OSHITOPOLWA SHOKUKONAKONWA 34
Okwiigilila oshinakugwanithwa oshipe
“Kalunga oku shi kwiinekelwa. Ita dhimbwa iilonga nohole yeni mokusimanekitha edhina lye.” — HEB. 6:10.
EIMBILO 38 Ote ke ku koleka
ELALAKANO LYOSHITOPOLWA *
1-3. Omolwomatompelo gamwe geni iinakugwanithwa yaalongi yethimbo lyu udha tashi vulika yi lunduluke?
OMUMWATATE Robert nomukadhi Mary Jo, otaya ti: “Konima sho twa kala omimvo 21 miilonga yuutumwa, aavali yetu ayehe yane oya tameke okweehama. Otwa li tu na ehalo lyoku ya sila oshimpwiyu. Nonando ongawo, otwa li tu uvu nayi sho twa li tu na okuthiga po ehala ndyoka tu hole noonkondo, moka twa kala tatu longele tu li aatumwa.”
2 Omumwatate William nomukadhi Terrie otaya ti: “Otwa li twa lili, sho twa mono kutya uukolele wetu itawu tu pitike we tu tsikile noshinakugwanithwa shetu. Ondjodhi yetu yokulongela Jehova kondje yoshilongo, oya hulile mokwena kwa thita.”
3 Omumwatate Aleksey ota ti: “Otwa li tu shi kutya aapataneki yetu oya li ya hala okupata oshitayimbelewa moka nda li tandi longele. Osha li she tu uvitha nayi, oshoka shoka osho ya li ya ningi, e tatu zi mo moBetel.”
4. Omapulo geni tatu ka kundathana moshitopolwa shika?
4 Shimwe ishewe, aalongi yethimbo lyu udha oyendji, mwa kwatelwa Aabetel, oya li ya pewa iinakugwanithwa iipe. * Otashi vulika hashi kala oshidhigu kaamwatate naamwameme mbaka aadhiginini okweetha po oshinakugwanithwa shoka ya li ya lenga. Oshike tashi vulu oku ya kwathela, ya taambe ko omalunduluko? Ongiini to vulu oku ya kwathela? Omayamukulo komapulo ngoka, otaga vulu oku tu kwathela atuheni, uuna twa taalela omalunduluko monkalamwenyo.
NKENE TO VULU OKUTAAMBA KO ELUNDULUKO
Omolwashike tashi vulika shi kale eshongo kaauvithi yethimbo lyu udha ya thige po oshinakugwanithwa shawo? (Tala okatendo 5) *
5. Omomikalo dhini elunduluko lyoshinakugwanithwa tali vulu oku tu guma?
5 Kutya nduno ohatu longele momapya nenge moBetel, ohatu ilongo okukala tu hole aantu noonkondo nosho wo oshitopolwa moka hatu longele. Uuna tu na okuthiga po oshinakugwanithwa shetu, ohashi tu dhenge pomutima. Ohatu ka kala twa yuulukwa aamwatate naamwameme mboka twa thiga po nohatu kala tatu ipula nayo, unene tuu ngele otatu yi, omolwomapataneko. (Mat. 10:23; 2 Kor. 11:28, 29) Natango, okutaamba ko oshinakugwanithwa oshipe nenge okugalukila kegumbo, olundji ohashi kala eshongo, molwaashono otashi ku pula wu igilile ishewe oshitopolwa sheni. Omuwatate Robert nomukadhi Mary Jo otaya ti: “Katwa li we twa igilila omukalondjigilile gwetu nosho wo nokuli okuuvitha melaka ndyoka twa yama. Otwa li tu uvite twa fa inaatu opalela mo we moshilongo shetu.” Yamwe mboka oshinakugwanithwa shawo sha lunduluka, ohashi vulika yi iyadhe meshongo lyokwaa na oshimaliwa. Otashi vulika ya kale ye uvite inaaya gamenwa noya teka omukumo. Oshike tashi vulu oku ya kwathela?
