1-3. ¿Jamüshii nnojoliinnapaka ayatüin sünain aʼyatawaa waneepia nümüin Jeʼwaa waneinnua wawalayuu?

ROBERT sümaa Mary Jo, misioneeroshii naya soʼu 21 juya, shiasaʼa ayuuijaʼalaʼa namaka na wayuu kachooinkana naya. Anuu nanüiki: «Talatüsü waaʼin süka waaʼinmajüin na wayuu kachooinkana waya. Mojupejeʼe waaʼin süka wakolojooinjanain, jama kiʼrainnain waya suluʼu tia mmakat».

² Anuu nünüiki William sümaa Terrie: «Aʼyalajüshii waya süka nnojoliinjanain ayatüin waya sünain tü waʼyataainkat sutuma ayuulin waya. Aʼyataweesü waaʼin nümüin Jeʼwaa suluʼu wanee mma naatajatü, aʼwüinjaapejeʼe tia».

³ Anuu nünüiki Alexéi: «Nüchajaain sukuwaʼipa chi sülaülakai tü mmakat süpüla nüshaʼwaleʼerüin tü aʼyatawaakat suluʼu Weteet. Naaʼinrapa tia, mojusü maʼin waaʼin süka wojuʼitüin suluʼujee Weteet».

4. ¿Jarat tü pütchi wasouteetkalü eʼipajee sünain ekirajaayakat tüü?

⁴ Wawalayuukana naainnua, nnojoishii nayain neʼe alatüin amüin tia. Alatüsü shia namüin na wawalayuu aʼyataakana suluʼu Weteet jee na aʼyataakana waneepia nümüin Jeʼwaa. * Eesüjaʼa mojule naaʼin süchiirua tü naʼyataainkat, jama kamalain maʼin shia namüin. ¿Kasa akaalinjeenaka naya? ¿Kasa waaʼinrüinjatka süpüla wakaalinjain naya? Sünainjee tü aküjüneetkat shiʼipajee tia pütchikat, wayaawateerü aaʼu tü waaʼinrüinjatkat sülatalaʼa sümüle wanee kasa wamüin.

5. ¿Jamüsü kapüleeka wamüin wekiʼralaain suluʼu wanee mma waʼyataainjatka aluʼu nümüin Jeʼwaa?

⁵ Jamüshiijaʼa waʼyataale suluʼu Weteet jee sünain waneirua aʼyatawaa nümüin Jeʼwaa, aishii wapüla na wayuukana jee ekiʼralaashii waya suluʼu tü mma kaluʼukat waya. Makalaka mojuin waaʼin wooʼulaainjatüle waʼyataain sutuma waneirua kasa. Wasukajüin na wayuu wapütakana jee shapaasü waaʼin naaʼu, shialeekajaʼa sülatüle tia wamüin sünainjee süpülajünüin woulia tü waʼyataainkat nümüin Jeʼwaa (Mat. 10:23, TNM; 2 Cor. 11:28, 29). Eesü kapüleere wamüin wekiʼralaain suluʼu wanee mma süka naatain nakuwaʼipa na kepiakana suluʼu, shialeekajaʼa waleʼejüle suluʼumüin woumain kakalia mapa. Anuu nünüiki Robert sümaa Mary Jo: «Waponojoo amaalü tü wakuwaʼipakat jee isasü wachiki aküjaa pütchi suluʼu tü anüikii watüjakat sünainjee wei. Müshii naatajanakai waaʼin». Eeshiijaʼa müliale waya sutuma sülatalaʼa sümüin kasa wamüin, maʼaka saaʼin manneetseraʼa wamüle, mmorüle waya jee mojule waaʼin. ¿Kasa akaalinjeenaka waya sülatüle wamüin tia?

6. ¿Kasa waaʼinraka warütkaale nünainmüin Jeʼwaa?

⁶ Ayata warütkaain nünainmüin Jeʼwaa (Sant. 4:8). ¿Kasa waaʼinraka warütkaale nünainmüin? Weʼitaain waaʼin nünain Jeʼwaa «chi Aapajakai sünüiki wayuu suʼuraajapa» (Sal. 65:2). «Jüküja nümüin tü shapaakalü atuma jaaʼin», müsü Salmo 62:8. Nnojotsü kasain isain nüchiki Jeʼwaa. Naaʼinreerü tü kasa anasükat wamüin waneepia (Éf. 3:20). Nnojotsü naapüin neʼe Jeʼwaa wamüin tü wachuntakat nümüin, naaʼinreerü wapüleerua waneirua kasa süpüla nunouteʼerüin tü alatakat wamüin, wanee kasa nnojotka antapünaain suluʼu wekii.

