1-3. Ibhidi yebhi i tena ku di bhana na-yu jiphange javulu jala mu sidivisu ya thembu yoso?

ROBERT ni Mary Jo, ambe: “Kyoso ki twa tenesa 21 a mivu mu sidivisu ya akunji a jixi jengi, o jitata jetu joso a kwata uhaxi. Twa sangulukile mu kwa langa. Maji kuxisa o kididi ni kikalakalu kyetu ki twa zolele kwa tu luwalesa kyavulu.”

² William ni Terrie ambe: “Kyoso ki twa mono kwila ki tweji vutuka dingi ku kikalakalu kyetu mukonda dya uhaxi, twa didi. O nzoji yetu ya kusidivila Jihova mu jixi ja makanga ya fwile.”

³ Aleksey wambe: “Ngejidile kwila o jinguma jetu a mesenene kujika o Betele mu ngexile mu sidivila. Maji etwenyoso twa luwalele kyavulu kyoso kya i jika, etu twayi kubhata.”

4. Ibhwidisu yebhi ya-nda tambwijila o milongi yiyi?

⁴ Xinganeka we ku jiphange javulu ala mu sidivisu ya thembu yoso, kala akwa Betele a tambula kikalakalu kya ubhe. * Ku jiphange ja fiyele jiji, avulu kyene mu a bhonza kuxisa o kikalakalu kya zolele kyavulu. Ihi i tena ku a kwatekesa ku di bhana ni kibhidi kiki? Kyebhi ki u tena ku a kwatekesa? O itambwijilu ya ibhwidisu yiyi, i tena ku tu kwatekesa kyoso ki tu di bhana ni ibhidi.

5. Kutambula ikalakalu ya ubhe kufunyisa kyebhi o mwenyu wetu?

⁵ Kabasa kididi ku tu sidivila, kikale ku Betele ki kale mu ikalakalu yengi ya thembu yoso, tu tena kuzola kyavulu o athu  katé mwene o kididi. Se kumoneka kima ki tu bhangesa kuxisa o kikalakalu kyetu, muxima u tu kata. Tu kala ni ngunzu ya jiphange, tu tandanganya na-u, benge-benge se twa mu tunda mukonda dya izukutisu ya jinguma jetu. (Mat. 10:23; 2 Kol. 11:28, 29) Kubhonza we kuya kididi kyengi mukonda nange kubhinga kwijidila ijila yengi. Tu tena kudivwa kiki, né mwene se tu vutuka mu kididi mwa tu vwalela. Robert ni Mary Jo ambe: “Etu ki twejidile dingi o ijila ya ixi yetu, ni kuboka mu dimi dyetu dya uvwalukilu kwa tu bhonzele kyá. Twa divwile kala twexile jinzwangiza mu ixi yetu.” Amoxi a tambula ikalakalu ya ubhe, a tena ku di bhana ni maka a lungu ni kitadi. A tena kukala ni héle, kuthandanganya ni kuluwala. Ihi i tena kukwatekesa?

6. Kyebhi ki tu tena kuzukama kwa Jihova?

⁶ Zukama kwa Jihova. (Tiya. 4:8) Kyebhi ki tu tena kubhanga kiki? Mu ku mu dyelela kala, “Mukwa kwívwa o kusamba.” (Jisá. 65:2) O divulu dya Jisálamu 62:8, dyamba: “Lundululenu o mixima yenu kwa mwene.” Jihova “wa soko-bhu kubhanga yoso i twa tena o kubhinga, ni yoso i twa tena o kubanza, n’a te-ku dingi.” (Efe. 3:20) Jihova ka tu bhana ngó o ima i tu mu bhinga mu misambu. Mwene u tena kubatula o maka metu mu ukexilu ki tu u xinganeka.

7. (a) Ihi i tena ku tu kwatekesa kuzukama kwa Jihova? (b) Kala ki londekesa Jihebelewu 6:10-12, ihi ya-nda bhita se tu suluka ni kusidivila Jihova ni ufiyele woso?

