HOSỌ OPLỌN TỌN 34
Adàdidiọ Sọgbe hẹ Azọ́ndenamẹ Yọyọ De
“Jiwheyẹwhe ma yin mawadodonọ nado wọn azọ́n mìtọn po owanyi he mì dohia na oyín etọn po.”—HEB. 6:10.
OHÀN 38 E Na Hẹn We Lodo
BLADOPỌ *
1-3. Etẹwẹ yin whẹwhinwhẹ́n delẹ he wutu e sọgan biọ dọ azọ́ndenamẹ lizọnyizọnwatọ whenu-gigọ́ tọn lẹ tọn ni diọ?
ROBERT po Mary Jo po flin dọmọ: “To whenue mí ko sẹ̀n po ayajẹ po na owhe 21 to azọ́ndenamẹ mẹdehlan tọn mẹ godo, mẹjitọ mítọn ẹnẹ lẹpo lẹzun madogánnọ. Homẹ mítọn hùn nado penukundo yé go. Amọ́ to ojlẹ dopolọ mẹ, e blawuna mí nado jo aigba-denamẹ he ko lẹzun owhé mítọn titi enẹ do.”
2 William po Terrie po dọmọ: “Whenue mí sè dọ mí ma gán lẹkọyi azọ́ndenamẹ mítọn mẹ na agbasamalo mítọn wutu, mí viavi. Ojlo mítọn nado sẹ̀n Jehovah to tògodo ma wá yì domọ ba.”
3 Aleksey dọmọ: “Mí ko yọnẹn dọ nukundiọsọmẹtọ mítọn lẹ jlo na sú wekantẹn alahọ tọn lọ, fie n’to sinsẹ̀n te. Etomọṣo, whenue enẹ jọ bọ mí dona tọ́n sọn Bẹtẹli, e gbẹ́ vẹawuna mí.”
4. Kanbiọ tẹlẹ wẹ mí na gbadopọnna to hosọ ehe mẹ?
4 Gbọnvona enẹlẹ, mí sọ tindo numimọ hagbẹ whẹndo Bẹtẹli tọn fọtọ́n susu gọna mẹdevo he mọ azọ́ndenamẹ yọyọ yí lẹ tọn. * Mẹmẹsunnu po mẹmẹyọnnu nugbonọ ehelẹ po sọgan mọdọ e nọ vẹawu taun nado jo azọ́ndenamẹ he yè yiwanna de do. Etẹwẹ sọgan gọalọna yé nado diọada sọgbe hẹ ninọmẹ lọ? Nawẹ a sọgan gọalọna yé gbọn? Gblọndo kanbiọ ehelẹ tọn sọgan gọalọna mímẹpo nado pehẹ diọdo lẹ to gbẹzan mítọn mẹ.
LEHE MÍ SỌGAN PEHẸ DIỌDO DE DO
Naegbọn azọ́ndenamẹ de jijodo sọgan nọ vẹawuna lizọnyizọnwatọ whenu-gigọ́ tọn lẹ taun? (Pọ́n hukan 5tọ) *
5. Eyin azọ́ndenamẹ mítọn diọ, aliho tẹlẹ mẹ wẹ ehe sọgan yinuwado mí ji te?
5 Vlavo mí to sinsẹ̀n to aigba-denamẹ ji kavi to Bẹtẹli, mí sọgan tindo owanyi sisosiso na gbẹtọ lẹ podọ etlẹ yin na fie mí to sinsẹ̀n te lọsu. Eyin whẹwhinwhẹ́n depope wá hẹn mí nado tọ́n sọn finẹ, mí nọ jẹflumẹ taun. Mí nọ jẹdò mẹhe mí jodo lẹ tọn podọ mí nọ hanú na yé, titengbe eyin homẹkẹn wẹ zọ́n bọ mí dona jo yé do. (Mat. 10:23; 2 Kọl. 11:28, 29) Humọ, e nọ saba biọ dọ yè ni diọada sọgbe hẹ aṣa devo de eyin yè bẹ azọ́ndenamẹ yọyọ de jẹeji kavi eyin yè tlẹ lẹkọyi owhé. Robert po Mary Jo po dọmọ: “Aṣa mítọn titi lẹ lẹzun nuyọyọ na mí, podọ etlẹ nọ vẹawuna mí nado dekunnu to anọ́nù-gbè mítọn mẹ. E taidi na mí dọ jonọ-gbéji wẹ mí te nkọ.” Mẹhe sin azọ́ndenamẹ diọ lẹ sọgan pannukọn nuhahun akuẹzinzan tọn madonukun lẹ to ajiji mẹ. Yé sọgan biọ bẹwlu mẹ, nọ to nuhà bo gán gbọjọ. Etẹwẹ sọgan gọalọna yé?
