1-3. Wetin na sɔm rizin dɛn we kin mek ful-taym savant dɛn chenj dɛn asaynmɛnt?

TU MISHƆNARI dɛn we nem Rɔbɔt ɛn Meri Jo bin tɔk se: “Afta wi bin dɔn spɛn 21 ia na wi asaynmɛnt, wi mama ɛn papa dɛn bin sik ɛn dɛn nɔ bin ebul du tin fɔ dɛnsɛf. Wi bin gladi fɔ go kia fɔ dɛn. Bɔt wi bin stil fil am we wi bin nid fɔ kɔmɔt na di ples we wi bin rili lɛk.”

² Wiliam ɛn Tɛri bin tɔk se: “We wi kam no se wi wɛlbɔdi nɔ go gi wi chans fɔ go bak na wi asaynmɛnt, wi bin kray. Wi bin rili want fɔ sav Jiova na ɔda kɔntri, bɔt naw wi nɔ go ebul du am.”

³ Alɛksi bin tɔk se: “Wi bin no se di gɔvmɛnt bin want fɔ lɔk di branch ɔfis usay a bin de sav. Bɔt wi bin stil shɔk we i apin ɛn wi bin nid fɔ kɔmɔt na Bɛtɛl.”

4. Us kwɛstyɔn dɛn wi go tɔk bɔt insay dis atikul?

⁴ Apat frɔm dɛn ɛkspiriɛns dɛn ya, bɔku ɔda ful-taym savant dɛn de we bin dɔn gɛt nyu asaynmɛnt. * I nɔ izi fɔ dɛn brɔda ɛn sista dɛn ya fɔ kɔmɔt na dɛn asaynmɛnt we dɛn bin rili lɛk. Wetin go ɛp dɛn fɔ ajɔst to di chenj? Aw yu go ɛp dɛn? Di ansa to dɛn kwɛstyɔn dɛn ya go ɛp wi fɔ ajɔst we sɔntin chenj na wi layf.

5. We wi asaynmɛnt chenj, aw dat kin afɛkt wi?

⁵ Ilɛksɛf wi de sav na di fil ɔ na Bɛtɛl, wi kin rili kam fɔ lɛk di pipul dɛn ɛn di ples usay wi de sav. So if ɛnitin mek wi nid fɔ kɔmɔt de, wi at kin rili pwɛl. Wi kin mis wi brɔda ɛn sista dɛn we wi kin lɛf biɛn, ɛn wi kin wɔri bɔt dɛn mɔ if di rizin we mek wi de kɔmɔt de na bikɔs dɛn ban wi wok. (Mat. 10:​23; 2 Kɔr. 11:​28, 29, NW) Apat frɔm dat, i nɔ kin izi fɔ go na difrɛn ples bikɔs wi go nid fɔ ajɔst to nyu kɔlchɔ. Wi kin ivin fil dis we if wi de go bak na di say usay wi kɔmɔt. Rɔbɔt ɛn Meri Jo bin tɔk se: “Wi bin dɔn ivin fɔgɛt wi yon kɔlchɔ ɛn fɔ ivin prich insay wi langwej. Wi bin de fil lɛk se wi na strenja dɛn na wi yon kɔntri.” Sɔm pipul dɛn we dɔn chenj dɛn asaynmɛnt go nid fɔ bia wit mɔni prɔblɛm dɛn. Dɛn nɔ kin gɛt kɔnfidɛns, dɛn nɔ kin fil sef, ɛn dɛn at kin rili pwɛl. Wetin go ɛp dɛn?

6. Aw wi go kɔntinyu fɔ de nia Jiova?

⁶ Kɔntinyu fɔ de nia Jiova. (Jems 4:​8) Aw wi go du dat? Na bay we wi de abop pan di Wan “we de ansa wi prea.” (Sam 65:​2) Sam 62:​8 (NW) tɛl wi se: “Una tɛl am ɔl wetin de na una at.” Jiova kin du “mɔ pas ɔl di tin dɛn we wi de aks fɔ ɔ tink bɔt fa fawe.” (Ɛfi. 3:​20, NW) Jiova nɔ kin jɔs gi wi wetin wi de aks am fɔ we wi de pre. I kin du pas wetin wi de tink se i go du, ɛn i kin sɔlv wi prɔblɛm dɛn di we aw wi nɔ de ɛva imajin.

7. (a) Wetin go ɛp wi fɔ kɔntinyu fɔ de nai Jiova? (b) Frɔm wetin de na Di Ibru Pipul Dɛn 6:​10-12, wetin kin apin we wi kɔntinyu fɔ sav Jiova fetful wan?

