1-3. Yisinke ayi ninkisa ava va kara mosirugana sosiruwo nasinye va hageke sirugana sawo?

ROBERT namukadendi Mary Jo, kwa tanta asi: “Konyima zapa twa kere mosirugana soutumwa nomvhura 21, vakondi vetu navenye vane kwa tamekere kuvera. Ose kwa hefe mokukavapakera mbili. Nye twa guvire apa twa sigire sirongo esi twa ka kere.”

² William naTerrie kwa tanta asi: “Ose kwa lilire apa twa ya dimbwilire asi kapi tatu vhuru hena kutwikira nosirugana setu morwa kuvera-vera. Ose kapi hena twa vhulire kuza tu ka zuvhisire mosirongo sapeke.”

³ Aleksey kwa tanta asi: “Ose twa yi divire asi varwanesi kwa here kupata Beteli omu ngani rugana. Nye apa va pete Beteli, ose kwa hagekere sirugana setu ntani ayo kwa tu guvisire.”

4. Mapuro musinke natu ka zogera mosirongwa esi?

⁴ Kugusa ko vanavazinyetu owo, vanavazinyetu vamwe kukwatera mo Vabeteli wovanzi, nawo kwa gwana sirugana sosipe. * Vanavazinyetu ava navenye kuvhura kuvadigopera kusiga sirugana sawo esi va hara unene. Yisinke nayi va vatera va hafere sirugana sawo sosipe? Ngapi omu natu va vatera? Malimbururo komapuro aga kuvhura kutuvatera natuvenye nsene ukaro wetu una runduruka meparu.

5. Ngapi omu ayi tu kundama apa atu gwana sirugana sosipe ndi apa au runduruka ukaro wetu?

⁵ Yi kare asi ose kurugana moBeteli ndi mosirugana sapeke, ose kuhara vantu ntani nevango oku atu ruganene. Yipo nye, ayo kutuguvisa apa atu gwana sirugana sosipe ndi nsene ukaro wetu u runduruka. Ose kurongora vantu ava atu sigi nokukara nosinka kwawo, unene po nsene ose kuna diruka morwa marwaneso. (Mat. 10:23; 2 Kol. 11:28, 29) Kuvhura yi kare hena udigu kutambura sirugana sosipe ndi kutengura kembo morwa twa ka yika nompo dokosirongo oku twa ka kere. Robert naMary Jo, kwa tanta asi: “Ose kwa lizuvhire ngwendi vageni mosirongo setu morwa kwa ka kere siruwo sosire mosirongo sapeke.” Vanavazinyetu vamwe ava ava gwana sirugana sosipe, kukara noudigu woyimaliwa. Eyi kuvhura kuvadompesa. Yisinke nayi va vatera?

6. Ngapi omu natu hedera Jehova pepi?

⁶ Hedera Jehova pepi. (Jak. 4:8) Ngapi omu natu yi rugana? Pokuhuguvara mwendi morwa age “kuzuvha makanderero” getu. (Epis. 65:2) Episarome 62:8 kutanta asi: “Omu mu tantere maudigu geni nagenye.” Jehova kuvhura kuturuganena “yoyinzi-yoyinzi, kupita nayinye eyi atu hundire neyi atu gazara.” (Efe. 3:20) Jehova kapi a tu pe tupu yeeyi atu mu hundire. Age kuvhura kukohonona po maudigu getu monkedi ezi natu dira kundindira.

7. (a) Yisinke nayi tu vatera tu hedere pepi naJehova? (b) Kuliza noVahebeli 6:10-12, yitundwamo musinke ngayi kara nsene tu twikira kukarera Jehova noulimburukwi?

⁷ Mokuhedera pepi Jehova, twa hepa kuresa Matjangwa nkenye apa nokuteda ko. Munazinyetu gumwe ogu ga kere mutumwa kwa tanta asi: “Ya wapa kukara nkenye apa noukareli wepata nokuliwapaikira komapongo ngwendi moomu tupu ngo yi rugana mosirugana soge sanare.” Ayo ya kara hena nomulyo o liture mo mokuzuvhisa mbudi zongwa mombungakriste zompe. Jehova kudiworoka navenye ava ava twikire kumukarera noulimburukwi, nampili va dire kumuruganena yoyinzi ngwendi nare.—Resa Vahebeli 6:10-12.

8. Ngapi omu nonkango domwa-1 Johanesa 2:15-17, nadi ku vatera o rerupike eparu lyoge?

 ⁸ Rerupika eparu lyoge. Wa ha pulisira yinka youzuni waSatana yi ku hagekese kukarera Jehova. (Mat. 13:22) Wa ha pulisira uzuni ou ndi vakaume woge ndi ekoro lyoge va ku ninkise o kondjere emona mouzuni ou waSatana. (Resa 1 Johanesa 2:15-17.) Huguvara mwaJehova ogu ga tumbwidira asi ngatu pa yihepwa yetu yopampepo neyi yopanyama ‘paapa tuna yi hepere.’—Heb. 4:16; 13:5, 6.