Nujọnu wẹ e yin dọ mí ni dọnsẹpọ Jehovah bosọ dejido ewọ go (Pọ́n hukan 6, 7tọ) *
6. Nawẹ mí sọgan hẹn haṣinṣan pẹkipẹki de go hẹ Jehovah gbọn?
6 Hẹn haṣinṣan pẹkipẹki de go hẹ Jehovah. (Jak. 4:8) Nawẹ mí sọgan wàmọ gbọn? Gbọn jidide do ewọ go taidi “Sisètọ odẹ̀ tọn” dali. (Salm. 65:2) “Mì nọ hùn ahun mìtọn na ẹn” wẹ Salmu lẹ 62:8 dọ. Jehovah sọgan wà “susu tlala hú nuhe mí biọ kavi lẹn lẹpo.” (Efe. 3:20) Ewọ ma nọ nọte do onú tangan he mí biọ ẹ to odẹ̀ mẹ lẹ kẹdẹ ji. E sọgan wà nuhe mí ma donukun, yèdọ nuhe na zẹ̀ nudepope he mí gán ko lẹn go, nado didẹ nuhahun mítọn lẹ.
7. (a) Etẹwẹ na gọalọna mí nado hẹn haṣinṣan pẹkipẹki de go hẹ Jehovah? (b) Sọgbe hẹ Heblu lẹ 6:10-12, etẹwẹ na yin kọdetọn lọ eyin mí zindonukọn nado to Jehovah sẹ̀n po nugbonọ-yinyin po?
7 Nado gbọṣi adà Jehovah tọn mẹ, nọ hia Owe-wiwe lẹ egbesọegbesọ bo nọ lẹnayihamẹpọn do yé ji. Mẹmẹsunnu he ko sẹ̀n taidi mẹdehlan wayi de dọmọ: “Nọ hodo tito gbesisọ tọn de na nuhe dù sinsẹ̀n-bibasi whẹndo tọn po awuwiwlena opli lẹ po, dile a nọ wà do to azọ́ndenamẹ towe dai tọn mẹ.” Humọ, zindonukọn nado nọ tindo mahẹ gigọ́ to azọ́n wẹndagbe lilá tọn lọ mẹ to agun yọyọ towe mẹ. Jehovah ma nọ wọn mẹhe zindonukọn nado to ewọ sẹ̀n po nugbonọ-yinyin po lẹ, eyin yé ma tlẹ sọgan sọ nọ wà nuhe yé ko nọ wà dai lẹpo ba.—Hia Heblu lẹ 6:10-12.
8. Nawẹ hogbe he tin to 1 Johanu 2:15-17 mẹ lẹ sọgan gọalọna we nado nọ hẹn gbẹzan towe bọawu gbọn?
8 Nọ hẹn gbẹzan towe bọawu. Ma dike magbọjẹ aihọn Satani tọn ni “gbidikọna” nuwiwa gbigbọmẹ tọn towe lẹ blo. (Mat. 13:22) Ma nọ joawuna kọgbidinamẹ aihọn tọn, kavi họntọn po hẹnnumẹ ahundoponọ lẹ po tọn nado doafọna hihọ́ he akuẹ sọgan hẹnwa to titonu Satani tọn mẹ blo. (Hia 1 Johanu 2:15-17.) Dejido Jehovah go, yèdọ mẹhe dopà nado penukundo nuhudo gbigbọmẹ tọn, numọtolanmẹ tọn gọna agbasa tọn mítọn lẹpo go “to ojlẹ sisọ mẹ.”—Heb. 4:16; 13:5, 6.
9. Sọgbe hẹ Howhinwhẹn lẹ 22:3, 7, naegbọn e do yin nujọnu nado dapana ahọ́ he ma yin dandan tọn lẹ, podọ etẹwẹ sọgan gọalọna mí nado basi nudide nuyọnẹn tọn lẹ?