⁷ Phala kuzukama kwa Jihova, kubhinga kutanga o Mikanda Ikôla izuwa yoso ni kuxinganeka mu milongi i u tanga. Sayi phange wexile mukunji a jixi jengi wambe: “Suluka ni kubhanga o ubhezelu ku mwiji, pelepalala o yônge mu semana joso kala ki wexile mu bhanga mu kikalakalu kyé kyokulu.” Suluka we ni kubhanga yoso i u tena mu kikalakalu kya kuboka, kumoxi ni kilunga kyé kya ubhe. Jihova u lembalala yó a suluka ni ku mu sidivila ni ufiyele, né mwene se ka tena dingi kubhanga o ima yexile mu bhanga m’ukulu.—Tanga Jihebelewu 6:10-12.

8. Kyebhi o mukanda wa 1 Nzwá 2:15-17, u tu kwatekesa ku di kwatenena mu ima ya beta kota ku mwenyu?

⁸ Sosolola o ima ku mwenyu wé. Kana kwehela kwila o hele ya mundu wa Satanaji i kubhangesa “kubhaka” mba kufidisa o kikalakalu kyé kwa Jihova. (Mat. 13:22) Kana kubhana matwí ku athu ka mu sidivila Jihova,  makamba, mba jindandu a sota ku kutangela kwila, phala kukala ni mwenyu wambote wa bhingi kunganyala dingi kitadi. (Tanga 1 Nzwá 2:15-17.) Dyelela kwa Jihova wa kanena ku tu bhana yoso i twa bhindamena, “mu kumbi dya kubhondalala” mba mu kithangana kya tokala.”—Jihe. 4:16; 13:5, 6.

9. (a) Kala ki londekesa Jisabhu 22:3, 7, mu ithangana yebhi ku tena kubhonza kulenga o makongo? (b) Ihi i tena ku tu kwatekesa kusola ni unjimu?

⁹ Kana kuta makongo. (Tanga Jisabhu 22:3, 7.) Phala kuya mu kididi kyengi sayi bhabha kubhinga kitadi kyavulu. Mu kiki ki kubhonzo kuta makongo. Phala kute dikongo dya dikota, kana kusumba ima se ku i bhindamena kyavulu. Kyoso ki tu bhondalala mba kutata, kubhonza kusola se kitadi kikuxi ki twa-nda sobha. Benge-benge se twa mu langa ndandu yetu wa kate. Mu ithangana yiyi, lembalala kwila o “kusamba ni kudyonda,” ku tena ku kukwatekesa kusola ni unjimu. Mu kutambwijila o misambu yé Jihova u tena ku kubhana kutululuka “kwa-nda ku mi bateka mixima ni ilunji,” phala u tene kusola kyambote o kima ki wa mesena.—Fil. 4:6, 7; 1 Phe. 5:7.

10. Kyebhi ki tu tena kubhanga makamba ambote?

¹⁰ Bhanga ukamba wambote ni makamba ni jindandu. Kima kyambote kutangela ku makamba o ima ya tu kala ku muxima, kotelele kwa yó a mu di bhana we ni ibhidi ya difu ni yé. Se u bhanga kiki, wa-nda divwa dingi kyambote. (Ndo. 4:9, 10) O makamba u wa bhange mu kikalakalu kyê m’ukulu, a-nda kala hanji makamba-mê. Maji kindala, wa-nda bhinga kubhanga mawukamba a ubhe. Kana kujimba kwila, phala kukala ni makamba, wa bhingi u kala we u dikamba. Ihi i wa tokala kubhanga phala kukala ni makamba a ubhe? Tangela kwa akwenu o mawujitu ni kisangusangu kya kubhana Jihova mu sidivisu yê. Né mwene se o jiphange kya tendela kyambote o kisangusangu kyé kya lungu ni sidivisu ya thembu yoso, sayi yâ a-nda wabhela o phangu yé, a-nda kituka makamba ambote. Maji wa tokala we kudilanga. Kana ku di fumanesa mba kuzangeleka o ikalakalu i wa bhange. Kana we kulunga o muxima mu ima yayibha.

