1-3. Ano ang pila ka rason sa pagbag-o sang asaynment sang mga ara sa pinasahi nga bug-os tion nga pag-alagad?

“NALIPAY gid kami nga mag-alagad bilang misyonero. Pero pagkatapos sang 21 ka tuig, nagluya na ang lawas sang amon mga ginikanan,” siling nanday Robert kag Mary Jo. “Nalipay kami nga atipanon sila. Pero nasubuan kami nga biyaan ang lugar nga ginpalangga gid namon.”

² “Sang nabal-an namon nga indi na kami makapadayon sa amon asaynment bangod sang amon problema sa panglawas, naghibi gid kami,” siling nanday William kag Terrie. “Gusto gid namon nga magpadayon sa amon pag-alagad kay Jehova sa iban nga pungsod, pero indi na namon ini mahimo subong.”

³ “Bal-an namon nga gusto sang mga manughingabot nga ipasira ang sanga talatapan kon sa diin ako nagaalagad,” siling ni Aleksey. “Pero sang ginsira nila ang Bethel kag kinahanglan na namon maghalin, nasubuan gihapon kami.”

4. Ano nga mga pamangkot ang aton binagbinagon sa sini nga artikulo?

⁴ Magluwas sa sini nga mga eksperiensia, linibo pa nga nagaalagad sa Bethel kag iban pa ang ginhatagan sing bag-o nga mga asaynment. * Mahimo mabudlay gid para sa sining matutom nga mga kauturan nga biyaan ang ila asaynment nga ginpabaloran gid nila. Ano ang makabulig sa ila nga maka-adjust sa mga pagbag-o? Paano mo sila mabuligan? Ang sabat sa sini nga mga pamangkot makabulig sa aton tanan nga maatubang ang mga pagbag-o sa aton kabuhi.

5. Kon magbag-o ang aton asaynment, ano ang epekto sini sa aton?

⁵ Nagaalagad man kita sa Bethel ukon sa iban pa nga aspekto  sang bug-os tion nga pag-alagad, matun-an naton nga palanggaon ang mga tawo kag bisan ang lugar kon sa diin kita nagaalagad. Gani kon indi na kita makapadayon sa aton asaynment ukon ginhatagan kita sing bag-o nga asaynment sa iban nga lugar, masubuan gid kita. Mahidlaw kita sa mga kauturan, kag mabalaka sa ila, ilabi na gid kon kinahanglan naton maghalin bangod sang paghingabot. (Mat. 10:23; 2 Cor. 11:28, 29) Kag mahimo nga mabudlayan gid kita kon magkadto kita sa lain nga lugar bangod kinahanglan naton mag-adjust sa bag-o nga kultura. Kag posible nga amo man sini ang mabatyagan naton kon magbalik kita sa lugar nga ginhalinan naton. “Indi na kami pamilyar sa amon kaugalingon nga kultura kag daw indi na kami kabalo magbantala gamit ang amon namat-an nga lenguahe,” siling nanday Robert kag Mary Jo. “Tungod malawig kami nga nag-alagad sa iban nga lugar, pamatyag namon daw mga dumuluong kami sa amon pungsod.” Ang iban nga ginhatagan sing bag-o nga asaynment mahimo hinali lang nga magkaproblema sa pinansial. Mahimo sila mabalaka, maluyahan sing buot, kag magbatyag nga wala sing kasiguruhan ang ila kabuhi. Ano ang makabulig sa ila?

6. Paano kita makapabilin nga suod kay Jehova?

⁶ Magpabilin nga suod kay Jehova. (Sant. 4:8) Paano naton ini mahimo? Paagi sa pagsalig sa iya subong “Manugpamati sang pangamuyo.” (Sal. 65:2) “Ipautwas ninyo sa iya ang inyo ginabatyag,” siling sang Salmo 62:8. Mahimo ni Jehova ang “sobra pa kabugana labaw sa aton ginapangayo ukon ginahunahuna.” (Efe. 3:20) Ihatag ni Jehova indi lang kon ano ang aton ginapangamuyo sa iya. Mahimo niya solbaron ang aton mga problema sa pamaagi nga labaw pa sa aton ginahunahuna.

