CHIBAABA CHAKUDIZA 34
Chakwikala naMuzañalu Neyi Yuma Yinahimpiki
“Nzambi waloña nawa hakavulamena mudimu wenu nikukeña kumwakeñeli ijina dindiku.”—HEB. 6:10.
KAMINA 38 Wakayinka Ñovu
NSAÑU YIDI MUCHIBAABA *
1-3. Yumanyi yinateli kuleñela antu adi mumudimu wampinji yejima kuhimpa mudimu wawu?
AMANAKWETU aRobert niañodawu aMary Jo ahosheli nawu: “Hanyima yakukalakala mumudimu wawumishonali yaaka 21, anvwali jetu ejima awana akatili. Twayili nakuyakamena. Hela chochu, twatiyili kutama kushiya mudimu wutwakeñeli nankashi.”
2 Amanakwetu aWilliam niañodawu aTerrie ahosheli nawu: “Chitwelukili netu tukutwesha wanyi kufunta mumudimu wetu muloña wayikatu, twadilili nankashi. Mpwila yakukeña kufunta nakukalakela kwituña dacheñi twadiña nayu, ilaña muloña wayikatu twakañenyi.”
3 Manakwetu Aleksey wahosheli nindi: “Twelukili netu akwakutukabisha akeñeleña kushinka kasanji kamutayi kunazatilileña. Ilaña, chelili ashinki twafumini haBeteli nawa chankatili nankashi.”
4. Malwihwinyi itukuhanjekahu muchinu chibaaba?
4 Amanakwetu adiña mumudimu wampinji yejima, kushilahu ninana akalakeleleña haBeteli niwena nyidimu yawu yahimpikili. * Chinateli kuyikalila awa amanakwetu niahela ashinshika kushiya mudimu wawu wakeñeshawu nankashi. Chumanyi chinateli kuyikwasha kuumika neyi kudi kuhimpika? Munateli kuyikwasha ñahi? Ñakwilu yanawa malwihu yinateli kutukwasha muchihandilu chetu neyi kunamwekani kuhimpika.
CHIMUNATELI KWILA NAKUHIMPIKA
Muloñadi chichinateli kuyikalila antu anafumi mumudimu wampinji yejima? (Talenu paragilafu 5) *
5. Yumanyi yatumwekenaña neyi mudimu wunahimpiki?
5 Hela chakwila twazatilaña mumaluña amakwawu hela haBeteli, tunateli kukeña antu niluña kutwakalakelaña. Neyi kumwekana chuma chikuletesha kushiya mudimu wetu, twaneñaña nankashi. Twayanukaña amanakwetu niahela nawa twayakamenaña, sweje-e neyi twafuminiku muloña wakutukabisha. (Mat. 10:23; 2 Kor. 11:28, 29) Cheñi, chinateli kukala nankashi kuya kwiluña dacheñi hela kufunta kwiluña kutwafumini muloña chakeñekaña kuhimpa nshakaminu. Robert niMary Jo ahosheli nawu: “Twenjilili wanyi chisemwa chetu nawa chatukalileña kushimwina mwidimi detu. Twatiyili tuhu neyi tudi añinza.” Antu amakwawu afumaña mumudimu wampinji yejima mali anateli kuyikalila. Anateli kudimona neyi aneluki wanyi chatela kwilawu, anayumbi nawa amukunkulwayi. Chumanyi chinateli kuyikwasha?
Twatela kuswina kwakwihi naYehova nikumukuhwelela (Talenu maparagilafu 6-7) *
6. Tunateli kuswina ñahi kwakwihi naYehova?
6 Swinenu kwakwihi naYehova. (Yak. 4:8) Tunateli kwila ñahi mwenimu? Kuhitila mukumukuhwelela Yehova “watiyaña mwalombañawu antu.” (Mas. 65:2) Masamu 62:8 yahoshaña nawu “ichilenu nyichima yenu kumesu indi.” Yehova “nateli kukoña yuma yabadika chikupu yuma yitwamulombaña hela yitwatoñojokaña.” (Efwe. 3:20) Bayi neyi nateli kutwinka hohu yuma yitwamulombañaku. Ilaña nateli kutwilila cheñi yuma yayivulu yitunabuli kukuhwelela, sweje-e yitunamoni netu yakala.
7. (a) Yumanyi yinateli kutukwasha kuswina kwakwihi naYehova? (b) Kwesekeja na Aheberu 6:10-12, chumanyi chinateli kumwekana neyi tutwalekahu kumukalakela Yehova nakashinshi?