7. (1) ¿Kasa waaʼinrüinjatka süpüla ayatüin warütkaain nünainmüin Jeʼwaa? (2) Saashin Hebreokana 6:10-12, ¿kasa anasü weʼreetka sünainjee waneepiain waya nümaa Jeʼwaa?

⁷ Wanee kasa waaʼinrüinjatka süpüla ayatüin warütkaain nünainmüin Jeʼwaa shia waashajeʼerüinjatüin weinshi tü Wiwüliakat jee wasakireʼerüinjatüin waaʼin sünain tü sümakat. Anuu nünüiki wanee misioneeropuʼushi: «Ayateesü waaʼinrüin waneepia tü waaʼinrapuʼukat maʼaka saaʼin waʼwaajüin Maleiwa sümaa wapüshi jee yapajüin watuma tü wekirajaainjatkat sünain tü outkajawaakat». Ayataʼaya waküjain maʼin pütchi namaa na wawalayuu woutkajaakana amaa. Nnojoleena motuin naaʼin Jeʼwaa na aʼyataakana nümüin waneepia jaʼitairü palitchoin maaʼulu tü naʼyataainkat nümüin (paashajeʼera Hebreokana 6:10-12).

8. ¿Kasa waaʼinrüinjatka saashin 1 Juan 2:15-17 süpüla nnojoluinjatüin waaʼinmaain waneirua kasa?

 ⁸ Nnojo waaʼinmaain waneirua kasa. Waaʼinmaa maʼin tü aʼyatawaakat nümüin Jeʼwaa suulialeʼeya shapaain waaʼin süchiirua waneirua kasa (Mat. 13:22, TNM). Nnojo jaa wamüin sümüin tü namakat wamüin na watünajutkana, na wapüshikana jee waneinnua wayuu aküjakana wamüin wainmainjatüin nneerü wamaʼana süpüla anainjanain waya (paashajeʼera 1 Juan 2:15-17). Weʼitaa waaʼin sünain naapeerüin Jeʼwaa wamüin tü kasa choʼujaakat sümüin wanoula, tü washeʼinjatkat, tü weküinjatkat, tü wepiainjatkat jee tü kasa anainjatkalü atuma waaʼin (Heb. 4:16; 13:5, 6).

9. (1) Saashin Proverbios 22:3, 7, ¿jamüsü nnojotka anain waʼanapajüle nneerü nnojotka choʼujaain maʼin wamüin? (2) ¿Kasa akaalinjeenaka waya süpüla anainjatüin tü kasa waneekakat?

⁹ Nnojo waʼanapajüin nneerü nnojotka choʼujaain maʼin wamüin (paashajeʼera Proverbios 22:3, 7). Eeshi naʼanapajüle nneerü wanee wayuu nukolojooinjachire, jama kojutuin maʼin süsapia. Nnojo waʼanapajüin nneerü süpüla wayaʼlajüin wanee kasa nnojotka choʼujaain maʼin wamüin. Shapaale waaʼin sutuma waaʼinmajüin wanee wapüshi ayuuikai, kapüleesü wamüin wayaawatüin saaʼu jeʼrainjatüin nneerü waʼanapajaka. Süpülapünaa waaʼinrüin tia, anashii woʼuraajüle nümüin Jeʼwaa jee wachuntule maʼin nümüin süpüla anainjatüin sukuwaʼipa tü kasa waneekakat. Naapeerü wanee anaa wamüin, jimateerü waaʼin jee wayaawateerü saaʼu tü kasa anakat süpüla waaʼinrüin (Filip. 4:6, 7; 1 Ped. 5:7).

10. ¿Kasa waaʼinrüinjatka süpüla waʼaleewajaain namaa na waneinnua?

¹⁰ Pütünajutuinjana na wayuu aneenakana atuma pukuwaʼipa. Waküja namüin na watünajutkana jamüin waaʼin jee tü alatakat wamüin, shialeekajaʼa namüin na alatüinnakana amüin tü alatakat wamüin (Ecl. 4:9, 10). Jaʼitaina ayatüin watünajutuin na wawalayuu woutkajaapuʼukana amaa, waʼaleewajaa namaa waneinnua eere woutkajaain maaʼulu. Süpüla waaʼinrüin tia, kamaneeinjana waya namüin na waneinnua. Waküja namüin tü kasa anasü naapakat Jeʼwaa wamüin süpüla neʼrüin talatüin waaʼin sünain aʼyatawaa nümüin. Mayaainjeʼe nnojoleerüin kasajatüin namüin waneinnua wawalayuu tü wamakat, eejeena na anakana amüin tü wakuwaʼipakat jee aleeweena naya wamaa. Nnojoliipejeʼe waya aashajaainjanain maʼin süchiki tü kasa waaʼinrapuʼukat jee tü kasa mojukat atuma waaʼin.

