LARTIK LETID 34
Kouma To Kapav Adapte Twa dan enn Nouvo Afektasion?
“Bondie pa inzis pou bliye seki zot inn fer ek lamour ki zot finn montre pou so nom.”—EBRE 6:10, NW.
KANTIK 38 Li Pou Fer Twa Vinn For
REZIME *
1-3. Pou ki rezon sertin serviter aplintan kitfwa bizin sanz afektasion?
ROBERT ek Mary Jo dir: “Apre ki nou ti pas 21 zoli lane dan nou servis misioner, nou bann paran ti tom bien malad. Nou ti kontan pou pran zot swin. Kanmem sa, li ti difisil pou kit sa lafektasion ki nou ti bien kontan la.”
2 William ek Terrie rakonte: “Kan nou ti aprann ki nou pa pou kapav retourn dan nou afektasion akoz nou bann problem lasante, nou ti bien plore. Nou ti touletan kontan pou al servi Zeova dan enn lot pei, me asterla nou ti pou nepli kapav fer sa.”
3 Aleksey dir: “Nou ti kone ki gouvernman ti pe rod ferm biro nasional kot mo ti pe servi. Me kanmem sa, nou ti gagn enn sok kan ti ferm Betel ek nou ti bizin ale.”
4. Ki bann kestion nou pou examine dan sa lartik-la?
4 Anplis, boukou serviter aplintan, parmi ena osi bann ki ti pe servi dan Betel, finn gagn bann nouvo afektasion. * Sa bann frer ek ser fidel la kitfwa trouv sa difisil pou kit enn afektasion ki zot extra kontan. Ki kapav ed zot pou adapte ar sa sanzman-la? Kouma to kapav ed zot? Repons sa bann kestion-la kapav ed nou tou kan nou konn bann sanzman dan nou lavi.
KOUMA POU ADAPTE AR ENN SANZMAN?
Kifer sa kapav difisil pou bann serviter aplintan kit zot afektasion? (Get paragraf 5) *
5. Ki lefe enn sanzman afektasion kapav ena lor nou?
5 Mem si nou pe servi dan Betel ouswa dan enn lot form servis aplintan, pena dout ki nou devlop enn gran lamour pou bann dimounn ek plas kot nou pe servi. Alor, sa desir nou leker kan nou bizin kit nou lafektasion. Nou bann frer ek ser mank nou, ek nou gagn zot traka, sirtou si nou’nn bizin kit zot akoz persekision. (Mat. 10:23; 2 Kor. 11:28, 29, NW) Anplis, kan nou sanz afektasion ouswa nou retourn dan nou pei, nou bizin adapte ar enn lot landrwa ek kiltir. Robert ek Mary Jo dir: “Nou ti nepli abitie ar nou prop kiltir ek nou ti mem gagn difikilte pou prese dan nou lang. Nou ti santi nou kouma bann etranze dan nou prop pei.” Bann ki sanz afektasion gagn osi bann difikilte ki zot pa ti ena avan lor plan finans. Zot kapav santi zot perdi ek dekouraze. Ki kitsoz kapav ed zot?
Li inportan ki nou vinn pros ar Zeova ek nou fer Li konfians (Get paragraf 6-7) *
6. Kouma nou kapav res pros ar Zeova?
6 Res pros ar Zeova. (Zak 4:8) Kouma nou kapav fer sa? Se kan nou fer Zeova konfians parski Li “ekzos nou lapriyer.” (Ps. 65:2) Psom 62:8 dir: “Dir li seki ena lor zot leker.” Zeova “kapav fer boukou plis ki nou dimande, mem boukou plis ki nou kapav mazine.” (Efe. 3:20) Li pa zis donn nou seki nou demann Li dan nou bann lapriyer. Parfwa, Li kapav mem fer bann kitsoz ki nou pa atann pou rezoud nou bann problem.
7. (a) Ki pou ed nou pou res pros ar Zeova? (b) Dapre Ebre 6:10-12, ki bienfe nou pou gagne si nou kontign servi Zeova avek fidelite?
