1-3. Sɔɔŋ kuɛɛ tosa yɛ lepum mi wanaa cho o wali lɔɔlɔɔ Mɛlɛkaa niŋnda mal ɔɔ siŋga wali ndaa?

“WƆSILAŊ 21 koni naŋ tuei yeela o wali lemisiɔnalueiyo niŋ ni mi wanaa velu naa wa nda hiɔɔlu kpou del a naa.” Hei Lɔbɔti nda Meele Choo dimi ni. “Ŋ wa a kɔl kɛndɛ tau le mɛɛ naŋ miiŋgu le nda mandaa yɛ. Kɛ wana dimi isɔɔ a tonya, miŋ tambu kɔl tau le malɔɔ wali naa lemisiɔnalueiyo.”

² Mi Wuliɛm nda Tɛli bɛɛ dimi aa, “Mɛɛ naŋ sina maa kɛndiaa naa cho lɛ naa chɛlɔɔ miŋ miiŋgu o wali lɔɔlɔɔ Mɛlɛkaa niŋ te, miŋ chaŋ.” Ma hiau lachi a dimioo aa, “Mi tuu naŋ nɔ le kɔlaŋ wali Chɛhowaa tosaa o lɛŋnde cheleŋ niŋndo tambu.”

³ “Miŋ sina maa wanaa cho naa nyɛpalaa tusioo choo wa yeema ma kinda lɛuvii Seiyaa Chɛhowaa naa ya wa wallo wa.” Hei Alɛkse bɛɛ dimi ni. Mbo hiau lachi a dimioo aa, “Kɛ mɛɛ nda kinda niko lɛuve hei nduyɛ ma dimul naa le miŋ mal Bɛtɛɛl, mi kɔllo tambu naa tau.”

4. Nyunala kuɛɛ naŋ cho yɛ yaasiaa o buŋgɛi hei niŋ?

⁴ O faŋaŋndɔ o sɔɔŋ yɔŋnaŋndoŋ muŋ kɔɔli, ŋ cheleŋ cho tau a wanaa siŋgaŋndaŋ * la komal niŋ o wali lɔɔlɔɔ Mɛlɛkaa niŋnda. Simullo pila i wa ni le mi puaapiliaa a ndepiliaa naa haa mal wali nda kaala wo, te siŋgaŋndaŋ la komal nda pɛ. Yɛɛ mala yɛ nda ma biuŋ nduyɛ ma tosa yɛlɛmiaalaŋ? Vɛɛ ŋ mala yɛ nda? Mulila naŋ cho sɔla le nyunalaŋ ndaŋndo la cho naa kpou mala  miŋ che mɛɛ naŋ biunuŋ siŋgaŋnda komal naa laŋ yɛ.

5. O nɛila kuɛɛ niŋ siŋgaŋnda komal naa laŋ la paaliaŋ yɛ naa?

⁵ O yɔŋ bɛɛ aa o Bɛtɛɛl naŋ cho wali lɔɔlɔɔ Mɛlɛkaa tosaa ni ɔɔ naa cheleŋ, miŋ sɔla chaŋyaŋ kɛndɔŋ tau nduyɛ miŋ kaala vɛlɛ fondaŋ naŋ wa wo. Le hei, mi kɔllo tambu naa tau te siŋgaŋ kɛ kɛ tosa pɛ miŋ mal fondaŋ naŋ cho wo ɔɔ wali naa. Mi yeemɛi wa naa o kɔl tau le wanaa naŋ mɛi ya. Nduyɛ, miŋ buulaŋ tau le nda te o yɔŋ pɛ aa nyɛpalaa nda tusi naa choo wo tosa ni miŋ mal fondaŋ naŋ wa wo. (Maa. 10:​23; 2 Kɔliŋ. 11:​28, 29) O faŋaŋndɔ o hei kɔɔli, simullo pila i wa vɛlɛ ni le kɔlaŋ o fondaŋ cheleŋ ɔɔ le miiŋgoo o lɛŋnde numndeŋ niŋ. Kanifuule, a nɔ ma kɔ tosa yɛlɛmiaalaŋ a mɛɛ naamula waŋnda loŋ la cho yɛ. Mi Lɔbɔti nda Meele Choo dimi aa, “Miŋ puɛɛnuŋ naamula naalaŋ, nduyɛ naŋ chiee lɛ bɛɛ pɛŋ yooŋgu kɛndɔɔ dimioo o suɛi nɛi maŋgalɛi niŋ te. Miŋ simnuŋ mialla o lɛŋnde naaleŋ niŋ.” Mi bahawɛi nyɛsɔlaa komal vɛlɛ wanaa siŋgaŋndaŋ la komalla apum. Ma luɛi o buulaŋ bɛndoo niŋ a kɔl tambɛiyo o tasela ndɔ. Kɛ yɛɛ nɔla yɛ mbo mala nda?