7. (a) Ano ang makabulig sa aton nga magpabilin nga suod kay Jehova? (b) Suno sa Hebreo 6:10-12, ano ang resulta kon padayon kita nga nagaalagad sing matutom kay Jehova?

⁷ Para magpabilin nga suod kay Jehova, basaha adlaw-adlaw ang Kasulatan kag pamalandungi ini. Ang isa ka misyonero sadto nagsiling: “Dapat regular gihapon ang imo iskedyul para sa pangpamilya nga pagsimba kag paghanda para sa mga miting, nga ginahimo mo na antes magbag-o ang imo asaynment.” Kag padayon nga himua ang imo bug-os nga masarangan sa pagbantala sang maayong balita upod sa imo bag-o nga kongregasyon. Ginadumdom ni Jehova ang mga nagapadayon sa ila matutom nga pag-alagad sa iya, bisan limitado na ang mahimo nila subong.—Basaha ang Hebreo 6:10-12.

8. Paano ang 1 Juan 2:15-17 makabulig sa imo nga mahuptan nga simple ang imo kabuhi?

 ⁸ Hupti nga simple ang imo kabuhi. Indi pagtuguti nga ‘malumos’ ang imo pag-alagad kay Jehova sang mga kabalaka sa kalibutan ni Satanas. (Mat. 13:22) Indi magpamati sa mga tawo nga wala nagaalagad kay Jehova ukon sa mga abyan ukon mga paryente nga mahimo gusto magbulig sa imo pero silingan ka nga kinahanglan mo sing madamo nga kuarta para mangin mas maayo ang imo kabuhi. (Basaha ang 1 Juan 2:15-17.) Magsalig kay Jehova, nga nagapromisa nga hatagan kita sing tanan naton nga kinahanglanon ‘sa tion nga kinahanglan’ gid naton ini. Buligan man niya kita nga mangin malig-on ang aton pagtuo kag mangin kalmado.—Heb. 4:16; 13:5, 6.

9. Suno sa Hulubaton 22:3, 7, ngaa indi dapat magpangutang kon indi man gid kinahanglan, kag ano ang makabulig sa aton nga makadesisyon sing maalamon?

⁹ Indi magpangutang kon indi man gid kinahanglan. (Basaha ang Hulubaton 22:3, 7.) Magasto ang pagsaylo sang ilistaran, kag daw mapilitan ka nga mangutang. Para gamay lang ang imo utang, indi magpangutang para ibakal sang mga butang nga indi man gid kinahanglan. Kon na-stress ka, halimbawa, kon nagaatipan ka sa nagamasakit nga miembro sang imo pamilya, mahimo mabudlayan ka magdesisyon kon pila gid ang imo utangon. Sa sini nga mga kahimtangan, dumduma nga ang “pangamuyo kag pag-ampo” makabulig sa imo nga magdesisyon sing maalamon. Sabton ni Jehova ang imo mga pangamuyo paagi sa paghatag sa imo sing paghidait nga ‘magabantay sang imo tagipusuon kag ikasarang sa paghunahuna.’ Makabulig ini sa imo nga mangin kalmado kag makahimo sang pinakamaayo nga desisyon.—Fil. 4:6, 7; 1 Ped. 5:7.

10. Paano kita makakita sang bag-o nga mga abyan?

¹⁰ Magpabilin nga suod sa mga tawo nga may maayo nga impluwensia sa imo. Magpakig-istorya sa imo suod nga mga abyan parte sa imo mga ginabatyag kag mga kabudlayan, labi na gid sa mga nakaeksperiensia man sini. Mangin maayo ang imo pamatyag kon himuon mo ini. (Man. 4:9, 10) Abyan mo gihapon ang mga nangin abyan mo sa imo asaynment sang una. Subong, sa imo bag-o nga asaynment, dapat mangita ka sang bag-o nga mga abyan. Paano mo ini himuon? Dumduma nga para makakita ka sang abyan, dapat mangin mainabyanon ka. Sugiri ang iban sang imo makalilipay nga mga eksperiensia sa pag-alagad kay Jehova para mabatyagan nila ang imo kalipay. Bisan indi maintiendihan sang iban sa inyo kongregasyon kon ngaa importante gid sa imo ang bug-os tion nga pag-alagad, mahimo nga ang iban sa ila mapalig-on sa imo halimbawa kag mangin maayo mo nga mga abyan. Pero indi pag-ipadayawdayaw ang mga nahimo mo sa pag-alagad, kag likawi nga iistorya ang imo negatibo nga mga balatyagon.