9. Kuliza noYisewe 22:3, 7, morwasinke natu nyokerera po makongo ga hana hepero ntani yisinke nayi tu vatera tu ture po matokoro gomawa?

⁹ Nyokera po makongo ga hana hepero. (Resa Yisewe 22:3, 7.) Apa muntu a diruka, age kuhepa yimaliwa yoyinzi, ntani kuvhura yi mu ninkise a guse makongo. Yipo nye, wa ha korota yimaliwa yipo o ka rande yininke eyi ono dili kuhepa. Ayo kuvhura kukara udigu kutokora asi yimaliwa yokuhura kupi natu korota nsene nosinka tuna kara, pasihonena nsene kuna kupakera mbili vekoro lyetu ava vana kuvera. Moukaro wangoso, diworoka asi ‘makanderero’ kuvhura kutuvatera tu ture po matokoro gomawa. Jehova nga limburura makanderero goge pokukupa mbili ezi ngazi ‘kunga mwenyo goge nomagazaro goge’ yipo o ture po matokoro gomawa.—Fil. 4:6, 7; 1 Pet. 5:7.

10. Ngapi natu tulisa po vakaume wovape?

¹⁰ Tulisa po vakaume wovawa. Tantera ko vakaume woge maudigu goge nomu ono kulizuvha, unene po ava va pita moukaro wokulifana. Nsene o yi rugana, ngo lizuvha ko hansa. (Muud. 4:9, 10) Vakaume ava wa tulisire po mosirugana soge sanare, ngava twikira kukara vakaume woge. Nye wa hepa hena kutulisa po vakaume wovape mosirugana soge sosipe. Diworoka asi mokugwana kaume, twa hepa kukara nonkareso zongwa. Ngapi no tulisa po vakaume wovape? Tantera ko wopeke yininke yoyiwa eyi wa limonena mosirugana saJehova yipo va dimburure ruhafo oru wa gwana. Nampili ngomu vamwe womombungakriste nava dira kukwata egano eyi wa harera sirugana sosiruwo nasinye, vamwe ngava yi dimburura ntani ngava hara kutulisa po ukaume nove. Nye takamesa mokudira kulikangangera yininke eyi wa tompora mosirugana saJehova ntani wa ha demenena koyininke yoyidona.

11. Yisinke nava rugana valikwali yipo va twikire kukara noruhafo?

¹¹ Wa ha pa mulikwali goge usima nsene one kwa hageka sirugana seni morwa age kuvera-vera. Ano nsene ove kuvera-vera,  wa ha lizuvha udona kweyi nove nomulikwali goge mwa hageka sirugana seni. Diworoka asi one “rutu rumwe tupu” ntani one kwa tumbwidira Jehova asi ngomu twikira kukara kumwe yi kare asi yisinke ngayi horoka. (Mat. 19:5, 6) Nsene one kwa hageka sirugana seni morwa mukadoge kwa gwana ezimo mwa hana kuyindindira, yi likideni kwamunweni asi age mulyo unene kupitakana sirugana seni sanare. Mu tantereni nkenye apa asi age ‘sigava’ sokutunda kwaKarunga. (Epis. 127:3-5) Ntani hena, mu tantereni yilimonena yoyiwa eyi mwa hafera mosirugana seni. Nsene o yi rugana, kuvhura ngayi mu tumangeda nage a karere Jehova mosirugana sosiruwo nasinye.

12. (a) Ngapi natu vatera ava va kara mosirugana sosiruwo nasinye va twikire nosirugana sawo? (b) Ngapi natu va vatera va yike sirugana sawo sosipe?

¹² Nombungakriste dononzi novanavazinyetu vamwe kuvatera womosirugana sosiruwo nasinye yipo va twikire nosirugana sawo. Pasihonena, awo kuvakorangeda nokuvapa yimaliwa ndi yihepwa yopanyama ntani kuvavatera yipo va pakere mbili vekoro lyawo ava va tunga koure. (Gar. 6:2) Nsene vanavazinyetu womosirugana sosiruwo nasinye kwava tuma mombungakriste zeni, wa ha gazara asi awo kwa rugana yoyidona. * Nye va vatera va yike usimbu ukaro wawo woupe. Va tambura nokuvapandadeka koyirugana yawo eyi va rugana, nampili uvera kuna kuvaninkisa va dire kurugana yoyinzi ngwendi nare. Va diva momunene. Lirongera  ko kediwo lyawo nedeuro eli va gwana.