7 Hakwila muswini kwakwihi naYehova, tañenuña Bayibolu mpinji yejima nikutoñojokahu chikupu. Manakwetu wumu wadiña mishonali wahosheli nindi: “Twalekenuhu kwikala nakudifukula kwachisaka nikuloñesha kupompa neyi chimwelileña mumudimu wenu.” Cheñi, twalekenuhu kuzata hakumina ñovu jenu kushimwina nsañu yayiwahi muchipompelu chenu chachiha. Yehova wanukaña antu atwalekañahu kumukalakela nakashinshi hela chakwila hiyanateli kuzata neyi chazatileñawu kunyimaku.—Tañenu Aheberu 6:10-12.
8. Mazu ekala ha 1 Yowanu 2:15-17 anateli kuyikwasha ñahi kupeleshaku chihandilu chenu?
8 Peleshenuku chihandilu chenu. Bayi mwiteja kwakama kwamukaayi kaSatana ‘kuyikañeshi’ kumukalakela Yehovaku. (Mat. 13:22) Bayi mwiteja ikakeja damukaayi hela amabwambu jenu hela antaña kuyileñela kutachika kufwila mali amukaayi kaSatanaku. (Tañenu 1 Yowanu 2:15-17.) Mukuhwelelenu Yehova watukana kutwinka yuma yejima yitwakeñaña “hampinji yatelela.”—Heb. 4:16; 13:5, 6.
9. Kwesekeja na Yishimu 22:3, 7, chalemenadi kubula kudiñija munyikudi, nawa chumanyi chinateli kutukwasha kufuukula chiwahi?
9 Neyi mudana mali bayi mukongolaku. (Tañenu Yishimu 22:3, 7.) Chakeñekaña kwikala namali neyi munakubuuka nawa chinateli kwikala chaswayi kudiñija munyikudi. Hakwila mubuli kwiñila munyikudi bayi mukongola mali kulonda mulandimu yuma yimunakubula kukeñaku. Chinateli kwikala chakala kufukula mali itwatela kukongola neyi tudi nachineñi, sweje-e neyi tudi namuyeji muchisaka. Mukukala kwamuchidiwu, anukenu nenu “[kulomba] nikulomba kwakulembelela” kunateli kuyikwasha kufuukula chiwahi. Yehova nateli kwakula kulomba kwenu nawa nateli kuyinka kuwunda kunateli “[kuhemba] nyichima yenu niyitoñojoka yenu” nawa kunateli kuyikwasha kwikala nakuwunda.—Fwi. 4:6, 7; 1 Pet. 5:7.
10. Tunateli kukwata ñahi amabwambu amaha?
10 Dikundenu nawantu anateli kuyikwasha. Lejenuku amabwambu jenu chimunakutiya nikukala kumunakumona, sweje-e amwenihu kukala neyi kumunakumona. Neyi mwila mwenimu, chikuyikwasha kutiya chiwahi. (Mukwa. 4:9, 10) Antu adiña amabwambu jenu kumwadiña akutwalekahu kwikala amabwambu jenu. Kwejima kumunakuzatila, mwatela kwikala nawamabwambu amaha. Ilukenu nenu hakwila mwikali nawamabwambu chiña mwikala akasunuka. Munateli kwikala ñahi nawamabwambu amaha? Lejenuñaku antu nkisu yimunadiluñishi mumudimu waYehova kulonda atiyi muzañalu wekalañamu. Hela chakwila amakwawu muchipompelu hiyanateli kwiluka muloña waweni wumwakeñela mudimu wampinji yejimaku, ilaña amakwawu anateli kukeña kwiluka nawa anateli kwikala amabwambu jenu. Bayi muswejaña kuhosha hansañu yinayikundami hohu enu hela yuma yimunakalakali mumudimu waYehova nihayuma yatama yimunakuhitamuku.
11. Munateli kutwalekahu ñahi kwikala namuzañalu muwulu wenu?
11 Neyi mwalekeli mudimu wenu muloña wayikatu yamwinikwenu, bayi mumwinka muloñaku. Munjila yikwawu, neyi yenu mwakatili, bayi mudinkaña nyiloña nakutoñojoka nenu yenu mwakojejeliku. Anukenu nenu mudi “mujimba wumu” nawa mwadikanini kumesu aYehova nenu mukadakamenaña wumu namukwawu hela yuma yinakali ñahi. (Mat. 19:5, 6) Neyi mwalekeli mudimu wenu muloña wakwila ñodenu wemitili, lekenu mwanenu yeluki nindi walema kubadika mudimu wenu. Mpinji yejima mulejenuña mwanenu nenu “hiwuloku” wafuma kudi Nzambi. (Mas. 127:3-5) Cheñi, mulejenu yuma yayiwahi yimwadiluñishili mumudimu wenu. Kwila mwenimu, kunateli kumukwasha mwanenu kumukalakela Yehova neyi chimwamukalakeleleña.