9 Nọ dapana ahọ́ he ma yin dandan tọn lẹ. (Hia Howhinwhẹn lẹ 22:3, 7.) Tẹnsisẹ sọgan biọ akuẹzinzan he yè ma lẹn, podọ e bọawu nado dota ahọ́ mẹ. Nado de ahọ́dudu pò, nọ payi ma nado họ̀ nuhe a ma do hudo etọn nugbonugbo lẹ ahọ́. To whenue ninọmẹ de to kọgbidina mí to numọtolanmẹ-liho, di apajlẹ eyin mí to nukunpedo mẹyiwanna he to azọ̀njẹ de go, mí sọgan mọdọ e vẹawu nado basi nudide obá he mẹ mí na yàn akuẹ jẹ tọn. To ninọmẹ mọnkọ lẹ mẹ, nọ flindọ ‘odẹ̀ po ovẹ̀ po’ sọgan gọalọna we nado basi nudide nuyọnẹn tọn lẹ. Taidi gblọndo de na odẹ̀ towe lẹ, Jehovah sọgan na we jijọho he na ‘họ́ ahun towe po nugopipe apọ̀nmẹ tọn towe po,’ bo gbọnmọ dali gọalọna we nado basi nudide dagbe hugan lẹ.—Flp. 4:6, 7; 1 Pita 5:7.
10. Nawẹ mí sọgan jihọntọn yọyọ lẹ gbọn?
10 Nọ dogbẹ́ dagbe lẹ. Nọ dọ numọtolanmẹ towe po nuhe pehẹ a te lẹ po na họntọn dagbe lẹ, titengbe mẹhe sọgan ko do numimọ ayajẹ po nuhahun po tọn dopolọ hẹ we lẹ. Mọwiwà sọgan hẹn we jẹgangan to numọtolanmẹ-liho. (Yẹwh. 4:9, 10) Mẹhe a ko jihọntọn hẹ to azọ́ndenamẹ towe dai tọn mẹ lẹ na gbẹ́ yin họntọn towe lẹ. Todin, to azọ́ndenamẹ towe yọyọ mẹ, a dona jihọntọn yọyọ devo lẹ. Flindọ nado tindo họntọn de, hiẹ lọsu dona yin họntọn dagbe de ga. Nawẹ a sọgan jihọntọn yọyọ lẹ gbọn? Nọ dọhona mẹdevo lẹ gando numimọ ojlofọndotenamẹ tọn he a tindo to sinsẹ̀nzọn Jehovah tọn mẹ lẹ go, bo dike yé ni mọ ayajẹ he sinsẹ̀nzọn enẹ hẹnwa na we. Eyin mẹdelẹ to agun lọ mẹ ma tlẹ mọnukunnujẹ ojlo sinsinyẹn he a tindo na sinsẹ̀nzọn whenu-gigọ́ tọn mẹ, apajlẹ towe sọgan dọ̀n mẹdevo lẹ bọ yé na lẹzun họntọn dagbe lẹ na we. Ṣigba, nọ nọ̀ aṣeji ma nado dọ̀n ayidonugo he ma yin dandan tọn wá dewe kavi nuhe a ko wadotana lẹ ji, podọ ma nọ dọho glanglan do numọtolanmẹ ylankan towe lẹ ji blo.
11. Nawẹ a sọgan hẹn ayajẹ go to alọwle towe mẹ gbọn?
11 Eyin a dona jo azọ́ndenamẹ towe do, na agbasamalo alọwlemẹ towe tọn wutu, a dowhẹ ẹ blo. To alọ devo mẹ, eyin hiẹ lọsu wẹ tindo nuhahun agbasalilo tọn, ma gblewhẹdo dewe bo lẹndọ emi hẹnnugble na alọwlemẹ emitọn blo. Flindọ “agbasalan dopo” wẹ mì yin, podọ mì dopà to Jehovah nukọn nado penukundo ode awetọ go to ninọmẹ lẹpo mẹ. (Mat. 19:5, 6) Eyin mì jo azọ́ndenamẹ de do na hòmimọ madonukun de wutu, mì hẹn ẹn diun dọ mì dohia ovi mìtọn dọ ewọ yin nujọnu na mì hú azọ́ndenamẹ mìtọn. Mì hẹn ovi mìtọn deji dọ “ale de” sọn Jiwheyẹwhe dè wẹ ewọ yin na mì. (Salm. 127:3-5) Gbọnvona enẹ, mì sọ nọ dọhona ẹn gando numimọ awuvivi tọn he mì tindo to azọ́ndenamẹ mìtọn mẹ lẹ go. Mọwiwà sọgan dozolanmẹna ovi mìtọn nado wá yí gbẹzan etọn zan to sinsẹ̀nzọn ayajẹ tọn Jehovah tọn mẹ kẹdẹdile mì wà do.
