1-3. Ua li cas cov kwvtij nkauj muam ua haujlwm puv ntoob ibtxhia yuav tau hloov haujlwm?

LANPAW (Robert) thiab Malis (Mary) hais tias: “Tom qab wb mus tshaj tawm txawv tebchaws tau 21 xyoos, wb niam pog txiv yawg thiab niamtais yawmtxiv lawv puavleej laus thiab tsis taus lawm. Wb zoo siab mus pab tu lawv tiamsis wb kuj hlub thiab tsis xav ncaim cov uas wb nrog ua ke tau ntau xyoo lawm.”

² Viyees (William) thiab nws tus pojniam Thialis (Terrie) hais tias: “Thaum wb paub tias vim wb muaj mob wb yuav rov mus ua haujlwm puv ntoob li qub rau Yehauvas tsis tau lawm, wb quaj ib pluag. Wb yeej xav ua Yehauvas tes haujlwm txawv tebchaws mus li tiamsis zaum no yuav tsis tau mus lawm.”

³ Alijxim (Aleksey) hais tias: “Peb yeej paub tias nomtswv xav muab ceg Npe-ee ntawm peb kaw tiamsis thaum lawv kaw lawm tiag tseem ua rau peb tu siab heev tias peb yuav tau tawm Npe-ee.”

4. Hauv zaj no peb yuav teb 2 lo lus nug twg?

⁴ Tsis yog tas li cov hais los saum no xwb, tseem tshuav cuab kwvtij Npe-ee thiab cov ua haujlwm puv ntoob txhiab txhiab tus uas tau hloov haujlwm lawm thiab. * Yuav nyuaj heev rau cov no tso tes haujlwm uas lawv nyiam heev tseg mus ua ib teg tshiab. Dabtsi yuav pab kom lawv zoo siab rau lawv tes haujlwm tshiab? Koj yuav pab tau lawv li cas? Cov lus teb rau 2 lo lus nug no yuav pab tau lawv thiab kuj yuav pab tau peb sawvdaws thaum peb lub neeg hloov lawm.

5. Thaum tes haujlwm hloov lawm, yuav ua li cas rau peb?

⁵ Txawm yog peb ua haujlwm hauv Npe-ee lossis ua haujlwm puv ntoob qhov twg los peb yeej yuav hlub cov neeg thiab nyiam qhov chaw ntawd. Yog li ntawd, yog tias peb yuav tau tso peb tes haujlwm tseg yuav ua rau peb tu siab kawg. Peb yuav nco peb cov kwvtij nkauj muam uas nyob tom qab heev. Yog vim muaj kev tsimtxom peb thiaj tso lawv tseg ces yuav ua rau peb txhawj txog lawv heev thiab. (Mathais 10:23; 2 Kauleethaus 11:28, 29) Tsis tas li ntawd xwb, tej zaum peb yuav tau mus rau ib qho chaw tshiab thiab xyaum luag tej kev noj kev haus tshiab. Txawm peb rov los tsev xwb los, tej zaum yuav tsis zoo li qub lawm. Lanpaw thiab Malis hais tias: “Vim wb mus nyob lwm lub tebchaws tau ntev heev lawm, thaum wb rov los txog wb qub teb qub chaw, wb zoo li cov neeg txawv tebchaws lawm xwb.” Thaum mus nyob ib qhov chaw tshiab ibtxhia yuav muaj tej nuj nqis uas lawv tsis tau muaj dua. Tej zaum lawv yuav nyuaj siab heev tsis pom qab yuav ua li cas. Dabtsi thiaj yuav pab tau lawv?

6. Peb yuav ua li cas peb thiaj nyob ze Yehauvas?

⁶ Nyob ze Yehauvas. (Yakaunpaus 4:8) Peb yuav ua li no li cas? Peb yuav tsum tso siab plhuav rau Yehauvas tias nws yuav “teb peb tej lus thov.” (Phau Ntawv Nkauj 65:2) Phau Ntawv Nkauj 62:8 hais tias: “Qhia nej lub siab rau nws.” Yehauvas yeej “ua tau ib puas tsav yam ntau dua li tej uas peb thov thiab tej uas peb xav.” (Efexus 3:20) Nws tsis yog ua raws li peb thov xwb. Tej zaum nws tseem ua ntau tshaj li peb lub siab xav los daws peb tej kev nyuaj siab thiab.

7. (1) Dabtsi yuav pab kom peb nyob ze Yehauvas? (2) Raws li Henplais 6:10-12, yog peb rau siab ntso teev tiam Yehauvas yuav zoo li cas?

