1-3. Hunbi kima rawngbâwltute’n inthlâk danglamna an neih a ngaih chhan ṭhenkhat chu eng nge ni?

“MISSIONARY rawngbâwlnaah kum 21 chhûng hlim taka hun kan hman hnu chuan kan nu leh pate ve ve chu an chak ta lo va. Anmahni kan enkawl dâwn avângin kan lâwm a. Mahse, nuam kan tih êm êmna hmun kan kalsan tûr chu hrehawm kan ti,” tiin Robert-a leh Mary Jo-i te’n an sawi.

² “Kan hrisêl lohna avângin kan chanvo neihna hmunah kan kîr thei tawh dâwn lo tih kan hriat chuan kan ṭap a. Ram danga Jehova rawngbâwl chu duh hle mah ila, tûnah chuan a theih tawh loh,” tiin William-a leh Terrie-i chuan an sawi.

³ “Ka rawngbâwlna branch office chu min tiduhdahtute’n khâr an tum tih kan hria a. Tichuan, an khâr ta rêng a, Bethel chhuahsan a ngaih tâkah chuan mi a ṭhâwng duh khawp mai,” tiin Aleksey-a chuan a sawi.

4. He thuziakah hian eng zawhnate nge kan sawiho vang?

⁴ Bethel-a rawngbâwltute pawh tiamin, hunbi kima rawngbâwl tam tak chuan chanvo thar an dawng a. * Hêng unau rinawm takte hian an ngainat tak chanvo kalsan chu harsa an ti mai thei a ni. Engin nge chûng inthlâk danglamnate hmachhawn thei tûra anni chu ṭanpui thei? Anni chu engtin nge i ṭanpui theih? Chûng zawhnate chhânna chuan nuna inthlâk danglamna hmachhawn thei tûrin min ṭanpui ṭheuh thei a ni.

5. Eng kawngtein nge chanvo inthlâk danglamnain kan chungah nghawng a neih theih?

⁵ Thlawhhmaah emaw, Bethel-ah emaw rawng kan bâwl a nih chuan, mite leh kan rawngbâwlna hmunte chu kan ngaina hle thei a. Chhan engemaw avânga kalsan a ngaih chuan, hrehawm kan ti hle a ni. Kan kalsan tâk unaute chu kan ngaiin, kan ngaihtuah êm êm a, a bîk takin, tihduhdahna avânga chhuahsan a ngaih hian, kan ngaihtuah lehzual a ni. (Mt. 10:23; 2 Kor. 11:28, 29) Chu bâkah, chanvo thar kan dawng emaw, kan awmna hmuna kan haw leh hunah emaw hian hnam dân mila insiamrem leh a ngai a. “Kan hnam dânte pawh kan hre chiang tawh lovin, mahni ṭawnga thu hrilh pawh kan harsat tawh a ni. Mahni ram ngeiah pawh mikhual ni hian kan inhria,” tiin Robert-a leh Mary Jo-i te’n an sawi. An chanvo thlâk danglama awm mi ṭhenkhat chuan beisei loh takin sum leh pai lama harsatnate pawh an tâwk hial thei a. Anni chuan him lo nia inhriatna leh lunghnualnate an nei mai thei a ni. Engin nge ṭanpui thei?

6. Engtin nge Jehova chu kan hnaih tlat theih?

⁶ Jehova hnaih tlat rawh. (Jak. 4:8) Chu chu engtin nge kan tih theih? Ani chu “ṭawngṭaina ngaithlatu” anga kan rinchhan tlatna hmangin a ni. (Sâm 65:2) “In thinlung chu a hmâah chuan leihbaw rawh u,” tiin Sâm 62:8-na chuan a sawi a. Jehova chuan “kan dîl leh kan ngaihtuah zawng zawng aia nasa” zâwkin a ti thei a ni. (Eph. 3:20) Ani chuan ṭawngṭainaa a bîk taka kan thil dîlte chauh min pe lo va. Kan buainate ching fel tûrin kan ngaihtuah phâk loh leh beisei loh tak thil engemaw pawh a ti thei a ni.