LEHE MẸDEVO LẸ SỌGAN GỌALỌ DO
12. (a) Nawẹ mí sọgan gọalọna mẹhe to sinsẹ̀nzọn whenu-gigọ́ tọn mẹ lẹ nado zindonukọn to azọ́ndenamẹ yetọn mẹ gbọn? (b) Nawẹ mí sọgan gọalọna yé nado diọada sọgbe hẹ azọ́ndenamẹ yọyọ yetọn po awubibọ po gbọn?
12 E jẹna ayidego taun dọ agun susu po mẹdelẹ po nọ wà nuhe go yé pé lẹpo nado gọalọna mẹhe to sinsẹ̀nzọn whenu-gigọ́ tọn mẹ lẹ nado gbọṣi azọ́ndenamẹ yetọn mẹ. Yé nọ wàmọ gbọn tulinina yé nado zindonukọn to azọ́ndenamẹ yetọn mẹ, gọna akuẹ kavi agbasanu devo lẹ nina yé nado nọgodona yé dali, kavi gbọn alọgigọna yé nado penukundo hagbẹ whẹndo yetọn tọn he yé jodo whé lẹ go dali. (Gal. 6:2) Eyin mẹhe to sinsẹ̀nzọn whenu-gigọ́ tọn mẹ enẹlẹ mọ azọ́ndenamẹ yọyọ de yí nado sẹ̀n to agun towe mẹ, ma nọ mọdọ vlavo yé gboawupo to adà de mẹ kavi dọ mẹplọnlọ de yin dido yé go wutu wẹ azọ́ndenamẹ yetọn do diọ blo. * Kakatimọ, gọalọna yé na adàdidiọ lọ nido bọawuna yé. Dokuavọna yé po zohunhun po bo pà yé na azọ́n he yé ko wà wayi lẹ, eyin agbasamalo tlẹ to aliglọnna yé nado wà susu todin. Jẹakọ hẹ yé. Plọnnu sọn oyọnẹn, azọ́nplọnmẹ po numimọ susugege he yé ko tindo lẹ po mẹ.
13. Aliho tẹlẹ mẹ wẹ mí sọgan gọalọna mẹhe mọ azọ́ndenamẹ yọyọ de yí lẹ te?
13 To tintan whenu, mẹhe mọ azọ́ndenamẹ yọyọ de yí lẹ sọgan do hudo alọgọ towe tọn nado mọ adọtẹn, tẹnsẹnamẹnu, agbasazọ́n po dandannu devo lẹ po. Yé sọ sọgan do hudo nudọnamẹ agọe tọn lẹ tọn gando whẹho egbesọegbesọ tọn lẹ go, taidi takuẹ súsú gọna lehe yé gán mọ godonọnamẹ azọ́nwatẹn he nọ gọalọ to owùnu-jijọ whenu lẹ tọn yí do. Nuhe sin hudo yé do hugan ma yin dọ yè ni wàlẹblanuna yé gba, amọ́ dọ yè ni mọnukunnujẹ ninọmẹ yetọn mẹ. E sọgan to awuvẹ na yé nado pehẹ nuhahun agbasalilo tọn yetọn titi kavi hẹnnumẹ yetọn tọn lẹ. Yé sọgan to aluẹmẹ na okú mẹyiwanna de tọn wutu. * Podọ, yé sọ sọgan to awubla, vlavo to yede mẹ bọ mẹde ma na yọnẹn, na họntọn gbigbọmẹ tọn yetọn he yé jodo to fie yé ko sẹ̀n te wayi lẹ wutu. E nọ yí whenu nado duto numọtolanmẹ sinsinyẹn he sọgan hẹnmẹ biọ bẹwlu mẹ enẹlẹ ji.