⁷ Fɔ kɔntinyu fɔ de nia Jiova, wi fɔ de rid di Baybul ɛvride ɛn tink gud gud wan bɔt wetin wi dɔn rid. Wan brɔda we na bin mishɔnari bin tɔk se: “Na fɔ kɔntinyu fɔ de du yu famili wɔship ɔltɛm ɛn pripia fɔ di mitin dɛn jɔs lɛk aw yu bin dɔn de du na yu asaynmɛnt. Dɔn, kɔntinyu fɔ du ɔl wetin yu ebul fɔ prich di gud nyuz na yu nyu kɔngrigeshɔn. Jiova de mɛmba di wan dɛn we de kɔntinyu fɔ sav am fetful wan, ilɛksɛf dɛn nɔ ebul fɔ du ɔl wetin dɛn bin de du trade.—Rid Di Ibru Pipul Dɛn 6:​10-12.

8. Aw di wɔd dɛn we de na Jɔn In Fɔs Lɛta 2:​15-17 go ɛp yu fɔ kip yu layf simpul?

 ⁸ Kip yu layf simpul. Nɔ alaw di yagba na Setan in wɔl fɔ stɔp yu fɔ sav Jiova. (Mat. 13:​22) Nɔ alaw di tin dɛn we de apin na di wɔl, wi padi dɛn, ɔ wi fambul dɛn fɔ mek wi rɔnata mɔni na dis wɔl. (Rid Jɔn In Fɔs Lɛta 2:​15-17.) Abop pan Jiova we dɔn prɔmis fɔ gi wi wetin wi nid “di rayt tɛm.” I go ɛp wi fɔ kɔntinyu fɔ gɛt strɔng fet, fɔ gɛt kolat, ɛn fɔ gɛt wetin wi nid fɔ liv.—Ibru 4:​16; 13:​5, 6.

9. Frɔm wetin de na Prɔvabs 22:​3, 7, wetin mek i impɔtant fɔ avɔyd fɔ tek dɛt we wi nɔ rili nid? Wetin go ɛp wi fɔ disayd di rayt tin?

⁹ Nɔ trɔs mɔni if nid nɔ de fɔ du dat. (Rid Prɔvabs 22:​3, 7.) Pɔsin kin spɛn bɔku mɔni we i de muf, ɛn i izi fɔ lɛ pɔsin gɛt dɛt. Fɔ lɛ yu nɔ gɛt bɔku dɛt, yu nɔ fɔ de lɛnt mɔni fɔ bay di tin dɛn we yu nɔ rili nid. I nɔ kin izi fɔ disayd ɔmɔs mɔni fɔ lɛnt we wi rili strɛs, fɔ ɛgzampul, we wi de kia fɔ wi fambul we sik. We dat apin, i fayn fɔ mɛmba se wi nid fɔ de “pre bɔt ɔltin” fɔ ɛp wi fɔ disayd di rayt tin. Jiova kin ansa yu prea bay we i de ɛp yu fɔ gɛt kolat we go mek yu disayd fɔ du di rayt tin.—Fil. 4:​6, 7; 1 Pit. 5:​7.

10. Aw wi go mek nyu padi dɛn?

¹⁰ Kɔntinyu fɔ bi padi to pipul dɛn we go ɛp yu fɔ du wetin rayt. Tɔk to yu tayt padi dɛn bɔt aw yu de fil ɛn di tin dɛn we de mɔna yu, mɔ to di wan dɛn we una ɔl gɛt di sem prɔblɛm. If yu du dat, dat go mek yu fil bɛtɛ. (Ɛkli. 4:​9, 10) Di padi dɛn we yu bin mek na di asaynmɛnt we yu bin de go kɔntinyu fɔ bi yu padi dɛn. Ɛn naw, yu go nid fɔ mek nyu padi dɛn na yu nyu asaynmɛnt. Mɛmba se if yu want fɔ gɛt padi dɛn, yu nid fɔ bi padi. Aw yu go mek nyu padi dɛn? Tɛl ɔda pipul dɛn bɔt di fayn fayn tin dɛn we Jiova dɔn du fɔ yu, so dat dɛn go si di kayn we aw yu gladi na Jiova in savis. Ilɛksɛf sɔm pipul dɛn na di kɔngrigeshɔn nɔ ɔndastand wetin mek yu lɛk ful-taym savis, stil ɔda pipul dɛn go want fɔ no mɔ bɔt yu ɛn dɛn go bi yu padi dɛn. Bɔt nɔ tɔk tumɔs bɔt yusɛf ɔ di tin dɛn we yu dɔn du we yu de sav Jiova, ɛn nɔ tɔk bɔt ɛni bad we aw yu de fil.

