LONGI DIA 34
Aweyi Tulenda Kadila ye Kiese avo tutambwidi Kiyekwa Kiampa?
“Nzambi kakondelo unsongi ko kavilakana e salu kieno yo zola nusongele muna nkumbu andi.”—AYIB. 6:10.
NKUNGA WA 38 Yave Okukumika
MANA TULONGOKA *
1-3. Ekuma e mpangi zankaka bena muna salu kia ntangwa ke ntangwa balenda sobelwa e kiyekwa?
MPANGI Robert yo nkaz’andi Mary Jo bavova vo: “Vava twalungisa mvu 21 muna salu kia kimisionario, mase meto bayela. Twakala ye kiese mu kwenda kubalunga-lunga. Kansi, twakendalala mpe wau twasisa e fulu kina twatoma zolanga.”
2 Mpangi William yo nkaz’andi Terrie bavova vo: “Twadila kwayingi vava twazaya wo vo mu kuma kia vimpi weto, ke tuvutuka diaka ko muna salu kieto. E tima dieto dia sadila Yave mu nsi ya kinzenza diafokoka vana vau.”
3 Mpangi Aleksey wavova vo: “Twazaya wo vo atantu eto bazola kanga e Betele ina yasadilanga. Kansi e lumbu bakanga e Betele, yeto awonso twakendalala kikilu.”
4. Nkia yuvu tubakila e mvutu mu longi diadi?
4 Yindula mpe mpangi zayingi basadilanga kuna Betele ye mpangi zankaka ana batambula kiyekwa kiampa. * Diampasi kikilu diakala kwa mpangi zazi zakwikizi mu yambula e salu kina batoma zolanga. Adieyi dilenda kubasadisa mu kulukilwa e nsobani? Adieyi olenda vanga muna kubasadisa? E mvutu za yuvu yayi zilenda kutusadisa mu kulukilwa e nsobani zivangamanga muna zingu kieto.
ADIEYI DILENDA KUTUSADISA MU KULUKILWA E NSOBANI?
Ekuma dikadilanga diampasi kw’awana bena mu salu kia ntangwa ke ntangwa mu sisa kiyekwa kiau? (Tala e tini kia 5) *
5. Nkia mambu mampasi malenda kutubwila avo kiyekwa kieto kisobele?
5 Muna salu kia ntangwa ke ntangwa, kiakala muna salu kia kimisionario, kimviti a nzila yovo kia Betele, tuvanganga yikundi yayingi yo longoka yangalela e fulu kina tusadilanga. Muna kuma kiaki, tukendalalanga kwayingi vava tuyambulanga e kiyekwa kieto mu kuma kia nsobani zivangamanga. Viangi kiayingi tumonanga kia awana twasisa yo tokana kwayingi mu kuma kiau, musungula avo tuyambwidi e kiyekwa kieto mu kuma kia lubangamu. (Mat. 10:23; 2 Kor. 11:28, 29) Vana ntandu, avo tutambwidi kiyekwa kiampa yovo vutuka ku nzo, dilenda kala diampasi mu kulukilwa e fu ya kisi nsi. Mpangi Robert yo nkaz’andi Mary Jo bavova vo: “Ke twakulukilwa diaka zingu kia nsi eto ko. Kana nkutu sila umbangi muna nding’eto dianzenza diakala kwa yeto. Twayimwenanga nze anzenza muna nsi eto.” E diambu diankaka dilenda kala diampasi i sadila e nzimbu mu mpila ina ke twayindulanga ko. Ediadi dilenda fila muntu mu kendalala, kala ye lukatikisu yo mona o wonga. Adieyi dilenda kutusadisa?
Diambote mu kwamanana kumika e kikundi kieto yo Yave yo kumbunda e vuvu (Tala e tini kia 6-7) *
6. Aweyi tulenda kumikina kikundi kieto yo Yave?
6 Kumika e kikundi kiaku yo Yave. (Yak. 4:8) Aweyi tulenda wo vangila? Kala ye vuvu vo Yave ‘owanga e sambu’ yaku. (Nku. 65:2) E sono kia Nkunga 62:8 kivovanga vo: “Nutendwela ntima mieno kuna kena.” Yave “olenda vanga mayingi lutila nkutu mawonso tulombanga yovo yindula.” (Ef. 3:20) Nzambi ke vanganga kaka mana tulombanga ko muna sambu. Avo vena ye diambu dikututokanesanga, Yave olenda dio singika mu mpila ina ke twayindulanga ko.
7. (a) Adieyi dilenda kutusadisa mu kwamanana kumika kikundi kieto yo Yave? (b) Landila e sono kia Ayibere 6:10-12, nkia nluta tubaka avo tukwamanene sadila Yave ye kwikizi kiawonso?