11. Paano ninyo mahuptan ang inyo kalipay subong mag-asawa?

¹¹ Kon indi kamo makapadayon sa inyo asaynment bangod may problema sa panglawas ang imo bana ukon asawa, indi sia pagbasula. Kon ikaw ang  may problema sa panglawas, indi pagbasula ang imo kaugalingon kag indi magbatyag nga ginpaslaw mo ang imo bana ukon asawa. Dumduma nga ‘isa kamo ka unod,’ kag nagpromisa kamo kay Jehova nga atipanon ninyo ang kada isa bisan ano pa ang mga kahimtangan. (Mat. 19:5, 6) Kon indi na kamo makapadayon sa inyo asaynment bangod nagbusong ang imo asawa nga wala sa plano, dapat mapaintiende ninyo sa inyo anak nga mas importante sia sa inyo sangsa inyo asaynment. Pasaliga sia nga ‘isa sia ka padya’ halin sa Dios. (Sal. 127:3-5) Istoryahi man sia parte sa inyo makalilipay nga mga eksperiensia sa inyo asaynment sang una. Kon himuon ninyo ini, mapalig-on ninyo ang inyo anak nga mag-alagad man sing bug-os tion kay Jehova pareho sang ginhimo ninyo sang una.

12. (a) Paano kita makabulig sa mga nagaalagad sing bug-os tion para makapadayon sila sa ila asaynment? (b) Paano naton sila mabuligan nga maka-adjust?

¹² Dalayawon gid kay madamo nga kongregasyon kag kauturan ang nagabulig sa mga nagaalagad sing bug-os tion para makapadayon sila sa ila asaynment. Ginahimo nila ini paagi sa pagpalig-on sa ila nga magpadayon sa ila hilikuton kag paghatag sang ila mga kinahanglanon sa materyal. Nagabulig man ang mga kauturan nga atipanon ang pamilya sang mga nagaalagad sing bug-os tion sa malayo nga lugar. (Gal. 6:2) Kon maasayn sila sa inyo kongregasyon, indi paghunahunaa nga wala nila nahimo sing maayo ang ila asaynment ukon gindisiplina sila. * Sa baylo, buligi sila nga maka-adjust. Abiabiha sila sing mapinalanggaon kag komendahi sila sa ila mga nahimo, bisan nga limitado na ang ila mahimo bangod sang problema sa panglawas. Pangilalaha sila. Madamo ka sing matun-an sa ila ihibalo, sa mga paghanas nga ila nabaton, kag sa ila mga eksperiensia.

13. Ano ang aton mabulig sa mga nakabaton sang bag-o nga asaynment?

 ¹³ Sa umpisa, mahimo nga kinahanglan sang mga nakabaton sang bag-o nga asaynment ang imo bulig para makakita sang ilistaran, salakyan, obra, kag iban pa. Posible man nga kinahanglan nila sang bulig parte sa mga buhis kag insurance. Pero mas kinahanglan nila ang aton pag-intiende sa ila kahimtangan, indi ang aton kaluoy. Mahimo nga nagaantos sila ukon ang miembro sang ila pamilya bangod sang problema sa panglawas. Mahimo nga nagapangasubo sila bangod napatyan sila sang hinigugma. * Kag posible man nga nasubuan sila bangod nahidlaw sila sa mga abyan nila sa ila asaynment sang una, kag wala lang nila ini ginaistorya sa aton. Kinahanglan nila sang tion para magtawhay ang ila hunahuna bangod sang kadamo sang ila ginapamensar.

