1-3. Dahaka badina ma haida dainai, ful-taim hesiai taudia edia asainmen ia idau diba?

ROBERT bona Mary Jo idia gwau: “Lagani 21 lalonai emai misinari asainmen ai moalelaia murinai, ai ruaosi emai tama sina be idia gorere. Ai moale idia ai naria totona. To, ai lalohisihisi badina ai lalokau henia bada gabuna do ai rakatania.”

² William bona Terrie idia gwau: “Emai helt dainai ai diba emai asainmen dekenai do ai giroa lou lasi neganai, ai tai. Emai ura badana be tano ma ta ai Iehova do ai hesiai henia, to hari unai ai karaia diba lasi.”

³ Aleksey ia gwau: “Egu hesiai gaukara lau karaia tanona ai, ai diba gavamani idia ura brens ofesi idia koua. To, Betele idia koua bona unai gabu ai rakatania neganai, ai do lalohisihisi noho.”

4. Inai atikol ai edena henanadai do ita herevalaia?

⁴ Unai ekspiriens hegeregerena ful-taim hesiai taudia momo, Betele dekenai idia gaukara taudia danu, be asainmen matamata idia abia. * Inai abidadama tadikaka bona taihu dekenai ia auka idia lalokau henia bada asainmen idia rakatania totona. Dahaka ese idia do ia durua, unai senisi idia haheaukalaia totona? Edena dala ai idia oi durua diba? Unai henanadai edia haere ese ita ibounai do ia durua, iseda mauri ai idia vara senisi idauidau ita haheaukalaia totona.

5. Dahaka ia vara diba bema iseda asainmen ia idau?

⁵ Herevana ful-taim hesiai gaukara ma haida ita karaia eiava Betele ai ita gaukara, iseda hesiai gaukara ita karaia gabuna bona unuseniai idia noho taudia do ita lalokau henia. Unai dainai bema badina ma haida dainai iseda asainmen ia idau, ita lalohisihisi diba. Ita rakatania tadikaka taihu ita reaia bada bona ita lalohekwarahi, badina dagedage karana dainai idia ita rakatania. (Mat. 10:23; 2 Kor. 11:28, 29) Danu, asainmen matamata ita abia, eiava iseda hanua dekenai ita giroa lou neganai, nega momo do ia auka kastom matamata ita badinaia totona. Robert bona Mary Jo idia gwau: “Emai kastom ai laloaboio sisina, danu ia auka emai gado korikori dekenai ai haroro totona. Ai mamia ai be idau taudia bamona.” Edia asainmen ia idau taudia haida be moni ena hekwakwanai idia davaria danu. Reana do idia daradara, gari bona lalomanoka. Dahaka ese idia ia durua diba?

6. Edena dala ai Iehova kahirakahira ita noho diba?

⁶ Iehova kahirakahira oi noho. (Iam. 4:8) Edena dala ai unai ita karaia diba? Ia ita abidadama henia badina iseda ‘guriguri ia kamonai’ henia. (Sal. 65:2) Salamo 62:8 ia gwau: “Emui kudouna edia ura gaudia, be ia dekenai do umui hamaoroa.” Iehova ese “ita noia eiava lalohadailaia gaudia sibona lasi, to unai gaudia idia hereaia gaudia ia henia diba.” (Efe. 3:20) Iehova be ita noia gaudia sibona ia henia lasi. To, ita laloa lasi dalanai heduru ia henia, iseda hekwakwanai Ia hamaoromaoroa totona.

7. (a) Dahaka ese ita ia durua diba Iehova kahirakahira ita noho totona? (b) Heberu 6:10-12 ena hereva bamona, dahaka namo do ia vara bema mai abidadama ida Iehova ita hesiai henia noho?

⁷ Iehova kahirakahira ita noho totona, dina ta ta ai Baibel ita duahia bona laloa dobu. Guna misinari gaukara ia karaia tadikaka ta, ia gwau: “Hanaihanai ruma bese tomadiho bona hebou gaudia hegaegaelaia ena sediual oi badinaia be namo, emu asainmen gunana ai oi karaia bamona.” Danu emu kongrigeisen matamatana ai, sivarai namona harorolaia gaukarana oi karaia noho. Iehova ese mai abidadama ida ia idia hesiai henia noho taudia ia laloaboio lasi, ena be edia goada be guna bamona lasi.​—Heberu 6:10-12 duahia.