13. Ngapi natu vatera vanavazinyetu ava va gwana sirugana sosipe?

¹³ Twa hepa hena kuvatera ava va gwana sirugana sosipe yipo va gwane yirugana noku nava tunga ntani nayimwe hena eyi va hepa. Kuvhura va hepe mauzera gamwe kuhamena oku nava futira yininke yawo yimwe. Nye unene po, awo kuna hara tu kwate egano ukaro wawo. Nampo awo kuvera-vera ndi kuna kupakera mbili gumwe gekoro ogu a vere. Ndi nampo vana guwu morwa kwa fisa gekoro lyawo. * Ndi nampo vana guwu morwa kuna kurongora vakaume vawo wokombungakriste ezi vana kutunda. Ayo kugusa siruwo komeho va yike ukaro wawo woupe.

14. Ngapi omu vanavazinyetu va vaterere munazinyetu gomukadi a tambure ukaro wendi woupe?

¹⁴ Nsene o zuvhisa kumwe nawo ntani nokuvakorangeda kupitira mosihonena soge, kuvhura o va vatere va yike sirugana sawo sosipe. Munazinyetu gomukadi ogu ga ka zuvhisira nomvhura dononzi kosirongo nasopeke kwa tanta asi: “Mosirugana sange sanare, ame ngani rugana malirongo goBibeli nkenye ezuva. Nye mosirugana sange sosipe, ayo ngayi digopere nge kulikida muntu etjangwa ndi vidiyo mokuzuvhisa. Nye vanavazinyetu womombungakriste ezi na kere, ngava zigida nge ni ze nawo komatengwiroko nokomalirongo gawo goBibeli. Upampi ou va likidire vanavazinyetu pokurugana malirongo goBibeli kwa vaterere nge ni dire kufa unye. Na lirongere omu nani tameka kuzogera novantu. Nayinye eyi kwa vaterere nge ni kare noruhafo.”

15. Ngapi omu no hafera sirugana soge sosipe?

¹⁵ Kuvhura o hafere sirugana soge sosipe. Wa ha lizuvha asi ove kwa rugene yoyidona mosirugana soge sanare ndi asi ove kwato mulyo. Gazadara ko omu Jehova  ana kukuvatera ntani twikira kuzuvhisa. Honena Vakriste wovalimburukwi womosiruwo sovapositoli. Nkenye oku va kere, awo ngava “zi mwa za sirongo, va udise mbudi zongwa.” (Yirug. 8:1, 4) Nsene o twikira kuzuvhisa, ove ngo gwana yitundwamo yoyiwa. Pasihonena, vazuvhisi wokukarerera ava va tjidire mosirongo simwe kwa dirukilire mosirongo sopopepi oku va hepere vazuvhisi wokuuyunga eraka lyawo. Konyima zomakwedi gongandi, awo kwa tulisire po nombungagona dononzi.

16. Yisinke no rugana o hafere sirugana soge?

¹⁶ “Ehafo lyomwaHOMPA, yilyo nonkondo deni.” (Neh. 8:10) Ruhafo rwetu kutunda kelikwatakano eli twa kara nalyo naJehova nye kapisi mosirugana esi twa kara naso nampili ngomu twa si hara unene. Yipo nye, nsene tuna hara kugwana ruhafo, twa hepa kukara pepi naJehova nokumuhuguvara. Diworoka asi ove kwa here sirugana soge sanare morwa ove kwa here kuvatera vantu. Yipo nye, litura mo unene mosirugana soge yipo o mone omu Jehova ngaku vatera o si hare naso.—Muud. 7:10.

17. Yisinke twa hepa kudiworoka kuhamena sirugana esi tuna kara naso ngesi?

¹⁷ Twa hepa kudiworoka asi elikwatakano lyetu naJehova alyo lyanarunye, nye sirugana esi tuna kara naso sopokaruwogona tupu. Mouzuni woupe, nampo natuvenye ngatu ka gwana yirugana yoyipe. Aleksey ogu tuna tumbura pomuhowo ga yi pura asi ukaro wendi woupe ngau ka mu vatera komeho. Age kwa tanta asi: “Na yi divire asi Jehova yipo ga kara ntani uzuni woupe yipo ngau kara, nye ame kwa lizuvhire ngwendi ure ga kara ntani uzuni woupe kapi una kuwiza usimbu. Nye ngesi kuna kulizuvha asi pepi naJehova nina kara ntani uzuni woupe ntaantani u wize.” (Yirug. 2:25) Yi kare asi sirugana musinke twa kara naso, tu twikireni kuhedera Jehova pepi. Age kapi nga tu sigilira, nye nga tu vatera tu gwane ruhafo mwankenye sirugana tuna kumuruganena nkenye oku tuna kara.—Jes. 41:13.