1-3. Ta jet iaan un ko unin an maroñ oktak jerbal ko an ro rej pãd ilo jerbalin full-time?

ROBERT im Mary Jo rej ba: “Ãlikin 21 iiõ ko rekanooj em̦m̦an in am̦ro kar kõm̦m̦ane jerbalin mijinede, aolep rũtto ro 4 jinõm̦ro im jem̦am̦ro rar nañinmej im m̦õjn̦o̦. Kõm̦ro ar m̦õn̦õn̦õ in lale er. Ijoke, ear lukkuun pen am̦ro em̦m̦akũt jãn jikin eo me ilo bũruom̦ro ej ijo jikũm̦ro.”

² Bar ruo rippãlele etaer William im Terrie rej ba: “Ke kõm̦ro ar jel̦ã bwe kõm̦ro ejjab maroñ jepl̦aak ñan jerbal eo am̦ro kõn an jab em̦m̦an kiiõ ãjmour ko am̦ro, kõm̦ro ar lukkuun jañ. Kõttõpar eo am̦ro ñan karejar ñan Jeova ilo bar juon aelõñ ear jem̦l̦o̦k.”

³ Em̦m̦aan eo etan Aleksey ej ba: “Kõmar jel̦ã bwe ri-kõjdat ro rar kõn̦aan bwe en kilõk ra eo ilo jikin eo iar jerbal ie. Bõtab, kõmar ilbõk ke men in ear wal̦o̦k im kõmar aikuj em̦m̦akũt jãn Betel̦.”

4. Ta kajjitõk ko jenaaj etali ilo katak in?

⁴ Kobal̦o̦k ippãn bwebwenato ko an rein, ewõr to̦ujin ro uwaan baam̦le eo ilo Betel̦ im ro jet me rar bõk jerbal ko rekããl. * (Lale kõmel̦el̦e eo itulal̦.) Emaroñ lukkuun pen ñan an rein jeid im jatid retiljek em̦m̦akũt jãn jerbal eo aer me el̦ap aer yokwe. Ta eo emaroñ jipañ er ñan kajjioñ imminene kõn oktak in ewal̦o̦k ñan er? Ewi wãween ad maroñ jipañ er? Uwaak ko ñan kajjitõk kein remaroñ jipañ kõj aolep ñan jel̦ã ta eo jen kõm̦m̦ane ñe ewõr oktak ko rej wal̦o̦k ilo mour ko ad.

5. Ñe ej oktak jerbal eo ad, ewi wãween an men in maroñ jelõt kõj?

⁵ Meñe jej jipañ ilo jerbalin kwal̦o̦k naan ak ilo Betel̦, jemaroñ jino ad lukkuun yokwe armej ro im bareinwõt jikin eo jej jerbal ie. Kõn men in, jej bũrom̦õj ñe jej aikuj em̦m̦akũt jãn jerbal eo ad. Jej oñkake ro jaar em̦m̦akũt jãn er, im jej inepata kõn er, el̦aptata ñe jaar aikuj em̦m̦akũt kõn an ri-jum̦ae ro matõrtõr im kaeñtaan armej ro an Jeova ilo jikin eo. (Matu 10:23; 2 Kor. 11:28, 29) Bareinwõt, ñe jej bõk juon jerbal ekããl ak jepl̦aak ñan ijo jikid, ekkã ad ilbõk kõn an kanooj oktak m̦anit ko jãn doon. Robert im Mary Jo rej ba: “Ekar etal im ejako am̦ro jel̦ã kõn m̦anit ko an aelõñ eo am̦ro im bareinwõt kilen kwal̦o̦k naan ilo kajin eo am̦ro. Kõn an to am̦ro jerbal ilo bar juon aelõñ, ej ãinwõt ñe kom̦ro ruwamãejet ilo aelõñ eo am̦ro make.” Jet me eoktak kiiõ jerbal eo aer remaroñ iioon apañ kõn jããn ilo jidimkij kõnke elõñ men ko rej aikuj kõl̦l̦ãiki kiiõ. Jet remaroñ jaje ta eo enaaj wal̦o̦k im remaroñ mijak im ebbweer. Ta eo emaroñ jipañ?

