ORUPA RWOMAKONḒONONENO 34
Mokara vi nondjoroka motjiungura tjoye otjipe?
“Ndjambi Eye omunausemba. Eye ke nokuzemba otjiungura tjeṋu, norusuvero ndu mwa raisa ku Ye.”—HEBR. 6:10.
EIMBURIRO 38 Eye me ku zeuparisa
OMAPU KU MATU KATARA *
1-3. Omapu yeṋe tjiva nge tjita kutja ovakarere mbe karera oruveze aruhe ve rundurure otjiungura tjawo?
ROBERT na Mary Jo va tja: “Kombunda yozombura 21 motjiungura tjetu otjovahindwa, ovanene vetu atuyevari va ngundiparere mena rouvere. Eṱe twa ri nondjoroka okuvetjevera. Posi yokutja ya ri otjihihamse okuisa oruveze ndu twa suverere nomasa.”
2 William na Terrie va tja: “Indu tji twa zuva kutja katu nokuyenena okuyaruka kotjiungura tjetu mena rouveruke wetu, eṱe twa rira. Eṱe aruhe aatu vanga okukarera Jehova mehi rarwe posi yokutja nai katu yenene rukwao.”
3 Aleksey wa tja: “Eṱe aatu tjiwa kutja ovetutatumise aave vanga okupata orutavi romberoo ami pe karere. Posi yokutja indu tji va pata oBetel eṱe aatu sokupita mu yo nu twa wire momuinyo.”
4. Morupa ndwi matu kahungirira komapuriro yeṋe?
4 Ovakarere ovengi mbaave karere oruveze aruhe, na imba mbaave karere poBetel va pewa oviungura ovipe. * Tjiri mape ya ai rire otjiṋa otjizeu kovakambure ovaṱakame mba okuisa oviungura mbi va suvera nomasa. Otjikwaye tji matji yenene okuvevatera okutjinda omarundurukiro nga? Ove mo yenene okuvevatera vi? Omaziriro komapuriro nga maye tu vatere atuhe indu tji matu tjiti omarundurukiro mehupo.
OMUANO WOKUTJINDA OMARUNDURUKIRO
Ongwaye tji mape ya ai rire ouzeu kovakarere mbe karera Jehova oruveze aruhe okuisa otjiungura tjawo? (Lesa oparagrafa 5) *
5. Omomiano viṋe otjiungura otjipe mu matji yenene okutuṱuna?
5 Nandarire kutja tu ungura poBetel poo motjiungura tjokuzuvarisa, eṱe matu yenene okurihonga okusuvera ovandu nu nandarire oruveze pu tu karera. Kunao tu hihamwa omutima tjinene tji matu isa otjiungura tjetu. Eṱe tu hihamenwa i imba mbu mave sewa kongotwe, nu tu rikendera wo, tjinenenene indu tji matu sokuyenda mena rokutatumisiwa i yovapirukire. (Mat. 10:23; 2 Kor. 11:28, 29) Wina mape ya irira ouzeu tjinene okuyaruka kehi retu poo okuuta otjiungura otjipe, mena rokutja tu hepa okuiririra ombazu yarwe ombe. Robert na Mary Jo va tja: “Eṱe twa zemba ombazu yetu oveni nu nandarire okuzuvarisa meraka retu. Mena rokutja twa karera oure woruveze orure moruveze rarwe, eṱe aatu rimunu kutja kaweṱe ovehi retu rukwao.” Tjiva mbe muna omarundurukiro motjiungura tjawo mape ya ve kara nouzeu wotjimariva. Owo mape ya ave utu okukara nomakeyakeyero nu ave u momuinyo. Otjikwaye tji matji yenene okuvevatera?
Ounahepero okutumbuka popezu na Jehova nokukambura muye (Lesa oparagrafa 6-7) *
6. Matu yenene vi okukara popezu na Jehova?
6 Kara popezu na Jehova. (Jak. 4:8) Matu yenene vi okutjita nao? Kambura mu ingwi ngu “zuvira ozongumbiro.” (Eps. 65:2) Epsalme 62:8 ri tja: “Mu raereye omaumba weṋu aehe!” Jehova ma yenene ‘okutjita ovingi okukapita imbi eṱe mbi matu sora okukumba poo okuripura.’ (Ef. 3:20) Jehova ketu pe imbi mbi twa ningire mongumbiro yetu uriri. Nungwari u yenena okuzengurura omauzeu wetu momuano mbu tu hi nokuundjira ko.
7. (a) Ovikwaye mbi mavi tu vatere kutja tu kare popezu na Jehova? (b) Otja kOvaheberi 6:10-12, mape tjitwa tjike indu tji wa kayenda komurungu okukarera Jehova nouṱakame?