7 Muna kumika e kikundi kieto yo Yave, divavanga vo twatanganga e Bibila lumbu yawonso yo badika mana tutanganga. Mpangi mosi wasalanga e salu kia kimisionario wavova vo: “Kwamanana kala ye nsambila ya esi nzo yo kubika malongi ma tukutakanu nze una wavanganga vitila kiyekwa kwaku kiasoba.” Vana ntandu, kwamanana yikama e salu kia samuna e nsangu zambote muna nkutakani aku yampa. Yave osungamenanga awana bekunsadilanga ye kwikizi kiawonso kana una vo ke belendanga diaka vanga mawonso ko bavanganga.—Tanga Ayibere 6:10-12.
8. E mvovo mina muna 1 Yoane 2:15-17, aweyi milenda kusadisila mu kala ye zingu kiavevoka?
8 Vevola e zingu kiaku. Kuyambula ko vo o ntelamw’o moyo wa nza ya Satana ‘wafinangesa’ e salu yaku ya mwanda. (Mat. 13:22) Kuyambula ko vo wantu a nza, akundi yovo yitu yaku bavukumuna mu landa e ngindu za vava kala ye mavua mayingi mu kuyitanina mu nza yayi ya Satana. (Tanga 1 Yoane 2:15-17.) Bunda e vuvu muna Yave, ona osianga e nsilu vo okutuvana yawonso tuvuidi o mfunu muna mwanda ye muna nitu “muna ntangwa ifwene.”—Ayib. 4:16; 13:5, 6.
9. Landila e sono kia Ngana 22:3, 7, ekuma dinina diamfunu mu venga dia e mfuka avo ke divuilu kwandi mfunu ko? Adieyi dilenda kutusadisa mu baka nzengo zambote?
9 Venga e fu kia dia e mfuka zakondwa o mfunu. (Tanga Ngana 22:3, 7.) E nsobani zilenda fila muntu mu fwasa nzimbu zayingi yo dia e mfuka. Muna lembi dia e mfuka zayingi, uyikenga walembi sumbanga e lekwa ina kuvuidi kikilu mfunu ko. Vava tuwanananga ye mambu mampasi nze lunga-lunga muntu una vo mbevo, dilenda kala diampasi mu zaya tezo kia mfuka tulenda dia. Avo diambu diadi onuananga diau, sungamena vo e “sambu ye ludodokelo” lulenda kusadisa mu baka nzengo zambote. Yave ovana e mvutu za sambu yaku yo kuvana luvuvamu ‘luyingila ntim’aku ye makani maku.’ Muna mpila yayi, olenda kala ye ngindu zavuvama yo baka nzengo zambote.—Fili. 4:6, 7; 1 Pet. 5:7.
10. Aweyi tulenda vangila yikundi yampa?
10 Kala ye ngwizani ambote ye yitu ye akundi aku. Diambote mu zayisanga e ntokani zaku kwa akundi aku, musungula awana bawanana ye mambu nze mana mabwididi. O vanga wo dilenda kusadisa mu kala ye ngindu zavuvama. (Kim. 4:9, 10) Awana wavanga yau kikundi kuna zunga wasadilanga bekwamanana kala akundi aku. Kansi avo ofidilu ku zunga kiankaka, ofwete vanga yikundi yampa. Sungamena vo muna kala ye akundi, divavanga vo wakala nkundi ambote. Aweyi tulenda vangila yikundi yampa? Zayisanga kw’akaka una Yave kekusambulwilanga. Yambula vo akaka bamona e kiese omonanga muna salu kia Yave. Dilenda kala vo akaka muna nkutakani ke bebakula ko e kuma oyangalelanga e salu kia ntangwa ke ntangwa. Kansi, akaka balenda landa e mbandu aku yo kituka se akundi aku. Kuna diak’e sambu, ofwete keba muna lembi tunta e sungididi kiasaka muna mambu wavanga muna salu kia Yave. Ofwete venga mpe e fu kia vovelanga kaka e mpasi wawanana zau.
11. Adieyi olenda vanga muna kwamanana kala ye longo lwakiese?
11 Ezak’e ntangwa, divavanga vo akazi bayambula e salu kia ntangwa ke ntangwa avo mosi muna yau obakamene kimbevo. Avo e diambu diadi dinubwididi, kutumbi nkaz’aku ko. Kuna diak’e sambu, avo ngeye obakamene kimbevo, kuyitumbi ko ngatu yindula vo nkaz’aku okendelekele. Sungamena vo nu “nitu mosi,” nsilu nuasia kwa Yave vo nulunga-lunga muntu yo nkwandi, kana nkutu nkia diambu dilenda kunubwila. (Mat. 19:5, 6) Akazi balenda mpe yambula e salu kia ntangwa ke ntangwa avo nkento oyimiti lembi wo kana. Avo e diambu dia mpila yayi dinubwididi, nusadisa mwan’eno kabakula vo yandi osundidi o mfumu ke mu kiyekwa nuakala kiau ko. Nuzayisanga o mwan’eno vo yandi i “nsendo” watuka kwa Nzambi. (Nku. 127:3-5) Nunzayisanga mpe e mambu makiese nuawanana mau muna salu kia ntangwa ke ntangwa. Ediadi dilenda kunkasakesa mu kota muna salu kia ntangwa ke ntangwa.