⁷ Yuav kom peb nyob ze Yehauvas, peb yuav tsum nyeem phau Vajlugkub txhua hnub thiab ua tib zoo xav txog tej uas peb nyeem. Ib tug kwvtij uas tshaj tawm txawv tebchaws hais tias: “Zoo rau peb rau siab npaj rau peb tej kev sib txoos thiab nrog peb tsevneeg pehawm Vajtswv ua ke tsis tu ncua li qub.” Kuj zoo rau peb rau siab ntso ua npaum li peb ua tau mus nrog pawg ntseeg los yog lub koom txoos tshiab mus tshaj tawm thiab. Txawm peb ua tsis tau npaum li qub lawm los, Yehauvas yeej nco ntsoov tej haujlwm uas peb ua rau nws.​—Nyeem Henplais 6:10-12.

8. 1 Yauhas 2:15-17 pab tau koj ua lub neej yoojyim li cas?

 ⁸ Ua lub neej yoojyim. Nyob hauv Xatas lub qab ntuj no muaj kev txhawj xeeb ntau tsav ntau yam, tiamsis tsis txhob cia tej ntawd los ua rau koj tso tseg tsis teem tiam Yehauvas. (Mathais 13:22) Tsis txhob mloog cov uas tsis teev tiam Yehauvas lossis peb tej phoojywg thiab tsevneeg uas xav pab peb tiamsis tsuas hais kom peb rau siab ntso khwv nyiaj khwv txiaj kom tau lub neej zoo xwb. (Nyeem 1 Yauhas 2:15-17.) Tso siab plhuav rau Yehauvas tej lus cog tseg. Nws hais tias nws yuav pab kom peb txojkev ntseeg nyob ruaj khov, kom peb muaj lub siab tus, thiab kom peb muaj txaus noj txaus haus.​—Henplais 4:16; 13:5, 6.

9. Raws li Pajlug 22:3, 7, vim li cas tsis zoo rau peb muaj nuj nqis ntau thiab dabtsi yuav pab kom peb paub txiav txim siab zoo?

⁹ Tsis txhob lob nuj nqis. (Nyeem Pajlug 22:3, 7.) Thaum peb tsiv mus nyob lwm qhov yuav siv nyiaj ntau heev. Yog peb tsis muaj nyiaj txaus ces tej zaum yuav ua rau peb xav mus qiv mus txais luag. Zoo rau peb tsis txhob lam mus luab tej khoom uas peb tsis tas muaj los tau, peb thiaj tsis muaj nuj nqis ntau. Yuav tsis yoojyim rau peb paub tias yuav txais nyiaj npaum li cas thaum peb muaj kev nyuaj siab. Xws li thaum peb tsevneeg ib tug muaj mob es peb yuav tau tu lawv. Thaum zoo li no, nco ntsoov tias yog koj “thov Vajtswv” ces nws yuav ‘ua rau koj muaj kev kaj siab’ koj thiaj paub txiav txim siab zoo.​—Filipis 4:6, 7; 1 Petus 5:7.

10. Peb yuav ntaus phoojywg tshiab li cas?

¹⁰ Nrog cov uas yuav txhawb tau koj. Qhia siab rau koj cov phoojywg zoo. Yimhuab zoo rau koj qhia rau ib tug uas twb ntsib li koj lawm. Yog koj ua li no, tej zaum yuav ua rau koj kaj siab. (Tej Lus Qhia 4:9, 10) Koj cov qub phoojywg los haj tseem yog koj cov phoojywg. Tiamsis nimno koj mus rau ib qho chaw tshiab lawm, koj yuav tau ntaus dua phoojywg tshiab. Nco ntsoov tias yog koj xav muaj cov phoojywg zoo, koj yuav tsum paub hlub thiab ua ib tug phoojywg zoo rau luag ua ntej. Koj yuav ntaus phoojywg tshiab li cas? Qhia lwm tus txog tej koob hmoov uas koj tau txais, lawv thiaj pom tias vim li cas koj nyiam ua haujlwm puv ntoob rau Yehauvas ua luaj. Ibtxhia hauv lub koom txoos yuav tsis to taub tiamsis ibtxhia yuav xav paub ntxiv thiab xav ua koj cov phoojywg zoo. Txawm li ntawd los, ua zoo tsis txhob tham ntau ntau txog koj tus kheej thiab tej uas koj tau ua rau Yehauvas, lossis tej uas koj tsis nyiam.

