CILONGESA 34
Bika Bimikwasa Mubwahelele Nga Bamyana Cipangi Ceka?
‘Njambi kakele na kapenga, ngeci ebale bipangi byeni na cizemo cimunamwesa ku lizina lyendi.’—HEVE 6:10.
MWASO 38 Uka Mitiisa
BILI MUNO MU CILONGESA *
1-3. Byuma muka bikalingisa baje bali mu cipangi ca simbu yoshe babane bipangi byeka?
ROBERT na Mary Jo bendekele ngwabo: “Twalikuwile cipangi cetu ca bumishinali ha myaka 21. Oloni bisemi betu boshe bawana babinjile. Twabwahelelele mutwakele na kubanyunga. Nameme ngoco, twazeyele mwafwa twasezele cipangi citwazemene manene.”
2 William na Terrie bendekele ngwabo: “Twalilile mutwamwene ngwetu kutwasa kutwalelelaho mu cipangi cetu mwafwa ya kubinja. Kutwasele lalo kupangela Yehova mu lifuti lyeka.”
3 Aleksey wendekele ngwendi: “Njapangelele ha ofisi ya munango. Co twazibile ngwabo bitozi betu baishoka. Mubaishokele, twakele mu bitanga mwafwa tubaboshe twatundile ha ofisi ya munango.”
4. Bihula muka bitukumbulula muno mu cilongesa?
4 Bwingi bwa baje bakele mu cipangi ca simbu yoshe kwambateselela na baje bakele na kupangela ha Mbetele babanene bipangi byeka. * Aba bandolome na bandokazi bakalizibi kuzeya mwafwa banaseze cipangi cibazemene manene. Bika byasa kubakwasa bezilile buyoye bwabuha? Mwasa kubakwasa bati? Kuzibuka mubanakumbulwila ebi bihula kutukwasa tubaboshe nga byuma bitenguluka mu kuyoya kwetu.
BIMUNAPANDE KULINGA NGA BYUMA BITENGULUKA
Bika bitwendekela ngwetu baje bali mu cipangi ca simbu yoshe bawana bukalu nga babana cipangi ceka? (Taleni palagilafu 5) *
5. Twasa kuliziba bati nga byuma bitenguluka?
5 Baje bapangela ha Mbetele nambe kweka bazema cipangi cabo na banu babali na kulikwatasana nabo. Ngeci, bakalizibi kuzeya nga baseza cipangi cabo na bandolome na bandokazi babo. Co lalo bakalishoshomwena hali bandolome babo maneneni nga okwo ku banatundu banaseza bandolome bali na kubayandesa. (Mateo 10:23; 2 Koli 11:28, 29) Co lalo kwasa kubakaluwila kukapangela kweka nambe kwiluka kwimbo lyabo mwafwa bakalilongesa buyoye bwabuha. Robert na Mary Jo bendekele ngwabo: “Nameme tuneluka kwimbo lyetu, co lalo tuli na kwambulula mu ndaka yetu, tukalizibi ngwe tunazimbala. Twapangelele mu lifuti lyeka ha myaka yaingi, co tukalizibi ngwe tu bangenzi mu lifuti lyetu.” Nga banu bajaluka basa kupangesa bimbongo byabingi kutubakana bije bibali nabyo. Ngeci, bakalishoshomwena, bakakala mu bitanga, co lalo bakazeye. Bika byasa kubazembeleka?
Tunapande kukulahela Yehova na kukanyamesa busamba bwetu nendi (Taleni palagilafu 6-7) *
6. Twasa kukanyamesa bati busamba bwetu na Yehova?
6 Kukanyamesa busamba na Yehova. (Yako 4:8) Twasa kubukanyamesa bati? Tulinga ngoco, nga tukulahela ‘Muka-kukumbulula malombelo.’ (Myaso 65:2) Ku Myaso 62:8 ngwabo: “Mulekeni bukalu bweni bwoshe.” Yehova ‘asa kulinga byuma bya kutubakana bije bitunamulombo, nambe kutubakana bije twasa kuyongola.’ (Efeso 3:20) Yehova atwana byuma byabingi kutubakana bije bitunamulombo. Asa kumanesa bukalu bwetu mu ngila ije kutwasinganyekele.
7. (a) Mwasa kukanyamesa bati busamba bweni na Yehova? (b) Kwesekesa na Vahevelu 6:10-12, bubwa muka buli mu kutwalelelaho kupangela Yehova?