6. Ewi wãween bwe jen maroñ epaake wõt Jeova?

⁶ Epaake wõt Jeova. (Jem. 4:8) Ewi wãween ad maroñ kõm̦m̦ane men in? Ikijjeen ad lõke e ãinwõt Eo ‘ej roñjake jar’ ko ad. (Sam 65:2) Ilo Sam 62:8 (UBS) ej ba: “Kom̦win kwal̦o̦k ñan e aolep inepata ko ami.” Jeova emaroñ kõm̦m̦ani men ko ñan kõj “el̦apl̦o̦k jãn men otemjej jej kajjitõk im l̦õmn̦aki.” (Eps. 3:20) Ejjab kõm̦m̦an joñan an letok men ko jej lukkuun kajjitõk kaki ilo jar ko ad. Emaroñ kõm̦m̦ani men ko ejjel̦o̦k ad kar kõtmãne kaki, ak el̦apl̦o̦k jãn jabdewõt men ko jemaroñ kar l̦õmn̦aki, ñan kõm̦adm̦õdi apañ ko ad.

7. (1) Ta eo enaaj jipañ kõj ñan epaake wõt Jeova? (2) Ekkar ñan Hibru 6:10-12, ta tokjãn ad naaj wõnm̦aanl̦o̦k wõt im tiljek ilo ad karejar ñan Jeova?

⁷ Ñan ad epaake wõt Jeova, jej aikuj riiti Jeje ko raan otemjej im kõl̦mãnl̦o̦kjen̦ kaki. Juon em̦m̦aan me ekõn kar juon mijinede ej ba: “Keini am̦ kõm̦m̦ane iien kabuñ an baam̦le eo im kõppojak ñan kweilo̦k ko ãinwõt am̦ kõn kõm̦m̦ane ilo jerbal eo am̦ kar m̦okta.” Bareinwõt, wõnm̦aanl̦o̦k wõt im lukkuun bõk kun̦aam̦ ilo jerbalin kwal̦o̦k naan ilo eklejia eo am̦ ekããl. Jeova ej keememej ro rej wõnm̦aanl̦o̦k wõt im tiljek ilo aer karejar ñane meñe rejjab maroñ kõm̦m̦ani aolep men ko rekõn kar kõm̦m̦ani m̦okta.​—Riit Hibru 6:10-12.

8. Ewi wãween an naan ko ilo 1 Jon 2:15-17 maroñ jipañ eok ñan jab m̦ad kõn m̦weiuk ko?

 ⁸ Jab m̦ad kõn m̦weiuk ko. Jab kõtl̦o̦k bwe inepata ko an lal̦ in an Setan ren “kapañ” eok jãn am̦ karejar ñan Jeova. (Matu 13:22) Jum̦ae ijjiped eo jãn lal̦ in im jãn ro m̦õttam̦ ak baam̦le eo am̦ ñan pukot jerbal ko rel̦l̦ap on̦ãer bwe kwõn maroñ jokwane ilo jukjukun pãd in an Setan. (Riit 1 Jon 2:15-17.) Lõke Jeova, eo im ej kallim̦ur bwe enaaj letok men ko jej aikuji “ilo iien eo ejejjet.” Enaaj jipañ kõj bwe en kajoor wõt tõmak eo ad, bwe jen ineem̦m̦an wõt, im enaaj bareinwõt kabwe aikuj ko ad.​—Hib. 4:16; 13:5, 6.

9. Ekkar ñan Jabõn Kõnnaan 22:3, 7, etke eaorõk ñan ad kõjparok bwe jen jab m̦uri ñe ejjab menin aikuj, im ta eo emaroñ jipañ kõj ñan kõm̦m̦ani pepe ko ilo mãlõtlõt?

⁹ Kõjparok ñan jab m̦uri ñe ejjab menin aikuj. (Riit Jabõn Kõnnaan 22:3, 7.) Emaroñ bwe an l̦ap on̦ããn ñan em̦m̦akũt, im epidodo ñan ad m̦uri. Ak ñan kõm̦m̦an bwe en dik ad m̦uri, jen kõjparok bwe jen jab baro jããn ñan wiaiki men ko jejjab lukkuun aikuji. Emaroñ pen ad pepe kõn joñan eo jej m̦uriiki ñe jej jelm̦aiki juon apañ epen, ñan waanjoñak ñe jej lale eo ejitõnbõro ippãd me enañinmej. Ilo iien rot kein, keememej bwe am̦ “jar im akwel̦ap” emaroñ jipañ eok ñan kõm̦m̦ani pepe ko ilo mãlõtlõt. Jeova emaroñ uwaaki jar ko am̦ ikijjeen an jipañ eok ñan ineem̦m̦an wõt bwe kwõn maroñ kõm̦m̦ane pepe eo em̦m̦antata.​—Pil. 4:6, 7; 1 Pit. 5:7.