11. Yuav ua li cas neb ob niamtxiv thiaj muaj kev zoo siab?

¹¹ Yog tias koj yuav tsum tso koj tes haujlwm tseg vim koj tus txij nkawm muaj mob lawd, tsis txhob hais tias yog tim nws. Lossis yog koj ho yog tus muaj mob, tsis txhob tu siab tias yog tim koj es neb thiaj tsis tau ua haujlwm puv ntoob lawm. Nco ntsoov tias neb “koom ua ib lub cev” lawm thiab thaum neb sib yuav neb twb cog lus  rau Yehauvas lawm tias neb yuav sib hlub sib pab, ib tug yuav tsis tso ib tug tseg. (Mathais 19:5, 6) Yog tias neb yuav tau tso neb tes haujlwm tseg vim neb muaj menyuam lawd, nco ntsoov qhia neb tus menyuam tias nws tseemceeb dua tes haujlwm uas neb tau tso tseg. Niaj hnub qhia nws tias nws “yog koob hmoov los ntawm [Yehauvas].” (Phau Ntawv Nkauj 127:3-5) Thiab nco ntsoov qhia nws txog txhua yam zoo uas Yehauvas foom koob hmoov rau neb thaum neb ua haujlwm puv ntoob rau Nws. Yog neb ua li no, yuav txhawb kom nws xav siv nws lub neej los ua haujlwm puv ntoob rau Yehauvas ib yam li neb thiab.

12. (1) Peb yuav pab cov uas ua haujlwm puv ntoob lawv thiaj ua tau lawv tes haujlwm tsis tseg li cas? (2) Peb yuav ua li cas pab kom lawv muaj siab ua lawv tes haujlwm tshiab?

¹² Peb zoo siab heev uas muaj ntau lub koom txoos thiab coob tus kwvtij nkauj muam sib zog pab cov uas ua haujlwm puv ntoob kom lawv thiaj ua tau lawv tes haujlwm tsis tseg. Lawv mob siab lug txhawb, pab nyiaj txiag, pab khoom vaj khoom tsev, lossis pab saib xyuas lawv tsevneeg. (Kalatias 6:2) Yog luag xa cov ua haujlwm puv ntoob tuaj rau koj lub koom txoos, tsis txhob xav tias ntshe lawv ua haujlwm tsis zoo lossis lawv ua txhaum dabtsi lawv thiaj yuav tsum hloov haujlwm. * Tiamsis ua zoo xav seb koj yuav ua li cas pab kom lawv muaj siab ua lawv tes haujlwm tshiab. Txawm lawv muaj mob muaj nkeeg ua tsis tau ntau lawm los, zoo siab hlo tos txais lawv thiab qhuas lawv rau tej uas lawv tseem ua tau. Lawv twb teev tiam Yehauvas ntau ntev heev lawm ces lawv yeej paub Vajlugkub zoo, kawm tau ntau yam, thiab tau ua ntau yam rau  Yehauvas. Yog koj ua phoojywg nrog lawv koj yuav kawm tau ntau yam.

13. Peb yuav pab cov hloov haujlwm tshiab uas nyuam qhuav tuaj txog li cas?

¹³ Thaum cov uas tau hloov haujlwm tshiab nyuam qhuav tuaj txog, lawv yuav tau nrhiav tsev nyob, tsheb tsav, haujlwm ua, thiab lwm yam. Lawv kuj yuav tsum paub seb yuav mus ua ntaub ntawv them se lossis tsav tsheb nyob qhov twg thiab. Zoo rau koj pab lawv li koj pab tau. Tiamsis qhov tseemceeb tshaj peb yuav tsum xam pom lawv. Tej zaum lawv lossis ib tug hauv lawv tsevneeg muaj mob muaj nkeeg. Lossis lawv muaj ib tug txheeb ze tau tas sim neej lawm thiab lawv tseem quaj ntsuag tus ntawd. * Tsis tas li ntawd xwb, txawm lawv tsis hais dabtsi los, tej zaum lawv yeej nco lawv cov qub phoojywg heev. Tej zaum yuav ntev heev lawv mam li ua tau ib siab.