7 Tandeni Mbimbiliya ha litangwa na litangwa na kusinganyekesesa ha byuma bimunatanda mangana mukanyamese busamba bweni na Yehova. Ndolome uje wapwile kamishinali wendekele ngwendi: “Lingeni kulemesa kwa naanga na kulibwahesela biwano ngwe mumwakele na kulingila te mucili mu cipangi ceni.” Co lalo omwo muli ku cikungulukilo caciha, pangeni na nzili mu cipangi ca kwambulula. Yehova kesi kwibala baje bali na kumupangela mu kulongwa nameme kubasa kupanga ngwe mubakele na kupangela kunima.—Tandeni Vahevelu 6:10-12.
8. Majwi ali ku 1 Yowano 2:15-17 amikwasa bati mwasiwise buyoye bweni?
8 Asiwiseni buyoye bweni. Keti mutabese bishoti bya muno mu kaye ka Satana bimyonowese kupangela Yehova. (Mateo 13:22) Keti mutolilile banu baje kubesi kupangela Yehova, nambe babushoko bweni, nambe babusamba beni baje bamishongangeya ngwabo mushakezeke bufuko. (Tandeni 1 Yowano 2:15-17.) Kulaheleni Yehova uje nakulahesa ngwendi atuzembeleka na kutwana byuma bya ku sipilitu nebi bya ku mubila ha simbu inapande.—Heve 4:16; 13:5, 6.
9. Kwesekesa na Visimo 22:3, 7, bika bikwapwila kwa seho kujeneka kulikobelesa mu mikuli? Co bika bitukwasa twangule mwamubwa byakulinga?
9 Keti mulikobelese mu mikuli. (Tandeni Visimo 22:3, 7.) Kujaluka kukashandola bimbongo byabingi, co kwakwasi kukobela mu mikuli. Ngeci, keti mukongole bimbongo mangana mulande byuma bije kumutondo kupangesa ha simbu oyo. Nga muli mu bukalu nambe nga muli na kubinjisa kabushoko keni, kwasa kumikaluwila kuzibuka seteko ya bimbongo bimunapande kukongola. Anukeni ngweni kulombela kwasa kumikwasa mwangule mwamubwa byakulinga. Yehova akumbulula lilombelo lyeni ha kumyana kwoloka kuje ‘kunyunga bimbunge byeni na biyongola byeni’ mangana mushubuluke.—Fili 4:6, 7; 1 Petu 5:7.
10. Twasa kuwana bati babusamba babaha?
10 Kaleni na babusamba bababwa. Lekeni babusamba beni mumuli na kulizibila na byuma bimunaliwana nabyo, maneneni baje baneti mu cifwa cimuli naco. Nga mulinga ngoco, co muziba ku mbunge hehu. (Kwambu 4:9, 10) Babusamba bamunaseza kuje kumwakele na kupangela anga bacili babusamba beni. Nameme ngoco, tondeni babusamba bakwabo okwo kumunajalukila. Mwasa kuwana bati babusamba babaha? Nga mushaka bakweni balikute neni busamba, co munapande kubamwesa cizemo. Kutundaho, balekeni byuma bimunalikuu mu kupangela Yehova. Co lalo bwaheleleni omwo mupangela Yehova. Mu cikungulukilo ceni bamo kubasa kuzibisisa bimwazemena manene cipangi ca simbu yoshe. Oloni bakwabo bamizibisisa, co mwasa kulikuta nabo busamba. Nameme ngoco, keti mwendeke lika byeni nambe byuma bimunalingi mu cipangi ca Yehova nambe byuma byabibi bimunaliwana nabyo.
11. Bika bimunapande kulinga mangana mubwahelele mu bulo bweni?
11 Nga kumutwalelelaho na cipangi ceni mwafwa ya kubinja kwa muka-limbo lyeni, co keti mumulubalele. Co lalo nga yeni mubinja keti mulizibe kukala na mulonga na kusinganyeka ngweni munonowesa mukweni kupanga cipangi ca simbu yoshe. Anukeni ngweni munapu “mubila umo.” Co lalo mwakulahesele Yehova ngweni mukalinyunga umo na mukwabo mu byoshe bimuliwana nabyo. (Mateo 19:5, 6) Hamo munonowa kutwalelelaho na cipangi ceni mwafwa ya kukala na limo. Muneni imukita napande kuzibuka ngwendi napu wa seho kuli yeni kutubakana cipangi cimwakele naco. Mulekeni ngweni napu “bwana” bwa kutunda kuli Njambi. (Myaso 127:3-5) Mulekeni lalo byuma bimwalikuwile mumwakele mu cipangi ceni. Kulinga ngoco kwasa kumushongangeya ashungwiye cipangi ca simbu yoshe.
