DISOLO YA KULONGUKA 34
Mutindu ya Kuyikama ti Bansoba ya Kisalu
“Nzambi me konda ve lunungu sambu yandi vila kisalu na beno mpi zola yina beno monisaka sambu na zina na yandi.”—BAEB. 6:10.
NKUNGA 38 Yandi Ta Pesa Nge Ngolo
MAMBU YINA DISOLO YAI KE TUBILA *
1-3. Inki kele mwa bikuma yina lenda sala nde kisalu ya bansadi ya ntangu yonso kusoba?
ROBERT ti Mary Jo ke tuba nde: “Na nima ya kulutisa bamvula 21 na kisalu ya kimisionere, bibuti na mono mpi ya nkento na mono belaka ngolo. Yo lombaka nde beto kwenda kusadisa bo. Ata mpidina, yo vandaka mpasi na kuyambula kisalu yina beto vandaka kuzola mingi.”
2 William ti Terrie ke tuba nde: “Ntangu beto zabaka nde beto ta vutukila diaka ve kisalu na beto sambu beto belaka, beto dilaka. Mpusa na beto ya kusadila Yehowa na insi ya nkaka lunganaka diaka ve.”
3 Aleksey ke tuba nde: “Beto zabaka nde bambeni ta kanga biro ya filiale na beto. Kansi, beto waka mpasi mingi ntangu yo salamaka mpi yo lombaka nde beto basika na Betele.”
4. Inki bangiufula beto ta tadila na disolo yai?
4 Diaka, bo me sobaka kisalu ya bampangi yina me salaka bamvula mingi na Betele mpi na kisalu ya nkaka ya ntangu yonso. * Yo lenda pesa bampangi yai ya kwikama mpasi na kuyambula kisalu yina bo vandaka kuzola mingi. Inki lenda sadisa bo na kuyikama ti nsoba yai? Inki mutindu nge lenda sadisa bo? Bamvutu na bangiufula yai ta sadisa beto na kuyikama ti bansoba yina lenda salama na luzingu.
MUTINDU YA KUYIKAMA TI NSOBA
Sambu na nki bansadi ya ntangu yonso ke kutanaka ti bampasi kana kisalu me suka? (Tala paragrafe 5) *
5. Nsoba ya kisalu ke nataka nki bampasi?
5 Yo vanda beto ke salaka kisalu ya ntangu yonso na teritware to na Betele, beto ke zolaka mingi bantu mpi kisika yina beto ke salaka. Kana yo ke lomba nde beto katuka, beto ke waka mpasi mingi. Beto ke yambulaka bantu yina beto vandaka kuzola mingi, ke kudiyangisaka sambu na bo, mingi-mingi kana beto ke katuka sambu na mbangika. (Mat. 10:23; 2 Bak. 11:28, 29) Kusoba kisalu to kuyambula yo ke pesaka mpasi mingi sambu beto ta soba mutindu ya kuzinga. Robert ti Mary Jo ke tuba diaka nde: “Beto ke yikamaka diaka ve ti luzingu ya insi na beto mpi kusamuna na ndinga na beto. Beto me kumaka bonso banzenza na insi na beto.” Bampangi yina kisalu me suka lenda kutana ti mpasi ya mbongo. Bo ke kudimonaka mfunu ve, ke kudiwaka kukonda lutaninu mpi ke lembaka nitu. Inki lenda sadisa bo?
6. Inki mutindu beto lenda kwenda pene-pene na Yehowa?
6 Kwenda pene-pene na Yehowa. (Yak. 4:8) Inki mutindu beto lenda sala yo? Kana beto ke tudila Yehowa ntima sambu yandi ke “waka kisambu.” (Nk. 65:2) Nkunga 62:8 ke tuba nde: “Beno kangula bantima na beno na ntwala na yandi.” Sambu Yehowa ke salaka “mingi kibeni kuluta mambu yonso yina beto ke lombaka to ke yindulaka.” (Baef. 3:20) Yandi ke pesaka beto mambu mingi kuluta yina beto ke lombaka sambu beto nunga bampasi mpi yandi lenda sala mingi kibeni kuluta yina beto yindulaka.
7. (a) Inki ta sadisa beto na kubikala pene-pene na Yehowa? (b) Na kutadila Baebreo 6:10-12, nki mambote beto ta baka kana beto ke landa kusadila Yehowa na kwikama yonso?