8. Edena dala ai 1 Ioane 2:15-17 ese oi ia durua diba kohu momo oi tahua lasi totona?

 ⁸ Kohu momo oi tahua lasi. Namo lasi Satani ena tanobada ena lalohekwarahi gaudia ese emu hesiai gaukara ia “koua.” (Mat. 13:22) Tanobada ena lalohekwarahi gaudia eiava emu turadia o varavara edia laloani herevadia, moni momo tahua karana dekenai, oi dadaraia. (1 Ioane 2:15-17 duahia.) Iehova ena gwauhamata oi abidadama henia, ia ese “nega maorona ai” heduru do ia henia, unai amo iseda abidadama do ia goada, do ita lalomaino bona tauanina dalanai ita do ia durua.​—Heb. 4:16; 13:5, 6.

9. Aonega Herevadia 22:3, 7 ena hereva bamona, dahaka dainai ita abitorehai lasi, bona dahaka ese ita do ia durua abia hidi maorona ita karaia totona?

⁹ Oi Abitorehai Lasi. (Aonega Herevadia 22:3, 7 duahia.) Reana gabu ta oi lao totona, moni bada do oi gaukaralaia. To, namo lasi oi abitorehai do oi gaukaralaia momo lasi gaudia oi hoia totona. Bema gorere taudia naria totona ita lalohekwarahi bada, reana do ia auka abia hidi maorona ita karaia moni hida ita abitorehai totona. Unai bamona negadia ai, namona be oi laloatao “guriguri bona noinoi goadagoada” karana ese oi do ia durua, abia hidi maorona oi karaia totona. Emu guriguri haerelaia totona, Iehova ese maino do ia henia emu “kudouna bona lalona” ia gimaia totona, unai amo lalohadai maorona oi abia diba.​—Fili. 4:6, 7; 1 Pet. 5:7.

10. Edena dala ai tura matamatadia ita davaria diba?

¹⁰ Tura namodia oi bamoa. Namona be tura namodia dekenai emu hemami bona emu hekwakwanai oi herevalaia, reana idia haida dekenai unai bamona gaudia idia vara. Unai bamona oi karaia neganai, emu hemami do ia namo. (Had. 4:9, 10) Emu asainmen gunana ai oi davaria turadia be emu tura namodia, to hari emu asainmen matamatana ai, namona be tura namodia ma haida oi tahua. Laloatao, ma haida oi tura henidia totona, namona be tura namona ai oi lao. Edena dala ai tura matamatadia oi davaria diba? Namona be ma haida dekenai Iehova ena hesiai gaukara lalonai oi davaria ekspiriens namodia oi herevalaia, unai amo oi abia moalena do idia mamia. Ena be kongrigeisen dekenai haida ese ful-taim hesiai gaukara oi laloa bada karana do idia lalopararalaia lasi, to ma haida be emu haheitalai do idia tohotohoa bona emu tura namodia ai idia lao diba. To, namo lasi Iehova ena hesiai gaukara ai oi hagugurua gaudia, bona oi ura henia lasi gaudia oi herevalaia momo.

11. Edena dala ai emu headava oi moalelaia diba?

¹¹ Bema oi be emu adavana ena helt dainai emu asainmen oi rakatania, namo lasi oi laloa unai be iena kerere. Eiava, bema emu helt dainai  emui asainmen do ia idau, namo lasi oi lalohisihisi, bona oi laloa emu adavana oi hahisia. Laloatao, umui be “tauanina tamona,” bona Iehova vairanai umui gwauhamata nega namodia bona nega dikadia ai do umui durua heheni. (Mat. 19:5, 6) Bema emu adavana ia rogorogo dainai emui fultaim hesiai gaukara umui rakatania, namona be emui natuna umui hadibaia, ia umui laloa bada dainai emui asainmen umui rakatania. Bona ia umui hadibaia, ia be Dirava ese ia henia “harihari gauna.” (Sal. 127:3-5) Danu, emui asainmen ai umui davaria ekspiriens namodia be ia dekenai oi herevalaia. Unai ese emui natuna do ia hagoadaia ena mauri lalonai Iehova hesiai henia gaukarana ia moalelaia totona.

12. (a) Edena dala ai ful-taim hesiai taudia ita durua edia asainmen idia karaia noho totona? (b) Edena dala ai idia ita durua, edia asainmen matamata idia moalelaia totona?

¹² Moale gauna be, ful-taim hesiai gaukara idia karaia taudia ese edia asainmen idia karaia noho totona, kongrigeisen momo bona tadikaka taihu ta ta be idia dekenai heduru idia henia. Hegeregere, moni bona edia dabu gaudia idia henia, eiava edia ruma bese idia durua. (Gal. 6:2) Bema ful-taim hesiai gaukara idia karaia taudia be asainmen matamata idia abia bona emu kongrigeisen dekenai idia mai, namo lasi oi laloa idia be kerere ta idia karaia eiava sisiba idia abia dainai edia asainmen ia idau. * To, namona be idia oi durua edia asainmen matamata idia moalelaia totona. Danu, idia oi welkam henia bona edia gaukara namona dainai oi hanamodia, ena be gorere dainai gau momo idia karaia diba lasi.  Edia diba, treinin henia dalana, bona ekspiriens amo diba oi abia.

