1-3. Ki rézon ki pé fè on sèwvitè aplentan chanjé aktivité ?

MI SA Robert é Mary Jo ka di : « Nou pasé 21 an antankè misyonè. Sa té bèl toubònman ! Men malérèzman, 2 paran an nou chak vin enfim. Nou té kontan okipé dè yo. Men sa té rèd toubònman pou nou té kité koté-la nou té ka sèvi la pas nou té enmé péyi-lasa onlo. »

² William é Terrie ka di : « Lè nou vin sav nou pa té pé rètouné la nou té ka sèvi la akòz dè santé an nou, nou pran pléré. Tout krab-la té mò an bari-la ! Nou pa té pé sèvi Jéova adan on péyi étranjé ankò. »

³ Mi sa Alèkséy ka di : « Nou té ja sav kè sé moun la ki té ka pèwsékité-nou la té vlé fèmé Filyal an nou. Men lè yo fèmé Bétèl-la é kè fò nou té pati, sa kontraryé-nou kanmenm. »

4. Dè ki kèsyon nou k’ay palé adan awtik-lasa ?

⁴ Anplisdisa, sonjé sitiyasyon a plizyè milyé bétélit é dòt sèwvitè aplentan, ki ka fè on nouvo travay * pou Jéova. Sé frè é sè fidèl lasa pé touvé sa rèd dè kité on aktivité yo té enmé onlo. Ka ki pé édé-yo fè kò èvè chanjman-lasa ? Kijan nou pé édé-yo ? Répons a sé kèsyon-lasa pé édé-nou lè ni on chanjman adan vi an nou.

5. Kijan sa pé aji anlè nou lè nou ka chanjé aktivité ?

⁵ Ki nou misyonè, ki nou ka sèvi adan Bétèl-la, nou ka vin enmé moun nou ka frékanté é nou ka jous vin  enmé koté-la nou ka sèvi la. É si pou kèk rézon fò-nou pati, sa ka fann tchè an nou. Sé frè é sè la nou ka kité la ka manké-nou onlo, é nou ka enkyèt pou yo, siwtou si sé akòz dè pèwsékisyon-la nou pati (Mat. 10:23 ; 2 Kor. 11:28, 29). Anplisdisa, lè nou ka chanjé aktivité oben nou ka rètouné akaz an nou, sa pé rèd toubònman pas fò-nou adapté-nou a on nouvo kilti. Mi sa Robert èvè Mary Jo ka di : « Nou té ja dézabityé èvè pwòp kilti an nou, é nou té ja pèd labitid préché adan pwòp lang an nou osi. Konm nou rété ka sèvi Jéova ondòt koté pannan on bon moman, nou té ni lenprésyon nou té étranjé adan pwòp péyi an nou. » Désèrten frè é sè ki ka chanjé aktivité pé touvé-yo èvè pwoblèm a lajan yo pa té ni avan. Kifè, yo pa oblijé sav ka pou yo fè é yo ka pèd kouraj. Ka ki pé édé-yo ?

6. Kijan nou pé rété toupré Jéova ?

⁶ Rété toupré Jéova (Jak 4:8). Pou nou rivé fè sa, fò-nou sèten i ‘ka tann priyè’ an nou (Sòm 65:2). Sòm 62:8 ka di : « Wouvè tchè a zòt ba-y ». Jéova pé « fè vréman lontan-lontan plis ki tousa nou mandé oben nou ka imajiné » (Éféz. 3:20). Lè Jéova ka réponn a priyè an nou, i pa’a ban-nou yenki sa nou ka mandé-y. I ka fè plis ki sa. I pé rézoud pwoblèm nou ka jwenn on mannyè nou pa té’é jen imajiné.

7. a) Ka ki pé édé-nou rété toupré Jéova ? b) Dapré Ébré 6:10-12, ki byenfé nou ké ni si nou ka kontinyé sèvi Jéova fidèlman ?