Osha simana tu hedhe popepi naJehova nokukala twe mu inekela (Tala okatendo 6-7) *
6. Ongiini tatu vulu okukala popepi naJehova?
6 Kala popepi naJehova. (Jak. 4:8) Ongiini tatu vulu oku shi ninga? Omokukala twe mu inekela e li Kalunga ‘ngoka ha uvu omagalikano.’ (Eps. 65:2) Episalomi 62:8 otayi ti: “Anekeni omaudhigu geni koshipala she.” Jehova ota vulu okulonga “oshindji shi vulithe pushoka tatu shi indile nenge tatu shi dhiladhila.” (Ef. 3:20) Ihe tu pe owala shoka twe mu indila kondandalunde. Oha vulu wo okukandula po omaupyakadhi getu momukalo moka inaatu dhiladhila nando onale.
7. (a) Oshike tashi ke tu kwathela tu tsikile okukala popepi naJehova? (b) Shi ikolelela kAahebeli 6:10-12, oshizemo otashi ka kala shini, ngele otwa tsikile okulongela Jehova nuudhiginini?
7 Opo wu kale popepi naJehova, kala ho lesha Ombiimbeli esiku kehe nokutedhatedha kwaashoka wa lesha. Omumwatate gumwe ngoka a li nale omutumwa, ota ti: “Kala ho ningi elongelokalunga lyuukwanegumbo nokwiilongekidhila okugongala pandjigilile, ngaashi wa kala ho shi ningi sho wa li noshinakugwanithwa shoye oshikulu.” Shimwe ishewe, tsikila okuuvitha onkundana ombwanawa ngaashi to vulu megongalo lyoye epe. Jehova oha dhimbulukwa mboka haya tsikile oku mu longela nuudhiginini, nonando itaya vulu okuninga ashihe shoka ya li haya ningi nale. — Lesha Aahebeli 6:10-12.
8. Ongiini oohapu ndhoka dhi li muJohannes gwotango 2:15-17, tadhi vulu oku ku kwathela wu kaleke onkalamwenyo yoye inaayi kitakana?
8 Kala wu na onkalamwenyo inaayi kitakana. Ino etha iimpwiyu yomuuyuni waSatana yi “thininike” okulongela kwoye Jehova. (Mat. 13:22) Yanda omathiminiko ngoka tage ku zile muuyuni, kookuume koye nenge kaakwanezimo yoye mboka ya tula einekelo lyawo moshimaliwa muuyuni mbuka waSatana. (Lesha 1 Johannes 2:15-17.) Inekela muJehova, ngoka a uvaneka kutya ote ke tu kwathela tu kale tu na eitaalo lya kola, tu kale twa ngungumana noku tu pa shoka twa pumbwa “pethimbo lyo opala.” — Heb. 4:16; 13:5, 6.
9. Shi ikolelela kOmayeletumbulo 22:3, 7, omolwashike sha simana okuyanda okulya oongunga inaadhi pumbiwa, noshike tashi vulu oku tu kwathela tu ninge omatokolo ge li pandunge?
9 Yanda oongunga inaadhi pumbiwa. (Lesha Omayeletumbulo 22:3, 7.) Omathimbo gamwe, ohashi pula ondilo okutembuka, nohashi kala oshipu omuntu a lye oongunga. Opo wu kale kuu na oongunga odhindji, kotokela okulanda iinima koondjo, mbyoka inoo pumbwa. Uuna tu li monkalo ondhigu, ngaashi okusila oshimpwiyu aanegumbo lyetu mboka taya ehama, otashi vulika shi kale oshidhigu tu lye oondjo dha eleka. Uuna wu li monkalo ya fa mpono, dhimbulukwa kutya ‘okugalikana nokwiindila wa mana mo,’ otaku vulu oku ku kwathela wu ninge omatokolo ge li pandunge. Jehova ota vulu okuyamukula omagalikano goye, moku ku pa ombili ndjoka tayi ‘gamene omwenyo gwoye nomadhiladhilo goye.’ Ote ke ku kwathela wo wu tokole pandunge. — Fil. 4:6, 7; 1 Pet. 5:7.