11. ¿Kasa waaʼinrüinjatka süpüla ayatüin talatüin waaʼin sümaa waʼwayuuse?

¹¹ Wooʼulaale suulia waʼyataain sutuma ayuulin waʼwayuuse, nnojo weʼitaain saaʼu shiain kasirüin tü alatakat. Nnojo mojuin waaʼin wayalejeʼe ayuuijaain jee nnojo jülüjain waaʼin wayain kasirüin tia. Soteesü waaʼin saʼaniraain wakuwaʼipa sümaa jee waküjain nümüin Jeʼwaa waaʼinmajüinjatüin shia jaʼitairü kasain alatüin (Mat. 19:5, 6). Akaʼaya ipuorüle shia, waküja nümüin chi wachonkai niain alanaʼaleein ojutü suulia tia waʼyataainkat. Waküja nümüin waneepia nüsülajalain nia Jeʼwaa wamüin  (Sal. 127:3-5). Waküja nümüin weʼrüin kasa anasü sünainjee tü waʼyataainkat nümüin Jeʼwaa. Waaʼinrüle tia, eesü süpüla nüneeküin niʼyataain waneepia nümüin Jeʼwaa maʼaka waaʼinrüin shia.

12. (1) ¿Kasa waaʼinrüinjatka süpüla wakaalinjain na aʼyataakana waneepia nümüin Jeʼwaa? (2) ¿Kasa waaʼinrüinjatka süpüla nekiʼralaainjanain sünain tü jeketkat naʼyataain?

¹² Eeshii na wawalayuu akaalinjakana na aʼyataakana waneepia nümüin Jeʼwaa süpüla ayatüinjanain naya sünain tü naʼyataainkat. Naaʼinrüin tia süka naaʼin namüiwaʼa. Natütüleʼerüin naaʼin naya wawalayuukana, naapüin nneerü namüin, naapüin waneirua kasa choʼujaaka namüin jee naaʼinmajüin napüshi (Gal. 6:2). Naluwataanüle waʼakamüin na wawalayuu ooʼulaakana suulia naʼyataain sutuma waneirua kasa, nnojo jülüjain waaʼin kaainjalain naya jee mojuin natuma sukuwaʼipa tü naʼyataainkat. * Wakaalinja naya süpüla nekiʼralaain sünain tü jeketkat naʼyataain. Talata waya namaa jee waküja namüin anain maʼin tü naaʼinrakat jaʼitashii nnojoleenain naʼyataain maʼin sutuma ayuulin naya. Wachajaa sukuwaʼipa süpüla weʼraajüin naya. Watüja sünainjee tü kasa natüjaakalü aaʼu, tü ekirajünakalü anain naya jee tü natüjakat apüleerua.

13. ¿Kasa waaʼinrüinjatka süpüla wakaalinjain wanee wawala eiwaʼaikai antaa?

¹³ Niiwaʼaire antaa wanee wawala, choʼujaajeerü nümüin piichi eeinjachire nutunküin, eʼejetuui nuʼunuinjatka aluʼu naaʼinrüinjatpa waneirua kasa, niʼyataainjatka anain jee waneirua kasa choʼujaajeetka nümüin. Eesüjaʼa süpüla waküjain nümüin süchiki jamüin sukuwaʼipapala wayuu jee tü naaʼinrüinjatkat süpüla eeinjatüin carné nümaʼana. Choʼujaapejeʼe wayaawatüin saaʼu tü alatakat  nümüin. Eeshijaʼa ayuuire nia jee ayuuire wanee nüpüshi. Eesüjaʼa mojule naaʼin sutuma sünaajaain wanee nüpüshi. * Jaʼitashi koʼutuin nia woulia, eesüjaʼa mojule naaʼin sutuma nusukajüin na nütünajutkana. Nnojoleerü anamaatüin naaʼin, kakaliasü tia.

14. ¿Kasa naaʼinraka na wawalayuukana süpüla shikiʼralaain wanee wawala eere süküjain pütchi?