10. Ewi wãween ad maroñ ejaake jem̦jerã ko rekããl ippãn ro jet?

¹⁰ Dãpij wõt jem̦jerã ko rem̦m̦an. Kwal̦o̦k kõn eñjake ko am̦ im wãween ko kwõj iiooni ippãn ro m̦õttam̦ kwepaake er, el̦aptata ro me bõlen rar bar iiooni ejja men ko wõt rekam̦õn̦õn̦õ im apañ ko kwõj iiooni. Ilo am̦ kõm̦m̦ane men in, emaroñ jipañ eok bwe en em̦m̦anl̦o̦k am̦ mour. (Ekl. 4:9, 10) Ro m̦õttam̦ me kwaar jel̦ã kajjier ilo kar jerbal eo am̦ m̦okta, renaaj baj m̦õttam̦ wõt. Kiiõ, ilo jerbal eo am̦ ekããl, kwõj aikuj pukot ro m̦õttam̦ rekããl. Keememej bwe ñan an wõr m̦õttam̦, kwõj aikuj juon eo epidodo an ro jet m̦õttãiki. Ewi wãween am̦ maroñ ejaake jem̦jerã ko rekããl ippãn ro jet? Kwal̦o̦k kõn men ko wõj rem̦m̦an Jeova ear kõjeraam̦m̦an eok kaki ke kwaar pãd ilo jerbalin full-time, im kõm̦m̦an bwe ro jet ren kile am̦ lañlõñ ilo jerbal eo an Jeova. Meñe jet ilo eklejia eo rejjab mel̦el̦e kõn an l̦ap am̦ itoklimo kõn jerbalin full-time, ak ro jet remaroñ kõn̦aan kal̦apl̦o̦k aer jel̦ã im jujen erom ro m̦õttam̦ me repaake eok. Bõtab, kõjparok bwe kwõn jab nõbar eok make im l̦ap am̦ kõnnaan kõn tõprak ko kwaar kõm̦m̦ani, im jab kõnnaan wõt kõn eñjake ko rejjab em̦m̦an me kwõj bũki.

11. Ewi wãween am̦ maroñ kõm̦m̦an bwe mourin pãlele eo am̦ en lem̦õn̦õn̦õ wõt?

¹¹ El̦aññe kwõj aikuj em̦m̦akũt jãn jerbal eo  am̦ kõnke eo pãleem̦ enañinmej, kwõn jab n̦aruon. Ak el̦aññe kwe eo ejjab em̦m̦an ãjmour eo an, jab nana am̦ mour im l̦õmn̦ak bwe kwõj kabũrom̦õj eo pãleem̦. Keememej, komiro ej “juon wõt kanniõk,” im komiro ar kallim̦ur im̦aan mejãn Jeova ñan lale im kõjparok doon jekdo̦o̦n ta eo enaaj wal̦o̦k. (Matu 19:5, 6) El̦aññe kwaar em̦m̦akũt jãn jerbal eo am̦ kõnke eo pãleem̦ ear jirilo̦k im bõro̦ro, kab kaalikkar ñan ajri eo nejũm̦ bwe el̦apl̦o̦k an aorõk ippam̦ jãn kar jerbal eo am̦. Ba ñan ajri eo nejũm̦ bwe kwõj watõk e ãinwõt juon “menin jolõt” jãn Anij. (Sam 127:3-5) Ilo ejja iien eo wõt, kwal̦o̦k ñane kõn men ko rekanooj in em̦m̦an kwaar iiooni ke kwaar pãd ilo jerbal eo am̦. Ilo am̦ kõm̦m̦ane men in, emaroñ lujur ajri eo nejũm̦ ñan kõjerbal mour eo an ñan jerbal ñan Jeova ilo jerbalin full-time ãinwõt kar kwe.

12. (1) Ewi wãween ad maroñ jipañ ro rej jerbal ilo full-time ñan wõnm̦aanl̦o̦k wõt ilo jerbal eo aer? (2) Ewi wãween ad maroñ jipañ er bwe en pidodol̦o̦k aer kajjioñ imminene kõn oktak eo ej wal̦o̦k ñan er?