6. Vɛɛ naŋ chɔɔlu yɛ Chɛhowa sɔɔŋguu ikɛi?

⁶ Chɔɔlu Chɛhowa sɔɔŋguu ikɛi. (Chemi. 4:​8) Vɛɛ naŋ tosa yɛ hei? Ŋ nɔ miŋ tiindaŋ ndu kanifuule ndu “cho wana muli piɛileŋ ndo ni.” (Sam 65:​2) Sam 62:​8 dimi aa, “La chɔm ndu bala nyala hawɛilaŋ kpou.” Te ŋ nyuna Chɛhowa pɛ le nyɛ, o nɔla mbo ke naa “mbo hiou bɛɛ nyɛ naa ŋ tuunuŋ o kɔl lo poloŋ poloŋ bɛndu.” (Ɛfi. 3:​20) O cho nyɛ naŋ nyuna pɛŋ Chɛhowa o piɛileŋ niŋndo suee le o ke naa le. Nduyɛ, mi Chɛhowa tosa a sabu miŋ sɔla nyɛ naŋ ve pɛŋ kɔl te wo le bahawɛila naalaŋ solioo.

7. (a) Yɛɛ naŋ nɔ yɛ miŋ tosa le miŋ hiou lachi a Chɛhowa piɛiyo? (b) A mɛɛ Hibuluiya 6:​10-12 dimi yɛ, yɛɛ cho yɛ wa fulamakɔɔlioo te ŋ hiou pɛ lachi a Chɛhowa piɛiyo o laalaŋndo choo?

⁷ Le ma hiou lachi a Chɛhowa piɛiyo, mɛɛ ma wa diomndaŋ veeloo o Baabuiyo niŋ lepaa o lepaa nduyɛ ma yiyaŋ lechoo. Mi puaapilɛnɔ wa paandu misiɔnalueileŋ ndo dimi aa, “Hiou lachi a pɛɛku leyuŋgoo tosaa vɛlɛ a bɛɛndiaŋndo le bɔŋaŋndaŋ, mɛɛ num aa tosa paandu o wali lɔɔlɔɔ Mɛlɛkaa niŋ yɛ.” Nduyɛ, o bɛnda vɛlɛ ma hiou lachi a yooŋgu kɛndɔɔ dimioo o kunda sɛnɛi ŋ kuɛ niŋndo. Chɛhowa puɛɛnuŋ a wanaa hiau lachi a ndu piɛiyo o laalaŋndo choo wa le, o yɔŋ bɛɛ ma ve lɛ tosa tau maa paandu le.—Nuawɔ Hibuluiya 6:​10-12.

8. Vɛɛ Chɔŋ Tasoo 2:​15-17 mala yɛ num ma tosa yoomu numndo tɛtɛlɛ?

 ⁸ Tosa yoomu numndo tɛtɛlɛ. Chɛl mi buulaŋndo le nyɔɔŋ sɔlaa o chieeŋ Setanaa hoo niŋ “kaya kayaŋ” num ma mal Chɛhowa piɛiyo le. (Maa. 13:​22) Mi wanayaŋ numndoŋ ɔɔ chaaŋaa numnda dimul num maa le ma sɔla batiuwaa o chieeŋ Setanaa hoo niŋ, mɛɛ ma nuuviaa nyɛsɔlaa tau. Te a ke num sila waa naa pɛ, a nɔ ma yaŋ nda lani kposoŋ te. (Nuawɔ Chɔŋ Tasoo 2:​15-17.) Tiindaŋ Chɛhowa kanifuule, o mɛi lediom le naa malaa miŋ hiou lachi a tiindaŋ naa kindioo, miŋ kɛsi kɔllo, nduyɛ mbo ke naa nyɛm naŋ hauba woŋ a “boondii naa ŋ yeema malaa ve.”—Hibu. 4:​16; 13:​5, 6.

