1-3. Ñanyi bintu bimo byakonsha kulengela baji mu mwingilo wa kimye kyonse kuleka mwingilo ye bengila?

BA ROBERT ne ba Mary Jo baambile’mba: “Byo twaingijile myaka 21 mu mwingilo wa bumishonale, bansemi betu bonse bana bakomene kabiji batendekele kukolwakolwa. Twafuukwilepo kuya na kwibalama. Pano bino, twajinga na bulanda pa kufuma ku mpunzha ko twatemenwe bingi.”

² Ba William ne ba Terrie bashimikizhe’mba: “Byo twayukile’mba na mambo a kukolwa kechi tusakutwajijila kwingila mwingila wa Lesa ye twaingilanga ne, twajijile bingi. Twakebeshanga kwingijila Yehoba mu kyalo kingi, pano bino, kechi twakonsheshe ne.”

³ Ba Aleksey baambile’mba: “Twayukile’mba balwanyi betu basa kushinka ofweshi wa musampi po naingijilanga. Twaumvwine bingi kutama byo bashinkile musampi, kabiji bonse twafuminepo.”

4. Ñanyi mepuzho o tusakukumbula mu uno mutwe?

⁴ Kabiji bavula bengila mwingilo wa kimye kyonse, kubikapotu ne baingijilanga pa Betele, bebapele mingilo ya katataka. * Bano balongo ne banyenga ba kishinka bajinga bingi na bulanda pa kuleka mwingilo ye batemenwe bingi. Ñanyi kintu kyakonsha kwibakwasha kuyuka bya kuba na luno lupimpu? Mwakonsha kwibakwasha byepi? Mikumbu ya ano mepuzho yakonsha kwitukwasha atweba bonse kuyuka bya kuba inge kwaubiwa lupimpu mu mwingilo wa Lesa ye twaingilanga.

5. Twakonsha kumvwa byepi inge kwaubiwa lupimpu ku mwingilo ye twaingilanga mu jibumba ja Lesa?

⁵ Inge twingila mwingilo wa kusapwila nangwa twingijila pa Betele, twakonsha kutemwa bingi bantu ne mpunzha kotwingijila. Onkao mambo, tumvwa bingi bulanda inge twafuma ku mpunzha ko twaingijilanga yeomwingilo. Tuvuluka bingi balongo ne banyenga bo twasha, kikatakata inge twibasha na mambo a lumanamo. (Mat. 10:23; 2 Ko. 11:28, 29) Kabiji javula kikatazha bingi kutendeka kwingila mwingilo wa katataka nangwa kubwela kwetu ko twafumine kala. Ba Robert ne ba Mary Jo baambile’mba: “Twalubilemo kisho kyetu kabiji kitukatezhenga kusapwila mu mulaka wetu. Twamwenengatu nobe kechi ko kwetu ne.” Bamo inge baleka mwingilo ye baingilanga mu jibumba ja Lesa, bwikalo bwibakatazha. Bakonsha kumvwanga kubula kuzhikijilwa, kubula kunema, kabiji bakonsha ne kulefulwa. Ki ka kyakonsha kwibakwasha?

6. Twakonsha kutwajijla byepi kufwenya kwipi ne Yehoba?

⁶ Fwenyai kwipi ne Yehoba. (Yako. 4:8) Twakonsha kuba byepi bino? Ke kupichila mu kuketekela aye ‘umvwa milombelo’ yetu. (Sala. 65:2) Salamo 62:8 waamba’mba: “Mubuulai biji ku michima yenu.” Yehoba wakonsha “kuba bintu byavula kukila ne pa bintu byonse byo tulomba nangwa byo tulanguluka.” (Efi. 3:20) Yehoba kechi upelelatu pa kwitubila bintu byonka byo tulomba ne. Wakonsha ne kwitubila bintu byo twabula kulombapo pa kuba’mba makatazho etu apwe.

7. (a) Ki ka kiketukwasha kutwajijila kufwenya kwipi ne Yehoba? (b) Kwesakana na byaamba Bahebelu 6:10-12, ñanyi kintu kikafumamo inge twatwajijila kwingijila Yehoba mu bukishinka?