CHINATELI KUKWASHANAWU AMAKWAWU
12. (a) Tunateli kukwasha ñahi adi mumudimu wampinji yejima kutwalekahu namudimu wawu? (b) Tunateli kuyikwasha ñahi kulonda chihandilu chiyipeleliku?
12 Chuma chasweja kuwaha, yipompelu yayivulu niamanakwetu azataña hakumina ñovu jawu kukwasha adi mumudimu wampinji yejima kutwalekahu namudimu wawu. Elaña mwenimu kuhitila mukuyikolesha kutwalekahu namudimu wawu, kuyinkahu mali hela yuma yakeñekaña hela kuyikwashaku kwakamena yisaka yawu kumukala. (Ñal. 6:2) Neyi adi mumudimu wampinji yejima anafunti kuchipompelu chenu, bayi muyimonaña nenu anayihañi muloña azatileña chiwahi wanyi hela nenu elili yuma yatamaku. * Ilaña yikwashenu kulonda chihandilu chiyipeleliku. Yitambwilenu nawa yihamekenu hamudimu wunakalakaliwu hela chakwila yikatu yinakuyikañesha kuzata neyi chazatileñawu. Yilukenu. Dizilenu kuyuma yejima yelukawu.
13. Tunateli kuyikwasha ñahi antu anafumi mumudimu wampinji yejima?
13 Antu anafumi mumudimu wampinji yejima, mwatela kuyikeñelaku itala, kuyikwashaku muñendelu, kuyikeñelaku mudimu niyuma yikwawu yakeñekaña. Anateli cheñi kukeña kuyikwashaku kwiluka njila yakufwetelamu nyinsoku nimabiwu. Ilaña chuma chalema chakeñañawu nankashi, akeñaña nawu mwiluki kukala kwawu. Hadaha anakukatakata indi kwiji ntaña yawu diyi wakata. Hadaha adi nachineñi chakujimbesha muntu akeñawu. * Nawa, neyi adi kwakankawawu atela aneñaña muloña wakwanuka amabwambu jawu kwadiña nakuzatilawu. Hatela kuhita mpinji yeneni hakwila nawu avulameniku.
14. Chipompelu chakwashili ñahi Muhela kwinjilila kwiluña kwayiliyi?
14 Neyi mushimwinaña nawu hamu nikuyikolesha kuhitila muyilwilu yenu yayiwahi chinateli kuyikwasha kwinjilila. Muhela wunakalakeli yaaka yayivulu mwituña dacheñi wahosheli nindi: “Kunadiña nakuzatila, nalombweleña atudizi aBayibolu mafuku ejima. Chinayili nakuzatila kwacheñi chankalilileña nikutaña nsona hela kutalisha vidiyo mumudimu wakushimwina. Ilaña amanakwetu niahela ansendeleña kuya nakushimwina nawu nikulombola atudizi. Chinamweni ana amanakwetu niahela adikita anakudizisha atudizi twawu aBayibolu chanleñeleli kukeña iluña mutwashimwinineña. Nadizili chakutachika kuhanjeka nawantu kunidi iluña. Yuma yejimiyi yankwashili kwikala cheñi namuzañalu.”
TWALEKENUHU KUZATA NAÑOVU
Keñenu njila jikuyikwasha kushimwina nankashi mwiluña denu (Talenu maparagilafu 15-16) *
15. Munateli kwikala ñahi namuzañalu mumudimu wenu wawuha?
15 Munateli kwikala namuzañalu mumudimu wenu wawuha. Bayi mutoñojoka nenu mwakañenyi kuzata mudimu hela nenu mudi amukunkulwayiku. Toñojokenuña chinakuyikwashayi Yehova chayinu mpinji. Imbujolenuña akwaKristu ashinshika amumafuku awapostolu. Kwejima kwadiñawu “mumaluña ashiyashana, atachikili kushimwina mazu ansañu yayiwahi.” (Yilw. 8:1, 4) Neyi mudinkaku nakutwalekahu kushimwina munateli kufuma yuma yayiwahi. Chakutalilahu, apayiniya ahañiluwu mwituña dimu ayili nakushimwina mwituña dikwawu mwadiña kukaankila nawa mwahosheleñawu idimi dawu. Mutukweji twantesha hohu, antu amavulu enjili nakukalakala hamu nawapayiniya adiña nakukalakela kunidi iluña.
