1-3. ¿Tleka sekimej tokniuan kikauaj kanin okitekichiuilijtokaj Jehová?

ROBERT uan Mary Jo yokipiayaj kanaj veintiún xiuitl otlapaleuijtokaj ken misioneros. Pero intatajuan omokokojkej. Yejuan okijtojkej: “Otechpaktiaya tikinmaluiskej. Pero sapanoa otimoyolkokojkej porque ayakmo tiyetoskiaj kanin otiktekichiuiliayaj Jehová”.

² Tokni William uan isiua tlen motokayotia Terrie, okijtojkej: “Otichokakej ijkuak otechiluijkej otimokokoayaj, ik non, ayakmo uelis timokopaskiaj kanin otiktekichiuiliayaj Jehová. Nochipa otiknekiayaj tiktekichiuiliskej Jehová itech non altepetl. Pero ayakmo uelis ijkon tikchiuaskiaj”.

³ Tokni Alexéi okijto: “Otikmatiayaj akinmej techkokoliaj okinekiayaj kitsakuaskej Betel kanin otikatkaj. Sapanoa otimoyolkokojkej ijkuak okitsakej Betel uan otiajkej”.

4. ¿Tlen tlajtlanilmej tikinnankiliskej?

⁴ Miakej tokniuan tlen okatkaj Betel uan oksekimej okinmiluijkej oksekan ma kitekichiuilitij Jehová. * Ninmej tokniuan xamo sapanoa omoyolkokojkej ijkuak okikajkej kanin okatkaj. ¿Tlen kinpaleuis amo ma moyolkokokan? ¿Ken uelis tikinpaleuiskej? Tinochtin techpaleuis tlen moijtos ijkuak monankiliskej ninmej tlajtlanilmej porque noijki uelis itlaj mopatlas itech tonemilis.

5. ¿Tlen uelis techpanos ijkuak itlaj mopatla itech tonemilis?

⁵ Tla tiktekichiuiliaj Jehová ompa Betel noso oksekan, tinochtin tikintlasojtlaj akinmej inmiuan tikatej. Ik non, sapanoa timoyolkokoaj ijkuak oksekan tiauij. Tikinmilnamikij tokniuan uan techtekipachoaj tla oksekan otiajkej porque tekiuajkej opejki techtlajyouiltiaj (Mat. 10:23; 2 Cor. 11:28, 29). Ualeua oui timomatiskej kanin tichantitiuij maski ompa otimoskaltijkej. Robert uan Mary Jo okijtojkej: “Amo otimomatiayaj kanin otimoskaltijkej uan amo kuali otimomachiliayaj ijkuak opejki titetlapouiaj ika totlajtol. Otikmachiliayaj ayakmo uelis ompa tichantiskiaj”. Xamo tiktlaxtlauaskej seki tlamantli tlen achto amo otiktlaxtlauayaj. Ik non, amo tikmatiskej tlen tikchiuaskej uan timoyolkokoskej. ¿Tlen techpaleuis tla ijkon techpanos?

6. ¿Ken uelis nochipa timouikaskej iuan Jehová?

⁶ Nochipa ma timouikakan iuan Jehová (Sant. 4:8). ¿Ken tikchiuaskej? Itech ma titlaneltokakan porque ye techkaki ijkuak tiktlatlaujtiaj (Sal. 65:2). Salmo 62:8 techiluia: “Xikiluikan tlen nankipiaj itech namoyolo”. Jehová techmakas “okachi miak de tlan tejwah tiktlajtlani noso tiknejnewiliah” (Efes. 3:20). Jehová amo san techmaka tlen tiktlajtlaniliaj. Techmakas tlen techpoloa uan uelis techtlajtlachialtis.

7. (1) ¿Tlen techpaleuis ma timouikakan iuan Jehová? (2) Ijkon ken kijtoa Hebreos 6:10-12, ¿tlen tikseliskej tla timochijchikauaj tiktekichiuiliskej Jehová?

⁷ Noijki techpaleuis nochipa ma timouikakan iuan Jehová tla mojmostla tiktlajtoltiaj Biblia uan itech timokuayejyekoaj. Se tokni tlen okatka misionero, okijto: “Moneki nochipa ma tikueyichiuakan Jehová iuan tokalchanejkauan uan ma timomachtikan ijkuak timonechikoskej. Ma tikchiuakan ken otikchiuayaj kanin achto otiktekichiuiliayaj Jehová”. Noijki nochipa ma titetlapouikan iuan tokniuan tlen axkan  inmiuan timonechikoaj. Jehová amo keman kinmilkaua akinmej mochijchikauaj kitekichiuiliskej maski ayakmo kichiuaj ken achto (xiktlajtolti Hebreos 6:10-12).

8. ¿Ken techpaleuia 1 Juan 2:15-17 amo ma tiktemokan miak tlamantli?