11. Kyebhi ki u tena kusuluka ni kusangulukisa o ukaza wê?

¹¹ Sayi makaza ene mu xisa o sidivisu ya thembu yoso mukonda o mukwá wa kate. Se kiki ki bhita neye, kana kutatela kaza dyê. Se éye wa kate, kana we ku ditatela, mu kuxinganeka kwila wa luwalesa kaza dyê. Lembalala kwila, enu mu “xitu imoxi.” Kyoso ki mwa kazala, mwa kanena kwa Jihova kwila, mwa-nda dilanga, kiza ki kizé. (Mat. 19:5, 6) Sayi makaza ene mu xisa o sidivisu ya thembu yoso  mukonda o muhatu wemita, sumbala kiyadi kyá ka ki mesenene. Se kiki ki bhita neye, wa tokala kutangela kwa mon’ê kwila, eye u mu tala kala “Jihuwilu” mba dibesá dya tundu kwa Nzambi. (Jisá. 127:3-5) U mu tangela we o mabesá u wexile na-wu mu sidivisu yé kwa Jihova. Kubhanga kiki, kwa-nda kwatekesa mon’ê kubhakula o mwenyu wê mu sidivisu ya Jihova, kala ki wa bhange eye.

12. (a) Kyebhi ki tu tena ku kwatekesa o jiphange ala mu sidivisu ya thembu yoso phala kusuluka mu ikalakalu yâ? (b) Kyebhi ki tu tena ku a kwatekesa ku di tunda kyambote mu ikalakalu ya ubhe?

¹² Ki sangulukisa kumona yene mu bhanga o jiphange mu ilunga phala kukwatekesa oso ala mu sidivisu ya thembu yoso, phala kusuluka mu ikalakalu yâ. Ene a bhanga kiki mu ku a swinisa ni ku a bhana kama koso-koso ka bhindamena, mba ku a kwatekesa kulanga o jindandu jâ. (Nga. 6:2) Se mu kilunga kyê mwiza phange wexile mu sidivisu ya thembu yoso, kana kubanza kwila ka ditundu kyambote mu kikalakalu kyê, mba-phe wa bhange kima kyayibha. * Mu veji dya kiki, mu kwatekese ku di tunda kyambote mu ikalakalu ya ubhe. Mu tambulule ni henda yoso, u mu sakidila mu kikalakalu kya bhange m’ukulu, sumbala o uhaxi ki u mwehela dingi kubhanga ima yavulu. Sota ku a ejiya, katula mbote mu kwijiya kwâ, mu jindunge ni mu misoso yâ.

13. Kikwatekesu kyahi ki tu tena kubhana kwa yó a tambula ikalakalu ya ubhe?

¹³ Ku dimatekenu, o jiphange ja tambula o ikalakalu ya ubhe, nange a-nda bhinga kikwatekesu phala kusanga inzo, salu mba  ibhindamu yengi ya kizuwa ni kizuwa. Atena we kubhindamena kwijiya o itendelesu ya ubhe ya lungu ni kufuta o malubhaku. O kya beta-kota, ene a mesena kwila, tu tendela o ibhindamu yâ. Nange sayi ndandu yâ wa kate, mba a luwala mukonda dya kufunda ndandu. * Mba mu kaswekele, ene a mu dila mukonda dya kuxisa o makamba a bhangele mu kikalakalu kyâ kyokulu. Kubhinga kithangana phala ku dibhana ni ibanzelu yoso yiyi.