16. Munateli kwikala ñahi namuzañalu namudimu wenu wawuha?
16 “Muzañalu waYehova diyi ñovu yenu.” (Nehe. 8:10) Twekalaña namuzañalu neyi tukolesha wubwambu wetu naYehova bayi mumudimu wetuku hela chakwila twawukeña chamuchidinyi. Dichi twalekenuhu kwenda naYehova nawa mulombenuña maana, wunlomboli niwukwashu. Mwakeñeli mudimu wenu wumwazatileña muloña wakwila mwakeñeli nankashi kukwasha antu. Keñenu nankashi mudimu wenu wawuha nawa mukumona Yehova chikuyikwashayi kukeña mudimu wenu.—Mukwa. 7:10.
17. Yumanyi yitwatela kwanukaña kutalisha hamudimu wutunakukalakala chayinu mpinji?
17 Twanukeña netu twakatwalekahu kumukalakela Yehova haya nyaaka, ilaña kukooleka kutukweti chayinu mpinji kwakamana. Mwituña dadiha wonsu wetu nyidimu yikahimpika. Aleksey, atenawu hakusambila wahosheli nindi, kuhimpika kwamudimu windi kwamukwashili kudiloñesha nakuhimpika kwakenza kumbidi. Dichi wahosheli nindi: “Nelukili nami Yehova wudi kwoku nituña dadiha, ilaña chamwekeneña neyi Yehova nituña dadiha jidi kwakulehi. Ilaña chayinu mpinji naswini kwakwihi naYehova nawa inakumona nami ituña dadiha keña dishiki.” (Yilw. 2:25) Hela chakwila tunakuzata mudimu wamuchidinyi, ilaña twatela kuswina kwakwihi naYehova. Hakatushiyaku nawa wukatukwashaña kwikala namuzañalu mumudimu windi wudi wejima.—Isa. 41:13.
KAMINA 90 Dikoleshenuña
^ para. 5 Mpinji yikwawu, amanakwetu niahela anateli kufuma mumudimu wampinji yejima hela anateli kuyituma nakuzatila kwacheñi. Achinu chibaaba chinahoshi hakukala kwamonañawu nichuma chinateli kuyikwasha hakwila nawu ekali namuzañalu. Chinakuhosha cheñi hayuma yinateli kwilawu amakwawu hakwila nawu ayikoleshi nikuyikwasha, kushilahu niyishina yinateli kutukwasha wonsu wetu neyi kunamwekani kuhimpika.
^ para. 4 Munjila yoyimu, neyi amanakwetu anakuli dehi kumujimba, ahanaña nyidimu yawu kudi atwansi. Talenu chibaaba chinakuhosha nawu “Enu Akwakristu Akulumpi—Yehova Walemesha Kwovwahila Kwenu,” muKaposhi Kakutalila kaSeptember 2018, nichibaaba chidi muKaposhi Kakutalila kaOctober 2018 chinakuhosha nawu “Ikalenu Awunda muYitoñojoka Hela Yuma Yinahimpiki.”
^ para. 12 Akulumpi kuchipompelu kunafumiwu atela kutemesha swayi-swayi mukanda wakuyilumbulula kulonda abuli kuyilabisha kutwalekahu kuzata mudimu wawu wawupayiniya, wawukulumpi hela neyi nkoñi wakuzatila.
^ para. 13 Talenu yibaaba yinakuhosha nawu “Yuma Yinateli Kukwasha Antu Ananeñi,” muAwake! yaEnglish yamu 2018, No. 3.
^ para. 57 KULUMBULULA NYEVULU: Adisumbula anayileji kufuma mwituña mwazatilañawu wumishonali, dichi anakushalishahu chipompelu.
^ para. 59 KULUMBULULA NYEVULU: Chinafuntiwu kwituña dawu, adisumbula wowamu anakulomba kudi Yehova kulonda yayikwashi kuumika nakukala kunakumonawu.
^ para. 61 KULUMBULULA NYEVULU: Nawukwashu waYehova anafunti cheñi mumudimu wampinji yejima. Anakuzatisha yuma yadiziliwu hadiñawu amishonali hakushimwina nsañu yayiwahi kudi muntu wafuma kwacheñi mwiluña dachipompelu dakushimwina.