7 Kutja u kare popezu na Jehova, lesa Ombeibela eyuva arihe nokuripurira ko oukoto. Omuhindwa umwe wa tja: “Kayende komurungu okukara nomerikotameneno weṱunḓu, nokurirongerisa kozombongarero zombongo tjimuna tjo tjiti indu tji wa ri motjiungra tjoye otjikuru.” Wina, kayende komurungu okuzuvarisa ombuze ombwa pu nombongo yoye ombe. Jehova u zemburuka imba mbe kayenda komurungu okumukarera nouṱakame nandarire kutja kave yenene okuungura oviṋa mbyaave ungura rukuru.—Lesa Ovaheberi 6:10-12.
8. Omambo nge ri mu 1 Johanes 2:15-17 maye ku vatere vi okuyandja ombango ku imbi mbi ri ovinahepero mehupo roye?
8 Yandja ombango ku imbi mbi ri ovinahepero mehupo roye. O yandjere ozongendo zouye wa Satan ze tjite kutja u ise okukarera Jehova. (Mat. 13:22) O puratene kovandu mbe ha karere Jehova, poo omapanga novazamumwe mbu mave kondjo okukuvatera mokukuraera kutja mohepa ovimariva ovingi okurundurura ehupo roye. (Lesa 1 Johanes 2:15-17.) Kara nongamburiro mu Jehova, ngwa kwizika okutupa avihe mbi matu hepa “moruveze orusemba.” Eye me tu vatere kutja tu kare nongamburiro yomasa, noupore nu me tu pe oviṋa mbi matu hepa.—Hebr. 4:16; 13:5, 6.
9. Otja kOmiano 22:3, 7, ongwaye tji tu ha sokuritwa mozondjo nḓe heri ohepero, nu ovikwaye mbi mavi yenene okutuvatera okutjita ozondando ozombwa?
9 O ritwa mozondjo nḓe heri ohepero. (Lesa Omiano 22:3, 7.) Omatjindiro mape ya aye tjiti kutja mu kare nozondjo. Okutja o yazema ovimariva okuranda oviṋa mbi u hinokuhepa. Irira ouzeu okutya kutja mo yazema ovimariva vingapi indu tji u ri mouzeu, otjotjihorera indu tji u tjevera omuzamumwe ngwa vera. Mozongaro otja inḓo, zemburuka kutja ‘mozongumbiro zoye azehe ningira ku Ndjambi imbi mbi wa hepa,’ nu okutjita nao maku ku vatere okutjita ozondando ozombwa. Jehova ma ziri ozongumbiro zoye, nu me ku pe ohange ndji ‘mai ṱakamisa omutima woye nouripura woye,’ mokukuvatera kutja ovikwaye mbi ri ovisemba okutjita.—Fil. 4:6, 7; 1 Petr. 5:7.
10. Matu yenene vi okutjita omapanga omape?
10 Kara nomapanga omawa. Hungira ku nomapanga woye wopopezu ohunga nongaro mu u ri nouzeu mbu u muna, tjinene ku na imba mbu mape ya va ri mongaro tjimuna oyoye. Tji mo tjiti nao ihi matji ku vatere okukara nawa. (Omuzuv. 4:9, 10) Omapanga ngu wa tjita motjiungura tjoye otjikuru mave karerere omapanga woye. Nai, motjiungura tjoye otjipe, mo hepa okutjita omapanga warwe omape. Zemburuka kutja, okukara nepanga ove mo sokurira epanga. Ove mo yenene vi okutjita omapanga omape? Raera varwe ohunga noviṋa oviwa mbi wa tjita motjiungura tja Jehova kutja owo ve yenene okumuna ondjoroka yoye. Tjiva mombongo mape ya ave ha zuu nawa kutja ongwaye tji wa suvera okukarera Jehova oruveze aruhe, posi yokutja varwe mape ya ave vanga okutjiwa nu ave rire omapanga woye omawa. O hungire tjinene ohunga na ove omuini, oviṋa mbi wa tjita motjiungura tja Jehova, poo ozongaro ozombi nḓu wa ri mo.
11. Ovikwaye mbi mo yenene okutjita kutja orukupo roye ru kare nondjoroka?
11 Tji wa isa otjiungura tjoye mena rouveruke womukweṋu ngu mwa kupasana, o mupe ondjo. Ove tji u hi nouveruke ouwa, o ripe ondjo mokuripura kutja mo hihamisa omundu ngu mwa kupasana. Zemburuka kutja oweṋe “onyama imwe,” nu mwa yana komurunguru wa Jehova okutjeverasana kehi yozongaro azehe. (Mat. 19:5, 6) Indu tji wa isa otjiungura tjoye mena rouṱumbapare, tjita kutja omuatje woye ma tjiwa kutja eye omunahepero potjiungura tjoye tji wa ri natjo. Raera omuatje woye aruhe kutja u mu vara otja “otjiyandjewa” okuza ku Mukuru. (Eps. 127:3-5) Nu wina mu raera ohunga noviṋa oviwa mbi wa tjita motjiungura tjoye. Tji wa tjiti nao maku mu tunduuza okukarera Jehova oruveze aruhe tjimuna ove tji wa tjita.