AWEYI AKAKA BALENDA SADISILA?
12. (a) Aweyi tulenda sadisila awana bena muna salu kia ntangwa ke ntangwa mu kwamanana muna salu kiau? (b) Adieyi tulenda vanga muna sadisa awana batambula kiyekwa kiampa mu kulukilwa e nsobani?
12 Diakiese dikalanga mu mona una mpangi zayingi besadisilanga awana bena muna salu kia ntangwa ke ntangwa. Akaka bezolanga kubakasakesa mu kwamanana muna salu kiau. Akaka bekubakayilanga finzimbu yovo lukau lwankaka. Vena mpe ye mpangi zankaka bekuyivananga mu sadisa e yitu ya awana bena mu salu kia ntangwa ke ntangwa kimana bakwamanana muna salu kiau. (Ngal. 6:2) Avo mpangi wakala muna salu kia ntangwa ke ntangwa otambwidi kiyekwa kiampa muna nkutakani eno, ediadi ke disongele ko vo mpangi katoma lungisa salu kiandi ko yovo diambu diambi kavanga. * Kansi, vanga mawonso muna kunsadisa kimana kakulukilwa e nsobani. Toma kuntambula yo kunsanisina mu kuma kia salu kasala kana una vo o unu ke lendanga diaka vanga mayingi ko mu kuma kia mayela. Vanga e ngolo muna toma kunzaya. Olenda longoka mayingi muna zayi, umbangu ye ndekwa zandi za vangila mambu.
13. Nkia lusadisu tulenda vana kw’awana betambulanga kiyekwa kiampa?
13 Kuna lubantiku, ampangi awaya balenda vava lusadisu muna solola nzo, fulu kia bakila e kalu, salu yovo lekwa yankaka. Balenda mpe vava zaya mayingi mu kuma kia zingu kia lumbu ke lumbu, nze futa e mpaku ye mambu mankaka. Edi betoma vuanga o mfunu kwa yeto i diadi: Bakula mana benuananga mau, ke kubafwila nkenda ko. Dilenda kala vo mosi muna yau yovo yitu kiau obakamene kimbevo. Balenda mpe kala bakendalala mu kuma kia lufwa lwa nzolw’au. * Dilenda kala mpe vo dila bedilanga mu kuma kia viangi kia akundi au basisa. Ntangwa divavanga muna zizidila o mambu mama mawonso.
14. Aweyi ateleki akaka basadisila mpangi mosi ankento mu kulukilwa e zunga kiampa?
14 O lusadisu lwaku ye mbandu aku ilenda sadisa e mpangi zazi mu kulukilwa e nsobani. Mpangi mosi ankento wasadila ku nsi ya kinzenza wavova vo: “Kuna zunga yasadilanga, lumbu yawonso yafilanga e longi dia Nkand’a Nzambi. Kansi kuna zunga kiampa, diampasi diakala mu tangila muntu Nkand’a Nzambi yovo songa video muna salu kia umbangi. Kansi, ateleki a nkutakani yampa bambokelanga mu kwenda vutukila kingula o wantu yo fila longi dia Nkand’a Nzambi. Vava yamona o vema yo unkabu wa mpangi zazi, yayantika yangalela e zunga kiampa. Yalongoka una ndenda yantikila e moko yo wantu muna zunga kiampa. Mawonso mama mansadisa mu vutulwisa e kiese kiame.”
KUYOYI KO!
Uyivana muna salu kia umbangi muna zunga kiampa (Tala e tini kia 15-16) *
15. Nkia nsambu olenda vua avo otambwidi kiyekwa kiampa?
15 O tambula kiyekwa kiampa dilenda kutwasila nsambu zayingi. Kubadikila nsobani yayi ko nze vika sia vo kwatoma kuyivananga ko muna salu wasalanga yovo kuna diaka mfunu ko. Sia e sungididi muna mpila ina Yave kekusadisilanga yo kwamanana samuna e nsangu zambote. Tanginina Akristu akwikizi a tandu kiantete. Kiakala nkia fulu bakala, ‘basamunanga e nsangu zambote za diambu dia Nzambi.’ (Mav. 8:1, 4) E ngolo ovanganga mu kwamanana samuna e nsangu zambote zilenda twasa nluta miayingi. Kasikil’owu, aviti a nzila ana bayingwa mu nsi mosi yo yaluka ku nsi yankaka ina vo yavuanga o mfunu wa ateleki bevovanga e ndinga ya nsi ina batuka. Ke vavioka ngonde zayingi ko, baziula buka yayingi yo nungunuka mu nzaki.