14. Nawẹ wẹnlatọ lẹdo de tọn lẹ gọalọna mẹmẹyọnnu de nado diọada sọgbe hẹ azọ́ndenamẹ yọyọ etọn gbọn?
14 Amọ́ todin whẹ́, godonọnamẹ po apajlẹ towe po sọgan gọalọna yé nado jẹakọ hẹ ninọmẹ yọyọ yetọn. Mẹmẹyọnnu de he sẹ̀n to otò devo mẹ na owhe susu dọmọ: “To azọ́ndenamẹ ṣie hoho lọ mẹ, n’nọ deanana plọnmẹ Biblu lẹ egbesọegbesọ. To yọyọ lọ mẹ, e nọ vẹawu nado tlẹ mọ dotẹnmẹ hundote lọ nado hùn Biblu kavi do video de hia to lizọnyizọn lọ mẹ. Ṣigba, wẹnlatọ lẹdo lọ tọn lẹ nọ basi oylọna mi nado hodo yé yì gọyìpọn po plọnmẹ Biblu yetọn lẹ po. Eyin n’mọ bọ mẹmẹsunnu gọna mẹmẹyọnnu zohunhunnọ podọ adọgbotọ enẹlẹ to anadena plọnmẹ Biblu he to nukọnyi lẹ, enẹ nọ whàn mi dogọ nado wleawuna pọndohlan dagbe de. N’plọn nado nọ bẹ hodọdopọ lẹ jẹeji to aigba-denamẹ yọyọ lọ ji. Ehe lẹpo gọalọna mi nado gọ̀ ayajẹ ṣie mọyi.”
ZINDONUKỌN NADO TO NUHE GO A PÉ LẸPO WÀ!
Dín aliho lẹ nado gbloada na lizọnyizọn towe to otò towe titi mẹ (Pọ́n hukan 15, 16tọ) *
15. Nawẹ a sọgan tindo kọdetọn dagbe to azọ́ndenamẹ yọyọ towe mẹ gbọn?
15 A sọgan tindo kọdetọn dagbe to azọ́ndenamẹ yọyọ towe mẹ. Ma pọ́n diọdo de hlan taidi kọdetọn awugbopo towe de tọn kavi ohia agọjijoyigodo tọn de blo. Nọ doayi lehe Jehovah to alọgọna we to gbẹzan towe mẹ do go, bo zindonukọn to yẹwhehodidọ mẹ. Nọ hodo apajlẹ Klistiani nugbonọ owhe kanweko tintan whenu tọn lẹ tọn. Mahopọnna fidepope he yé te, yé “gbọn aigba lọ lẹpo ji bo to wẹndagbe ohó lọ tọn lá.” (Owalọ 8:1, 4) Vivẹnudido towe nado zindonukọn to yẹwhehodidọ mẹ sọgan de sinsẹ́n dagbe lẹ tọ́n. Di apajlẹ, gbehosọnalitọ he yin yinyan sọn otò de mẹ lẹ sẹtẹn yì otò devo he to yakẹ de mẹ, fie nuhudo sù te ga to ogbè he yé nọ do mẹ. To osun vude gblamẹ, kándo yọyọ delẹ yin didoai bo to jideji tindo po awuyiya po.
16. Nawẹ a sọgan tindo ayajẹ to azọ́ndenamẹ yọyọ de mẹ gbọn?
16 “Ayajẹ Jehovah tọn wẹ huhlọn mìtọn.” (Nẹh. 8:10, Odò.) Jehovah wẹ dona yin asisa daho hugan ayajẹ mítọn tọn, e ma yin azọ́ndenamẹ mítọn mahopọnna lehe mí yiwanna azọ́n enẹ sọ. Enẹwutu, zindonukọn nado to zọnlinzin hẹ Jehovah bo nọ lẹhlan ewọ nado mọ nuyọnẹn, anademẹ po alọgọ po yí. Nọ flindọ a wá yiwanna azọ́ndenamẹ hoho towe, na a wà nuhe go a pé lẹpo nado gọalọna mẹhe to finẹ lẹ wutu. Wà nuhe go a pé lẹpo nado hẹn azọ́ndenamẹ towe dintọn di ga, bo pọ́n lehe Jehovah na gọalọna we nado yiwanna ehe lọsu do.—Yẹwh. 7:10.