VARWE MAVE VATERE VI
12. (a) Matu yenene vi okuvatera imba mbe karera Jehova oruveze aruhe okukayenda komurungu notjiungura tjawo? (b) Matu yenene vi okuvevatera okuiririra otjiungura tjawo otjipe?
12 Ozombongo ozengi zovakambure ovakwetu ve vatera imba mbe karera Jehova oruveze aruhe, okukayenda komurungu notjiungura tjawo. Owo ve tjita nao mokuvetunduuza, okuvepa oviṋa mbi mave hepa poo okuvevatera okutjevera eṱunḓu rawo ndi kara kokure. (Gal. 6:2) Imba mbe karera Jehova oruveze aruhe tji va hindwa kombongo yeṋu mena rotjiungura otjipe, o munu kutja owo va tjiti otjiṋa otjivi poo va rongwa. * Kunao, ve vatera kutja ve yenene okuiririra otjiungura tjawo. Ve yakura norusuvero nu ve tanga koviungura vyawo oviwa mbi va ungura, nandarire kutja kave nokuyenena okuungura ovingi mena rouveruke wawo. Uta okuvetjiwa. Rihongera kondjiviro yawo, noviṋa mbi va tjita.
13. Matu vatere vi imbo mba munu otjiungura otjipe?
13 Imba mba pewa otjiungura otjipe mape ya ave hepa ombatero yokupaha oruveze okukara po, okutwarewa kotuveze pekepeke, okupaha oviungura, noviṋa vyarwe mbi mave hepa. Owo mape ya ave hepa ondjivisiro ohunga noviṋa tjimuna okusuta otjitjamurongo nokukongorera ozoveta zehi. Posi yokutja, otjiṋa tji mave hepa tjinenenene, okweṱe okuzuva nawa ongaro mu ve ri. Owo mape ya ave kondjo nouveruke wawo oveni poo imbo wovazamumwe vawo. Owo mape ya ve ri moruhoze mena ronḓiro yomusuverwa wawo. * Nu nandarire kutja kave nokuhungira ohunga notjiṋa ho, mape ya ve ri momihihamo mena rokutja ve hihamenwa i yomapanga wawo. Owo tjiri ve hepa oruveze okutjinda ozongaro otja inḓo.
14. Ovazuvarise va vatera vi omukazendu omukambure okuiririra otjiungura tje otjipe?
14 Tji mozuvarisa kuna wo nokuvetunduuza notjihorera tjoye otjiwa move vatere kutja ve iririre. Omukazendu omukambure ngwa karere mehi rarwe oure woruveze orure wa tja: “Motjiungura tjandje otjikuru ami ee hongo ovandu Ombeibela eyuva arihe. Nu motjiungura tjandje otjipe yari ouzeu okulesa etjangwa poo okuraisa okavidio motjiungura tjokuzuvarisa. Posi yokutja ovazuvarise ve ndji ṋanga kutja tu yende pamwe kovahongwa vawo vOmbeibela. Okumuna ovakambure ovakwetu ovaṱakame nu mbe ungura oukukutu okuhonga ovahongwa vawo vOmbeibela kwa tjita kutja mbi kare noumune ouwa ohunga nomaturiro mu tu zuvarisira. Ami mbe rihonga okuuta omahungi momaturiro omape ngo. Avihe mbi vye ndji vatera okukara nondjoroka rukwao.”
KAYENDE KOMURUNGU!
Paha omiano vyokuneneparisa otjiungura tjoye tjokuzuvarisa momaturiro mu u zuvarisa (Lesa oparagrafa 15-16) *
15. Ove mo yenene vi okumuna ouwa motjiungura tjoye otjipe?
15 Ove mo yenene okumuna ouwa motjiungura tjoye otjipe. O munu kutja wa tjita oviṋa ovivi motjiungura tjoye otjikuru poo kutja kononḓengu. Ripura ohunga nomiano Jehova me ku vatera nai nu kayende komurungu okuzuvarisa. Horera kOvakriste ovaṱakame veserewondo etenga. Owo “va ya koṋa akuhe amave zuvarisa indji Ombuze Ombwa ya Kristus.” (Oviung. 8:1, 4) Tji wa kayenda komurungu okuzuvarisa, mo munu oviṋa oviwa. Otjotjihorera, ovakandjira mba rambwa mehi rimwe va tjindira kehi ro popezu, mu mwa ri nouhepe ounene meraka rawo wina. Momieze omiṱiṱi uriri, pa utwa ovimbumba ovipe mbya vi kurire ko.
