1-3. Anni i karuan ta rason nu ngatta manguli i asayment danuri egga ta ngamin-tiempo?

“KABALIN na 21 ragun nga magayayya nga pinammisioneromi, parehu nga nattaki i maganami,” neraddamman da Robert anni Mary Jo. “Kayàmi ira nga tangngawan. Ngem, maraddam kami lagapa nga panawan i lugar nga kuruga meddu ngana nikami.”

² “Tagga ta nammuammi nga ariammi ngana puede nga manoli ta asaymentmi megafu ta problema ta gawa-gawayyammi, siminangi kami,” istorian da William anni Terrie. “Nangultimu ngana i ambisiommi nga masserbi kani Jehova ta tanakuan nga nasion.”

³ “Ammumi nga kayà na manara-darum ira nga ipaserra i panga nga ofisina nu sitaw ngà masserbi,” kunni Aleksey. “Ngem nakaddagan kami lapa kustu nesimmu yatun anna mawag nga panawammi i Bethel.”

4. Anni ira nga pakkiavu i matabbag taw nga artikulo?

⁴ Fuera paga tatun ira nga ekspiriensa, rinivu nga miembro na familia na Bethel anna tanakuan paga i nakalawa gapa tu bagu ira nga asayment. * Awayyana nga marigatan danaw nga wawwaragi nga panawan i tagibaloradda nga asayment. Anni i makoffun nira tapenu marubang yatun nga panguli? Kunnasim ira moffunan? Makoffun i tabbag taw ira nga pakkiavu tapenu marubattam ngamin i manguloli ira nga sirkumstansia ta pattolay.

5. Anni ira i efekto nittam na panguli na asayment?

⁵ Massesserbi tam man ta Bethel onu ta tanakuan nga klase  na ngamin-tiempo nga serbisiu, baka nagigiammu tam ngana nga ayatan i totolay anna i lugar nga passerbiattam. Yatutta madammo ta panageno tam nu mawag tu panawattam i asayment tam. Kanappattam danuri mebattattam, anna mavuruttam para nira, nerulay nu gafu ta pameppersigi i pappanaw tam. (Mat. 10:23; 2 Cor. 11:28, 29) Kunne na gapa, baka mariga nga umay ta tanakuan nga lugar megafu ta mawag tu makibagay tam ta bagu nga kultura. Kunnatun gapa i mesimmu nu manoli ittam ta naggafuattam. “Ari kami ngana nga sanay ta mismu nga kulturami anna maski i pallayyagayya ta lengguahemi,” kudda Robert anni Mary Jo. “Gittana ari kami ngana makasabay.” Egga danuri nanguli i asaymentda nga nakaekspiriensa tu gavva nga problema ta finansial. Baka matagenoda nga ariadda ammu nu anni i mesimmu nira, mavurung ira, onu nakkafi i nonoda. Anni i makoffun nira?

6. Kunnasi tam makapattalupaddian nga madukko kani Jehova?

⁶ Mattalupaddian nga madukko kani Jehova. (Sant. 4:8) Kunnasi tam makua yatun? Gukaban na pattalo nisa bilang i “Minagginna tu pakimallo.” (Sal. 65:2, NW ) “Ngamin i vuru-vurung nu en-nu sa nga kagian,” kagian na Salmo 62:8. Makua ni Jehova i “mas aru paga anne ta kiddawat-tam sa onu manono tam.” (Efe. 3:20) Ari laman tu danuri kiddawattam ta pakimallo i iyawa ni Jehova nittam. Mawayyana nga kuan i ariattam ekspektan anna i mas mapia paga anne ta manono tam nga solusion na problema tam ira.

7. (a) Anni i makoffun nittam tapenu mattalupaddian nga madukko kani Jehova? (b) Segun ta Hebreo 6:10-12, anni i resulta na tulu-tuloy nga matalo nga passerbi tam kani Jehova?

⁷ Tapenu makapattalupaddian nga madukko kani Jehova, bibbigan i Biblia kadaggaw anna monag nga pannonopan yatun. Kunnaw i kagian na tadday nga dati nga misionero: “Kanayun lagapa nakuan nga egga i regular nga iskediulnu na paddayaw na familia anna i papprepara para ta study, gitta na kukukuannu ta dati nga asaymentnu.” Tulu-tuloy gapa nga kuan i ngamin nga mawayyanu nga ilayyagayya i mapia nga dumug ta bagu nga kongregasionnu. Keraddamman ni Jehova danuri tulu-tuloy nga masserbi tu mapia nisa, maski nu ariadda ngana makua i ngamin nga dati nga makuada.​—Bibbigan i Hebreo 6:10-12.

8. Kunnasi makoffun i 1 Juan 2:15-17 tapenu mapattalupaddian nga simple i pattolenu?

 ⁸ Pattalupaddianan nga simple i pattolay. Ariannu ipamavulun nga “makagurun” i vuru-vurung ira ta sistema ni Satanas ta espiritual nga aktibidadnu. (Mat. 13:22) Ari ginnan i totolay nga ari masserbi kani Jehova onu danuri kokkofun onu kafamilia nga kayàda i manguffun ngem kakkagiadda nga mawag tu mas paga nga mattrabahu kamu tapenu makkasta i pattolenu. (Bibbigan i 1 Juan 2:15-17.) Mattalo kani Jehova, nga nangipromesa nga iyawana i ngamin nga pakawagattam ta espiritual, emosional, anna material “ta tiempo na pagawag tam.”​—Heb. 4:16; 13:5, 6.