⁷ Pa kuba’mba mutwajijile kufwenya kwipi ne Yehoba, mwafwainwa kutanganga Binembelo moba onse ne kulanguluka-langulukapo. Mulongo umo wajinga mishonale waambile’mba: “Twajijilai kwikala na kupopwela kwa kisemi kimye kyonse ne kunengezha kupwila byonkatu byo mwaubanga kimye kyo mwaingijilenga mwingilo wenu.” Kabiji mwafwainwa kutwajijila kusapwila mambo awama pamo na kipwilo kyenu kya katataka. Yehoba uvuluka boba batwajijila na kumwingijila mu bukishinka nangwa kya kuba kechi babena kwingila byonka byo baingilanga kala ne.—Tangai Bahebelu 6:10-12.

8. Byambo biji pa 1 Yoano 2:15-17 byakonsha kwimukwasha byepi kwikala bwikalo bwapeela?

⁸ Ikalainga bwikalo bwapeela. Kange muswishe bya kutabataba bya mu ino ntanda ya kwa Satana kwimulengela kuleka kwingijila Lesa ne. (Mat.  13:22)Mwafwainwa kukana bimubuula bantu babula kwingijila Yehoba, balunda nenu nangwa balongo benu amba mwafwainwa kwikala na mali avula pa kuba’mba bwikalo buwame. (Tangai 1 Yoano 2:15-17.) Ketekelai mwi Yehoba walaya kwitupa bintu byonse “pa kimye kyafwainwa.” Uketukwasha kukosesha lwitabilo lwetu, kubula kwakamwa, ne kwitupa bya mu bwikalo byo tukeba.—Hebe. 4:16; 13:5, 6.

9. Kwesakana na byaamba Byambo bya Maana 22:3, 7, mambo ka o kyanemena kuchinuzhuka kukongola mali, kabiji ki ka kyakonsha kwitukwasha kufuukulapo bulongo?

⁹ Chinuzhukainga nkongole. (Tangai Byambo bya Maana 22:3, 7.) Pakebewa mali avula inge mwavilukila ku mpunzha ikwabo, kabiji kyapeela bingi kwitwezha mu nkongole. Pa kuba’mba mukepesheko makongole, kange mupotenga bintu byo mu bena kubula kukeba ne. Umvwe tubena kupita mu makatazho nabiji kulama mulongo wetu wakolwa, kyakonsha kwitukatazha kuyuka mali o twakonsha kukongola. Inge kyaikala bino, vulukai’mba “lulombelo ne milombelo ya misashijilo” byakonsha kwimukwasha kufuukula bintu bulongo. Yehoba pa kukumbula lulombelo lwenu, ukemupa mutende “ukalama michima ne milanguluko yenu” pa kuba’mba mufuukule bintu saka mwatekanya.—Fili. 4:6, 7; 1 Pe. 5:7.

10. Twakonsha kuba byepi pa kuba’mba twikale na balunda bakwabo?

¹⁰ Ikalai na balunda bawama. Buulaingako balunda nenu byo mubena kwiumvwa ne makatazho o mu bena kupitamo kikatakata boba bapitapo kala mu bintu byo mu bena kupitamo. Inge ke mube bino, kikemukwasha kukasuluka mu milanguluko. (Sapwi. 4:9, 10) Balunda bo mwajinga nabo ko mwaingijilenga mwingilo wa Lesa, bakatwajijila kwikala balunda nenu. Mwafwainwa kulenga balunda bakwabo ku mpunzha ko mwaya. Vulukai’mba pa kuba’mba mwikala na balunda, mwafwainwa kwikala mulunda wawama. Mwakonsha kuba byepi pa kuba’mba mwikale na balunda bakwabo? Bulaingako bakwenu bintu byawama bimubila Yehoba mu mwingilo wanji ne kulengela bakwenu kuyuka’mba mu kwingijila Yehoba muji mapesho. Nangwa kya kuba bamo mu kipwilo kechi bakonsha kuyuka ene mambo o mwatemenwa mwingilo wa kimye kyonse ne, bino bakwabo bakonsha kukeba kuyukilapo byavula kabiji bakekala balunda nenu. Pano bino, mwafwainwa kujimuka pa kuba’mba mubule kulengala bakwenu kutatu muchima pa bintu byo mwauba mu mwingilo wa Yehoba nangwa pa bintu byatama byo mwapitamo.