7 Sambu na kubikala pene-pene na Yehowa, beto fwete tanga Biblia konso kilumbu mpi kuyindula mingi mambu ya beto ke tanga. Mpangi mosi yina vandaka ntete misionere ke tuba nde: “Landa manaka na nge ya lusambu ya dibuta mpi yidika balukutakanu kaka mutindu nge vandaka kusala yo ntete.” Diaka, samuna mbala na mbala ti dibundu na nge ya mpa. Yehowa ke vilaka ve bansadi na yandi ya kwikama, ata bo ke sala diaka ve mutindu bo vandaka kusala ntete.—Tanga Baebreo 6:10-12.
Beto fwete kumisa kinduku na beto ti Yehowa ngolo mpi kutudila yandi ntima (Tala baparagrafe 6-7) *
8. Inki mutindu bangogo yina kele na 1 Yoane 2:15-17 ta sadisa nge na kuvanda ti luzingu ya kukonda mindondo?
8 Vanda ti luzingu ya kukonda mindondo. Kubika ve nde basusi ya luzingu ‘kukanga’ nge nzila na mambu ya kimpeve. (Mat. 13:22) Kulanda ve bangindu ya nsi-ntoto, ya banduku to ya bantu ya dibuta yina ke yindulaka nde kuvanda ti mbongo mingi ke nataka kiese. (Tanga 1 Yoane 2:15-17.) Tudila Yehowa ntima sambu yandi me silaka na kulungisa bampusa na beto ya kimpeve mpi ya kinsuni “na ntangu ya mbote.”—Baeb. 4:16; 13:5, 6.
9. Na kutadila Bingana 22:3, 7, sambu na nki beto fwete baka-baka ve bamfuka mpi nki lenda sadisa beto na kubaka balukanu ya mbote?
9 Kubaka-baka ve bamfuka. (Tanga Bingana 22:3, 7.) Muntu yina ke kwendaka kisika ya nkaka ke basisaka mbongo mingi. Yo yina, yandi lenda baka bamfuka. Sambu na kubaka ve bamfuka mingi, sumba kaka bima yina kele mfunu. Kana diambu mosi ke yangisa nge, mu mbandu kusansa mbefo, yo lenda vanda mpasi na kuzaba mbongo ikwa nge ta defa. Na diambu yai, kuvila ve nde ‘kisambu mpi kubondila’ lenda sadisa nge na kubaka balukanu ya mbote. Sambu na kupesa mvutu na bisambu na nge, Yehowa lenda pesa nge ngemba yina ta ‘tanina ntima na nge mpi mabanza na nge’ mpi lenda sadisa nge na kubaka balukanu ya mbote.—Bafil. 4:6, 7; 1 Pie. 5:7.
10. Inki mutindu beto lenda zwa banduku ya mpa?
10 Pona banduku ya mbote. Tela banduku na nge mutindu nge ke kudiwa mpi mambu ya ke yangisa nge, mingi-mingi bayina me kutanaka ti mambu yina nge ke kutana ti yo. Kusala mutindu yina ta sadisa nge na kudiwa mbote. (Lon. 4:9, 10) Kufwa ve kinduku ti banduku yina nge vandaka ti bo ntete. Sosa banduku ya nkaka na kisalu na nge ya mpa. Kuvila ve nde sambu kuzwa banduku, nge fwete vanda mpi nduku ya mbote. Inki mutindu nge lenda zwa banduku ya mpa? Tela bo mutindu Yehowa me sadisaka nge na kisalu ya ntangu yonso mpi bika bo bakisa nde nge ke sepelaka mingi ti kisalu ya Yehowa. Ata bampangi ya nkaka na dibundu ke bakisa ve kiese yina nge kele na yo sambu na kisalu ya ntangu yonso, bampangi ya nkaka ta mona mbandu na nge ya mbote mpi ta kuma banduku na nge. Kubenda ve dikebi na nge mosi to na mambu ya mbote yina nge me salaka na kisalu ya Yehowa mpi kutubila-tubila ve mambu yina ta tunga ve bankaka.
11. Inki lenda sadisa beno na kulanda kuvanda na kiese na makwela?
11 Kana kisalu na nge me suka sambu nkwelani ke bela, kupesa yandi ve foti. To kana nge mosi ke bela kudipesa ve foti mpi kuyindula ve nde nge me kota nkwelani na nge nsoki. Kuvila ve nde beno kele “nsuni mosi” mpi beno silaka Yehowa nde konso nkwelani ta kudibanza sambu na nkwelani na yandi ata na ntangu ya mpasi. (Mat. 19:5, 6) Kana kisalu me suka sambu nkento me baka divumu ya kukonda kukana, monisa mwana na beno nde yandi kele mfunu mingi kuluta kisalu na beno ya ntangu yonso. Ndimisa yandi nde beno ke bakaka yandi bonso “matabisi” ya me katuka na Nzambi. (Nk. 127:3-5) Tela yandi diaka mambote yina beno bakaka na kisalu ya ntangu yonso. Mpidina, yo lenda pusa yandi na kusadila Yehowa mutindu beno salaka.