7. (a) Jehova hnaih tlat tûrin engin nge min ṭanpui ang? (b) Hebrai 6:10-12-a sawi angin, rinawm taka Jehova rawng kan bâwl zawm zêlna chuan eng nge a rah chhuah ang?

⁷ Jehova hnaih tlat tûr chuan Pathian Thu chu nî tin chhiar la, chhût ngun ṭhîn ang che. Tûn hmaa missionary lo ni tawh ṭhîn unaupa chuan: “Chhûngkuaa Pathian biakna leh inkhâwm atâna inbuatsaihnate chu tûn hmaa chanvo i chelh laia i tih ṭhin ang bawkin, nei ziah ang che,” tiin a sawi a. Chu bâkah, i lawina kohhran tharah chuan theih tâwp chhuahin chanchin ṭha hril zawm zêl ang che. Jehova  chuan rinawm taka a rawngbâwl zawm zêltute chu tûn hma anga an thawh theih tawh loh hunah pawh a hre reng a ni.—Hebrai 6:10-12 chhiar rawh.

8. Johana thawn khat 2:15-17-a kan hmuh thute chuan engtin nge nun tisamkhai tûra min ṭanpui theih?

⁸ I nun tisamkhai rawh. Setana khawvêla lungkhamnate’n i thlarau lam thiltihte a “dîp” ral chu phal ngai suh. (Mt. 13:22) Nun ṭha zâwk i neih theih nân sum tam tak khâwl i mamawh tia i chhûng te, i ṭhian ṭha te, leh Jehova rawng bâwl lotute fuihna chu ngaithla suh. (1 Johana 2:15-17 chhiar rawh.) Kan thlarau lam, rilru lam, leh mamawh thilte “a hun taka” pêk kan ni dâwn tia min tiamtu Jehova chu rinchhan tlat ang che.—Heb. 4:16, NW; 13:5, 6.

9. Thufingte 22:3, 7-a sawi angin, ṭûl lo taka leiba neihna pumpelh chu engvângin nge a pawimawh a, thu tlûkna fing siam tûrin engin nge min ṭanpui thei?

⁹ Ṭûl lo takin leiba nei suh. (Thufingte 22:3, 7 chhiar rawh.) Insawnnaah rin ai daihin sum a ral thei a, leiba neih a awlsam hle. Leiba nei lo tûr chuan, mamawh tak tak loh thilte lei nân sum pûk suh ang che. Kan hmangaih tak dam lo kan enkawl laia kan rilru a hah hunah, sum pûk tûr zât hriat chu a harsa mai thei a. Chutiang dinhmunah chuan, ‘ṭawngṭaina leh dîlnain,’ thu tlûkna fing siam tûrin a ṭanpui thei che tih hre reng rawh. Jehova chuan i ṭawngṭainate chhângin, rilru chiai lova thilte ngaihtuah thei tûrin, ‘i thinlung leh i ngaihtuahnate vênsaktu’ tûr thlamuanna a pe thei che a ni.—Phil. 4:6, 7; 1 Pet. 5:7.

10. Engtin nge ṭhian tharte kan siam theih?

¹⁰ Inlaichînna ṭha nei tlat rawh. I rilru vei zâwngte leh thiltawnte chu a bîk takin i neih ang hlimna leh harsatna neitu ṭhian ṭhate hnênah hrilh ang che. Chu chuan rilru hahdamna a pe thei che a ni. (Thur. 4:9, 10) Tûn hmaa i chanvo neih laia i ṭhian siamte chu i ṭhiante an la ni reng ang. Mahse, tûnah chuan i chanvo thar neihnaah ṭhian tharte i siam a ngai a. Ṭhian siam tûr chuan nangmah ngei ṭhian i nih a ngai tih hre reng ang che. Engtin nge ṭhian tharte chu i siam theih? Jehova rawngbâwlnaa i thiltawnte chu mi dangte i hrilh chuan i hlimzia an hmu thei ang. Kohhrana mi ṭhenkhat chuan hunbi kima rawngbâwlnaa i phûrzia chu an hre thiam lo a nih pawhin, mi dangte chuan i entawn tûr siam avângin an rawn pan ang che a, i tân ṭhian ṭhate an ni ang. Mahse, ṭûl lo takin i hlawhtlinnate ngaihventîr lo tûr leh a chhe zâwnga ngaihtuahna i neih theihte chu sawi chhuak lo tûrin fîmkhur ang che.

