1-3. Midimu ya bana betu badi mu mudimu wa ku dîba ne ku dîba idi mua kuimana bua malu kayi?

ROBERT ne Mary Jo badi bavuluka bamba ne: “Tuetu bamane kuenza mudimu wetu wa bumisionere bimpe munkatshi mua bidimu 21, baledi betu bonso banayi bakatshioka, kabatshiyi ne makanda. Tuvua ne disanka dia kuya kubalama, kadi bivua bitubungamije bikole bua mutuvua bashiye muaba ukavua mulue bu kuetu menemene.”

² William ne Terrie badi bamba ne: “Pakatuambilabu ne: katuvua mua kupingana mu ditunga dituvua tuenzela mudimu wetu bualu tuvua tusama, tuakadila. Dijinga dituvua nadi dia kuenzela Yehowa mudimu kubabende diakapueka ne mâyi.”

³ Aleksey udi wamba ne: “Tuvua bamanye ne: baluishi betu bavua bakeba kukanga Betele utuvua. Kadi pakenzekabi, ne tuetu kumbuka ku Betele, biakansama anu ku muoyo.”

4. Nnkonko kayi ituandamuna mu tshiena-bualu etshi?

⁴ Pa kumbusha bana betu aba, kudi kabidi bena ku Betele ne bana betu bakuabu ba bungi badi mu mudimu wa ku dîba ne ku dîba badibu bashintulule midimu. * Bidi mua kukolela bana betu ba balume ne ba bakaji aba bua kulekela mudimu udibu banange bikole. Ntshinyi tshidi mua kubambuluisha bua bibidilangane ne nsombelu padi mudimu wabu wimana? Mmunyi muudi mua kubambuluisha? Mandamuna a nkonko eyi adi mua kutuambuluisha tuetu bonso padi nsombelu wetu ushintuluka.

5. Midimu yetu yoyi mimane, ntshinyi tshidi mua kutufikila?

⁵ Nansha tuetu ku Betele anyi mu midimu mikuabu ya ku dîba ne ku dîba, tudi mua kufika ku dinanga bantu bikole, too ne muaba utudi tuenzela mudimu. Mudimu wetu wowu muimane bua bualu kampanda anyi kansanga, tudi mua kumvua bibi menemene. Bana betu badi bashala badi mua kutusamina muoyo bikole, ne tudi mua kusamisha mutu bua bualu buabu, nangananga tuetu babashiye bualu baluishi bavua batukengesha. (Mat. 10:23; 2 Kol. 11:28, 29) Bualu bukuabu, padibu batushintulula midimu anyi nansha patudi tupingana kuetu, misangu ya bungi bitu bitamba kutukolela bua kuibidilangana ne nsombelu. Robert ne Mary Jo badi bamba ne: “Tukavua bapue bilele bia kuetu muoyo, ne bikavua bitukolele too ne bua kuyisha mu muakulu wetu wa ku dibele. Kuetu kukavua bu kuabende.” Bana betu badi midimu yabu mimane badi mua kupeta diakamue lutalu lua makuta. Badi mua kudimona bapange tshia kuenza, bashikile, ne batekete mu mikolo. Ntshinyi tshidi mua kubambuluisha?

6. Mmushindu kayi utudi mua kushala pabuipi ne Yehowa?

⁶ Shala pabuipi ne Yehowa. (Yak. 4:8) Mushindu kayi? Mueyemena yeye “Muteleji wa disambila.” (Mis. 65:2) ‘Pumuna muoyo webe kumpala kuende.’ (Mis. 62:8) Yehowa udi mua kuenza “bivule bipitshidile kule ne kule malu onso atudi tulomba anyi tuelela meji.” (Ef. 3:20) Kena utuenzela anu malu atudi tumulomba mu masambila to. Udi mua kujikija ntatu yetu mu mushindu utuvua katuyi belele meji.

7. a) Ntshinyi tshiatuambuluisha bua kushala pabuipi ne Yehowa? b) Ntshinyi tshidi Ebelu 6:10-12 utujadikila tuetu batungunuke ne kuenzela Yehowa mudimu ne lulamatu?