16. Mo yenene vi okukara nondjoroka motjiungura tjoye otjipe?
16 Ombeibela i tja: “Ondjoroka Muhona ndji me mu pe mai mu pe omasa.” (Neh. 8:10) Ondjoroka yetu mai sokuza koupanga wetu na Jehova nungwari ka motjiungura tjetu, nandarire kutja twe tji suvera pu pe ṱe ki pi. Kunao tji mo vanga okukara nondjoroka, mo sokukara popezu na Jehova nokukayenda komurungu okuṱaṱera ku Ye. Zemburuka kutja wa suverere otjiungura tjoye mena rokutja wa tjita pu mo yenene okuvatera ovandu mbo. Suvera otjiungura tjoye otjipe nu tara komuano Jehova mu me ku vatere okutjisuvera wina.—Omuzuv. 7:10.
17. Matu sokuzemburuka tjike ohunga notjiungura tjetu otjipe?
17 Matu sokuzemburuka kutja, okukarera Jehova ku karerera, posi yokutja otjiungura tjetu otjipe kamaa tjikarerere. Mouye oupe, atuhe mape ya matu kara notjiungura tjarwe. Aleksey, ngwa tamunwa pomautiro worupa ndwi, u tja omarundurukiro motjiungura tje ye mu vatera okurirongrisa komarundurukiro moruyaveze. Aleksey wa tja: “Ami aruhe ee tjiwa kutja Jehova nouye oupe oviṋa vyakatjiri, posi yokutja aavi munika tjimuna vi ri kokure. Nai mbi ri muna popezu na Jehova nu mbi muna kutja ouye oupe mauya tjimanga.” (Oviung. 2:25) Kainatja kutja otjiungura tjiṋe tji tu ungura, ngatu kare popezu na Jehova. Eye ke nokutwesa ko, posi yokutja eye me tu vatere okukara nondjoroka motjiungura tje nandarire kutja tu karera pi.—Jes. 41:13.
EIMBURIRO 90 Yanḓiparisasaneye
^ par. 5 Povikando tjiva ovakambure ovakwetu mbe karera Jehova oruveze aruhe mape ya ave isa okuungura otjiungura tjawo, poo ave munu otjiungura otjipe. Orupa ndwi maru ka hungira ohunga nomauzeu ngu ve muna nokutja ovikwaye mbi mavi yenene okuvevatera tji ve ri mozongaro ozombe nḓo. Oro wina maru kahungira ohunga nokutja varwe mave yenene vi okuvetunduuza nokuvepa omasa, nu wina maru kaṱuna komirari mbi mavi yenene okuvatera auhe wetu indu tji matu tjiti omarundurukiro.
^ par. 4 Momuano otjingewo, otja ozombura tji maze kayenda, ovarumendu ovakambure mbe nomerizirira mombongo ve yandja oviungura vyawo komitanda. Lesa otupa twi, “Vakurundu Ovakriste—Jehova u tjaterwa i youṱakame weṋu,” mOruhungu rwa Septemba 2018, na “Kara norusuvero momuinyo nandarire kehi yomarundurukiro,” mOruhungu rwa Oktoba 2018.
^ par. 12 Ovanene vombongo mombongo maave karere mave sokutjanga orutuu romeritjiukisiro, kutja ve kayende komurungu okukarera otjomukandjira, omunene wombongo poo otjomuvatere wombongo.
^ par. 13 Lesa ongongorasaneno ndji “Help for Those Who Grieve,” mo Awake! No. 3 yombura ndji 2018.
^ par. 57 OMAKAHURURIRO WOVIPERENDERO: Ovakupasane mbu mave sokuisa otjiungura tjawo otjovahindwa mehi rarwe mave virikiza kombongo yawo nomahoze momeho.
^ par. 59 OMAKAHURURIRO WOVIPERENDERO: Tji va yaruka kehi rawo, ovakupasane mbo mave kumbu ku Jehova kutja me ve vatere okutuurunga omauzeu ngu mave munu.
^ par. 61 OMAKAHURURIRO WOVIPERENDERO: Nombatero ya Jehova owo nai vekarera Jehova oruveze aruhe. Owo mave ungurisa eraka ndu ve rihonga tji vari ovahindwa, okuzuvarisa ombuze ombwa kovandu mba tjindira momaturiro ombongo yawo mui zuvarisira.