⁸ Amo ma tiktemokan miak tlamantli. Amo ma techyoltilana tlen kiyekana Satanás porque non kichiuas ayakmo ma tikpiakan chikauak totlaneltokilis (Mat. 13:22). Amo ma tikinkakikan tokalchanejkauan noso toyolikniuan ijkuak techiluiskej okachi ma tiktlanikan tomin uan ma tikpiakan okseki tlamantli (xiktlajtolti 1 Juan 2:15-17). Ma tikilnamiktokan Jehová techpaleuis ma tikpiakan chikauak totlaneltokilis, techyolchikauas uan techmakas tlen ika timopanoltiskej ijkuak monekis (Heb. 4:16; 13:5, 6).

9. (1) Ijkon ken kijtoa Proverbios 22:3, 7, ¿tleka amo ma tikmotlaneuikan tomin tla amo moneki? (2) ¿Tlen techpaleuis kuali ma timokuayejyekokan kox tikmotlaneuiskej tomin?

⁹ Amo ma tikmotlaneuikan tomin tla amo moneki (xiktlajtolti Proverbios 22:3, 7). Xamo patio kisas ijkuak techtlauikiliskej kanin tiaskej uan tiknekiskej tikmotlaneuiskej tomin. Tlamo moneki, amitlaj ma tikkouakan tlen satepan tiktlaxtlajtiaskej. Ualeua xamo timokuayejyekoskej moneki tikmotlaneuiskej tomin ijkuak se tokalchanejka mokokoa. Ijkuak ijkon techpanos, ma tiktlatlaujtikan Jehová ma techpaleui ma tikmatikan tlen tikchiuaskej. Ye techyolseuis uan techpaleuis ma tikpejpenakan tlen okachi kuali (Filip. 4:6, 7; 1 Ped. 5:7).

10. ¿Tlen techpaleuis ma timouikakan iuan oksekimej tokniuan?

¹⁰ Ma timouikakan iuan akinmej techyolchikauaskej. Ma tikintlapouikan toyolikniuan ken timomachiliaj uan tlen ouijkayotl tikixnamikij. Okachi ma timotlapouikan iuan akinmej ijkon yokinpanok uan non techpaleuis kuali ma timomachilikan (Ecl. 4:9, 10). Moneki ma timouikakan iuan oksekimej tokniuan maski ok timouikaj iuan akinmej katej kanin otikatkaj. Ik non, ma tikintlapouikan oksekimej ken yotechteochi Jehová uan ijkon kitaskej tiyolpakij. Sekimej tokniuan amo kajsikamatiskej tleka sapanoa tiyolpakij okachi tiktekichiuiliaj Jehová. Pero oksekimej xamo kinpaktis uan kinekiskej touan mouikaskej. Pero amo san ma tikinmiluijtokan tlen yotikchijkej uan tlen techyolkokoa.

11. ¿Tlen techpaleuis ma tiyolpakikan iuan tonamik?

¹¹ Amo ma tiktlajtlakoltikan tonamik tla omokoko uan oksekan otechtitlankej. Noijki  tla tejuan otimokokojkej amo ma timoyolkokojtokan nion ma timokuayejyekokan ayakmo techpatioitas tonamik. Ma tikilnamiktokan ijkuak otimonamiktijkej otikijtojkej ixpan Jehová nochipa san sekan timomaluiskej (Mat. 19:5, 6). Tla otikmatkej tikpiaskej se konetsintli, ma tikiluikan sapanoa tiktlasojtlaj uan okachi tikpatioitaj. Nochipa ma tikiluikan ye se tetliokolil tlen Jehová otechmakak (Sal. 127:3-5). Ma tiktlapouikan tlen otikchijkej ijkuak okachi otiktekichiuiliayaj Jehová uan xamo noijki kinekis ijkon kichiuas.

12. (1) ¿Ken tikinpaleuiskej tokniuan okachi ma kitekichiuilikan Jehová? (2) ¿Tlen tikchiuaskej tla ajsiti se tokni itech tlanechikol?

¹² Miakej tokniuan kinpaleuiaj oksekimej okachi ma kitekichiuilijtokan Jehová. Kinyolchikauaj, kintliokoliaj tomin, kinmakaj seki tlamantli noso kinmaluiliaj inkalchanejkauan. Sapanoa kuali tlen kichiuaj tokniuan (Gál. 6:2). ¿Tlen tikchiuaskej tla itech totlanechikol kititlaniskej se tokni tlen okachi okitekichiuiliaya Jehová? Amo ma timokuayejyekokan ayakmo kuali otekipanoaya noso itlaj amo kuali okichi kanin achto okatka. * Ma tikyolchikauakan porque touan kajki. Ma tiktlasojtlakan uan ma tikiluikan kuali tlen yokichi maski axkan ayakmo ijkon kichiua porque mokokoa. Okachi ma tikixmatikan. Ma timopaleuikan ika tlen kimati uan ken kichiua seki tlamantli.