14. Paano nakabulig ang mga kauturan nga maka-adjust ang isa ka sister sa iya bag-o nga asaynment?

¹⁴ Mabuligan mo man sila nga maka-adjust kon updan mo sila sa pagbantala kag palig-unon sila paagi sa imo maayo nga halimbawa. “Sa akon asaynment sang una, nagadumala ako sang mga pagtuon sa Biblia kada adlaw,” siling sang isa ka sister nga nag-alagad sa iban nga pungsod sa madamo nga tuig. “Pero mabudlay sa akon bag-o nga asaynment kay talagsa ka lang gid makapabasa sang Biblia ukon makapalantaw sang aton video sa ministeryo. Pero ginapaupod ako sang mga kauturan kon magbalik sila sa ila mga nabantalaan kag mga ginatun-an sa Biblia. Ang katutom kag kapisan sang mga kauturan nga nagadumala sang pagtuon sa Biblia nakabulig sa akon nga mangin positibo sa teritoryo. Natun-an ko kon paano makasugod sang pag-istoryahanay sa bag-o nga teritoryo. Ini tanan nakabulig sa akon nga mangin malipayon liwat.”

15. Paano ka mangin madinalag-on sa imo bag-o nga asaynment?

¹⁵ Puede ka mangin madinalag-on sa imo bag-o nga asaynment. Indi paghunahunaa nga wala mo nahimo sing maayo ang imo asaynment sang una ukon wala ka na ginapabaloran. Hunahunaa  ang madamo nga paagi nga ginabuligan ka ni Jehova subong, kag magpadayon sa pagbantala. Iluga ang matutom nga mga Cristiano sang unang siglo. Bisan diin man sila, ‘ginbantala nila ang maayong balita sang pulong sang Dios sa mga lugar nga ila ginkadtuan.’ (Binu. 8:1, 4) Mahimo magresulta sing maayo ang imo mga pagpanikasog nga magpadayon sa pagbantala. Halimbawa, sang ginpahalin ang mga payunir sa isa ka pungsod, nagsaylo sila sa ila kaingod nga pungsod nga nagakinahanglan sang daku nga bulig nga mabantalaan ang mga tawo nga nagahambal sang pareho sa ila nga lenguahe. Pagkatapos sang pila lang ka bulan, madamo nga bag-o nga grupo sa sini nga lenguahe ang natukod.

16. Paano ka mangin malipayon sa imo bag-o nga asaynment?

¹⁶ “Ang kalipay ni Jehova amo ang inyo kusog.” (Neh. 8:10, footnote) Ang aton daku nga kalipay nagadepende sa aton kaangtanan kay Jehova, indi sa aton asaynment, bisan pa ginapabaloran gid naton ini. Gani, kon gusto naton mangin malipayon, dapat kita magpabilin nga suod kay Jehova kag magsalig sa iya nga hatagan kita sing kaalam, panuytoy, kag suporta. Dumduma nga ginpabaloran mo gid ang imo asaynment sang una bangod ginhimo mo ang imo bug-os nga masarangan nga buligan ang mga tawo didto. Himua man ang imo bug-os nga masarangan sa imo bag-o nga asaynment kag saligi nga buligan ka ni Jehova nga pabaloran man ini.—Man. 7:10.

17. Ano ang dapat naton tandaan parte sa aton asaynment subong?

¹⁷ Dapat naton tandaan nga ang aton pag-alagad kay Jehova magapadayon, pero ang aton asaynment subong temporaryo lang. Sa bag-o nga kalibutan, mahimo magbag-o ang asaynment naton tanan. Si Aleksey, nga ginsambit kaina, nagapati nga ang mga pagbag-o sa iya asaynment nagahanda sa iya para sa mga pagbag-o sa palaabuton. “Nagapati ako nga matuod si Jehova kag ang bag-o nga kalibutan, pero nagbatyag ako nga indi gid ako suod kay Jehova kag kalayo pa sang bag-o nga kalibutan,” siling ni Aleksey. “Subong, suod na gid ako kay Jehova, kag pamatyag ko malapit na gid ang bag-o nga kalibutan.” (Binu. 2:25) Ano man ang aton asaynment, dapat magpabilin kita nga suod kay Jehova. Indi niya kita pagpabay-an. Bisan diin man kita nagaalagad, buligan niya kita nga mahimo naton ang aton bug-os nga masarangan kag mangin malipayon.—Isa. 41:13.