17. Etẹwẹ mí dona nọ flin gando azọ́ndenamẹ mítọn dintọn go?
17 Mí dona nọ flindọ sinsẹ̀nzọn mítọn hlan Jehovah yin kakadoi tọn, amọ́ azọ́ndenamẹ mítọn dintọn yin ojlẹ gli tọn. To aihọn yọyọ lọ mẹ, vlavo mímẹpo wẹ na mọ azọ́ndenamẹ yọyọ de yí. Aleksey he yin nùdego to bẹjẹeji yigbe dọ numimọ he emi to tintindo to alọnu din lẹ to alọgọna emi nado wleawudai na diọdo sọgodo tọn lẹ. E domọ: “N’yise dọ Jehovah tin podọ aihọn yọyọ lọ na wá nugbonugbo, amọ́ to aliho de mẹ, e gbẹ́ nọ taidi dọ yé dẹn do mi vude. Todin, n’nọ mọ Jehovah to nukọn ṣie, podọ e nọ taidi dọ n’to gbejizọnlin de zìn bọ aihọn yọyọ lọ wẹ fie n’na nọte do to madẹnmẹ.” (Owalọ 2:25) Mahopọnna azọ́ndenamẹ depope he mí tindo, mì gbọ mí ni to zọnlinzin hẹ Jehovah zọnmii. Ewọ ma na jo mí do gbede, amọ́ e na gọalọna mí nado nọ mọ ayajẹ to nudepope he mí penugo nado to wiwà mẹ to sinsẹ̀nzọn etọn mẹ—mahopọnna fihe e sọgan yin.—Isa. 41:13.
OHÀN 90 Mì Nọ Na Tuli Ode Awetọ
^ huk. 5 To whedelẹnu, e sọgan biọ dọ mẹmẹsunnu po mẹmẹyọnnu po he to sinsẹ̀nzọn whenu-gigọ́ tọn mẹ delẹ ni jo azọ́ndenamẹ yetọn do kavi yé sọgan mọ azọ́ndenamẹ yọyọ de yí. To hosọ ehe mẹ, mí na gbadopọnna avùnnukundiọsọmẹnu he yé nọ pehẹ lẹ, gọna nuhe sọgan gọalọna yé nado diọada po kọdetọn dagbe po. Hosọ lọ sọ dọhodo nuhe mẹdevo lẹ sọgan wà nado na tuli yé bosọ nọgodona yé ji, gọna nunọwhinnusẹ́n he sọgan gọalọna mímẹpo nado pehẹ diọdo lẹ.
^ huk. 4 Mọdopolọ, na mẹhowhe wutu, mẹmẹsunnu azọngbannọ susu ko jo azọngban yetọn lẹ do na mẹmẹsunnu he owhe yetọn ma ko sẹyì lẹ. Pọ́n hosọ lọ “Klistiani Mẹhomẹ lẹ Emi—Jehovah Yọ́n Pinpẹn Nugbonọ-Yinyin Mìtọn Tọn,” to Atọ̀họ̀-Nuhihọ́ lọ Tọn septembre 2018 tọn mẹ, gọna hosọ lọ “Nọ Hẹn Jijọho Ahun mẹ Tọn Go Mahopọnna Diọdo Lẹ,” to Atọ̀họ̀-Nuhihọ́ lọ Tọn octobre 2018 tọn mẹ.
^ huk. 12 Mẹho agun tọn he tin to fie omẹ ehelẹ ko sẹ̀n wayi te lẹ dona yawu do wekanhlanmẹ mẹdohia tọn de hlan, ma nado hẹn yé dọngbàn gbau nado zindonukọn to sinsẹ̀nzọn yetọn mẹ taidi gbehosọnalitọ, mẹho agun tọn kavi devizọnwatọ lizọnyizọnwiwa tọn.
^ huk. 13 Pọ́n hosọ debọdo-dego lọ lẹ “Alọgọ Na Mẹhe Ṣiọ Kú Do Lẹ” to Fọ́n! 2018, sọha 3tọ mẹ.
^ huk. 57 ZẸẸMẸ YẸDIDE LẸ TỌN: Asu po asi po de he to dandannu glọ nado jo azọ́n mẹdehlan tọn to otò devo mẹ do, to e yì whedenu dọna agun yetọn po avi po.
^ huk. 59 ZẸẸMẸ YẸDIDE LẸ TỌN: To whenue asu po asi po lọ lẹkọwa otò yetọn mẹ, yé hodẹ̀ hlan Jehovah vẹkuvẹku nado gọalọna yé nado duto avùnnukundiọsọmẹnu he yé pehẹ lẹ ji.
^ huk. 61 ZẸẸMẸ YẸDIDE LẸ TỌN: Po alọgọ Jehovah tọn po, asu po asi po lọ gọ̀ sinsẹ̀nzọn whenu-gigọ́ tọn bẹ. Yé nọ yí ogbè he yé plọn to azọ́n mẹdehlan tọn mẹ do lá wẹndagbe lọ na jonọ he tin to aigba-denamẹ agun yọyọ yetọn tọn ji lẹ.