9. Segun ta Proverbio 22:3, 7, ngatta mawag tu ibita tam i maggatu nu ari kawagan, anna anni i makoffun nittam tapenu makapaddesision tu masirib?

⁹ Ibita i maggatu nu ari kawagan. (Bibbigan i Proverbio 22:3, 7.) Posible nga magastus i magali, anna mabi laman nga mataga ta silu na paggatu. Ibita nga maggatu ta ganna-gannug nga ari mabba kawagan. Talaga mariga nga maddesision nu piga i mawag nga gatukan mas ngana nu egga ittam ta kavvuru-vurung nga situasion, angngariganna, nu egga i tangngawattam nga mataki nga kafamilia. Tatun ira nga situasion, daddamman nga makoffun nittam i “pakimallo” tapenu makapaddesision ittam tu masirib. Tabbagan ni Jehova i pakimallo tam ira gukaban na pangiyawa nittam tu imammo nga “manangngal ta nono anna giffutuan” tapenu makkalma ittam nige nga maddesision.​—Fil. 4:6, 7; 1 Ped. 5:7.

10. Kunnasi tam makabuu tu bagu ira nga pakkorofun?

¹⁰ Pattalupaddianan i makasta ira nga relasion. Istoriannu ta mapia nga kokkofun i mataga-tageno anna i ekspiriensanu ira, nerulay turi ira ta nakaekspiriensa gapa ta pagayayya anna problema ira nga inarubannu. Nu kuannu yaw, mas makkasta i panagenonu. (Ecl. 4:9, 10) Mattalupaddian lagapa nga kokkofunnu danuri kofunnu ta dati nga asaymentnu. Sangawe ta bagu nga asaymentnu, mawag tu makikkofun kamu mangana. Daddamman nga tapenu mapeggan tu kofun, mawag tu mabbalikka nga minakkikofun. Kunnasi kamu makabuu tu bagu ira nga pakkorofun? Iyistoria ta tanakuan i positibo ira nga ekspiriensanu ta passerbi kani Jehova, tapenu matagenoda i ayayyanu. Maski nu egga karuan nga ari makalippawa nu ngatta kuruga matalikarag kamu para ta ngamin-tiempo, posible nga mapagaram i tanakuan ta ehemplonu anna kayà dakamu gapa nga kofunan. Ngem immugurannu nga ariannu isentro i paggiristoria ta bagginu laman, anna ariannu maffokus ta negatibo ira nga panageno.

11. Kunnasi nga mattalupaddian nga magayayya i pagatawanu?

¹¹ Nu mawag nga panawannu i asaymentnu megafu ta mataki i atawam, ariammu yayya nga paliwatan. Nu sikaw gapa i mataki, ariammu  nakuan makonsensia, anna ariammu nonopan nga nadismayam i atawam. Daddamman nga “tattadday” kamu na atawam, anna nipromesanu kani Jehova nga ayatannu i kataggi-tadday maski anni i situasion. (Mat. 19:5, 6) Nu pinanawannu i tadday nga asayment megafu ta ari naplano nga pavvussi, siguraduan nga ikagi ta ananu nga mas nabalor yayya nikamu anne ta dati nga asaymentnu. Kanayun nga ikagi ta ananu nga imammatannu yayya bilang “bendision” nga naggafu ta Dios. (Sal. 127:3-5) Iyistoria gapa nisa i makasta ira nga ekspiriensanu ta asaymentnu. Makoffun yatun ta ananu tapenu mapaguyu gapa yayya nga usan i inangona tapenu masserbi kani Jehova tu magayayya.

12. (a) Kunnasi tam moffunan danuri egga ta ngamin-tiempo nga makapattulu-tuloy ta bagu nga asaymentda? (b) Kunnasi tam ira moffunan nga mas mabi nga makibagay ta panguli na asaymentda?

¹² Makomendan i aru nga kongregasion anna wawwaragi nga kukukuadda i adde na mawayyada tapenu uffunan nga makapattulu-tuloy ta asaymentda danuri egga ta ngamin-tiempo. Makuada yatun gukaban na pamagaram nira nga mattulu-tuloy ta trabahuda, pangiyawa nira tu finansial onu material nga suporta, onu panguffun nira nga tangngawan i kafamiliada nga nabattang ta baleda. (Gal. 6:2) Nu neyasayn ta kongregasionnu danuri dati nga masserbi ta ngamin-tiempo, ariannu imammatan nga nare-asayn ira megafu ta egga i nakkamaliadda onu nadisiplina ira. * Imbes tu kunna, uffunan ira tapenu mas mabi ira nga makibagay ta panguloli. Meddu nga alawatan ira anna komendan ira gafu ta nakuada, maski nu limitadu ngana i makuada megafu ta makafi nga gawa-gawayyan. Ammammuannu ira.  Makagigiammu ka ta ngamin nga pakannammuda, passanay, anna ekspiriensada.