LUSADISU YINA BAMPANGI LENDA PESA
12. (a) Inki mutindu beto lenda sadisa bansadi ya ntangu yonso na kulanda kusala kisalu na bo? (b) Inki mutindu beto lenda sadisa bo na kuyikama ti kisalu na bo ya mpa?
12 Beto ke sikisa mabundu ti bampangi yina ke salaka bikesa sambu na kusadisa bansadi ya ntangu yonso na kubikala na kisalu na bo. Bampangi ke salaka yo ntangu bo ke siamisaka bansadi ya ntangu yonso na kulanda kusala kisalu na bo, ke kabilaka bo mbongo to bima ya nkaka ya kinsuni mpi ke sadisaka bantu ya mabuta na bo. (Bag. 6:2) Kana bansadi ya ntangu yonso me kwisa na dibundu na beno, kumona ve nde bo me tinda bo sambu bo me sala diambu mosi ya mbi to bo me pesa bo ndola. * Sadisa bo na kuyikama ti kisalu yina ya mpa. Yamba bo na kiese, sikisa bo sambu na kisalu ya bo me salaka ata bo ke kuka diaka ve kusala mingi sambu sante na bo kele mbote ve. Sosa kuzaba bo mbote, baka mambote na nzayilu na bo, na formasio ya bo me bakaka mpi na mambu ya bo me zaba.
13. Inki lusadisu beto lenda pesa bampangi yina kisalu na bo me soba?
13 Na luyantiku, bampangi yina kisalu me soba ke vandaka na mfunu ya nzo, ya transpore, ya kisalu to mambu ya nkaka ya mfunu. Bo lenda vanda mpi ti mfunu ya kuzaba bansangu ya nkaka mu mbandu, mutindu ya kufuta mpaku mpi kisika ya mbote ya kubaka lusansu. Kuluta diaka, bo ke zolaka nde bantu kuwila bo mawa mpi kuditula na kisika na bo. Ziku bo lenda kudiyangisa sambu na kimbefo na bo mosi, ya bantu ya dibuta na bo to lufwa ya muntu mosi yina bo vandaka kuzola mingi. * Mbala ya nkaka bo lenda yindula banduku ya dibundu ya ntama. Yo ke lombaka ntangu sambu bo vila mambu yai ya ke yangisa bo.
14. Inki mutindu bampangi ya dibundu sadisaka mpangi-nkento mosi na kuyikama ti teritware ya mpa?
14 Lusadisu mpi mbandu na nge ya mbote lenda sadisa bo na kuyikama. Mpangi-nkento mosi yina salaka kisalu ya ntangu yonso bamvula mingi na insi ya nzenza ke tuba nde: “Na teritware na mono ya ntete, mono vandaka kulonguka Biblia ti bantu konso kilumbu, na teritware ya mpa, yo vandaka mpasi na kutangila muntu Biblia to na kusonga video na kisalu ya kusamuna. Kansi bampangi ya dibundu yina ya mpa vandaka kunata mono na kuvutukila balongoki na bo mpi kulonguka ti bo Biblia. Kikesa ya bampangi mpi mutindu balongoki na bo ya Biblia vandaka kuyela sadisaka mono na kutadila teritware yina na mutindu ya mbote. Mono longukaka mutindu ya kuyantika masolo ti bantu na kisalu ya kusamuna. Mambu yai yonso sadisa mono na kuvutukila kiese na mono.”
LANDA KUSALA BIKESA
Sadila bametode ya kuswaswana sambu na kusamuna mingi na kisika yina nge ke zinga (Tala baparagrafe 15-16) *
15. Inki mutindu nge lenda nunga na kisalu na nge ya mpa?
15 Nge lenda nunga na kisalu na nge ya mpa. Kuyindula ve nde nge ta yikama ve ti nsoba yina mpi kudimona ve mpamba. Sosa kubakisa mutindu Yehowa ke sadisa nge konso kilumbu mpi landa kusamuna. Landa mbandu ya Bakristu ya mvu-nkama ya ntete. Bo “vandaka kuzabisa nsangu ya mbote ya ndinga na bisika yonso yina bo vandaka kukwenda.” (Bis. 8:1, 4) Bikesa ya nge ke sala na kulanda kusamuna lenda buta mbuma ya mbote. Mu mbandu, bo kulaka bapasudi-nzila na insi mosi mpi bo kwendaka na insi ya pene-pene kisika mpusa ya bansamuni vandaka mingi na ndinga na bo. Na nima ya bangonda, bo kangulaka bimvuka yina yelaka nswalu.