11. Engtin nge i chhûngkua chu hlim reng tûra i tih theih?

¹¹ I kawppui hrilsêl lohna avânga i chanvo kalsan a ngai a nih chuan, ani chu mawhchhiat suh ang che. Kawng leh lamah chuan, nangma hrisêl lohna vâng a nih pawhin i kawppui i tilunghnual ang tia ngaihtuahin mahni inthiam  lovin awm suh. “Tisa pum khat,” in ni a, eng dinhmun hnuaiah pawh inngaihsak tawn tûrin Jehova hmaah thu in tiam tawh tih hre reng ang che. (Mt. 19:5, 6) Beisei loh taka nau pai avânga i chanvo kalsan a ngai a nih pawhin, i fa hnênah chuan ani chu i chanvo chân tâkte aiin i tân a pawimawh zâwk tih hriattîr ang che. I fa chu Pathian pêk “lâwmman” angin i thlîr tih hriat chiantîr bawk ang che. (Sâm 127:3-5) Chutih rualin, i chanvo neiha i thiltawn duhawm tak takte chu hrilh bawk rawh. Chu chuan Jehova rawngbâwlna hlimawm takah nangmah ang bawka nun hmang tûrin a chêttîr thei a ni.

12. (a) Hunbi kima rawngbâwltute chu an chanvo thawk zawm zêl thei tûrin engtin nge kan ṭanpui theih? (b) An dinhmun thara nuam ti tûrin engtin nge kan ṭanpui theih?

¹² Kohhran tam tak leh unaute chuan hunbi kima rawngbâwltute chu an rawngbâwlna thawk zawm zêl tûra an ṭanpui ṭhin avângin an fakawm hle a. An ṭanpui dânte chu an rawngbâwlna chhunzawm tûra fuih te, sum leh pai leh thil dang pêk te, a nih loh leh an chhuahsan tâk an chhûngte enkawlnaa ṭanpuite hi a ni. (Gal. 6:2) Hunbi kima rawngbâwltute chuan in kohhrana lo awm tûrin chanvo thar an dawng a nih chuan, chutianga an chanvo inthlâk danglamna chu tlin lohna engemaw an neih vâng leh zilhna an tawh vâng niin ngai suh. * Chu aiin, an dinhmun thara nuam an tih theih nân ṭanpui zâwk rawh. Anni chu ṭha takin lo lâwm la, an hrisêlnain a tlin tawh loh avânga tûna an tih theihte chu beitham hle mah se, tûn hmaa an thawhrimnate avângin fak ang che. Anni chu hriat chian lehzual tum la. An hriatna zau tak te, zirtîrna te, leh thiltawnte aṭangin inzir tum rawh.

13. Chanvo thar dawngtute chu engtin nge kan ṭanpui theih?

 ¹³ Chûng chanvo thar dawngtute chuan in luah tûr te, lîr thei te, hna te, leh thil ṭûl dangte an hmuh theih nân atîr lamah i ṭanpuina an mamawh thei a. Chhiah chawite leh insurance sum neih theih dân ang chi thil pawimawh dangte pawh an hriat a ngai mai thei bawk. A pawimawh ber chu i khawngaihna ni lovin, i hriatthiampuina an mamawh hi a ni. Anmahni emaw, an chhûngte emaw chu an hrisêl vak lo pawh a ni thei a. Thihna avânga an hmangaih takte an sûn avângin an khua a har hle pawh a ni thei. * An chanvo hmasaa an thlarau lam unaute an kalsan avângin, an khua a har ru reng pawh a ni thei bawk. Chutiang dinhmun chu ngaia nei tûr chuan hun engemaw chen a liam a ngai a ni.