14. Cov kwvtij nkauj muam yuav pab cov uas tau tes haujlwm tshiab li cas?

¹⁴ Yog koj nrog cov tau tes haujlwm tshiab mus tshaj tawm thiab coj tus qauv zoo ces yuav ua rau lawv xav nyob. Ib tug muam uas tshaj tawm txawv tebchaws tau ntau xyoo hais tias, “Ntawm lub tebchaws kuv nyuam qhuav los, kuv muaj neeg kawm Vajlugkub txhua txhua hnub. Tiamsis ntawm no, tej zaum twb tsis tau nyeem ib nqe Vajlugkub lossis tso ib zaj yeeb yej kiab rau luag saib li. Tiamsis cov kwvtij nkauj muam hauv kuv lub koom txoos tshiab ho coj kuv nrog lawv rov mus xyuas cov uas nyiam tham txog Vajlugkub thiab cov uas lawv qhia Vajlugkub rau. Thaum kuv pom lawv kub siab lug thiab sib zog qhia Vajlugkub rau lwm tus ua rau kuv pib xam pom cov uas nyob hauv thaj tsam no. Kuv pom tias kuv yuav tsum hais li cas thiaj raug lawv siab. Tej no ua rau kuv rov muaj kev zoo siab dua.”

15. Yuav ua li cas koj thiaj ua tau koj tes haujlwm tshiab?

¹⁵ Koj yeej yuav ua tau koj tes haujlwm tshiab. Tsis txhob xav tias koj ua haujlwm tsis zoo yav tas los thiab nimno koj tsis muaj nqis dabtsi lawm. Tiamsis xav seb Yehauvas tabtom pab koj  tamsim no li cas es rau siab ntso tshaj tawm. Xyaum cov uas ntseeg Yexus Khetos los yog cov Khixatia thawj 100 xyoo. “Cov ntseeg uas khiav mus nyob rau txhua qhov chaw, lawv kuj mus qhia Txojmoo Zoo rau qhov ntawd.” (Tes Haujlwm 8:1, 4) Yog koj rau siab ntso mus tshaj tawm, tej zaum koj yuav pab tau coob leej ntau tus. Xws li ib pab tho kev uas raug luag muab ntiab tawm tebchaws. Lawv tawm mus nyob ib lub tebchaws tsis deb uas muaj neeg coob heev hais lawv yam lus. Hli puav tom qab xwb, lawv twb ua tau ob peb pawg lawm thiab muaj neeg coob heev los koom lawv.

16. Yuav ua li cas koj thiaj zoo siab rau koj tes haujlwm tshiab?

¹⁶ “Txojkev zoo siab uas los ntawm [Yehauvas] twb txhawb tau nej lub zog lawm.” (Nehemis 8:10) Txawm peb nyiam peb tes haujlwm npaum li cas los qhov uas ua rau peb zoo siab tshaj yog peb txojkev sib raug zoo nrog Yehauvas tsis yog tes haujlwm uas peb ua. Yog li ntawd, yog peb xav muaj kev zoo siab, peb yuav tsum nyob nrog nraim Yehauvas thiab cia nws ua tus pab peb, qhuab qhia peb, thiab coj peb txoj haukev. Nco ntsoov tias tos koj nyiam koj tes haujlwm qub los twb yog vim koj hlub thiab xav pab cov neeg hauv lub tebchaws ntawd. Yog koj mob siab rau koj tes haujlwm tshiab ces Yehauvas yuav pab kom koj hlub cov neeg hauv lub tebchaws tshiab ib yam nkaus.​—Tej Lus Qhia 7:10.

17. Peb yuav tsum nco ntsoov li cas txog peb tes haujlwm uas peb ua tamsim no?

¹⁷ Peb yuav tsum nco ntsoov tias peb yuav teev tiam Yehauvas mus ibtxhis tiamsis tes haujlwm uas peb ua tamsim no tej zaum yuav tsis ua ntxiv thaum peb nyob hauv lub Vaj Kaj Siab lawm. Alijxim xav tias qhov uas nws hloov haujlwm tshiab tamsim no tsuas npaj nws rau lub neej yav tom ntej xwb. Nws hais tias, “Yav tas los, txawm kuv yeej ntseeg tias muaj Yehauvas thiab lub ntiajteb tshiab los, zoo li nyob deb heev. Tiamsis nimno kuv nyob ze Yehauvas, thiab zoo li lub ntiajteb tshiab twb los yuav txog lawm.” (Tes Haujlwm 2:25) Yog li ntawd, txawm peb muaj tes haujlwm twg thiab nyob lub tebchaws twg los cia peb nyob kom ze Yehauvas. Nws yuav tsis tso peb tseg li tiamsis yuav pab kom peb zoo siab hlo ua nws tes haujlwm.​—Yaxayas 41:13.