16. Inki mutindu nge lenda vanda na kiese na kisalu na nge ya mpa?
16 Biblia ke tuba nde: “Kiese ya Yehowa kele kikesa na beno.” (Neh. 8:10, noti na nsi ya lutiti) Kiese na beto fwete katuka ntete-ntete na kinduku na beto ti Yehowa kansi ve na mikumba, ata beto ke zolaka yo mingi. Yo yina, landa kutambula ti Yehowa, tudila yandi ntima sambu na kuzwa mayele, lutwadisu mpi lusadisu na yandi. Kuvila ve nde zola na nge sambu na bantu pusaka nge na kuzola kisalu na nge. Zola kisalu na nge ya mpa mpi tula dikebi mutindu Yehowa ke sadisa nge na kuzola yo.—Lon. 7:10.
17. Inki beto fwete vila ve na yina me tala mikumba na beto ya bubu?
17 Beto fwete vila ve nde beto ta sadila Yehowa mvula na mvula, kansi mikumba kele sambu na ntangu fioti. Na nsi-ntoto ya mpa, mikumba na beto yonso lenda soba. Aleksey, yina beto tubilaka na luyantiku ke ndimaka nde mambu yina yandi ke kutana ti yo ke sadisaka yandi na kuyilama sambu na bilumbu ke kwisa. Yandi ke tuba nde: “Ntangu yonso mono ke kwikilaka nde Yehowa kele mpi nsi-ntoto ya mpa ta vanda, kansi bantangu ya nkaka yo ke monanaka mwa ntama. Ntangu yai mono ke monaka nde Yehowa kele kibeni pene-pene mpi nsi-ntoto ya mpa kele mbasi.” (Bis. 2:25) Yo vanda konso mukumba yina beto kele na yo, bika beto landa kutambula ti Yehowa. Yandi ta yambula beto ve ata fioti, nkutu yandi ta sadisa beto na kuvanda na kiese na kisalu na yandi na konso kisika yina beto kele.—Yez. 41:13.
NKUNGA 90 Beto Pesana Kikesa
^ par. 5 Mambu ya nkaka lenda sala nde bansadi ya ntangu yonso kuyambula kisalu na bo to bo lenda tinda bo kisika ya nkaka. Disolo yai ta tubila bampasi yina bo ke kutanaka ti yo mpi mambu yina lenda sadisa bo na kuyikama ti bansoba. Beto ta tubila mpi mutindu bampangi lenda siamisa mpi kusadisa bo mpi minsiku yina lenda sadisa beto yonso na kuyikama ti bansoba.
^ par. 4 Kana bampangi yina kele ti mikumba me kuma bambuta, bo fwete pesa mikumba yango na batoko. Tala disolo na Nzozulu ya Nkengi ya Septembri 2018 ya ke tuba nde: “Bampangi Yina Me Kuma Bambuta—Yehowa Ke Sepelaka ti Kwikama na Beno,” mpi Nzozulu ya Nkengi ya Oktobri 2018 yina ke tuba nde: “Tanina Ngemba ya Mabanza Ata Mambu ya Luzingu Me Soba.”
^ par. 12 Bankuluntu ya dibundu yina bo me katuka, ta sonika mukanda nswalu sambu na kusonga dibundu yina ya mpa nde mpangi yina kele mupasudi-nzila, nkuluntu to nsadi ya kisalu.
^ par. 13 Tala masolo “Lusadisu Sambu na Bantu Yina Me Bwila Mpasi ya Lufwa” na Telama! No. 3 ya 2018.
^ par. 57 NTENDULA YA BIFWANISU: Kisalu ya kimisionere ya mpangi-bakala mosi ti nkento na yandi na insi ya nzenza me suka, bo ke dila mutindu bo ke kabwana ti bampangi ya dibundu.
^ par. 59 NTENDULA YA BIFWANISU: Ntangu bo me vutuka na insi na bo, bo ke landa kusamba Yehowa na kusadisa bo na kununga bampasi.
^ par. 61 NTENDULA YA BIFWANISU: Yehowa me sadisa bo diaka na kuvutukila kisalu ya ntangu yonso. Bo ke sadila ndinga yina bo longukaka na insi ya nzenza sambu na kulonga banzenza yina kele na teritware ya dibundu na bo ya mpa.