¹² El̦ap ad kam̦m̦oolol kõnke elõñ eklejia ko im bar kajjojo armej ro rar kõm̦m̦an joñan wõt aer maroñ ñan jipañ ro ilo jerbalin full-time bwe ren maroñ pãdwõt ilo jerbal eo aer. Rar kõm̦m̦ane men in ilo aer rõjañ er ñan wõnm̦aanl̦o̦k wõt ilo jerbal eo aer, lel̦o̦k jããn ak men ko jet rej aikuji, ak jipañ lale ro uwaan baam̦le eo aer me rettol̦o̦k jãn er. (Gal. 6:2) El̦aññe rej lel̦o̦k juon jerbal ekããl ñan ro ilo jerbalin full-time im jilkinwaj er ñan eklejia eo am̦, jab watõk bwe an oktak jerbal eo aer ej kaalikkar bwe bõlen ear jab em̦m̦an aer jerbal ak bwe rej kajeik er. * (Lale kõmel̦el̦e eo itulal̦.) Ijello̦kun, jipañ er bwe en pidodol̦o̦k aer kajjioñ imminene kõn  oktak eo ej wal̦o̦k ñan er. Meñe ejjab l̦ap men ko rej kõm̦m̦ani kiiõ kõn an jab em̦m̦an ãjmour eo aer, ak kwal̦o̦k juon karwainene eokmããn̦ãn̦ im nõbar er kõn jerbal ko rar kõm̦m̦ani. Kal̦apl̦o̦k am̦ jel̦ã kajjier. Katak jãn jel̦ã eo aer me ekanooj l̦ap, men ko rar katak im bõk kamminene kaki, im bwebwenato ko aer.

13. Ta ko jemaroñ kõm̦m̦ani ñan jipañ ro eoktak kiiõ jerbal eo aer?

¹³ Ilo jinoin, ro eoktak kiiõ jerbal eo aer remaroñ aikuj jipañ eo am̦ ñan kappok em̦, aikuj ial̦ ñan itoitak, kappok jerbal, im men ko jet rej aikuji. Remaroñ bar aikuji mel̦el̦e ko kõn wãween ko rekããl ilo raan kein, ãinwõt kõn kilen kõl̦l̦ã owõj im bõk aer insurance. Men eo el̦ap an aorõk im rej aikuji, ejjab ad bũrom̦õj kake er, ak ad mel̦el̦e. Emaroñ pen ñan er kõn an wõr aer nañinmej ak kõn an ro ilo baam̦le eo aer nañinmej. Remaroñ bũrom̦õj kõn jako eo an eo ejitõnbõro ippãer me ear mej. * (Lale kõmel̦el̦e eo itulal̦.) Im meñe rejjab ba jabdewõt, ak remaroñ bũrom̦õj kõn aer oñkake ro m̦õttaer ilo jikin eo rar jerbal ie. Ebõk iien ñan an jako eñjake kein rem̦wilal̦ im ekkã wõt an okkõtaktak eñjake ko ad kõn men kein.

14. Ewi wãween an kar jet ri-kwal̦o̦k jipañ juon jeid im jatid kõrã ilo eklejia eo aer ñan kajjioñ imminene kõn wãween eo ekããl ej iioone?

¹⁴ Ilo tõre in, am̦ rejetak er im joñak eo am̦ emaroñ jipañ er ñan kajjioñ imminene kõn wãween eo ekããl rej iioone. Juon jeid im jatid kõrã me ear jerbal ilo bar juon aelõñ ium̦win elõñ iiõ ej ba: “Ilo kar jikin eo iar jerbal ie m̦okta, elõñ rũkkatak ro iar katak ippãer aolep raan. Ilo jikin eo ekããl ij jerbal ie kiiõ, ekar pen ñan lo juon iien em̦m̦an ñan baj kõpel̦l̦o̦k Baibõl̦ eo ak kwal̦o̦k juon pija ilo jerbalin kwal̦o̦k naan. Ak ri-kwal̦o̦k ro ilo eklejia eo aõ rar kajjitõk ippa bwe in etal ippãer ñan rũkkatak ro aer im ro rej jepl̦aak ippãer. Aõ kar loe an rein jeid im jatid me rekijejeto im peran katak ippãn rũkkatak ro rej kõm̦m̦an wõnm̦aanl̦o̦k, men in ear jipañ eõ ñan kajim̦we l̦õmn̦ak eo aõ. Ilo teretore eo aõ ekããl, iar katak kilen jino bwebwenato ippãn armej ro. Aolep men kein rar jipañ eõ bwe in jino aõ bar lañlõñ.”