13. Asainmen matamata idia abia taudia dekenai dahaka heduru ita henia diba?

¹³ Asainmen matamata idia abia taudia be noho gabuna ta, motuka eiava PMV amo loaloa dalana, moni gaukara eiava gau ma haida dekenai heduru do idia ura. Eiava tax o insurance gaudia dekenai diba ma haida do idia ura abia. To mai anina bada gauna be, edia noho dalana oi lalopararalaia. Reana idia sibona eiava edia ruma bese tauna ta ia gorere dainai idia lalohekwarahi. Eiava edia lalokau tauna ta ia mase dainai idia lalohisihisi. * Bona reana do idia tai badina edia asainmen gunana dekenai idia bamoa tadikaka taihu idia reaia bada. Nega daudau lalonai unai do idia lalohisihisilaia.

14. Edena dala ai kongrigeisen ta ese taihu ta idia durua ena asainmen ia moalelaia totona?

¹⁴ Idia ida oi haroro hebou bona emu haheitalai namona ese idia ia durua diba. Lagani daudau, tano ma ta ai hesiai gaukara ia karaia taihu ta ia gwau: “Egu asainmen gunana ai lau be dina ibounai Baibel stadi lau karaia. Egu asainmen matamatana ai, ia auka haroro gaukara dekenai siri ta lau duahia eiava vidio ta lau hahedinaraia totona. To, tadikaka bona taihu ese lau idia boiria edia lou henia bona stadi ai itaia hebou totona. Unai abidadama tadikaka taihu be edia stiuden ida Baibel stadilaia karana idia goadalaia dainai unai ese lau ia durua egu teritori lau laloa bada totona. Teritori matamatana ai herevahereva hamatamaia dalana lau dibaia. Unai ibounai ese lau ia durua lau moale totona.”

15. Edena dala ai emu asainmen matamata ese anina namona ia havaraia diba?

¹⁵ Emu asainmen matamata ese anina namona ia havaraia diba. Namo lasi oi laloa emu asainmen ia idau badina oi be gaukara namona oi karaia lasi. Iehova ese dala idauidau ai oi ia durua dalana oi laloa bona haroro gaukara  oi goadalaia noho. Keristani taudia ginigunadia edia haheitalai oi tohotohoa. Idia be “idia lao tanodia ibounai dekenai, Dirava ena hereva ena sivarai namona idia harorolaia.” (Kara 8:1, 4) Emu haroro goadagoada karana ese anina namona ia havaraia diba. Hegeregere, tano ta ai edia gaukara idia koua painia taudia haida be tano ma ta dekenai idia lao, unuseniai momo be painia taudia idia herevalaia gado idia diba bona idia ura edia hereva momokani idia dibaia. Hua haida murinai, grup matamatadia idia hamatamaia.

16. Edena dala ai emu asainmen matamatana oi moalelaia diba?

¹⁶ “[Iehova] dainai ita moale neganai, goada do ita abia.” (Neh. 8:10) Iehova ita lalokau henia dainai ita moale, to iseda asainmen dainai lasi, herevana iseda asainmen ita ura henia bada. Unai dainai Iehova ida ita raka noho, iena aonega, hakaua dalana, bona heduru ita abia. Laloatao, emu asainmen gunana oi ura henia bada, badina unuseniai idia noho taudia oi lalokau henia. Unai hegeregerena, bema emu asainmen matamata oi ura henia, Iehova ese oi do ia durua emu asainmen oi laloa bada totona.​—Had. 7:10.

17. Hari ita karaia noho asainmen be edena bamona ita laloa be namo?

¹⁷ Namona be ita laloatao, Iehova ena hesiai gaukara be do ita karaia hanaihanai, to ita abia asainmen be do ia idau diba. Tanobada matamatana ai, ita ibounai iseda asainmen be do idia idau. Matamanai ita herevalaia tadikaka, Aleksey, ia abia dae ena asainmen dekenai idia vara senisi ese ia durua vaira nega ai do idia vara gaudia totona ia hegaegae. Ia gwau: “Guna lau laloa, Iehova bona tanobada matamata ena gwauhamata be momokani. To hari lau abia dae momokani, Iehova be lau kahirakahira ia noho bona tanobada matamata be kahirakahira do ia vara.” (Kara 2:25) Herevana dahaka asainmen ita karaia, namona be Iehova kahirakahira ita noho. Ia ese ita do ia rakatania lasi, to ita do ia durua iena hesiai gaukara idauidau ita moalelaia totona.​—Isa. 41:13.