moo?

ROBERT anga Mary Jo taki: „U du a zendeling wooko 21 yali. Baka dati u mma anga u dda á be poi luku denseefi moo. U lobi den, neen meke u be piisii fu solugu den. Toku a be taanga gi u fu fika a wooko di u be e du, bika u be lobi a wooko ya.”

² William anga Terrie taki: „A gusontu fu u be go anga baka, neen meke wi á be poi go doo anga a wooko di u be e du. U kee di u yee taki wi á be o man du a zendeling wooko moo.”

³ Aleksey taki: „U be sabi taki lanti be wani tapu a beikantoo pe u be e wooko. Ma toku u be dyombo di a sani ya pasa tuutuu. U be abi fu komoto a Betel.”

4. Sowtu akisi wi o luku aini a artikel ya?

⁴ A omen dunsu baala anga sisa di be e wooko a Betel, efuso di be e du wan taa fuuten diniwooko, be fende wan taa wooko aini a olikanisâsi. * Kande a taanga gi den baala anga sisa ya di e dini Yehofa anga den hii ati fu fika a wooko di den lobi. San a wantu sani di sa yeepi den fu piisii winsi fa sani kengi? Fa u sa holibaka gi den? Den akisi ya sa yeepi ala sama te sani kengi aini den libi.

5. San e miti son baala anga sisa te a wooko di den be e du gi Yehofa kengi?

⁵ Te wi e wooko a Betel efuso te wi e du wan taa fuuten diniwooko, wi e kon lobi den sama di wi anga den e wooko. Wi e kon lobi a wooko di wi e du tu. Te a de fu u fika a wooko ya, tyali e kisi u. Wi e angii fu den sama di u fika a baka. Wi e booko wi ede anga den, moomoo te u mu gwe fu di lanti tapu a wooko (Mat. 10:23; 2 Kor. 11:28, 29). A sa taanga gi u fu gwenti a fasi fa den e du sani na a pisi pe u foloisi go. Winsi a osu u daai go baka seefi a á makiliki fu teke gwenti. Robert anga Mary Jo taki: „Wi á be gwenti a fasi fa den sama fu a kondee fu u be e libi moo. A be taanga gi u fu peleiki aini u mamabee tongo. U be e fii enke wi a be taa kondee sama.” Son baala anga sisa e kon abi moni polobelema te den fende wan nyun faantiwowtu. Son leisi den e fii booko-saka tu. Fa u sa yeepi den baala anga sisa ya?

6. Fa u sa tan koosube a Yehofa?

⁶ Tan koosube a Yehofa (Yak. 4:8). Fa u sa du a sani ya? U mu fitoow Yehofa, „a sama di e aliki begi” (Ps. 65:2). Psalm 62:8 taki: „Puu ala san de a yu ati taigi en.” Yehofa man du „moo san wi e begi en efuso san wi e denki” (Efe. 3:20). Yehofa nai gi u den sani di wi e begi en namo. A sa du wan sani di wi á be denki seefi fu losi den polobelema fu u.

7. (a) San o yeepi u fu tan koosube a Yehofa? (b) Enke fa Hebrewsama 6:10-12 e soi, da sowtu wini wi o fende te u tan dini Yehofa anga u hii ati?

⁷ Efu u wani tan koosube a Yehofa u mu e leisi Beibel ala dei, da u teke ten pakisei san u leisi. Wan baala di be de zendeling fosi taki: „I mu e holi a Osufamii Anbegi ala yuu. I mu e seeka gi den komakandaa tu leti enke fa i be gwenti.” Tan du a peleikiwooko fayafaya tu. Jehovah nai feegete den sama di e dini en fayafaya, winsi den á poi du ala san den be e du fosi.​—Leisi Hebrewsama 6:10-12.

8. Fa den sani di sikiifi a 1 Yohanisi 2:15-17 sa yeepi u fu wi á libi bigi?

 ⁸ Ná libi bigi. Yu á mu meke den booko-ede fu a goontapu fu Saatan tapu i fu dini Yehofa (Mat. 13:22). Ná aliki famii efuso mati di e taigi i taki i mu abi tyaipi moni efi i wani i libi waka bun. (Leisi 1 Yohanisi 2:15-17.) U mu biibi taki Yehofa na a sama di e gi u san wi abi fanowdu „na a moo bun yuu”. Ai yeepi u fu taanga u biibi.​—Heb. 4:16; 13:5, 6.