15. Ewi wãween bwe kwõn maroñ lo tõprak ilo jerbal eo am̦ ekããl?

¹⁵ Kwõmaroñ lo tõprak ilo jerbal eo am̦ ekããl. Jab watõk bwe an oktak jerbal eo am̦ kiiõ ej mel̦el̦ein bwe ejjab em̦m̦an am̦ kar jerbal ak bwe edikl̦o̦k tokjam̦. Pukot wãween ko Jeova ej lewaj pein im jipañ eok ilo mour eo am̦ kiiõ im wõnm̦aanl̦o̦k wõt ilo am̦ kwal̦o̦k naan. Anõke Kũrjin ro retiljek ilo kar raan ko an rijjilõk ro. Jabdewõt jikin rar pãd ie, rar “deblo̦ke ãneo im kwal̦o̦k kõn ennaan eo em̦m̦an kõn naanin Anij.” (Jrb. 8:1, 4) Ilo am̦ kate eok im wõnm̦aanl̦o̦k wõt ilo jerbalin kwal̦o̦k naan, kwõmaroñ lo tõprak ko rem̦m̦an. Ñan waanjoñak, bainier ro me rar kadiwõjl̦o̦k er jãn juon aelõñ rar em̦m̦akũt ñan juon ãne epaak, ijo me rar bar aikuj jipañ ilo kajin eo aer. Ilowaan wõt jejjo allõñ, elõñ kurub ko rekããl me em̦õkaj an kar lõñl̦o̦k uwaaer, rar jutak ilo jikin in.

16. Ewi wãween am̦ maroñ lo lañlõñ ilo jerbal eo am̦ ekããl?

¹⁶ “Lañlõñ in Jeova ej ami kajoor.” (Nih. 8:10) Ijo me ej aikuj l̦aptata an itok lañlõñ eo ad jãne ej kõtaan eo ad ippãn Jeova, im jab jãn jerbal eo ad, meñe el̦ap ad lukkuun yokwe jerbal eo. Kõn men in, wõnm̦aanl̦o̦k wõt im etetal ippãn Jeova, kappukot mãlõtlõt, tõl, im jipañ jãn e. Keememej bwe kwaar maroñ jino am̦ yokwe jerbal eo am̦ ilo jikin eo kwaar jerbal ie m̦okta kõnke kwaar kõmaatl̦o̦k aolepen am̦ ñan jipañ armej ro ijo. Ãindeinl̦o̦k wõt, bar kõmaatl̦o̦k aolepen bũruom̦ ilo jerbal eo am̦ kiiõ im lale wãween an Jeova jipañ eok bwe kwõn bar yokwe jerbal in am̦ ekããl.​—Ekl. 7:10.

17. Ta eo jej aikuj keememeje kõn jerbal eo jej kõm̦m̦ane kiiõ?

¹⁷ Jej aikuj keememej bwe ad jerbal ñan Jeova ej ñan indeeo, bõtab jerbal eo ad kiiõ ej ñan jidik wõt iien. Ilo lal̦ eo ekããl, kõj aolep emaroñ naaj oktak jerbal ko ad. Aleksey, eo kar kwal̦o̦k kake m̦oktal̦o̦k, ej tõmak bwe wãween ko ej iiooni kiiõ rej kõpooje ñan oktak ko renaaj wal̦o̦k ilo iien en̦. Ej ba: “Iar jel̦ã bwe em̦ool an Jeova pãd im bwe lal̦ eo ekããl enaaj lukkuun wal̦o̦k, ak ear ãinwõt ñe men kein rar ettol̦o̦k jidik. Kiiõ ij loe Jeova ãinwõt ñe ej pãd im̦aan meja im lal̦ eo ekããl ãinwõt jikin eo ij pojakin bõjrakl̦o̦k ie.” (Jrb. 2:25) Jekdo̦o̦n ta jerbal eo ad, jen wõnm̦aanl̦o̦k wõt im etetal ippãn Jeova. Ejãmin ilo̦k jãn kõj, ak enaaj jipañ kõj ñan lo m̦õn̦õn̦õ ilo ad kõm̦m̦ane jabdewõt men eo jemaroñ kõm̦m̦ane ilo jerbal eo an, jekdo̦o̦n jerbal rot.​—Ais. 41:13.