¹⁴ Waküjale pütchi nümaa chi wawalakai jee watütüleʼerüle naaʼin sükajee wakuwaʼipa, ekiʼralaweechi nia sünain tü niʼyataain jeketkat. Anuu sünüiki wanee wawala aʼyataapuʼuka nümüin Jeʼwaa suluʼu wanee mma naatajatü: «Chaa eepuʼule taya tamaiwa, ekirajapuʼusü taya wayuu waneepia sünain tü Wiwüliakat. Shiasaʼa eere taya maaʼulu, kapüleeitpa tamüin taashajeʼerüin tü Wiwüliakat jee teeʼiyatüin wanee video, jama nnojoluin kasajatüin shia sümüin wayuu. Nounejaapejeʼe taya na tawalayuukana sünain ouyantaa wachikuaʼa jee sünain ekirajaa wayuu sünain tü Wiwüliakat. Atütülaaitpa taaʼin sünainjee teʼrüin waneepiain na tawalayuukana sünain naküjain pütchi jee sünain ekirajaa wayuu. Atüjaitpa taya süpüleerua tü tanüikinjatkat namüin na taküjakana amüin pütchi. Talatüitpa maʼin taaʼin sutuma tia».

15. ¿Kasa anasü weʼreetka sünainjee tü jeketkat waʼyataain?

¹⁵ Eejeerü tü kasa anasü weʼreetkat sünainjee tü jeketkat waʼyataain. Nnojo jülüjain waaʼin mojuin watuma sukuwaʼipa tü waʼyataainkat paala jee nnojo jülüjain waaʼin mojutuin shia. Shia jülüjainjatka waaʼin nükaalinjain waya Jeʼwaa jee ayatüin waküjain pütchi. Maa waya maʼaka naaʼin na anoujashii eejanakana soʼu nakalia na nikirajüinkana Jesuu jaʼitaina jalapünaain naya, aküjashii naya pütchi eepünaale naya (Aluw. 8:1, 4). Ayatüle waya sünain aküjaa pütchi, eʼreena waya kasa anasü sünainjee. Jamüshiijaʼa waneinnua pürekutsoot ojutunakainka suluʼujee wanee mma eepuʼule naküjain pütchi, akolojooshii naya suluʼumüin wane mma eere choʼujaain maʼin Aküjalii pütchi suluʼu tü anüikii natüjakalü apüleerua. Maʼaka jeʼra kashi süchikijee tia, awainmalaashii na wayuu outkajaakana namaa naya wawalayuukana.

16. ¿Kasa talateetka atuma waaʼin sünain tü jeketkat waʼyataain?

 ¹⁶ Nüküjain Nehemías namüin na judíokana katchin naaʼin süka talatüin naaʼin nutuma Jeʼwaa (Neh. 8:10). Jaʼitaina kiʼrain waya suluʼu tü mma waküjakalü aluʼu pütchi, nnojotsü shiainjatüin talatüin atuma waaʼin tia, shia talatüinjatka atuma waaʼin aleewain waya nümaa Jeʼwaa. Talateere waaʼin, ayata waya nümaa Jeʼwaa jee weʼitaa waaʼin sünain naapeerüin wamüin kekiiwaa, nikirajeenain waya otta nükaalinjeenain waya. Soteesü waaʼin talatüin waya sümaa tü waʼyataainkat süka wakaalinjeein na wayuukana. Nükaalinjeena waya Jeʼwaa süpüla talatüin waaʼin sümaa tü jeketkat waʼyataain wakaalinjeere maʼin na wayuukana (Ecl. 7:10).

17. ¿Kasa sotuinjatka waaʼin süchiki tü waʼyataainkat nümüin Jeʼwaa maaʼulu?

¹⁷ Soteesü waaʼin sülüʼülüin süpüla sajaʼlajaain tü waʼyataainkat nümüin Jeʼwaa maaʼulu, akaajasaʼa mapeena waneepieena waya sünain aʼyatawaa nümüin. Eesü naatajateerüle sümüin tü waʼyataakalü anain suluʼu tü mma jeketkat suulia tü waʼyataakalü anain maaʼulu. Alexéi chi wachuntakai anülia suʼttiajee ekirajaayakat tüü, nüküjain yapain nia süpüla tü alateetkat mapeena sutuma tü kasa alatakat nümüin maaʼulu. Anuu nünüiki: «Tatüjaa aaʼu shiimain eein Jeʼwaa otta eeinjatüin wanee mma jeketü, mapajeʼe wattayütkai saaʼin tamüin tia. Shiasaʼa maaʼulu, arütkaashi maʼin taya nünainmüin Jeʼwaa jee alüʼütsü maʼin tamüin tü mma jeketkat» (Aluw. 2:25). Waneepia waya nümaa Jeʼwaa jaʼitasü naatawalin tü waʼyataainkat nümüin. Nnojoleena niyüülajüin waya; nükaalinjeena waya süpüla talatüin waaʼin waʼyataale nümüin süka süpüshuaʼa waaʼin jaʼitaina jalain waya (Is. 41:13).