14. Engtin nge tualchhûnga thuchhuahtute chuan chanvo thar nei unaunu chu insiamrem tûra an ṭanpui?

¹⁴ Chutih chhûng chuan, i ṭanpuina leh i entawn tûr siamte chuan anni chu insiamrem tûrin a ṭanpui thei a. “Ka chanvo hmasaah chuan, ni tin hian Bible zirpuina ka kaihruai a; mahse, ka chanvo tharah chuan rawngbâwlnaa Bible keu emaw, video chhuahna hun remchâng neih emaw ringawt pawh a harsa a ni. Mahse, tualchhûnga thuchhuahtute chuan an tlawhkîrnaahte leh Bible zirpuinaahte min sâwm a. Chûng kan unau taima tak leh huaisen takte’n Bible zirpui hmasâwn tak an kaihruai ka hmuh hian a ṭha zâwnga thlîrna min neihtîr lehzual a ni. Rawngbâwlna bial thara mite biak ṭan dân ka zir a. Chûng zawng zawng chuan hlimna nei leh tûrin min ṭanpui a ni,” tiin kum tam tak chhûng ram danga rawng lo bâwl tawh unaunu chuan a sawi.

15. I chanvo thar dawnah engtin nge hlawhtlinna i neih theih?

¹⁵ I chanvo tharah chuan hlawhtlinna i hmu thei a. Inthlâk danglamna chu hlawhchhamna emaw, hnungtawlhna emaw angah ngai suh. I nunah Pathian Jehova kut chu hmuh tumin, thu hril zawm zêl ang che. Kum zabi khatnaa  Kristian rinawmte chu entawn rawh. An awmna hmun apiangah, anni chuan “khaw tinah an kal a, thu chu an hril zêl a.” (Tirh. 8:1, 4) Thu hril zawm zêl tûra theih tâwp i chhuahna chuan rah ṭha a chhuah thei a ni. Entîr nân, ram pakhat aṭanga hnawhchhuah pioneer-te chu an ṭawnga thu hrilh mamawh lehzualna hmun, an ṭhenawm ramah an insawn a. Thla tam a liam hmain, hmasâwn tak group tharte din a ni.

16. Engtin nge i chanvo thar dawnah hlimna i hmuh theih?

¹⁶ “LALPA chunga lâwmna chu in chakna a ni si a.” (Neh. 8:10.) Kan hlimna ber chu kan ngaihhlut tak kan chanvo dawnah ni lovin, Pathian Jehova chungah a ni zâwk a ni. Chuvângin, Jehova nên lêng dûnin, finna te, kaihhruaina te, leh ṭanpuinate hmu tûrin ani chu rinchhan tlat rawh. I chanvo hmasa i ngainat chhan chu, thinlung taka mite i ṭanpui vâng a ni tih hre reng ang che. Chuvângin, tûna i chanvo dawnah pawh theih tâwp chhuah la, i chanvo ngaina tûra Jehova’n a ṭanpui dânte chu hmu ang che.—Thur. 7:10.

17. Tûna kan chanvo neih chungchângah eng nge kan hriat reng ang?

¹⁷ Chatuana Jehova rawngbâwl tûr kan nih laiin, tûna kan chanvo dawnte chu rei lote chhûng atân chauh a ni tih kan hre reng tûr a ni. Khawvêl tharah chuan, kan za hian chanvo thar kan nei thei a. Atîra kan sawi tâk Aleksey-a chuan tûna a thiltawnte’n khawvêl thar atân a buatsaih niin a ring a. “Pathian Jehova leh khawvêl thar chu a tak tak a ni tih ka hre reng ṭhîn a; mahse, engemaw ti tak hian ka hlat deuh niin ka hria. Tûnah chuan, Jehova chu ka hnaih tawh hle a, chu chuan khawvêl thar chu lo thleng mai tawh tûr angin min thlîrtîr a ni,” tiin a sawi. (Tirh. 2:25) Kan chanvo dawn chu engpawh ni se, Jehova nên i lêng dûn ang u. Ani chuan min kalsan ngai dâwn lo va, khawiah pawh rawngbâwl mah ila, kan thawhrimnaah hlimna hmu tûrin min ṭanpui ang.—Is. 41:13.