10. Ongiini tatu vulu okumona ookuume aape?
10 Kala wu na ekwatathano ewanawa nookuume koye. Popya nookuume koye kombinga yankene wu uvite nosho wo omashongo ngoka wa taalela, unene tuu naamboka ya pita monkalo ya faathana. Okuninga ngawo, otaku vulu oku ku kwathela wu kale wa mbilipalelwa. (Omuuv. 4:9, 10) Ookuume koye mboka wa li wu na pethimbo wu li moshinakugwanithwa shoye oshikulu, otaya ka tsikila okukala ookuume koye. Nonando ongawo, owa pumbwa wo ookuume aape, sho wu na oshinakugwanithwa oshipe. Dhimbulukwa kutya ngele owa hala okukala wu na ookuume, owa pumbwa okukala kuume omwaanawa. Ongiini to vulu okumona ookuume aape? Lombwela yalwe kombinga yiimoniwa yoye iiwanawa miilonga yaJehova, opo ya tseye enyanyu ndyoka wu na. Nonando yamwe megongalo kaye uvite ko uulaadhi woye wokukala miilonga yethimbo lyu udha, yalwe otashi vulika ya hokwe oshiholelwa shoye, e taya ningi ookuume koye aawanawa. Ihe kala wa kotoka kuu gandje eitulomo lya pitilila kwaashoka wa pondola miilonga yaJehova, noino gandja eitulomo komaiyuvo omawinayi ngoka tashi vulika wu na.
11. Ongiini tamu vulu okukala mwa nyanyukwa mondjokana yeni?
11 Ngele owa thiga po oshinakugwanithwa shoye, molwuukolele wakuume koye kopandjokana, ino mu pa uusama. Nenge, ngele owa tameke okukala kuu na we uukolele, ino ipa uusama nokudhiladhila kutya owa uvitha nayi kuume koye kopandjokana. Dhimbulukwa kutya omu li “omuntu gumwe,” nomwa gana koshipala shaKalunga kutya otamu ka silathana oshimpwiyu miipyu nomiitalala. (Mat. 19:5, 6) Ngele owa thiga po oshinakugwanithwa shoye, omolwetegelelo inaali dhiladhilwa, shilipaleka kutya omumwoye oku shi shi kutya oye a simanenena e vule oshinakugwanithwa shoka wa li wu na. Mu shilipaleka kutya owe mu tala ko e li “eyambeko” lya za kuKalunga. (Eps. 127:3-5) Mu lombwela wo kombinga yiimoniwa iiwanawa mbyoka wa li wa mono moshinakugwanithwa shoye. Ngele owe shi ningi, otashi vulu okwiinyengitha omumwoye naye a kale a hala okulongela Jehova ethimbo lyu udha.
NKENE YALWE TAYA VULU OKUKWATHELA
12. (a) Ongiini tatu vulu okukwathela mboka ye li miilonga yethimbo lyu udha, ya tsikile niinakugwanithwa yawo? (b) Ongiini tatu vulu oku ya kwathela ya igilile oshinakugwanithwa shawo oshipe?
12 Oshi shi okupandulwa, sho omagongalo ogendji noohandimwe haya ningi ngaashi taya vulu ya kwathele mboka ye li miilonga yethimbo lyu udha, ya tsikile niilonga yawo. Ohaye shi ningi moku ya ladhipika ya tsikile niilonga yawo, moku ya pa shoka ya pumbwa nenge moku ya kwathela ya sile oshimpwiyu aakwanezimo yawo. (Gal. 6:2) Ngele mboka ye li miilonga yethimbo lyu udha oya pewa oshinakugwanithwa oshipe e taya tuminwa kegongalo lyeni, ino dhiladhila kutya oya ndopa okugwanitha po oshilonga shawo nenge ya ninga sha sha puka. * Pehala lyaashono, ya kwathela ya igilile oshinakugwanithwa shawo oshipe. Ya taamba ko nomaako agehe noku ya pandula, omolwiilonga yawo yuudhiginini, nonando itaya vulu we okulonga oshindji ngaashi nale, omolwuukolele. Kambadhala oku ya tseya nawa. Ilonga ko sha kontseyo yawo oyindji, kedheulo ndyoka ya mona nokiimoniwa yawo.