16. Adieyi dilenda kusadisa mu kala ye kiese muna kiyekwa kiaku kiampa?
16 Nkand’a Nzambi uvovanga vo: “E kiese kia Yave i fika kieno.” (Nek. 8:10) Dialudi vo tutoma zolanga e kiyekwa kieto. Kansi, e tuku dia kiese kieto i sadila Yave, ke kiyekwa tuna kiau ko. Muna kuma kiaki, kwamanana kumika e kikundi kiaku yo Yave yo kunlomba ngangu, luludiku ye lusadisu. Sungamena vo edi diasadisa mu yangalela e zunga kina wateka kala i ngolo wavanganga muna sadisa o wantu muna zunga kiakina. Sia o ntim’aku muna kiyekwa kiaku kiampa yo mona una Yave kekusadisila mu yangalela kiyekwa kiaku.—Kim. 7:10.
17. Adieyi tufwete sungamenanga mu kuma kia yiyekwa tuna yau o unu?
17 Kuvilakani ko vo sadila Yave i diambu tukwamanana vanga yakwele mvu, kansi e kiyekwa kiaku kia kolo kiandwelo. Muna nz’ampa, nanga e yiyekwa tuna yau o unu soba isobwa. Mpangi Aleksey ona tuyikidi kala okwikilanga vo e nsobani zivangamanga o unu zikunsadisanga mu kala wakubama mu kuma kia nsobani zivangama kuna ntwala. Wavova vo: “Tuka kolo ikwikilanga vo Yave una, e nz’ampa kwiza ikwiza. Kansi, yamonanga vo ke ikwiza wau ko. Kansi owau, imonanga vo Yave una va ndambu ame, e nz’ampa mu finama kaka ina.” (Mav. 2:25) Muna kuma kiaki, avo kiyekwa kiampa otambwidi, kumika kikundi kiaku yo Yave. Kesinga kubembola ko. Kiakala nkia kiyekwa una kiau yovo nkia fulu wina, Yave okusadisa mu kwamanana kala ye kiese muna salu kiandi.—Yes. 41:13.
NKUNGA WA 90 Tukasakesa Muntu yo Nkwandi
^ tini. 5 Ezak’e ntangwa, ampangi bena muna salu kia ntangwa ke ntangwa balenda yambula e kiyekwa kiau yovo tambula kiyekwa kiampa. Mu longi diadi, tubadika maka mambu mampasi bewanananga mau mpangi zazi ye dina balenda vanga muna kulukilwa e nsobani. Tubadika mpe dina akaka balenda vanga muna kubakasakesa yo kubasadisa. E nkanikinu tubadika mu longi diadi milenda sadisa konso muntu mu yeto mu kulukilwa e nsobani.
^ tini. 4 Muna kuma kia kinunu, mpangi zayingi bakala ye malau mayingi ma salu beyambulanga e yiyekwa yau kwa mpangi ana bakinu aleke. Tala e longi dina ye ntu a diambu: “Tatidila Luvuvamu lwa Ntima Kana Nkutu Vava Mambu Mesobanga” muna Eyingidilu dia Okutoba 2018.
^ tini. 12 Avo ampangi bena muna salu kia ntangwa ke ntangwa batambwidi kiyekwa kiampa, akuluntu bafwete twika e nkand’a kimbangi vana vau muna nkutakani yampa. Muna mpila yayi, ke beviokesa kolo kiandá ko muna vutukila sala se aviti a nzila, akuluntu yovo selo ya salu.
^ tini. 13 Tala malongi mena muna Despertai! No. 3 ya mvu wa 2018 ina yo ntu a diambu “Como lidar com a dor da morte.”
^ tini. 57 FWANISWA: Akazi mosi bayambwidi e salu kia kimisionario mu nsi ya kinzenza yo kanina ampangi za nkutakani au kuna nkenda zawonso.
^ tini. 59 FWANISWA: Kuna nsi au ya kingutukila, akazi awaya besambanga kwa Yave kimana kabasadisa mu zizidila e mpasi.
^ tini. 61 FWANISWA: Muna lusadisu lwa Yave, akazi awaya bavutukidi muna salu kia ntangwa ke ntangwa. Besadilanga e ndinga balongoka muna salu kia kimisionario muna sila umbangi kwa nzenza bena mu zunga kia nkutakani au yampa.