9. A mɛɛ Pulɔwaa 22:​3, 7 dimi yɛ, le yɛɛ o bɛnda yɛ miŋ fafaŋ kueela isiɛlɛilaŋ biyɔɔ, nduyɛ yɛɛ mala yɛ naa le kɛɛsiaalaŋ tosaa a taasi?

⁹ Fafaŋ kueela isiɛlɛilaŋ biyɔɔ. (Nuawɔ Pulɔwaa 22:​3, 7.) Nyɛsɔlaa pila wana pisi ni te a wa pɛ faŋaŋndo o fondaŋ ŋ cho wo le kɔlaŋ challe naa cheleŋ. Mi hei kuɛ le num balaŋ luei o kueelaŋ niŋ. Le hei fafaŋndo, bii kuee le nyɛm ŋ heuba le woŋ piondɔɔ le. Lepum, mi kɔl tambɛiyo komal naa tau te o yɔŋ pɛ miŋ wa wanaa naŋ kaala wa dandaa dɔwɔɔ mi nyɛsɔlaa chuu naa o ba. Mbo wa ikala le sinaa mɛɛ kpɛ naŋ nɔ miŋ bii kuoo le nda dandaa dɔwɔɔ yɛ. O bɛnda ma loonuŋ le waa “Mɛlɛka piɛiyo” o teleŋ waa naa bɛŋgu. Keŋ mala num ma tosa kɛɛsiaalaŋ a taasi. Chɛhowa cho piɛile numndeŋ muli nduyɛ, mbo ke num kɔl nyulu ‘nɔla mbo manda kɔl numndo a yiyaŋnda numndaŋ’ le kɛɛsiaa kɛndɔɔ tosaa wo.—Filipi. 4:​6, 7; 1 Pitɛ 5:​7.

10. Yɛɛ naŋ nɔ yɛ miŋ tosa le sɔlaa chaŋyaŋ sɛnɛiyoŋ?

¹⁰ Hiou lachi a chaŋyaŋ kɛndɔŋ nuuviaa. Chɔm chaaŋaa numaa nya chii baltaŋ nda simulta ŋ cho sɔlaa laŋ, taama taama a siŋgaŋnda waa naa komal niŋ paandu wa. Hei mala num ma kɛsi kɔllo. (Ikili. 4:​9, 10) Wanaa nya wa paandu o chaŋyɛi niŋ naŋ wa o wali lɔɔlɔɔ Mɛlɛkaa niŋnda cho wɔ wa chaaŋaa num. Kɛ naa ŋ kuɛ wa bɛɛ, a nɔ ma nuuviaa chaŋyaŋ sɛnɛiyoŋ. Loonuŋ maa le ma sɔla chaŋyaŋ, mɛɛ ma wa wana ikɛndɛ. Vɛɛ ŋ tosa yɛ chaŋyɛi a wanaa ŋ komalla? Chɔm nda sɔɔŋ kɛndɛŋ yɔŋnuŋ num o wali Chɛhowaa niŋndoŋ. Tosa ma che nyaale ŋ cho sɔlaa o ndu piɛiyo niŋndo. O yɔŋ bɛɛ mi apum o kundaa niŋ sina mɛɛ kpɛ ŋ kaala wali lɔɔlɔɔ Mɛlɛkaa yɛ le, taamasi num kɛndɔɔ cho tosa mi apum simnuŋ chaaŋaa numnda. Kɛ a nɔ ma wa yekeŋ. Lisaŋ a sɔɔŋ ŋ tosa niŋ o wali Chɛhowaa niŋndoŋ te. Nduyɛ, fɛŋ bɛɛ nɔ yiyaŋ wɔɔŋ o kɔl kposoŋ te.