⁷ Bua kushala pabuipi ne Yehowa, ikala ubala Dîyi diende dituku dionso ne welangana meji a biudi ubala. Muanetu mukuabu uvua misionere kale udi wamba ne: “Tungunukayi ne kuenza ntendelelu wa mu dîku pa tshibidilu ne kulongolola bisangilu anu bu panuvua mu mudimu.” Bualu bukuabu, tungunuka ne kudifila mu mudimu wa kuyisha mu tshisumbu tshiudi mpindieu. Yehowa udi uvuluka bantu badi batungunuka ne kumuenzela mudimu ne lulamatu, nansha bobu kabayi mua kuenza bionso bivuabu benza kumpala.​—Bala Ebelu 6:10-12.

8. Mmunyi mudi mêyi adi mu 1 Yone 2:15-17 mua kukuambuluisha bua kubenga kudikebela bintu bia bungi?

⁸ Kukebi bua kuikala ne bintu bia bungi to. Kulekedi tunyinganyinga tua mu ndongoluelu wa  Satana ‘tukufimpakaja,’ upanga mua kuenzela Yehowa mudimu to. (Mat. 13:22) Bena panu anyi balela ne balunda badi ne muoyo wa kukuepula ku ntatu badi mua kukuambila ne: bua kuikala bimpe, anu wewe ne tente mu nzubu, tente pambelu. Kubateleji to. (Bala 1 Yone 2:15-17.) Eyemena Yehowa. Mmulaye bua kutupesha bionso bitudi tukengela “pa dîba dikumbane.” Neatuambuluishe bua ditabuja dietu dikale anu dikole, ne bua katupampakanyi; neatupeshe kabidi bintu bia ku mubidi bitudi tukengela.​—Eb. 4:16; 13:5, 6.

9. Bilondeshile Nsumuinu 22:3, 7, bua tshinyi ki mbimpe kudibueja mu mabanza a tshianana? Ntshinyi tshidi mua kutuambuluisha bua kuangata mapangadika mimpe?

⁹ Kudibueji mu mabanza a tshianana to. (Bala Nsumuinu 22:3, 7.) Kumuangala kudi mua kututudisha makuta a bungi, ne dîba adi mbipepele bua kubuela mabanza. Nunku ki mbimpe kusomba makuta bua kusumba bintu bitudi katuyi tukengela menemene to. Padi malu matutonde, bu mudi patudi tusamisha, bidi mua kutukolela bua kumanya bungi bua makuta atudi mua kusomba. Biobi bikufikile, vuluka ne: “disambila ne disengelela” bidi mua kukuambuluisha bua kuangata mapangadika mimpe. Yehowa neandamune masambila ebe, ukupesha ditalala dikala mua ‘kulama muoyo webe ne bieledi biebe bia meji,’ ukuambuluisha bua kutukija bua kumona mua kuangata mapangadika mimpe.​—Filip. 4:6, 7; 1 Pet. 5:7.

10. Ntshinyi tshitudi mua kuenza bua kupeta balunda bakuabu?

¹⁰ Keba balunda bimpe. Ambila balunda bimpe muudi umvua, nangananga aba bakadi bapitshile mu ntatu ya buena yebe. Kuenza nunku kudi mua kukuambuluisha bua kudiumvua bimpe. (Muam. 4:9, 10) Balunda baudi mushiye abu nebashale anu balunda bebe. Mpindieu mbimpe ukebe balunda bakuabu muaba uukadi. Vuluka, bua wewe kupeta balunda, mbimpe wewe muine wikale mulunda muimpe. Ntshinyi tshiudi mua kuenza bua kupeta balunda bakuabu? Ambila bantu malu mimpe audi mupete mu mudimu wa Yehowa bua bamone mudi mudimu au mukupeteshe disanka. Bamue bana betu baudi nabu mu tshisumbu kabena mua kumvua tshiudi munangile mudimu wa ku dîba ne ku dîba to. Kadi bakuabu badi mua kusanka bua malu audi ubambila, balua balunda bimpe. Kadi wamanya, kutambi kukoka ntema ya bantu ku malu audi muenze ne ku malu adi akunyingalaja to.