7 Pou res pros ar Zeova, nou bizin lir Labib toulezour ek reflesi an profonder lor la. Enn frer ki ti misioner avan, dir: “Kontign ena enn bon program ladorasion an fami ek kontign prepar bann renion, parey kouma to ti pe fer dan to ansien afektasion.” Anplis, kontign fer tou seki to kapav pou pres bonn nouvel ansam ar bann frer ek ser ki dan to nouvo lasanble. Zeova rapel bann ki servi Li avek fidelite, mem si zot nepli kapav fer seki zot ti pe fer avan.—Lir Ebre 6:10-12, NW. *
8. Kouma bann parol ki ena dan 1 Zan 2:15-17 kapav ed twa pou gard enn lavi sinp?
8 Gard enn lavi sinp. Pa les bann traka ki ena dan lemond Satan “touf” twa, ek fer twa aret servi Zeova. (Mat. 13:22) Bann kamarad, bann fami, ouswa bann dimounn ki pa servi Zeova ek ki ena bann bon lintansion kapav ankouraz twa pou gagn plis kas ek pou ena enn pli bon lavi. Me fode pa to ekout zot. (Lir 1 Zan 2:15-17.) Zeova promet pou donn nou seki nou bizin “dan ler ki bizin.” Alor fer Li konfians. Li pou ed nou pou gard nou lafwa for, pou gard nou kalm, ek Li pou donn nou bann kitsoz materyel ki nou bizin.—Ebre 4:16, NW; 13:5, 6.
9. Dapre Proverb 22:3, 7, kifer li inportan ki nou evit fer bann det initil, ek ki kitsoz kapav ed nou pou pran bann bon desizion?
9 Evit fer bann det initil. (Lir Proverb 22:3, 7. *) Kan nou demenaze, sa kapav kout bien ser, ek li bien fasil pou nou fer bann det. Pou to evit fer bann det, pa aste lor kredi bann kitsoz ki to pa vremem bizin. Kan nou dan enn sitiasion stresan, sirtou kan enn manb lafami malad, kitfwa nou pa kone ki kantite larzan nou pou pran prete. Dan bann sitiasion koumsa, rapel bien ki “lapriyer ek siplikasion” kapav ed twa pou pran bann bon desizion. Pou reponn to lapriyer, Zeova kapav ed twa pou gard to kalm. Lerla, to pou kapav pran enn bon desizion dan sa sitiasion-la.—Fil. 4:6, 7, NW; 1 Pier 5:7.
10. Kouma nou kapav fer bann nouvo kamarad?
10 Res pros ar bann dimounn ki ena enn bon linflians lor twa. Partaz to santiman ek to bann lexperyans ar bann bon kamarad, sirtou ar bann ki kitfwa finn fer bann mem lexperyans ki twa. Kan to fer sa, sa kapav ed twa pou santi twa bien. (Ekle. 4:9, 10) Bann kamarad ki to’nn fer dan to ansien afektasion pou res touzour to bann kamarad. Asterla, dan to nouvo afektasion to bizin fer bann nouvo kamarad. Pou ki to ena enn kamarad, rapel bien ki tomem to bizin enn bon kamarad. Kouma to kapav fer bann nouvo kamarad? Koz lor bann bon lexperyans ki to finn fer dan to servis pou Zeova pou ki lezot kapav resanti to lazwa. Mem si sertin dan lasanble pa konpran kifer to kontan servis aplintan, kitfwa lezot pou anvi konn plis ek pou vinn to bann bon kamarad. Me selman, pa tro atir latansion lor tomem ek lor seki to’nn fer dan to servis pou Zeova, ek pa koz tro boukou lor bann santiman negatif ki to ena.
11. Kouma to kapav kontign ena enn lavi maryaz ki ere?
11 Si to bizin kit to afektasion akoz lasante to konzwin, pa repros li akoz sa. Me si se twa ki ena enn problem lasante, pa santi twa koupab ek panse ki to finn desevwar to konzwin. Pa bliye ki zot “enn sel” laser ek ki zot finn promet Zeova ki zot pou pran swin sakenn zot kamarad ninport ki arive. (Mat. 19:5, 6) Si to finn bizin kit enn afektasion parski to’nn tom ansint san ki to atann, fer tou pou ki to zanfan kone ki li pli inportan pou twa ki to ansien afektasion. Rasir to zanfan ki to konsider li kouma “enn rekonpans” ki sorti kot Bondie. (Ps. 127:3-5, NW) Koz osi lor bann bon lexperyans ki to finn gagne dan to afektasion. Kan to fer sa, sa kapav motiv to zanfan pou servi Zeova aplintan parey kouma to finn fer.