11. Yɛɛ nya nɔ yɛ mi la tosa le mi nɔ nyaa wa a nyaale?

¹¹ Te o yɔŋ pɛ aa kɛndiaa wana nya cho o nɔɔ niŋndo tosa ni mi wali lɔɔlɔɔ Mɛlɛkaa hialuŋ nya, mɛɛ bii ndu tɔɔyaŋ te. O baa pilɔɔ choo, te o yɔŋ yɛ pɛ aa kɛndiaa numpilaa tosa ni, mɛɛ tambu kɔl ma yiyaŋ maa a chuu chaaŋ num saŋgaa le. Loonuŋ maa “waŋndo o pilɛ” nya cho ni. Nduyɛ o paale nɔ kɛsiaa nyaa choo, ma chua  buŋgɛi Chɛhowa lachi maa mɛɛ mɛɛ la wa a feŋaŋ wana nya cho o nɔɔ niŋndo kɔɔli le. (Maa. 19:​5, 6) Lepum, mi foli nya ve kɔl te wo tosa mi wali lɔɔlɔɔ Mɛlɛkaa hɛluŋ nya. Te keŋ yɔŋnuŋ pɛ, mɛɛ la kɛsiŋ o kɔl maa hɔɔ koŋ cho o sɔvɛ mbo hiau wali lɔɔlɔɔ Mɛlɛka nya wa tosaa wo. O bɛnda bɔɔ vɛlɛ mi la tosa mi hɔɔ nya koŋ sina keŋ nduyɛ, mi la wa ndu dimullo maa ndu cho “nyɛm kɛŋ” Mɛlɛka fanda nya woŋ ni. (Sam 127:​3-5) La dimul ndu vɛlɛ a sɔɔŋ kɛndɛŋ nya tuei yeela o wali lɔɔlɔɔ Mɛlɛkaa niŋndoŋ. Keŋ tosa mi ndu bɛɛ soliŋ yoomu ndɔɔ kpeku le wali lɔɔlɔɔ Chɛhowaa tosaa maa nya.

12. (a) Vɛɛ naŋ mala yɛ wanaa cho o wali lɔɔlɔɔ Mɛlɛkaa niŋnda ma hiou lachi a ndu tosaa? (b) Vɛɛ naŋ tosa yɛ le mi sɔɔŋ wa ŋ kɛndɛ a nda te a hiŋ pɛ o kunda naa niŋ?

¹² Kundala bɔɔbɔɔ cho wanaa cho o wali lɔɔlɔɔ Mɛlɛkaa niŋnda malaa le ma hiou lachi a ndu tosaa. Nduyɛ, puaapiliaa a ndepiliaa bɔɔbɔɔ bɛɛ cho hei tosaa. Le hei, ŋ cho nda balikaa mello tau. Mɛɛ nda tosa hei yɛ cho kɔl dɛɛniaa nda kioo le ma hiou lachi a wali ndaa tosaa ni. Ma toolu nda vɛlɛ a nyɛsɔlaa ɔɔ nyɛm nda hauba woŋ, ɔɔ ma mala nda le yuŋgula ndala nda mɛi kɔɔlilaŋ mandaa. (Kalee. 6:​2) Lepum, mi siŋgaŋndo komal wanaa cho o wali lɔɔlɔɔ Mɛlɛkaa niŋnda okoŋ ma hiŋ o kunda numndo niŋ. Te keŋ yɔŋnuŋ pɛ, yiyaŋ naa maa a suliŋ le wali nda veelu nda le tosaa wo le, ɔɔ maa suɛi wɔɔŋnde le nda tosa ma ke nda silaa * le. Kɛ o bɛnda ma mala nda le mi nyɛ o nyɛ wa o kɛndɛ a nda. O yɔŋ bɛɛ mi kɛndiaa ndaa chɛllɛ nda le tosaa tau maa paandu le, demul nda a dialuŋ fulaa nduyɛ ma chandu nda le wali nda wa tosaa wo. Kindiŋ kpoke le ma sina nda. Kɔl kalu ndaa, pɛɛku nda sɔla wo, a sɔɔŋ ndaŋ yɔŋnaŋndoŋ nɔla miŋ pɛɛku num tau.