11. Aw yu go kɔntinyu fɔ mek yu mared-os gɛt gladi-at?

¹¹ If yu gɛt fɔ lɛf yu asaynmɛnt bikɔs yu man ɔ yu wɛf sik, nɔ blem am fɔ dat. Ɔ if yu gɛt wɛlbɔdi prɔblɛm, nɔ fil bad bɔt dat, ɛn nɔ tink se yu dɔn disapɔynt yu man ɔ yu wɛf. Mɛmba se una ɔl tu “dɔn  de lɛkɛ na wan pɔsin,” ɛn una dɔn mek prɔmis bifo Jiova se una go kia fɔ unasɛf ilɛk wetin apin. (Mat. 19:​5, 6) If una kɔmɔt na una asaynmɛnt bikɔs yu wɛf gɛt bɛlɛ we una nɔ plan fɔ, mek shɔ se yu pikin no se i impɔtant to una pas di asaynmɛnt we una bin gɛt. Mek lɛ yu pikin no gud gud wan se in na “blɛsin” frɔm Gɔd. (Sam 127:​3-5) Dɔn bak, tɛl am bɔt di fayn fayn ɛkspiriɛns dɛn we una bin gɛt na una asaynmɛnt. We yu du dis, dat go ɛp yu pikin fɔ yuz in layf fɔ sav Jiova ful-taym jɔs lɛk aw yu bin dɔn du.

12. (a) Aw wi go ɛp di wan dɛn we de na ful-taym savis fɔ kɔntinyu dɛn asaynmɛnt? (b) Aw wi go ɛp dɛn fɔ ajɔst to dɛn nyu asaynmɛnt?

¹² Wi gladi fɔ no se bɔku kɔngrigeshɔn dɛn ɛn pipul dɛn dɔn du wetin dɛn ebul fɔ ɛp di wan dɛn we de na ful-taym savis fɔ kɔntinyu fɔ de na dɛn asaynmɛnt dɛn. Dɛn de du dis bay we dɛn de ɛnkɔrej dɛn, gi dɛn wetin dɛn nid, ɔ ɛp fɔ kia fɔ dɛn fambul dɛn we de fa say. (Gal. 6:​2) If dɛn sɛn sɔm ful-taym savant dɛn na yu kɔngrigeshɔn bikɔs dɛn dɔn chenj dɛn asaynmɛnt, nɔ tink se dɛn dɔn du bad wok ɔ bad tin. * Bifo dat, na fɔ ɛp dɛn fɔ mek dɛn nyu asaynmɛnt izi fɔ dɛn. Na fɔ gladi fɔ dɛn ɛn tɛl dɛn tɛnki fɔ di wok we dɛn bin dɔn du, ilɛksɛf dɛn nɔ ebul fɔ du bɔku tin dɛn igen bikɔs dɛn nɔ gɛt gud wɛlbɔdi. Tray fɔ no dɛn mɔ. Lan frɔm di plɛnti tin dɛn we dɛn no, dɛn trenin, ɛn ɛkspiriɛns.

13. Wetin wi go du fɔ ɛp di wan dɛn we dɔn gɛt nyu asaynmɛnt?

 ¹³ Fɔs, di wan dɛn we dɔn gɛt nyu asaynmɛnt go nid pɔsin fɔ ɛp dɛn fɔ gɛt os, transpɔt, wok, ɛn ɔda tin dɛn we dɛn go nid. Dɛn go nid fɔ no di rayt tin dɛn we dɛn fɔ du, we i kam to tin dɛn lɛk fɔ pe taks ɛn ɔda tin dɛn. Wetin impɔtant pas ɔl, na we wi tray fɔ ɔndastand wetin de apin to dɛn. Sɔntɛm, dɛn de bia wit dɛn wɛlbɔdi prɔblɛm, ɔ dɛn fambul in yon. Ɔ sɔntɛm, dɛn at pwɛl bikɔs pɔsin we dɛn lɛk dɔn day. * Ɛn sɔntɛm ilɛksɛf dɛn nɔ tɔk bɔt am, dɛn at go pwɛl bikɔs dɛn de mis dɛn padi dɛn we de na di say usay dɛn bin de sav. I kin tek tɛm fɔ lɛ dɛn ebul bia wit di we aw dɛn de fil ɛn sɔntɛnde, dis kin kɔnfyus wi.