11. Ntshinyi tshinudi mua kuenza bua nuikale anu ne disanka mu dibaka?

¹¹ Mudimu wenu wowu muimane bualu muena dibaka nebe udi usama, kumuedi tshilumbu pambidi to. Peshi wowu muimane bualu udi usama, kudipishi wela meji ne: udi muele muena dibaka nebe mâyi ku makasa to. Vuluka, nudi “mubidi umue,” ne nuvua balayangane kumpala kua Yehowa bua kutabalelangana mu masanka ne mu ntatu. (Mat. 19:5, 6) Mudimu wowu muimane bualu mukaji mmupete difu, enzayi muenu muonso bua muana unualela amanye ne: udi ne mushinga wa bungi kunudi kupita mudimu unuvua nuenza. Kanumuedi  tshilumbu pa mbidi nuamba ne: mudimu wenu uvua muimane bua bualu buende to. Kadi nuikale numuambila ne: nudi numumona bu ‘difutu’ dia kudi Nzambi. (Mis. 127:3-5) Ikalayi kabidi numulondela malu mimpe a panuvua mu mudimu. Kuenza nunku kudi mua kumusaka bua kuenzelaye pende Yehowa mudimu wa ku dîba ne ku dîba anu bu nuenu.

12. a) Mmunyi mutudi mua kuambuluisha bantu badi mu midimu ya pa buayi bua kutungunuka nayi? b) Mmunyi mutudi mua kubambuluisha bua bibidilangane ne nsombelu wabu mupiamupia?

¹² Diakalenga, bisumbu bia bungi ne bena Kristo ba bungi badi benza muabu muonso bua kuambuluisha bana betu badi mu midimu ya pa buayi bua batungunuke nayi. Mushindu kayi? Badi babakankamija bua kutungunuka ne midimu yabu, babambuluisha ne makuta anyi ne bintu bikuabu, peshi babambuluisha bua kuikala kutangila bena mu mêku abu badibu bashiye. (Gal. 6:2) Bana betu bavua mu mudimu wa pa buawu bobu balue mu tshisumbu tshienu, kuedi meji ne: midimu yabu mmimane bualu kabavua benza mudimu bimpe anyi bualu mbenze bualu bubi to. * Kadi bambuluisha bua bibidilangane ne nsombelu wabu mupiamupia. Bakidila ne disanka ne bela kalumbandi bua mudimu udibu benze, nansha masama wowu abapangisha mua kuenza amue malu mpindieu. Dienzeja bua kubamanya. Enza bua malu onso adibu bamanye ne benze, ne bionso bidibu balonge bikuambuluishe pebe.

13. Tshitudi mua kuenza bua kuambuluisha bana betu badi midimu yabu mimane ntshinyi?

¹³ Bana betu badi midimu yabu mimane badi mua kuanji kuikala dijinga ne muaba wa  kusombela, mudimu wa kuenza, anyi bintu bikuabu bidi bikengela menemene. Badi kabidi mua kuikala dijinga ne kumanya mua kuenza amue malu a buatshia buila, bu mudi mua kupeta mâyi ne kumanya muaba udi bintu mushinga muimpe. Tshidibu natshi dijinga menemene ntshia ne: tuditeke pa muaba wabu, kadi katubangatshi bu bantu badi benza luse to. Badi mua kuikala basamisha mutu bua mua kupita ne masama adibu nawu anyi adi nawu bena mu mêku abu. Badi mua kuikala batshidi ne kanyinganyinga ka mudibu bafuishe. * Badi mua kuikala kabidi bajinga balunda babu badibu bashiye, bumvua bibi, nansha bobu kabayi bamba bualu. Malu onso aa adi mua kuikala abalubakaja, ne bidi mua kuangata matuku a bungi bua wowu kujika.

14. Mmunyi muvua bana betu ba mu tshisumbu kampanda bambuluishe muanetu wa bakaji bua kuibidilangana ne teritware mupiamupia?