13. Vɛɛ naŋ mala yɛ wanaa siŋgaŋndaŋ la komalla?

 ¹³ O tasela ndɔ, malaa pila wanaa siŋgaŋndaŋ la komalla yeema ni te a kuɛ pɛ naa sɛnɛiya. A yeema malaa le chiɛiyo sɔlaa, balɔɔ a nda le fondaa sinaa, wallo sɔlaa, nduyɛ a nyɛm nda hauba woŋ. A yeema vɛlɛ le ma mala nda ma sina mɛɛ sɔɔŋ tosaŋ o fondaŋ koŋ yɛ, mɛɛ paawaa malɔɔ a yauwo solioo le nyɛ nyaanaŋ numndo cho naa yɛ. O cho imɔnɛ le nda yeema num ma bii le nda le. Kɛ a yeema num ma bii simulta ndalaŋ bila. Naapum mi bahawɛi kɛndiaa wa ndapila ɔɔ wanayɛi ndɛi paaliaŋndo tau. Nduyɛ ma wa vɛlɛ mɔnɛi biyɔɔ tau le wana nda kaalaa * vi wo, ɔɔ le mɛɛ nda mɛi chaaŋaa ndaa nda wa paandu o wali lɔɔlɔɔ Mɛlɛkaa niŋnda yɛ. Mbo chua nda teleŋndo tau le sɔɔŋ muŋ biuwɔŋndo nduyɛ kɔl tambɛiyo pila i chuu nda ni.

14. Vɛɛ puaapiliaa a ndepiliaa mala yɛ ndepilɛnɔ siŋgaŋndo komallo le yɛlɛmiaalaŋ tosaa?

¹⁴ Le suŋ suŋndɔ, kɔlaŋ o wali pollo niŋ a nda latulu vɛlɛ a taamasi num kɛndɔɔ mala nda ma tosa yɛlɛmiaalaŋ. Mi ndepilɛnɔ pilɛ tosa wali lɔɔlɔɔ Mɛlɛkaa o lɛŋnde cheleŋ niŋ le wɔsila bɔɔbɔɔ wo dimi aa, “O lɛŋnde ya wa leŋ niŋ, mi yaa tosa pɛɛkula Baabuilaŋ lepaa o lepaa. Kɛ o lɛŋnde ya kuɛ leŋ niŋ, i wa bɔɔ ikala le mi yaa chɔm waŋndo vidueiyo ɔɔ bolle Baabuileŋ o wali pollo niŋ. Kɛ mi wanaa dimiaa yooŋgu kɛndiaa ya komalla ndaa kuɛ a ya o miiŋgula makɔɔlaŋ a pɛɛkula Baabuila ndalaŋ. Puaapiliaa a ndepiliaa haa ndaa nɔ bɔɔ sɛmbɔɔ a kɔl sikpaa. Mɛɛ ya che wanaa nda wa Baabuiyo pɛɛkoo wa hiouwɔɔ lachioo tosaa, mi siŋga yiyaŋ yaa nɔ a tanda hoo okɔɔ wo. Mi pɛɛku mɛɛ ya nɔ mi kandu suukaŋndo a waŋnda o tanda sɛnɛiyo hoo niŋ yɛ. Sɔɔŋ muŋ kpou mala ya ni mi sɔla vɛlɛ nyaaloo.”