14. Aw di brɔda ɛn sista dɛn na wan kɔngrigeshɔn bin ɛp wan sista fɔ ajɔst to in nyu asaynmɛnt?

¹⁴ If yu prich wit dɛn ɛn ɛnkɔrej dɛn bay yu gud ɛgzampul, yu go ɛp dɛn fɔ ajɔst. Wan sista we dɔn sav fɔ lɔng tɛm na ɔda kɔntri bin tɔk se: “We a bin de na mi fɔs asaynmɛnt, a bin de kɔndɔkt Baybul stɔdi dɛn ɛvride. Na mi nyu asaynmɛnt, i nɔ izi fɔ lɛ a gɛt di chans fɔ ivin opin di Baybul ɔ sho fim na fil savis. Bɔt di brɔda ɛn sista dɛn na mi nyu kɔngrigeshɔn bin de aks mi fɔ jɔyn dɛn fɔ du dɛn ritɔn visit dɛn ɛn Baybul stɔdi dɛn. We a bin de si dɛn fetful brɔda ɛn sista dɛn ya de tray tranga wan fɔ kɔndɔkt Baybul stɔdi dɛn, dat bin de mek a nɔ fil bad bɔt di tɛritri. A bin lan aw fɔ stat fɔ tɔk to pɔsin fɔ di fɔstɛm na mi nyu tɛritri. Ɔl dɛn tin ya bin ɛp mi fɔ gladi bak.”

15. Aw yu go go bifo na yu nyu asaynmɛnt?

¹⁵ Yu kin go bifo na yu nyu asaynmɛnt. Nɔ ɛva tink se yu bin dɔn du bad wok na di asaynmɛnt we yu bin de du trade ɔ yu nɔ impɔtant igen. Tink bɔt di plɛnti we dɛn we Jiova de ɛp yu ɛn kɔntinyu fɔ  prich. Falamakata di fɔstɛm Kristian dɛn we bin fetful. Ɛnisay we dɛn bin de, dɛn “bin de tɔk bɔt di gud nyuz bɔt Gɔd in wɔd ɔlsay na di land.” (Akt 8:​1, 4, NW) Di tray we yu de tray tranga wan fɔ prich go mek gud tin apin. Fɔ ɛgzampul, di payɔnia dɛn we dɛn bin drɛb na wan kɔntri bin muf go na wan ɔda kɔntri we de nia dɛn usay dɛnsɛf bin nid mɔ pipul dɛn fɔ ɛp dɛn na dɛn yon langwej. Afta sɔm mɔnt, bɔku pipul dɛn bin jɔyn di nyu grup insay di langwej we di payɔnia dɛn bin de prich.

16. Aw yu go gladi fɔ du yu nyu asaynmɛnt?

¹⁶ Di Baybul tɛl wi se: “Di gladi we Jiova de mek una gladi, na in de mek una gɛt trɛnk.” (Nɛi. 8:​10, NW, futnot) Di tin we fɔ mek wi gladi pas ɔl na wi padi biznɛs wit Jiova, nɔto wi asaynmɛnt, ilɛksɛf wi lɛk wi asaynmɛnt pasmak. So if wi want fɔ gɛt gladi-at, wi fɔ kɔntinyu fɔ de nia Jiova ɛn abop pan am fɔ gi wi sɛns, fɔ gayd wi, ɛn sɔpɔt wi. Mɛmba se yu bin lɛk yu fɔs asaynmɛnt bikɔs yu bin de du yu bɛst fɔ ɛp di pipul dɛn. So tray fɔ du yu bɛst na yu nyu asaynmɛnt ɛn si aw Jiova go ɛp yu fɔ lɛk am bak.—Ɛkli. 7:​10.

17. Wetin wi fɔ mɛmba bɔt wi nyu asaynmɛnt?

¹⁷ Wi fɔ mɛmba se wi savis to Jiova na sote go, bɔt di asaynmɛnt we wi gɛt naw na fɔ shɔt tɛm. Insay di nyu wɔl, wi ɔl go gɛt nyu asaynmɛnt. Alɛksi we wi bin tɔk bɔt fɔs bin biliv se in nyu asaynmɛnt de ɛp am fɔ rɛdi fɔ ɛni chenj we go kam tumara bambay. I tɔk se: “A no ɔltɛm se Jiova ɛn di nyu wɔl rial, bɔt i bin tan lɛk se dɛn de fa frɔm mi. Naw a de si Jiova bifo mi ɛn di nyu wɔl de kam jisnɔ.” (Akt 2:​25, NW) Ilɛk us asaymɛnt wi gɛt, wi want fɔ kɔntinyu fɔ de nia Jiova. I nɔ go ɛva lɛf wi, bɔt i go ɛp wi fɔ gɛt gladi-at pan ɛnitin we wi de du fɔ sav am ɛnisay we wi de.—Ayz. 41:​13.