13. Ekwatho lini tatu vulu okupa mboka ya pewa oshinakugwanithwa oshipe?
13 Mboka ya pewa oshinakugwanithwa oshipe, petameko otashi vulika tu kale twa pumbwa oku ya kwathela ya mone ehala lyokukala, olefa, iilonga niinima yilwe mbyoka ya pumbwa. Otashi vulika wo ya kale ya pumbwa uuyelele wu li pethimbo kombinga yiinima yakehe esiku, ngaashi omakwashilipaleko gontumba nokufuta iifendela. Shoka sha simanenena, oya hala tu uve ko onkalo yawo, ihe haku ya etela ohenda. Otashi vulika taya kondjo nokwaahe na uukolele nenge nuukolele waapambele yawo. Otashi vulika ya nika oluhodhi, omolweso lyomuholike gwawo. * Otashi vulika wo ya kale ya yemata, nonando katu shi wete, sho ya thiga po ookuume kawo mboka ya li ye na pethimbo ya li moshinakugwanithwa shawo oshikulu. Ohashi ya pula ethimbo ya taambe ko oonkalo ndhoka.
14. Omumwameme gumwe okwa li a kwathelwa ngiini kaauvithi yomoshitopolwa moka a tembukile, a igilile oshinakugwanithwa she oshipe?
14 Ngashingeyi ekwatho lyoye noshiholelwa shoye, otayi vulu oku ya kwathela ya igilile onkalo ompe. Omumwameme gumwe ngoka a kala ta longele moshilongo shilwe uule womimvo odhindji, ota ti: “Sho nda li ndi na oshinakugwanithwa shandje oshikulu, onda li handi ningi omakonakonombiimbeli kehe esiku. Ihe moshinakugwanithwa shandje oshipe, osha li oshidhigu ndi mone ompito yokuleshela omuntu enyolo muukalele nenge ndi mu ulukile okavidio. Elago enene, aauvithi yomoshitopolwa oya li haya pula ndje tu ye nayo komaishunoko gawo nokomakonakonombiimbeli gawo. Okutala aamwatate naamwameme mboka aalaadhi naadhiginini taya ningi omakonakonombiimbeli taga humu komeho, osha kwathele ndje ndi kale ndi na etaloko ewanawa. Ondi ilongo nkene ndi na okutameka oonkundathana naantu yomoshitopolwa shetu oshipe. Iinima ayihe mbyoka oya kwathele ndje ndi kale ndi na enyanyu ishewe.”
PULA KOMEHO!
Tala omikalo moka to vulu okutamununa mo uukalele woye moshitopolwa sheni (Tala okatendo 15-16) *
15. Ongiini to vulu okupondola moshinakugwanithwa shoye oshipe?
15 Oto vulu okupondola moshinakugwanithwa shoye oshipe. Ino dhiladhila kutya owa ninga sha sha puka moshinakugwanithwa shoye oshikulu nenge kutya ngashingeyi ino simana we. Ndhindhilika nkene Jehova te ku kwathele ngashingeyi monkalamwenyo yoye nokutsikila okuuvitha. Landula oshiholelwa shAakriste aadhiginini yomethelemimvo lyotango. Oya li ya “yi akuhe noyu uvitha oohapu dhaKalunga.” (Iil. 8:1, 4) Oonkambadhala dhoye dhokutsikila okuuvitha, otadhi vulu dhi ete iizemo iiwanawa. Pashiholelwa, aakokolindjila yamwe mboka ya li ya tidhwa mo moshilongo shontumba, oya li ya tembukile koshishiindalongo, moka mwa li aantu oyendji yelaka lyawo ya pumbwa okuuvithilwa. Muule woomwedhi oonshona, opwa totwa oongundu oompe melaka ndyoka nodha li tadhi ningi ehumokomeho.
16. Ongiini to vulu okumona enyanyu moshinakugwanithwa shoye oshipe?
16 Ombiimbeli otayi ti: “Enyanyu ndyoka Omuwa te li gandja, nali mu kumike.” (Neh. 8:10) Ekwatathano lyetu naJehova olyo unene nali tu etele enyanyu, ihe hashinakugwanithwa shetu, nonando otu kale tu shi hole shi thike peni. Onkee ano, kala popepi naJehova noku mu pula e ku pe uunongo, e ku wilike noku ku ambidhidhe. Dhimbulukwa kutya shoka sha li she ku ningitha wu kale wu hole oshinakugwanithwa shoye oshikulu, oosho wa ningi oonkambadhala dha mana mo wu kwathele aantu. Onkee longa nuudhiginini moshinakugwanithwa shoye oshipe nokumona nkene Jehova te ku kwathele wu kale wo wu shi hole. — Omuuv. 7:10.