13. ¿Ken uelis tikpaleuiskej se tokni ijkuak oksekan kititlanij ma kitekichiuiliti Jehová?

 ¹³ Ijkuak tokni ajsiti totlanechikol, xamo monekis ma tikpaleuikan ma kitemo kanin chantis, ken uelis kanaj yas, kanin tekipanos uan okseki tlamantli. Uelis tikiluiskej ken motlaxtlaua impuestos noso ken uelis kipias seguro. Pero tokni okachi kinekis ma tikajsikamatikan uan amo san ma tikiknomatikan. Xamo ye mokokoa noso se ikalchanejka noso moyolkokoa porque oixpoliuik se ikalchanejka. * Xamo kinmilnamiki iyolikniuan maski amo techiluia. Ualeua moyolkokoa uan oui moyolchikauas.

14. ¿Ken otlapaleuijkej tokniuan ma momati se tokni?

¹⁴ San niman momatiskej tla inmiuan titetlapouiaj uan tla kitaj tikpiaj kuali toyelis. Se tokni tlen miak xiuitl okitekichiuili Jehová itech okse altepetl, okijto: “Mojmostla onitlamachtiaya kanin onikatka. Pero kanin oniajsito oui onikitaya niktlajtoltis se texto noso nikteititis se video. Pero tokniuan onechiluiayaj inmiuan ma nitlamachtiti uan ma nitetlajpaloti. Sapanoa onechpaleuijkej ninmej tokniuan porque kuali otlamachtiayaj uan oyolpakiayaj. Noijki onechpaleui ijkuak onikitak okipatlatokaj innemilis akinmej okinmachtiayaj. Opejki niyolpaki ijkuak opejki okachi nitetlapouia”.

15. ¿Ken uelis tiyolpakiskej kanin techtitlaniskej?

¹⁵ Uelis tiyolpakiskej kanin techtitlaniskej. Amo ma timokuayejyekokan ayakmo itlaj topati porque ayakmo okachi tiktekichiuiliaj Jehová. Ma tikitakan ken yotechpaleui uan ma titetlapouikan. Ma tikchiuakan ken okichijkej tokniuan tlen okatkaj itech achto siglo. Yejuan “sentetl kan ik oyayah otetlapowiayah de n kualitlájtoli de Dios” (Hech. 8:1, 4). Miakej tikinpaleuiskej tla timochijchikauaskej titetlapouiskej. Ma tikitakan tlen okinpanok  sekimej tokniuan ijkuak okinkixtijkej itech inmialtepe. Kanin oyajkej noijki opejki tetlapouiaj ika intlajtol. Opanok seki metstli opejki miakej monechikoaj.

16. ¿Tlen techpaleuis ma tiyolpakikan kanin techtitlaniskej?

¹⁶ Nehemías okinmilui judíos ye Jehová kichiua ma tiyolpakikan noso techyolchikaua (Neh. 8:10). Maski sapanoa otechpaktiaya kanin otiktekichiuiliayaj toTajtsin Dios, okachi ma tikpatioitakan iuan timouikaj uan amo kanin otikatkaj. Moneki timouikaskej iuan Jehová tla tiknekij tiyolpakiskej, ma tikiluikan ma techmaka ixtlamatilistli, ma tiktlajtlanilikan ma techyekana uan ma techpaleui. Ma tikilnamiktokan otikpatioitayaj kanin otiktekichiuiliayaj Jehová porque otiknekiayaj miakej tikinpaleuiskej. Jehová techpaleuis ma techpakti kanin axkan tiktekichiuiliaj tla timochijchikauaj miakej tikinpaleuiskej (Ecl. 7:10).

17. ¿Tlen moneki tikilnamiktoskej?

¹⁷ Ma tikilnamiktokan nochipa tiktekichiuiliskej Jehová pero axkan uelis techiluiskej oksekan ma tiktekichiuilitij. Itech xochitlali xamo techiluiskej ken tiktekichiuiliskej Jehová. Alexéi tlen itech yotimotlapouijkej, okijto tlen axkan kipanotok kipaleuis satepan. Okijto: “Nochipa nikilnamiktok Jehová melauak kajki uan noijki xochitlali melauak mochiuas pero onimokuayejyekoaya ok uejkauaskia. Axkan okachi kuali nimouika iuan Jehová uan nikneltoka tlaltikpak yimokopas xochitlali” (Hech. 2:25). Nochipa ma tiyetokan iuan Jehová maski san kanin tiktekichiuilitiuij. Amo keman techkauas. Nochipa techpaleuis ma tiyolpakikan tla timochijchikauaj tiktekichiuiliskej maski san kanin techtitlaniskej (Is. 41:13).