11. Mwakonsha kuba byepi pa kuba’mba mwikale na lusekelo mu masongola enu?

¹¹ Inge kya kuba mwalekele mwingilo ye mwaingilanga na mambo a kukolwa kwa bena kwenu, kechi mwafwainwa kwibapamo mambo ne. Kabiji inge kya kuba’mba kukolwakolwa ko kwimulengejile kuleka yeo mwingilo, kange mwipengamo mambo ne kulanguluka’mba benakwenu basakumona’mba yenu mwalengela’mba muleke mwingilo wenu ne. Vulukainga’mba mwi “mubiji umo,” kabiji pa juba ja masongola, mwamulayile Yehoba  kuba’mba mukelamanga bulongo nangwatu inge bintu byakatazha mu bwikalo bwenu. (Mat. 19:5, 6) Inge mwalekele mwingilo wenu na mambo a jiimi ja kubula kuketekela, mubuulai mwanenu kuba’mba wanema bingi kukila mwingilo ye mwaingilanga. Kimye kyonse, mubuulainga mwanenu kuba’mba mumumona kwikala “mfweto” yafuma kwi Lesa. (Sala. 127:3-5) Kabiji mubuulainga bintu byawama byo mwamwenejilemo kimye kyo mwaingijilenga mwingilo wenu. Inge kemube bino, mwanenu ukatundaikwa kwingila mwingilo wa Yehoba ukamuletela lusekelo mu bwikalo bwanji.

12. (a) Twakonsha kukwasha byepi baji mu mwingilo wa kimye kyonse kutwajijila mu mwingilo wabo? (b) Twakonsha kulengela byepi boba baleka mwingilo wabo kwingila na lusekelo?

¹² Bipwilo byavula, kubikapotu ne balongo ne banyenga bakwasha baji mu mwingilo wa kimye kyonse. Boba bino kupichila mu kwibatundaika kutwajijla kwingila mwingilo wabo, kwibapa mali, bikebewa mu bwikalo nangwa kukwasha bisemi byabo byo basha. (Nga. 6:2) Umvwe baji mu mwingilo wa kimye kyonse bebatuma mu kipwilo kyenu na mambo a kuleka mwingilo wabo, kechi mwafwainwa kulanguluka’mba bakankalwa kwingila nangwa’mba balengele mambo ne. * Bino mwafwainwa kwibakwasha pa kuba’mba bekale na lusekelo. Batambwilai na lusekelo ne kwibasanchila pa mwingilo ye baingilanga nangwa kya kuba kukolwa kwibalengela kubula kwingila byonka byo baingilanga. Bayukai bulongo ne kufunjilako ku maana ebafunjisha Lesa ne ku bintu byawama byo bamwenejilemo mu mwingilo wa Lesa.

13. Ñanyi bukwasho bo twakonsha kukwasha bo ba baleka mwingilo wabo?

¹³ Balongo ne banyenga baleka mwingilo wabo bakonsha kukeba kwibakwashako  kutaana mazubo mwa kwikala, ñendelo, kutaana nkito ne bintutu bikwabo bya mu bwikalo. Kabiji bakebewa kwibabuulako bintu bya pa juba pa juba, nabiji kupana misonko ne kunembesha ku kampanyi kapana mali inge bintu byaonaika. Kintu kyo bakeba ke kya kuba’mba muyuke bintu byo babena kupitamo. Kampe abo bene babena kukolwa, nangwa mu kisemi kyabo muji ubena kukolwa. Kabiji kampe baji na bulanda bwa kufwisha mulongo wabo. * Kabiji bakonsha kwikala na binyenge bya kuvuluka balongo ne banyenga bo basha nangwa kya kuba kechi bambapo ne.