BAKWENI BASA KUMIKWASA BATI?
12. (a) Twasa kukwasa bati baje bali mu cipangi ca simbu yoshe batwaleleleho mu cipangi cabo? (b) Twasa kubakwasa bati bezilile buyoye bwabuha?
12 Bandolome na bandokazi babangi bali na kukwasa baje bali mu cipangi ca simbu yoshe mangana batwaleleleho na cipangi cabo. Bali na kulinga ngoco omwo babatakamesa, kubana bya kulikwasesa ku mubila, nambe kubanyungilako babushoko bwabo babanaseza ku membo abo. (Ngala 6:2) Nga baje bali mu cipangi ca simbu yoshe babana cipangi ceka na kubatuma ku cikungulukilo ceni, keti musinganyeke ngweni banalingi byuma byabibi nambe banonowa cipangi cibanakele na kupanga. * Oloni bakwaseni bezilile buyoye bwabuha. Batambuleni mwamubwa, co bashangazaleni ha bipangi bibanapanga nameme ha simbu ino kubasa kupanga ngwe mubapangelele kunima. Likuteni nabo busamba. Co mwasa kulilongesa ku mana abo, ku byuma bibanalilongesa na ku byuma bibanaliwana nabyo.
13. Mwasa kukwasa bati baje babanana cipangi ceka mu munga yetu?
13 Kwaseni baje babanana cipangi ceka mu munga yetu bawane njubo, bazibuke mwakwendela, bawane cipangi na byuma byeka bibatonda. Mwasa kubalekako lalo byuma bimo bya kufwa ngwe mwakufwetela mitelo, kwakutekwila mema, noku kubasa kulanda byuma ha ndando ya kwisi. Nameme ngoco, cuma cibatonda manene kuli yeni cinapu kubazibisisa. Hamo bali na kubinja nambe bali na kubinjisa kabushoko kabo. Hamo bali mu busiwa bwa kutsisa munu ibazema. * Co lalo hamo bali mu buli mwafwa banaseza babusamba babo kuje kubakele na kupangela. Nameme kubamileke mubali na kulizibila, oloni zibukeni ngweni obu bukebwo bukalu bubali nabwo. Kukambata simbu asina obu busiwa buhwe.
14. Bandolome na bandokazi bakwasele bati ndokazi umo ezilile cipangi cendi caciha?
14 Nga mupanga nabo mu lihya na kubashongangeya na kubamwesa mwanja waubwa, co bezilila cipangi cabo caciha. Ndokazi uje wapangelele mu lifuti lyeka wendekele ngwendi: “Njakele na kutwamenena bilongesa bya Mbimbiliya ha litangwa na litangwa. Oloni munjajalukile, kwanjikaluwilile kutandela munu Mbimbiliya nambe kumumwesa vidio. Bandolome na bandokazi banjilanyele ku mangenzi abo a kwilukila na ku bilongesa byabo. Co njashubulukile munjamwene banu babalilongesele nabo Mbimbiliya bakola ku sipilitu. Njalilongesele mwakwendekela na banu bomu mu citingitingi.”
TWALELELENIHO KUPANGA
Pangeni na nzili mu cipangi ca kwambulula nga muneluka kwimbo lyeni (Taleni palagilafu 15-16) *
15. Bika bimikwasa mupange mwamubwa cipangi ceni caciha?
15 Nga banamyana cipangi ceka, keti musinganyeke ngweni kumwakele na kupanga mwamubwa cipangi ceni nambe kuliziba ngweni mubangoco. Mwasa kupanga mwamubwa cipangi ceni caciha. Nangukeni mwali na kumikwaselamo Yehova, co twaleleleniho kwambulula. Tembwinineni baka-Kilistu ba mu simbu ya tupositolo. Kwoshe kubakele na kwita, bakele na kwambulula muzimbu waubwa. (Vili 8:1, 4) Nga mutwalelelaho kwambulula, co muwana bibezikiso. Cakumwenako, bapainiya bamo bapangelele mu lifuti limo. Co mu kwita kwa simbu, babashekele muje mu lifuti. Ngeci bajalukilile mu lifuti muje banu babangi bapangesele ndaka yabo, oloni baka-kwambulula bapwile babandondo. Mu bingonde byabindondo lika, bashangumukile bibunga byabingi.