⁷ Pou rété toupré Jéova, fò-nou li Pawòl a-y touléjou é pran tan réfléchi asi-y. On ansyen misyonè ka di : « Fò-w kontinyé fè étid familyal a-w é préparé sé réinyon-la, kon ou té ni labitid fè avan. » Kontinyé fè lè maksimòm pou préché èvè nouvo lasanblé a-w. Jéova ka sonjé tout frè é sè ki ka kontinyé sèvi-y èvè fidélité menmsi yo pé pa fè tousa yo té ka fè avan (li Ébré 6:10-12).

8. Kijan sa ki maké adan 1 Jan 2:15-17 pé édé-w kontinyé ni on vi ki senp ?

⁸ Kontinyé ni on vi ki senp. Pa lésé difikilité a lavi anpéché-w sèvi Jéova (Mat. 13:22). Mond-lasa, zanmi a-w oben fanmi a-w pé chèché a mèt présyon asi-w pou fè-w konprann ou bizwen on bon travay pou-w pé sa byen. Yo pa oblijé  ni pon mové lentansyon ! Men pa lésé présyon-lasa aji asi-w (li 1 Jan 2:15-17). Jéova ka pwomèt-vou i ké toujou ba-w tousa ou bizwen « o bon moman ». I ké édé-w konsolidé fwa a-w, i ké trankilizé lèspri a-w é i ké ba-w byen matéryèl ou bizwen. Ou pé fè-y konfyans ! (Ébr. 4:16 ; 13:5, 6).

9. Dapré Pwovèb 22:3, 7, poukwa sa enpòwtan kè nou pa mèt dèt initil asi do an nou é ka ki pé édé-nou pran on bon désizyon ?

⁹ Pa mèt dèt initil asi do a-w (li Pwovèb 22:3, 7). Déménajé, sé on biten ki pé fè on moun dépansé onlo lajan é ki pé fè-y ni dèt fasilman. Pou-w pa touvé-w èvè onlo dèt, pa fè krédi pou biten ou pa vréman bizwen. Lè nou adan on sitiyasyon ki ka boulvèsé-nou, kon lè nou ka okipé dè on fanmi an nou ki malad, nou pé ni dimal a désidé konmen lajan nou ké prété. Si ou adan on sitiyasyon konsa, sonjé kè si ou priyé Bondyé é ou sipliyé-y, sa pé édé-w pran on désizyon ki saj. Pou Jéova réponn a priyè a-w, i pé ba-w lapé ki ké ‘pwotéjé tchè a-w é lèspri a-w’ pou-w pé sa rété kalm pou pran on bon désizyon (Filip. 4:6, 7 ; 1 Pyè 5:7).

10. Kijan ou pé fè pou ni bon zanmi ?

¹⁰ Rété toupré a moun ki pé aji anbyen asi-w. Palé dè sa ou ka rèsanti é dè sa ou ka viv èvè dé bon zanmi. Sé pé dé zanmi ki ja touvé-yo adan menm sitiyasyon ki-w. Lè ou ké fè sa, ou ké santi-w plibyen (Ékl. 4:9, 10). Sé zanmi-la ou té ni avan la ké toujou zanmi a-w. Men alè, la ou yé la, fò-w touvé dòt zanmi. Sonjé kè pou-w pé sa ni zanmi, fò voumenm a-w janti èvè lézòt. Ka ou pé fè pou ni dòt zanmi ? Palé èvè lézòt dè tout bèl èkspéryans ou ja viv dépi ou ka sèvi Jéova, pou yo pé sa santi tout jwa-la ki andidan a-w la. Menmsi sèwten frè é sè adan lasanblé lokal a-w pa’a konprann ki jwa ou ka rèsanti difètkè ou ka sèvi Jéova aplentan, pétèt ni dòt ki ké anvi sav plis biten asi sèwvis a-w. É yo pé vin bon zanmi èvè-w ! Sèlman, fè atansyon pou-w pa palé twòp dè voumenm é dè sa ou ja fè pou Jéova. É fò pa ou palé twòp dè biten ki négatif.