KOUMA LEZOT KAPAV EDE?
12. (a) Kouma nou kapav ed bann serviter aplintan pou kontign zot servis? (b) Kouma nou kapav ed zot pou adapte dan zot nouvo afektasion?
12 Dan boukou lasanble, bann frer ek ser fer zefor pou ed bann serviter aplintan pou ki zot res dan zot servis. Zot ankouraz sa bann serviter aplintan la pou kontign zot servis kan zot donn bannla enn led lor plan materyel ouswa ed zot pou pran swin zot fami ki res lwin. (Gal. 6:2) Si apre enn sanzman afektasion, bann serviter aplintan vinn dan to lasanble, fode pa to panse ki zot finn mal fer zot travay ouswa ki zot finn fer enn move kitsoz. * Okontrer, ed zot pou adapte dan zot nouvo afektasion. Akeyir zot bien ek felisit zot pou bon travay ki zot finn fer, mem si asterla zot nepli kapav fer boukou akoz zot lasante. Aprann konn zot. Profit zot lexperyans, zot konesans, ek formasion ki zot finn gagne.
13. Kouma nou kapav ed bann ki’nn gagn enn nouvo afektasion?
13 Kitfwa o-koumansman, bann ki’nn gagn enn nouvo afektasion pou bizin to led pou rod lakaz, transpor, travay, ouswa bann lezot kitsoz. Kitfwa zot pou bizin osi bann linformasion lor bann kitsoz kouma pey tax ek lasirans. Me seki zot plis bizin se ki nou konpran zot sitiasion. Kitfwa zot ena bann problem lasante ouswa enn manb zot fami malad. Kitfwa zot an-dey parski enn kikenn ki zot bien kontan inn mor. * Ek mem si zot pa koz lor la, kitfwa zot sagrin parski zot bann kamarad mank zot. Kitfwa zot santi zot inpe perdi ek zot bizin letan pou sirmont sa bann santiman-la.
14. Kouma bann frer ek ser ti ed enn ser pou adapte dan so nouvo afektasion?
14 Antretan, to soutien ek to lexanp kapav ed zot pou adapte ar zot nouvo sitiasion. Enn ser ki finn servi pandan plizir lane dan enn lot pei, dir: “Dan mo ansien afektasion, mo ti fer bann letid Labib toulezour. Selman dan mo nouvo afektasion, li ti difisil mem pou ouver Labib ouswa montre enn video dan predikasion. Me dan mo nouvo lasanble, bann frer ek ser ti demann mwa pou akonpagn zot dan zot bann vizit ek letid. Kan mo ti trouv sa bann frer ek ser fidel la fer bann letid Labib avek kouraz, sa ti fer mwa ena enn lespri pozitif. Mo ti aprann pou koumans bann konversasion dan mo nouvo teritwar. Tousala ti ed mwa pou regagn mo lazwa.”
KONTIGN FER TO MAXIMUM!
Rod bann fason pou varye to predikasion dan to nouvo teritwar (Get paragraf 15-16) *
15. Kouma to kapav reisi dan to nouvo afektasion?
15 To kapav reisi dan to nouvo afektasion. Fode pa to panse ki to’nn mal fer to travay dan to ansien afektasion ouswa ki asterla to ena mwins valer. Reflesi lor bann fason ki Zeova pe ed twa asterla ek kontign prese. Imit bann Kretien fidel dan premie siek. Ninport kotsa zot ti ete, zot “ti anons bonn nouvel konsernan parol Bondie.” (Zist. 8:1, 4, NW) Si to kontign prese, to kapav gagn bann bon rezilta. Par exanp, bann pionie ki bann lotorite ti pouse dan enn pei ti al res dan enn lot pei ki pa tro lwin, ek laba osi ti bizin plis proklamater dan lang ki zot ti koze. Dan zis de-trwa mwa, boukou group ti forme ek boukou dimounn ti vinn dan sa bann group-la.