9. Enke fa Odo 22:3, 7 e soi, da saide wi á mu meke paiman di á de fanowdu? San sa yeepi u fu du sani anga koni?

⁹ Ná meke paiman di á de fanowdu. (Leisi Odo 22:3, 7.) Te wi e foloisi a makiliki fu meke paiman, bika a dii fu foloisi go tan a wan taa peesi. Efi yu a wani abi gaan paiman yu á mu leni moni fu bai sani di i ná abi fanowdu tuutuu. Te u mu solugu wan sama fu u di siki efuso te wi abi taa booko-ede, ai moo taanga fu sabi omen moni u mu leni. Te a sani ya miti u wi á mu feegete fu ’begi Yehofa fayafaya’. A sani ya o yeepi u fu du sani anga koni. Yehofa o gi wi a freide fi en di o „kibii wi ati anga u fusutan”. A sani ya o yeepi u fu sabi san na a moo bun sani fu du.​—Filip. 4:6, 7; 1 Peit. 5:7.

10. San o yeepi i fu meke nyun mati?

¹⁰ Suku bun mati di sa yeepi i. Taigi den mati fi i fa yu e fii, moomoo den wan di be miti denseefi sani di e miti i. A sani ya o yeepi i fu fii moo bun (Peleik. 4:9, 10). Den mati di i be abi a pe i be de fosi e tan i mati ete. Ma toku i mu meke nyun mati a pe i foloisi go. Holi a pakisei taki efi i wani abi mati, iseefi mu de wan mati gi taawan. Fa i sa meke nyun mati? I sa e gi taawan toli fu den fasi fa Yehofa yeepi i di i be e du a taa wooko gi en. Den mu man si taki anga piisii yu e wooko gi Yehofa. Winsi son sama aini a kemeente nai kaba fusutan saide i lobi a fuuten diniwooko, kande taawan o wani sabi moo fu a fuuten diniwooko. A so den o toon i mati. Ná poti pakisei a iseefi tumisi te yu anga den e taki. Yu á mu e taki fu den booko-ede fi i ala yuu.

11. Fa i sa piisii enke osufamii winsi u libi kengi?

¹¹ Efi i mu tapu anga a fuuten diniwooko fu di i toowpaa siki, yu á mu gi en a fowtu. Ma na a taase efu a yu siki, yu á mu fii enke a yu meke i toowpaa tapu anga a fuuten diniwooko. Holi a pakisei taki yu anga en a „wan sikin”. U paamisi a Yehofa fesi taki wi o holibaka gi useefi winsi san e pasa (Mat. 19:5, 6). Efi i mu tapu anga a fuuten diniwooko fu di i de anga bee, i mu meke a pikin si kiin taki i  lobi en moo a faantiwowtu di i be abi. U mu e taigi a pikin ala yuu taki wi e si en enke „wan kado” di Gadu gi u (Ps. 127:3-5). U mu e gi en ondoofenitoli tu fu a ten di u be e du a fuuten diniwooko. A sani ya o gi en taanga-sikin fu wooko gi Yehofa tu leti enke u.

12. (a) Fa i sa yeepi baala anga sisa di de aini a fuuten diniwooko fu go doo anga a wooko fu den? (b) Fa u sa yeepi den fu teke gwenti?

¹² A omen kemeente anga taa sama e holibaka gi den baala anga sisa di e du a fuuten diniwooko fu den á fika a wooko ya. Den e gi den moni anga taa sani di den abi fanowdu. Den e yeepi den luku den famii fu den di abi yeepi fanowdu (Gal. 6:2). Efu den sende wan sama di be de aini a fuuten diniwooko kon na a kemeente pe i de, yu á mu si enke a du a á be e du en wooko bun meke den gi en wan taa wooko. Yu á mu si enke a wan sani a du tu. * Pe fi i pakisei den sani de, a moo bun fi i yeepi en fu teke gwenti. Soi switifasi gi en. Winsi son wan fu den á poi wooko taanga moo fu di den siki, gafa den fu a wooko di den be e du. Meke moiti fu sabi den moo bun. Meke moiti fu leli wan sani fu a ondoofeni fu den. Meke den leli i san den sabi tu.