16. Mwasa kupwa bati ba kubwahelela mu cipangi ceni caciha?
16 Kubwahelela kwa kutunda kuli Yehova kukekwo kunapu nzili yeni. (Nehe 8:10) Munapande kupwa ba kubwahelela mwafwa ya kukala na busamba bwabubwa na Yehova, keti mwafwa ya kuzema manene cipangi ceni. Kanyameseni busamba bweni na Yehova. Co mulombeni amyane mana, amitwamenene na kumikwasa. Anukeni ngweni mwazemene cipangi ceni ca laja mwafwa mwakele mbunge ku kukwasa banu. Ngeci, akeni lalo mbunge ku cipangi ceni caciha, co Yehova amikwasa mucizeme.—Kwambu 7:10.
17. Bika bitunapande kuzibuka ha bipangi bituli na kupanga mu munga ya Yehova?
17 Tunapande kulemesa Yehova myaka yoshe. Oloni bipangi bituli na kupanga ha simbu ino binapu bya simbu yaindondo lika. Mu kaye kakaha, hamo tubaboshe bakatwana bipangi byabiha. Aleksey itunendeka ku maputukilo aino ñanda wendekele ngwendi kumwana cipangi caciha kunamukwasa alibwahesele kutenguluka cili na kwija kulutwe. Wendekele ngwendi: “Njazibukile ngwange Yehova kwali, co kaye kakaha kakaija. Oloni njamwene ngwe Yehova kanjakele manene mbunge, co lalo kaye kakaha kukaija bwasi. Njazibukoni ngwange Yehova nanjaka mbunge, co njamono ngwange kaye kakaha kali ha lijulu na kanwa.” (Vili 2:25) Tunapande kukanyamesa busamba bwetu na Yehova nameme tupange bipangi bya kufwa bati. Kwoshe kutuli Yehova katwibala, atukwasa tubwahelele omwo tumupangela.—Isaya 41:13.
MWASO 90 Lususuezane
^ par. 5 Baje bali mu cipangi ca simbu yoshe basa kuliwana na byuma bije byasa kubonowesa kutwalelelaho mu cipangi cabo. Bakwaboco basa kubana bipangi byeka. Muno mu cilongesa tusimutwiya bukalu bubali na kuliwana nabwo nebi byasa kubakwasa bezilile buyoye bwabuha. Tusimutwiya lalo bibanapande kulinga bandolome na bandokazi mangana babakwase, babazembeleke na kubatakamesa. Co lalo tusimutwiya mubyasa kutukwasela binangulo bya mu Mbimbiliya nga buyoye bwetu butenguluka.
^ par. 4 Bandolome babangi omwo banete ha myaka imo, banecela bipangi byabo na kubisezela bandolome ba bakwenje. Taleni Kaposhi ka Kukengela ka September 2018 ha mutwe wa “Baka-Kilistu ba Tukulukazi Yehova Wazema Kulongwa Kweni” naka ka October 2018 ha mutwe wa “Twaleleniho Kupwa ba Kubwahelela Nameme Byuma Bitenguluka.”
^ par. 12 Bakulunu ba ku cikungulukilo cibanatundu banapande kutuma bwasi mukanda wa kuzimbula aba bandolome na bandokazi. Oku kubalingisa bashangumuke bwasi kupanga bipangi byabo bya kufwa ngwe bupainiya, bukulunu mu cikungulukilo nambe kupwa muka-kupangela.
^ par. 13 Taleni Toneni! ya Na 3 ya 2018 ha mutwe wa: “Bika Byasa Kukwasa Baje Banatsisa?”
^ par. 57 KULUMBUNUNA BIKUPULO: Ndolome na munakazi wendi baje banapwile bamishinali bali na kusalesa cikungulukilo omwo cipangi cabo cinahu.
^ par. 59 KULUMBUNUNA BIKUPULO: Bali mu lifuti lyabo, co banatwalelelaho kulombela kuli Yehova mangana abakwase bakolese mu bukalu bwabo.
^ par. 61 KULUMBUNUNA BIKUPULO: Yehova nabakwasa beluke mu cipangi ca simbu yoshe. Bali ku cikungulukilo caciha. Co bali na kwambulwila banu ba ku mafuti eka baje bakendeka bindaka bije bibalilongesele te bali mu bumishinali.