¹⁴ Wewe uyisha ne bana betu aba ne ubakankamija ku tshilejilu tshiebe, nebibambuluishe bua kuibidilangana ne nsombelu. Muanetu wa bakaji uvua muenze mudimu kubabende munkatshi mua bidimu bia bungi udi wamba ne: “Pamvua kubabende, mvua ndongesha bantu Bible dituku dionso. Kadi pangakapingana kuetu, bua kupeta nansha mpunga wa kubadila muntu mvese anyi kuleja muntu filme mu buambi bivua bualu bukole. Kadi bana betu bavua bandomba bua kuya nabu mu buambi, bua kupinganyina bantu bavuabu bayukile nabu ne bua kulonga Bible ne bantu. Pamvua mmona muvua bana betu ba balume ne ba bakaji ba tshisumi balonga Bible ne bantu, ne bantu abu baya kumpala, biakamfikisha ku dinanga teritware wetu. Ngakalua kumanya mua kutuadija kuyukila ne bantu. Malu onso aa akangambuluisha bua kupetulula disanka.”

15. Ntshinyi tshiudi mua kuenza bua malu kuendawu bimpe muaba uukadi mpindieu?

¹⁵ Udi mua kuenza bua malu ende bimpe muaba uukadi mpindieu. Kuedi meji ne: midimu yebe mmimane bualu udi muenze mudimu bibi anyi ne: kutshiena ne mushinga to. Ela meji a malu adi Yehowa ukuenzela, ne tungunuka ne kuyisha. Idikija bena Kristo ba lulamatu ba kumpala. Bonso “bavuabu batangalaje bakaya mu buloba bujima  benda bambila bantu lumu luimpe lua dîyi.” (Bien. 8:1, 4) Wewe udienzeja bua kutungunuka ne kuyisha, neupatule bipeta bimpe. Tshilejilu, bavua bipate bampanda-njila mu ditunga kampanda, bobu kuya mu ditunga diena mutumba. Mu ditunga adi bavua kabidi dijinga ne bamanyishi ba bungi bavua bakula muakulu uvua bampanda-njila abu bamanye. Mu ngondo mikese tshianana, bantu ba bungi bakitaba bulelela, bobu kuenza tusumbu tua bungi.

16. Ntshinyi tshidi mua kukupetesha disanka muaba uukadi mpindieu?

¹⁶ “Disanka dia Yehowa mbukole buenu.” (Neh. 8:10, dim.) Tudi tupeta disanka dia bungi menemene bualu tudi mu malanda mimpe ne Yehowa, ki mbualu tudi mu mudimu kampanda to, nansha tuetu bawunange bikole. Nunku tungunuka ne kuenda ne Yehowa, umueyemena bua akupeshe meji, akulombole, ne akukuatshishe. Kupu muoyo ne: wakalua kunanga mudimu webe bualu uvua mudifile ne muoyo mujima bua kuambuluisha bantu ba muaba uuvua au to. Difila kabidi ne muoyo mujima muaba uukadi mpindieu ne mona mudi Yehowa ukuambuluisha bua kuwunanga pawu.​—Muam. 7:10.

17. Ntshinyi tshitudi katuyi mua kupua muoyo bua midimu itudi nayi lelu?

¹⁷ Katupu muoyo ne: netuenzele Yehowa mudimu bua kashidi ne tshiendelele to. Kadi midimu itudi nayi lelu nya tshitupa tshîpi, ne idi mua kushintuluka mu buloba bupiabupia. Aleksey utukadi batele udi umona ne: dishintuluka dia midimu yende didi dimuambuluisha bua kudilongolola bua dishintuluka dia midimu mu buloba bupiabupia. Udi wamba ne: “Mvua mumanye kuonso eku ne: Yehowa mmuntu mulelela, tshibi bu muikale kule; mvua mumanye kabidi ne: buloba bupiabupia nebuikalaku bushuwa, kadi mmona bu ne: ki ndelu to. Lelu wa ndaya, nkadi mmona Yehowa bu udi kumpala kuanyi menemene, mmona kabidi buloba bupiabupia anu bu ne: budi bufika mu tshitupa tshia dîba emu.” (Bien. 2:25) Nunku nansha tuetu tuenza midimu kayi, tutungunukayi ne kuenda ne Yehowa. Kakutulekela dituku nansha dimue, kadi neatuambuluishe bua kuikala ne disanka mu bionso bitudi tuenza mu mudimu wende, nansha tuetu tubienzela muaba kayi.​—Yesh. 41:13.