13. Anni i meyuffuttam turi ira ta nakalawa tu bagu nga asayment?

¹³ Baka ta gafu awayyana nga danuri nakalawa tu bagu nga asayment ay mawagda i magaleg tu paddianan, transportasion, trabahu, anna tanakuan paga nga kawagadda. Awayyana nga mawagda i informasion ira meyannung ta gannug ira gitta na pappagan tu danum anna kuryente. Ngem i pinaka-kawagadda ay i pangalippawa tam ta sirkumstansiada ira. Posible nga egga i taka-taki nga attattammadda onu na kafamiliada. Onu maddaddam ira ta patay na iddeddukadda. * Maski paga ariadda kagian, baka marraddam ira megafu ta kanappadda i kokkofudda ta dati nga asaymentda. Mawag i tiempo tapenu marubang danatun nga panageno, nga nu mittan ay manguloli.

14. Kunnasi inuffunan na wawwaragi i tadday nga sister tapenu makibagay ta bagu nga asaymentna?

¹⁴ Nu mallayyagayya kavulu ira anna pagaramman ira gukaban na makasta nga ehemplonu, moffunannu ira nga makibagay ta situasiodda. “Ta nappasa nga asayment ku, kadaggaw ngà mangikondukta tu Bible study,” kunna sister nga piga dagun nga nasserbi ta tanakuan nga nasion. “Taw ta bagu nga asayment ku, marigatan ngà maski mangibibbig laman tu teksto onu mangipagiraw tu video ta ministerio. Ivulu-vulunà na wawwaragi ta bagu nga kongregasiokku ta passinoli anna ta Bible study-da ira. Megafu ta masingi-singakku i talikarag anna gutu na wawwaragi ta pangikondukta tu progresibo ira nga paggigiammu tu Biblia, mas nabbalin tu positibo i pagimamma ku. Nagigiammù nu kunnasi i mangigafu tu pakiyuvovug ta bagu nga teritorio. Nakoffun ngamin danatun tapenu makapagayayya ngà uli.”

15. Anni ira i puede nga makasta nga resulta na bagu nga asayment mu?

¹⁵ Puede nga egga ira i makasta nga resulta na bagu nga asayment mu. Ariammu imammatan nga ari tu makasta i nakuam ta nappasa nga asayment mu onu mas baddi ngana  sangawe i balor mu. Nonopan nu kunnasi naka nga uuffunan ni Jehova sangawe ta aru nga gannug, anna ari magimmang ta pallayyagayya. Parigan danuri matalo nga Cristiano ta ollu-siglo. Maski sitaw i diadda, ‘minay ira ta madduma-ruma nga lugar nga nangilayya-gayya ta uvovug.’ (King. 8:1, 4) Nu tulu-tuloy ka ta pallayyagayya, marresulta yatun tu makasta. Angngariganna, danuri papayunir nga napapanaw ta tadday nga nasion ay nagali ta kabiko nga nasion nu sitaw dakal i pakawagan ta lengguaheda. Ta unag na piga vulan, aru nga grupo i alistu nga nabuu.

16. Kunnasi ka makapagayayya ta bagu nga asayment mu?

¹⁶ “I pagayayya kani Jehova i sikannu.” (Neh. 8:10, ftn.) I pagayayya tam nakuan ay maggafu ta relasiottam kani Jehova, ari tu ta asayment tam, maski paga kakayà tam yatun. Nu kayà tam gafu nga makapagayayya, mawag tu maddukko ittam kani Jehova anna kanayun nga mattalo ta sirib, giya, anna suportana. Daddamman nga nakayatammu i dati nga asayment mu megafu ta kingnguam i adde na mawayyam tapenu uffunan i totolay tari. Kuammu gafu i adde na mawayyam ta bagu nga asayment mu anna innan nu kunnasi naka uffunan ni Jehova nga ayatan gapa yatun.​—Ecl. 7:10.

17. Anni nakuan i daddammattam meyannung ta maddaggun nga asayment tam?

¹⁷ Daddammattam nga i serbisiu tam kani Jehova ay mannanayun, ngem i maddaggun nga asayment tam ay temporario. Ta napabagu nga mundo, awayyana nga manguli i asayment tam. Kurugan ni Aleksey nga nakagi ta gafu nga iprepara yayya na maddaggun nga situasionna para tatun. “Kumbinsidu ngà nga kurug si Jehova anna i napabagu nga mundo, ngem gittana mediu arayyu paga,” kunni Aleksey. “Sangawe, gittana egga ta arubakku laman si Jehova anna i tumunug ngana nga pagimmangakku ta pabbiahè ay i napabagu nga mundo.” (King. 2:25) Maski anni paga i asayment tam, kanayun nakuan nga makipallakag ittam kani Jehova. Arianna ittam vuluvuga nga panawan, nu ari, uffunanna ittam nga malegan i pagayayya ta pangngua ta adde ta mawayya tam ta passerbi nisa​—maski sitaw paga yatun.​—Isa. 41:13.