13. Fa u sa yeepi den sama di kon a u kemeente fu di den kisi wan nyun faantiwowtu?

¹³ Biginbigin, kande den sama di fende wan taa faantiwowtu aini a olikanisâsi o abi sama fanowdu fu yeepi den  fu fende wooko, osu, wagi, efuso taa sani di den abi fanowdu. Kande den o abi sama fanowdu tu fu yeepi den anga pampila sani fu a nyun peesi pe den go. Wan taa fasi fa u sa yeepi den, a te wi e meke moiti fu fusutan fa den e fii. Kande na a gusontu fu den go a baka, efuso wan famii fu den siki. Kande a wan sama fu den dede. * Kande den e angii fu den mati di den be abi a pe den be de fosi. Kande den nai taki fu den sani ya, ma toku i sa holi den a pakisei. Den o abi ten fanowdu fu kisi denseefi baka.

14. Fa baala anga sisa yeepi wan sisa fu fiti enseefi na a nyun kemeente di a foloisi go?

¹⁴ Te yu e wooko anga den nyun baala anga sisa ya aini a peleikiwooko, a sani ya sa yeepi den fu teke gwenti moo gaw. Wan sisa di dini omen yali enke zendeling aini wan taa kondee taki: „Na ala dei mi be e abi Beibelsutudi na a taa kondee pe mi be e du a zendeling wooko. Ma a nyun peesi di den sende mi go, wan Beibel tekisi efuso wan felon seefi ai taanga fu soi den sama. Den baala anga sisa aini a nyun kemeente be e kai mi fu go a den gobaka anga sutudi fu den. Di mi si fa den be e meke moiti fu yeepi den Beibel sutudi fu den, a sani ya yeepi mi fu si taki sama be de ete di wani sabi moo. Mi leli fa fu bigin wan takimakandaa na a pisi pe u be e peleiki. Den sani ya yeepi mi fu piisii baka.”

15. San i mu du efi i wani abi bun bakapisi te sani kengi?

¹⁵ Winsi sowtu faantiwowtu i fende aini a olikanisâsi, i sa abi bun bakapisi. Yu á mu si enke a du yu á be e du i wooko bun meke den baala gi i wan taa wooko. Meke moiti fu si fa Yehofa e yeepi i. Yu á mu tapu fu peleiki tu. Waka a den fositen Kelesten baka di be e „paati a bun nyunsu fu a wowtu fu Gadu na a hii  kondee” (Toli 8:1, 4). Efi yu e tan peleiki, yu o fende wini. Luku a toli fu wantu pionili di lanti yaki puu a wan kondee. Den pionili ya foloisi go a wan taa kondee di be de koosube, pe den be e taki a tongo fu den. Baka wantu mun a omen kulu den be opo aini a kondee ya.

16. Fa i sa piisii anga a nyun wooko fi i?

¹⁶ „A piisii di Yehofa e meke sama piisii de enke wan kibiipeesi gi u” (Neh. 8:10). Winsi u lobi a wooko di wi e du gi Yehofa, tokuso u mu moo lobi Yehofa. Neen meke efu u wani piisii anga iniiwan wooko di u mu du aini a olikanisâsi, u mu tan koosube a Yehofa, u mu e fitoow en tu. Na feegete taki a di i be wani yeepi den sama a pe i be de meke i be lobi a wooko di i be e du ape. Neen meke efi i wani piisii anga a nyun wooko fi i, i mu wani yeepi den sama a pe i de nownow. Te i du a sani ya Yehofa o yeepi i fu piisii baka.​—Peleik. 7:10.

17. San u mu holi a pakisei fu den gaandi di wi abi nownow?

¹⁷ U mu holi a pakisei taki a dini di wi e dini Yehofa a fu alaten, ma a wooko di wi e du gi en nownow sa kengi. Kande aini a nyun goontapu a wan taa wooko wi o du. Aleksey di u be taki fi en na a bigin e si a kengi di sani kengi aini en libi nownow, enke wan fasi fa Yehofa e seeka en gi a nyun goontapu. A taki: „Mi be sabi taki Yehofa de tuutuu. Mi be sabi taki wan nyun goontapu o kon tu. Ma mi be e si enke den sani ya á be o pasa ete. Nownow mi kon moo koosube a Yehofa. Mi e fii enke a nyun goontapu de leti ya” (Toli 2:25). Winsi sowtu wooko wi e du aini a olikanisâsi nownow, u mu meke moiti fu wi anga Yehofa á poli. Noiti a o gwe fika u. Winsi pe u de a o yeepi u fu piisii anga a wooko di wi e du.​—Yes. 41:13.