17. Oshike tu na okudhimbulukwa kombinga yoshinakugwanithwa shoka tu na ngashingeyi?
17 Dhimbulukwa kutya okulongela kwetu Jehova oshinima shaaluhe, ihe oshinakugwanithwa shoka tu na ngashingeyi oshopakathimbo owala. Muuyuni uupe, iinakugwanithwa yetu atuheni otashi vulika yi ka lunduluke. Omumwatate Aleksey ngoka a popiwa metetekelo, ota ti kutya omalunduluko moshinakugwanithwa she, otage mu kwathele i ilongekidhile omalunduluko gomonakuyiwa. Ota ti: “Onda kala aluhe ndi shi kutya Jehova ogwolela nuuyuni uupe oshinima shoshili, ihe eitulomo lyandje hako nda kala nde li ukitha. Ngashingeyi ondi wete ndi li popepi naJehova nondi uvite uuyuni uupe wu li pokuya.” (Iil. 2:25) Kutya nduno otu na oshinakugwanithwa shini, natu tsikile okweenda pamwe naJehova. Ke na esiku e ke tu ethe, ihe ote ke tu kwathela tu nyanyukilwe kehe shoka tatu ningi miilonga ye kutya nduno openi. — Jes. 41:13.
EIMBILO 90 Tu tsaathaneni omukumo
^ okat. 5 Omathimbo gamwe, aamwatate naamwameme mboka ye li miilonga yethimbo lyu udha, otashi vulika ya ze mo nenge ya pewe oshinakugwanithwa oshipe. Oshitopolwa shika, otashi kundathana omashongo ngoka haya kala ya taalela naashoka tashi vulu oku ya kwathela ya taambe ko oonkalo oompe. Otashi kundathana wo nkene yalwe taya vulu oku ya tsa omukumo noku ya ambidhidha nosho wo omakotampango ngoka taga vulu oku tu kwathela atuhe, tu taambe ko omalunduluko.
^ okat. 4 Sha faathana, uuna aamwatate yoshinakugwanithwa ya adha omimvo dhontumba, iinakugwanithwa yawo ohaye yi gandja kaamwatate aagundjuka. Tala oshitopolwa: “Aakriste aakokele — Jehova okwa lenga uudhiginini weni,” mOshungolangelo yaSeptemba 2018 nosho wo “Kala wu na ombili yokomwenyo, nonando oonkalo nadhi lunduluke,” mOshungolangelo yaKotoba 2018.
^ okat. 12 Aakuluntugongalo yomegongalo moka ya li, oye na okunyola ontumwafo yetembuko nziya ngaashi tashi vulika, opo ya vule okutsikila ye li aakokolindjila, aakuluntugongalo nenge aayakuligongalo megongalo lyawo epe.
^ okat. 13 Tala oshitopolwa “Help for Those Who Grieve, mo-Awake! No. 3 yomo 2018.
^ okat. 57 ETHANO PEPANDJA 21: Aaihokani mboka ye na okuthiga po oshinakugwanithwa shawo shuutumwa, taya laleke egongalo lyawo ya kengeleka.
^ okat. 59 ETHANO PEPANDJA 22: Aaihokani oyo tuu mboka, sho ya shuna koshilongo shawo, oya kala nokugalikana Jehova e ya kwathele yi idhidhimikile omashongo ngoka ya taalela.
^ okat. 61 ETHANO PEPANDJA 24: Kekwatho lyaJehova, aaihokani mbaka oya ka vula ishewe okushuna miilonga yethimbo lyu udha. Oya kala taya longitha ontseyo yelaka ndjoka ya mona moshinakugwanithwa shawo oshikulu, ya uvithile oontauki onkundana ombwanawa moshitopolwa shegongalo lyawo epe.