14. Kyebhi o aboki mu kilunga kya kwatekesa phange ya muhatu ku di tunda kyambote mu ikalakalu ya ubhe?

¹⁴ O kukalakala na-u mu sidivisu ya kuboka ni ku a swinisa bhu kaxi ka phangu yê, kwa-nda ku a kwatekesa ku di tunda kyambote mu ikalakalu ya ubhe. Sayi phange ya muhatu wa kalakala mivu yavulu mu ixi yengi, wambe: “Mu kikalakalu kyami kyokulu, izuwa yoso ngexile mu longa maxibulu. Maji kindala, kya mu ngi bhonza katé mwene kujikula ngó o Bibidya mba kulondekesa vidyu mu ukunji. Maji o aboki mu kilunga mu twala, ene mu ngi bhinga phala ku a xinjikila kukunda ni kulonga o maxibulu-mâ. Kumona o nguzu ni kuswina kwa jiphange jiji mu kulonga maxibulu a kula mu nzumbi, kwa ngi kwatekesa kumona o ima mu ukexilu wambote. Nga dilongo kumateka kuzwela ni athu mu mbambe yiyi ya ubhe. Yoso yiyi, ya ngi kwatekesa kukala dingi ni kisangu-sangu mu ukunji wami.”

15. Kyebhi ki u tena kuditunda kyambote mu ikalakalu yé ya ubhe?

¹⁵ Eye u tena ku di tunda kyambote mu kikalakalu kyé kya ubhe. Kana kuxinganeka kwila wa bhange kima kyayibha mu ikalakalu yé yokulu, mba ki wala dingi ni valolo. Tala kyebhi Jihova kyene mu ku kwatekesa ku mwenyu wé. Kolokota mu kuboka. Kayela o phangu ya Jikidistá mu hama ya dyanga. Kwoso-kwoso kwa mwanganene ene ‘akexile mu boka o njimbu yambote ya mak’â Nzambi’. (Ika. 8:1, 4) O nguzu i u bhanga mu kuboka, ya-nda kubhekela mabesá. Mu kifika,  sayi aboki a thembu yoso a a kayele mu ixi mwexile mu boka. Kyenyiki, a ile mu bokela ixi yengi mwexile we ibhindamu yavulu mu dimi dyâ. Mu kubhita tu mbeji, a jikula ibuka ya ubhe mu dimi dyâ.

16. Kyebhi ki u tena kusanguluka mu ikalakalu ya ubhe?

¹⁶ “O kusanguluka kwa Ngana [Jihova], yene o nguzu yenu.” (Neh. 8:10) O kusanguluka kwetu kwa tokala kwijila mu ukamba ni Jihova, kana mu kikalakalu kyetu, né mwene se twa ki wabhela kyavulu. Kyenyiki-phe, zukama kwa Jihova, mu dyelele ni muxima woso, mu ku mu bhinga o kwijiya, itendelesu ni kikwatekesu. Lembalala kwila, eye weza mu zola o ikalakalu yé yokulu, mukonda wa i bhangele ni muxima woso phala kukwatekesa o athu. Ta muxima we mu kikalakalu ki wala na-kyu kindala kiki. Jihova wa-nda kukwatekesa ku ki zola we.—Ndo. 7:10.

17. Ihi i twa tokala kulembalala ya lungu ni kikalakalu ki twala na-kyu kindala kiki?

¹⁷ Twa tokala kulembalala kwila, o sidivisu yetu kwa Jihova, ki yala ni disukilu. Maji o kikalakalu ki twala na-kyu kindala kiki, kyala ni disukilu. Ku mundu wa ubhe, etwenyoso nange twa-nda tambula ikalakalu ya ubhe. Aleksey, twa mu tumbula ku dimatekenu, u xikina kwila, o ikalakalu ya ubhe yene mu tambula, ya mu mu kwatekesa phala o ima ya-nda moneka ku hádya. Mwene wambe: “Eme ngejiya kwila, Jihova muthu wa kidi, o mundu wa ubhe wa kidi we. Maji mu dyami, yedile kala yexile dikanga hanji. Maji kindala Jihova kala dingi dikanga dyami. O mundu wa ubhe ngi u mona kala mung’we kyá.” (Ika. 2:25) Kyenyiki-phe, kabasa kikalakalu ki twa mu bhanga kindala, etwenyoso twa mesena kuzukama kwa Jihova. Mwene ka-nda twehelela, maji wa-nda tu kwatekesa kukala ni kusanguluka, kabasa kikalakalu ki tu bhanga mu kilunga kyê.—Iza. 41:13.