15. Yɛɛ mala yɛ num ma sɔla batiuwaa te siŋgaŋndo komal num pɛ?

¹⁵ A nɔla ma sɔla batiuwaa te siŋgaŋndo komal num pɛ. Siŋgaŋ komal numndo tosa ma yiyaŋ maa wali nda ke numndo ŋ bumba ni ɔɔ a sɔla lɛ niŋ batiuwaa kposoŋ te le. Yiyaŋ a mɛɛ Chɛhowa mala num niŋ paandu yɛ nduyɛ ma hiou lachi a yooŋgu kɛndɔɔ dimioo. Tol taamasi  Kilisiɔŋaa laalaŋnda o wɔsiŋ kɛmɛ tasoŋ niŋ kɔɔli. A wa a bɛɛndiaŋ lɔɔlɔɔ le waŋnda “suɛi Mɛlɛkɛi chɔmndo ba o ba fee nda fuuluu” pɛ. (Walta. 8:​1, 4) Te a dɔu pɛ sɛmbɔɔ ma hiou lachi a yooŋgu kɛndɔɔ dimioo, a cho fulamakɔɔlila kɛndɛlaŋ sɔla. Le taamaseliiyo, mɛɛ nda tou kɔɔfaa o lɛŋnde pilɛ niŋ, ma kuaŋnuŋ o lɛŋnde wa nda ikɛi leŋ niŋ. Nduyɛ, yeemɛi wa tau le wanaa dimi suɛi ndɛi maŋgalɛi ya o lɛŋnde nda kuɛ leŋ niŋ. O paŋguŋ biŋgi bɛŋgu, mi kundala sɛnɛilaŋ la kilaŋ o suɛi maŋgalɛi kɔɔfaa haa wa yooŋgu kɛndɔɔ dimioo ve niŋ.

16. Yɛɛ mala yɛ num ma wa a nyaale te siŋgaŋndo komal num pɛ?

¹⁶ Baabuiyo dimi aa, “Kɔl nyulu [nyaale NW] Mɛlɛka Yaawɛɛ o cho nya ke wo, ndu cho yoomuma nyaaŋ ni.” (Nɛhi. 8:​10) Nyɛ nɔ mbo ke naa nyaale kpeekpeiyo wo cho chaŋyɛi naŋ nɔ a Chɛhowa ve ni, kɛ o cho wali lɔɔlɔɔ Mɛlɛka naŋ tosa wo le, o yɔŋ bɛɛ miŋ kaala ndu tau. Lelaŋ, lo Chɛhowa ikɛi nduyɛ ma tiindaŋ ndu le num taasioo, nɛi chɔmaa, a malaa kioo. Loonuŋ maa nyɛ tosa ma kaala wali lɔɔlɔɔ Mɛlɛka ŋ wa tosaa wo cho yoomuma ŋ soliŋ kpeku le acheleŋnda malaa wo ni. Handu kɔllo kpou o wali sɛnɛi ŋ sɔla suŋ suŋ o kɔɔna Chɛhowaa niŋndo choo, nduyɛ ma che mɛɛ Chɛhowa cho num mala le ndu tosaa yɛ.—Ikili. 7:​10.

17. Yɛɛ naŋ nɔ yɛ miŋ loonuŋ suŋ suŋ a wali lɔɔlɔɔ Mɛlɛkaa okɔɔ?

¹⁷ Wali lɔɔlɔɔ Mɛlɛkaa cho lefafɛɛŋ te. Kɛ ŋ nɔ miŋ kɛsiŋ o kɔl maa lefafɛɛŋ naŋ nɔ le Chɛhowa piɛiyo ni. Naapum o chieeŋ sɛnɛiyo niŋ bɛɛ, siŋgaŋndaŋ la nɔ le naa kpou komallo. Alɛkse, o naŋ soo a ndu okɔɔ suŋndo, ndoo laalaŋ maa siŋgaŋnda cho ndu komallo suŋ suŋ ndaŋ la cho ndu bɛɛndiaa le laŋ o chilaŋ niŋ ni. Mbo dimi aa, “Yaa laalaŋ kɛsɛ maa Chɛhowa cho nduyɛ maa chieeŋ sɛnɛiyo bɛɛ cho wa. Kɛ mi yiyaŋ maa Chɛhowa a chieeŋ sɛnɛiyo cho ya bɔɔ levil. Kɛ suŋ suŋ niŋ, I cho Chɛhowa ikɛi kpɛɛluŋ nduyɛ, I sina niŋ kɛsɛ maa chieeŋ sɛnɛiyo nɔ le hunɔɔ suŋ suŋ.” (Walta. 2:​25) O yɔŋ bɛɛ mi siŋgaŋ kɛ kɛ komal naa, ŋ hiounuŋ lachi a loo Chɛhowa ikɛi kpɛɛluŋ. Fɛŋ bɛɛ o mel naa le. Nduyɛ ba o ba naŋ wa, o cho naa mala miŋ sɔla nyaaloo le o naŋ tiuba wo tosaa o wali ndɔɔ niŋ.—Aisaya 41:​13.