16. Kouma to kapav gagn lazwa dan to nouvo afektasion?
16 “Lazwa Zeova li zot lafors.” (Ne. 8:10, not) Se nou relasion avek Zeova ki bizin rann nou zwaye, pa nou afektasion, mem si nou bien kontan nou servis. Alor, kontign mars avek Zeova, ek kont lor Li pou gagn so direksion, so sazes ek so soutien. Pa bliye ki to finn aprann kontan to ansien afektasion parski avek tou to leker to ti ed bann dimounn ki ti laba. Met tou to leker dan to nouvo afektasion ek gete kouma Zeova pou ed twa kontan sannla osi.—Ekle. 7:10.
17. Ki nou bizin rapel konsernan nou afektasion?
17 Nou bizin rapel ki nou pou kontign servi Zeova pou leternite, me ki lafektasion ki nou ena asterla li zis pou enn tan. Dan lemond nouvo, kitfwa nou tou nou pou sanz afektasion. Aleksey, ki nou ti mansione o-koumansman, dir ki bann sanzman afektasion ki li’nn kone pe ed li pou prepar li pou bann sanzman ki pou ena dan lavenir. Aleksey dir: “Mo ti touletan kone ki Zeova ek lemond nouvo zot reel, me kanmem sa zot ti paret inpe lwin. Me asterla mo bien pros ar Zeova, ek pou mwa se koumadir lemond nouvo deryer laport.” (Zist. 2:25) Alor, ninport ki afektasion nou gagne, nou anvi res pros ar Zeova. Zame Li pa pou kit nou. Li pou ed nou pou trouv lazwa dan tou seki nou pe fer dan so servis, ninport kotsa nou ete.—Iza. 41:13.
KANTIK 90 Ankouraz Sakenn Parmi Nou
^ par. 5 Parfwa bann frer ek ser ki dan servis aplintan kitfwa bizin aret zot servis, ouswa zot gagn enn nouvo afektasion. Sa lartik-la pou koz lor bann difikilte ki zot gagne ek seki zot kapav fer pou adapte ar zot nouvo sitiasion. Li koz osi lor seki lezot kapav fer pou ankouraz ek soutenir zot, ek li donn bann prinsip ki kapav ed nou tou pou fer fas ar bann sanzman.
^ par. 4 Li parey pou bann frer responsab ki’nn ariv enn sertenn laz. Zot donn bann frer ki pli zenn bann responsabilite ki zot ena. Get lartik « Frères d’expérience, Jéhovah chérit votre fidélité », dan Latour Degard Septam 2018, an Franse, ek lartik “Res Anpe ar Tomem Malgre Bann Sanzman,” dan Latour Degard Oktob 2018.
^ par. 7 Ebre 6:10-12: “10 Parski Bondie pa inzis pou bliye seki zot inn fer ek lamour ki zot finn montre pou so nom, kan zot finn servi bann sin ek ki zot pe kontign servi bannla. 11 Me nou anvi ki sakenn parmi zot montre mem zel pou ki ziska lafin zot pena okenn dout konsernan zot lesperans, 12 ek pou ki zot pa vinn pares, me ki zot imit bann dimounn ki erit bann promes, gras-a lafwa ek pasians.”
^ par. 9 Proverb 22:3, 7: “3 Enn dimounn ki ena bon zizman kasiet kan li trouv enn danze, me enn kikenn ki pena lexperyans kontign ale, ek li pey bann konsekans. 7 Bann dimounn ris diriz lor bann pov, ek sa dimounn ki pran prete la li esklav sa dimounn ki’nn pret li la.”
^ par. 12 Bann ansien dan lasanble kot zot ti pe servi avan bizin pa tarde pou ekrir enn let introdiksion. Koumsa sa bann frer ek ser-la kapav pli vit posib kontign servi antan ki pionie, ansien, ouswa asistan ministeryel.
^ par. 13 Get seri lartik “Led pou Bann Dimounn Ki An-Dey,” dan Leve! 2018, No. 3.
^ par. 59 DESKRIPSION ZIMAZ: Enn koup ki pe oblize kit zot servis misioner pe dir orevwar zot lasanble avek larm dan zot lizie.
^ par. 61 DESKRIPSION ZIMAZ: Kan zot retourn dan zot pei, sa koup-la kontign priye Zeova pou ed zot fer fas ar bann difikilte ki zot pe gagne.
^ par. 63 DESKRIPSION ZIMAZ: Avek led Zeova, sa koup-la inn re-pran servis aplintan. Zot pe pres ar bann imigre dan lang ki zot ti aprann dan zot servis misioner.