11. Ka ou pé fè pou-w toujou ni tchè-kontan adan mayé a-w ?

¹¹ Si fò-w té kité sèwvis a-w paskè mari a-w ou madanm a-w tonbé malad, pa rann-li rèsponsab dè sa. Menmjan-la, si sé vou ki tonbé malad, pa mèt an tèt a-w kè ou désèvwa moun-la ou mayé èvè-y la, é pa santi-w koupab pou sa. Toujou sonjé kè zò sé « onsèl chè, » é kè lè zò mayé, zò pwomèt Jéova kè yonn ké pran swen a lòt kèlkèswa sa ki rivé (Mat. 19:5, 6). Si fò ou té arété sèwvis a-w pas ou vin  tonbé ansent alòskè sa pa té o pwogram, fè ansòt pou timoun a-w sav kè i pli enpòwtan ki sèwvis-la ou té ni la. Fò-w toujou di-y i sé « on rékonpans » ki ka vin dè Bondyé (Sòm 127:3-5). Anmenmditan, palé èvè-y dè tout bèl biten ou viv adan sèwvis a-w. Si ou fè sa, sa pé ba timoun a-w anvi sèvi Jéova aplentan kon ou té ka fè-y.

12. a) Ka nou pé fè pou édé sé sèwvitè aplentan la kontinyé sèwvis a yo ? b) Kijan nou pé édé-yo santi-yo byen la yo yé la aprézan ?

¹² Onlo lasanblé lokal ka pran dispozisyon pou sé sèwvitè aplentan la pé sa rété adan aktivité a yo. Ni onlo frè é sè osi ki ka édé-yo dè yomenm a yo. A pa ti bèl sa bèl ! Pou ankourajé sé sèwvitè aplentan la a kontinyé sèwvis a yo, sé frè é sè lasa ka ba-yo sa yo bizwen oben yo ka pran swen a fanmi a yo ki malad ou ki ja ni on tilaj (Gal. 6:2). Si yo voyé sèwvitè aplentan adan lasanblé lokal * a-w, pa pansé kè si yo chanjé aktivité sé pas yo fè on biten ki pa bon. Olyé dè sa, ba-yo on pal pou yo santi-yo byen la yo yé la aprézan. Akéyi-yo bra gran wouvè, é menmsi yo pé pa fè tousa yo té ka fè avan akòz dè santé a yo, félisité-yo pou tousa yo ja fè. Aprann konnèt-yo. Konm sé dé moun ki plen konésans, ki ja viv onlo biten é ki rèsèvwa on bèl fòwmasyon, éséyé vwè kijan ou pé pran ègzanp asi yo.

13. Ka nou pé fè pou édé sé sèwvitè aplentan la lè yo sòti voyé-yo ondòt koté ?

¹³ Lè yo sòti rivé konsa, pétèt sé  sèwvitè aplentan la ka bizwen on moun édé-yo touvé on kaz pou rété, on vwati, on travay é dòt biten ankò. Pétèt osi yo bizwen déotwa enfòwmasyon pou sav kijan yo ka péyé enpo adan péyi-lasa oben ka yo dwèt fè pou pran on asirans. Anfinaldikont, sa yo pi bizwen, sé kè nou éséyé konprann sitiyasyon a yo ! Délè, yo ka jwenn difikilté kon lamaladi oben fò yo okipé dè on fanmi a yo ki malad. Pétèt osi yo pèd on moun yo té enmé *, é sa ka rann-yo tris toubònman. É menmsi yo pa’a palé dè sa alantou a yo, nou ka tou konprann kè zanmi yo té ni avan ka manké-yo onlo pas yo pa’a vwè sé frè é sè lasa souvan kon avan. Yo bizwen tan pou aksèpté sa yo ka rèsanti é pétèt sa ka fè onsèl mélanj an tèt a yo.