14. Basapwishi mu kyalo mwayile nyenga bamukwashishe byepi kwingila na lusekelo mwingilo wa Lesa?

¹⁴ Inge ke musapwile nabo ne kwibatundaika na byubilo benu byawama, mwakonsha kwibakwasha kwikala bulongo. Nyenga waingila mwingilo wa Lesa pa myaka yavula waambile’mba: “Ku kyalo kingi ko naingijilanga mwingilo wa Lesa, nafunjishanga bantu Baibolo pa juba pa juba. Bino ku kyalo ko nayile, kyakatazhanga ne kutanga Baibolo nangwa kutambisha vidyo mu mwingilo. Pano bino, basapwishi ba ku kino kyalo bansendangako pa kubwela ku bantu bo besambile nabo ne ku bo bafunjishanga Baibolo. Pa kumona mukoyo ne kuchinchika kwa bano balongo ne banyenga byo bafunjishanga bantu Baibolo kwandengejile kutemwa nyaunda yetu. Nafunjile bya kutendeka mwisambo na bantu mu nyaunda ya katataka. Bino byonse byankwashishe kwikala na lusekelo jikwabo mu mwingilo wa Lesa.”

15. Mwakonsha kwingila byepi na lusekelo mu mwingilo wenu wa katataka?

¹⁵ Mwakonsha kwingilanga bulongo mwingilo wenu wa katataka. Kange mulangulukenga’mba kuleka kwingila mwingilo wenu kumwesha’mba mwakankalwa kwingila nangwa’mba kechi mwanema ne. Langulukainga pa mashinda avula Yehoba mo abena kwimukwashisha luno ne kutwajijila na kusapwila. Londelainga byaingilanga bena Kilishitu batanshi ba kishinka. Konse ko baikalanga, “basapwijilenga mambo awama a Lesa.” (Byu. 8:1, 4) Inge mwatwajijila kusapwila, mukamwenamo bintu byawama bingi. Monai kyamwekele. Bapainiya bo bapangile mu kyalo kimo, bavilukijile mu kyalo kyaabana mupaka na kyalo mo baikalanga. Mu  kino kyalo mwakebewenga basapwishi bavula baambanga mulaka wabo. Byo papichiletu bañondo bacheche, kwalengelwe mabumba avula a mu mulaka ye baambanga.

16. Mwakonsha kwikala byepi na lusekelo mu mwingilo wenu wa katataka?

¹⁶ “Lusekelo lwa Yehoba bo bulume” bwenu. (Ne. 8:10, tubyambo twa munshi.) Twakonsha kwikala na lusekelo inge twaikala na bulunda bwakosa ne Yehoba, kechi mwingilo wetu nangwa kya kuba twamutemwa ne. Onkao mambo, inge tukeba kwikala na lusekelo, twafwainwa kwikala na bulunda bwakosa ne Yehoba ne kumuketekela. Vulukai kuba’mba mwatemenwe mwingilo ye mwaingilanga mambo mwatele muchima pa kukwasha bantu. Tai muchima pa mwingilo wenu wa katataka ne kumona Yehoba byo abena kwimukwasha kumutemwa.—Sapwi. 7:10.

17. Ki ka kyo twafwainwa kuvulukanga pa mwingilo ye tubena kwingila luno?

¹⁷ Twafwainwa kuvulukanga’mba tukatwajijila kwingijila Yehoba myaka ne myaka, bino mwingilo ye tubena kwingila luno kechi wa myaka ne. Mu ntanda ipya, kyamweka atweba bonse baketupa mingilo ya katataka. Ba Aleksey bo twaambapo ku ntendekelo ya uno mutwe, bayukile’mba lupimpu lwaubiwenga lwibanengezhenga ku lupimpu lukobiwa kulutwe. Baambile’mba: “Nayukile’mba Yehoba koaji kabiji ntanda ipya ikekalako, bino kimye kimo namonanga nobe Yehoba uji kwalepa ne ntanda ipya nobe kechi iji pepi kufika ne. Pano luno, Yehoba uji pepi ne amiwa, kabiji mmona’mba ntanda ipya ijitu pepi kufika.” (Byu. 2:25) Ke na mambo abiji mwingilo wetu ne, bino twafwainwa kutwajijila kufwenya kwipi ne Yehoba. Kechi uketusha ne, bino uketukwasha kwingila na lusekelo mwingilo yense ye aketupa.—Isa. 41:13.