14. Kijan pwoklamatè a on lasanblé lokal édé on sè santi-y byen la i yé la konnyéla ?

¹⁴ Si ou ka préché èvè sé sèwvitè aplentan la é si ou ka soutyenn-yo, sa ké édé-yo santi-yo byen. Mi sa on sè ki sèvi Jéova pannan onlo lanné adan on péyi étranjé ka di : « La an té yé la, an té ni étid biblik touléjou. É konnyéla, sé on fwa konsa an ka rivé wouvè Bib-la oben kè an ka pé montré on vidéo an prédikasyon. Men sé pwoklamatè la ki adan nouvo lasanblé an mwen ka envité-mwen adan vizit a yo é adan étid yo ni. Yo ka étidyé Labib èvè moun ki ka fè bon pwogré. Lè an konstaté jan yo ka pòté mannèv an prédikasyon é balan kouraj yo ni, an koumansé santi-mwen pli alèz an téritwa-la. An aprann koumansé dé ti kozé èvè moun ki adan nouvo téritwa an mwen. Tousa édé-mwen rètouvé jwa an mwen. »

15. Ka ou pé fè pou-w ni bon rézilta adan nouvo sèwvis a-w ?

¹⁵ Ou pé réyisi la ou yé la konnyéla. Pa konpranndèdi sé dèyè ou fè oben ou pa  itil ankò. Jéova ka édé-w onlo mannyè diféran. Pran tan a-w pou vwè kijan i ka édé-w, é kontinyé préché. Pran ègzanp asi sé krétyen fidèl la ki viv o prèmyé syèk. Apré on gwo pèwsékisyon, ‘toupannan yo té ka travèsé péyi-la, yo té ka anonsé bon nouvèl a Pawòl a Bondyé’ (Akt 8:1, 4). Asiré sèten, si ou ka fè éfò pou préché ou ké ni bon rézilta. Pa ègzanp, déotwa pyonyé yo té mèt déwò adan on péyi, ay viv adan on péyi toupré. É sa byen tonbé, paskè sa pèwmèt-yo préché ba moun ki té ka palé menm lang ki yo. An détwa mwa sèlman, plizyè gwoup té ja fòwmé adan lang-lasa é yo pwogrésé vit menm.

16. Ka ou pé fè pou-w ni tchè-kontan adan on nouvo sèwvis ?

¹⁶ « Lajwa ki ka vin dè Jéova, sé-y ki fòs a zòt » (Néém. 8:10, nòt). Menmsi nou enmé sèwvis-la nou ka fè la onlo, sé lanmityé an nou èvè Jéova ki dwètèt ban-nou lajwa. Alò rété toupré a Jéova é kontinyé konté asi sajès a-y, konsèy a-y é soutyen a-y. Sonjé kè si ou té enmé sèwvis-la ou té ka fè la konsa, sé pas ou té ka fè-y èvè tout tchè a-w é pas ou té vréman anvi édé sé moun la. Alò menmjan-la, mèt tout tchè a-w adan sa ou ka fè konnyéla é ou ké vwè kijan Jéova ka édé-w enmé sèwvis-lasa osi (Ékl. 7:10).

17. Ka fò-nou sonjé anrapò èvè sèwvis-la nou ka fè aprézan la ?

¹⁷ Fò-nou toujou sonjé kè nou ké sèvi Jéova étèwnèlman alòskè travay-la nou ka fè aprézan la sé jis pou on tan. Adan mond nouvo la, pétèt noutout ké ni ondòt biten a fè. Alèksèy, nou palé dè-y an débi a awtik-la, sèten kè sa i ka viv jòdla, sé on préparasyon pou mond nouvo la. Mi sa i ka di : « An toujou vwè Jéova kon on moun réyèl é mond nouvo la osi, men an té ni lenprésyon yo té on ti jan lwen kanmenm. Jòdijou, an ka santi an pli pré Jéova é kè sé dèmen menm mond nouvo la ka vin » (Akt 2:25). Kèlkanswa sa Jéova ban-nou fè konm travay, an-nou rété toupré-y. I pé’é janmen lagé-nou ! I ké édé-nou sèvi-y èvè tchè-kontan é i ké édé-nou fè tousa nou pé pou-y, kèlkanswa koté-la nou yé la. I pa’a mandé plis ki sa ! (Iz. 41:13).