MWAHA WOOHUSERYA 34
Mukhalelo wa Ohakalala Mmuteko Muvyaani
“Muluku hari oohookololowa; harwa acuwalaru muteko anyu mweenraanyu woosivela nsina nawe.”—AHE. 6:10.
NCIPO 38 Muluku Onamoolipihaani
YEEYO NNAHAALAAHU OHUSERYA *
1-3. Ntakhara heeni akina anarumeela mmuteko wa elukuluku yoothene annaphiyerya otoroka murici?
ROPERTU NI MARIYA annuupuwela: “Nimalinhe iyaakha makhumi meeli ni emoha nrumeelaka ntoko mamisiyonaario, asitiithi ahu asese yaaniiceliwa. Naahihakalala waakhapelela. Nyenya eyo yaari yawiicela ohiya muculi orummwa yoowo naasivelaahu vatokovene.”
2 William ni Terrie awo tho yaarumeela mu elapo yookhopela. Awo aaloca: “Vaavaa naasuwenlaahu wi, nthowa na okumi ahu hinaahaala otitelela mu orummwa ahu, naahinla vatokovene. Yoolakelela ahu ya omurumeela Yehova mu elapo ekina yaaphiya omakuchuwelo.”
3 Aleksey aari Petelita. Owo onnathariha: “Hiyo naahisuwela wi amwiicani ahu yaachuna owala Epeteli weiwo kaarumeelaakawo. Nyenya eyo yaari yawiicela vaavaa eyo yeereyaaya, nave naaphwanela okhuma o Peteli.”
4. Makoho taani anahaala waakhuliwa mmwaha yoola?
4 Muupuwele tho sa macikhwi a mapetelita ni akina yaawo yaakhenle murici muvyaani. * Anna ni arokora yaala oororomeleya, ohiya muteko yoowo yaasivelaaya vancipale tahi echu yookhweya. Anna ni arokora yaala eni ehoolele hai matorokelo yaawo? Tiheeni nyuwaano munaphwanelaanyu opaka wi mwaakhaviherye? Maakhulo a makoho yaala ananwerya onikhaviherya oothene ahu ohoolela matorokelo mookumini.
MUKHALELO WA OHOOLELA MATOROKELO
Ntakhara heeni nnamukhala nikacamiho wa arummwa a elukuluku yoothene ohiiya muteko aya? (Moone eparakrafo 5) *
5. Mmikhalelo taani otorokeya wa murici onanivolowelaaya?
5 Moohipwacha waakhanle wi nnarumeela Opeteli naari mpuro mukina, nnaphwanela wunnuwiha osivela wahu ntakhara achu ni nipuro nnarumeelaahuwo. Nave, vaavaa onachuneyaaya orowa wanthowa nammoori, ninnakhala awiiniwa murima. Ninnakhalano munkhela ni yaale nnahiyaahu muculi, nave ninnuukhuwa ni yaawo, xaxaxa wakhala wi nihin’ye orummwa nthowa na wiikariwa. (Mat. 10:23; 2 Kor. 11:28, 29) Onamukhalatho woovilasa oya nipuro nikina woona wi muchu onahaala opaka matorokelo vooloca sa sookhovelela ivyaani. Nnamoona mmukhalelo mmohamoha wakhala wi nnakookela nipuro nenlo nyariwaahuwo. Ropertu ni Mariya aaloca: “Naanaviliwa wiikhoveleliha ni meerelo a elapo ahu. Ophiyerya wi olaleerya mu elocelo ahu waari wookacamiha. Woona wi naahirumeela mu nipuro nikina mu elukuluku yincipale, niisoona okhala achu ookhopela mu elapo ahu.” Akina yaawo apanke matorokelo mmuteko aya mootutusa anamuhoolela makacamiho a olivela ichu soomwiilini. Awo anamwiisoona okhala awuukhuwa, oohikhapeleleya ni ooceecheya. Tiheeni eni yaakhaviherye?
Ti woochuneya omwaacamela Yehova ni omuroromela yene (Moone iparakrafo 6-7) *
6. Mmukhalelo taani nneeraahu nlipihe onthamwene ahu ni Yehova?
6 Mmwaacamele Yehova. (Tiy. 4:8) Nni neereno hai eyo? Moorweela wa omuroromela owo ntoko ‘awiiwa mavekelo.’ (Sal. 65:2) Salumu 62:8 onnathariha wi nnaphwanela ‘olocano ni murima woothene.’ Yehova “ori oowerya weerano soothene, opwahasha mwemmo nnavekaahumo naari nnuupuwelaahumo.” (Éfe. 3:20) Muluku hanatikitheryeya pahiru mu opaka yeeyo nnavekaahu mu nivekelo. Wakhala wi nookhalano nikacamiho vyakala, Yehova onnawerya omaliha mmukhalelo naahaanyiheryaahu.
7. (1) Tiheeni eni enikhaviherye olipiha onthamwene ahu ni Yehova? (2) Mwawiiwanana ni Ahebri 6:10-12, teevi eri yookhumelela ya otitelela omurumeela Yehova moororomeleya?
7 Echu ekina enahaala wookhaviheryaani olipiha onthamwene anyu ni Yehova ori omwaalakhanya Piipiliya nihiku ti nihiku ni wuupuwelela. Munna mmoha yoowo aarumeela ntoko misiyonaariyo ooloca: “Mutitelele opaka moohihiyererya malapelo anyu a echoko ni orehererya mithukumano, hiihaa ntoko mweerelaanyu muri mu orummwa anyu wakhalai.” Opwaha yeeyo, mukhaviherye mwakuru muteko woolaleerya michaka saphaama mu muloko anyu muvyaani. Yehova onnawuupuwela yaale anatitelela omurumeela moororomeleya, naamwi ehiweryaka opaka soothene yaapakaaya khalai.—Mwaalakhanye Ahebri 6:10-12.
8. Yoorepa ya 1 Yohani 2:15-17 eni yookhaviheryeeni hai okhweiha ekumi?
8 Mutitelele okhweiha okumi anyu. Muheemererye wi sawuukhula sa elapo ya Satana ‘siiphelele’ miteko sanyu soomunepani. (Mat. 13:22) Mukhooce okhinyererya wa elapo naari asinthamwene ni amusi yaawo anakhala ntoko wi aakhalano mathowa oophwanelela, yeereryaka wooceenyeryaani ophwanya okhapeleleya mu muhakhu wa elapo ya Satana. (Mwaalakhanye 1 Yohani 2:15-17.) Mmuroromele Yehova. Owo onahaala wookhapelelaani mu soothene munachunaanyu mmakupa oomunepani, mmuupuweloni ni oomwiilini “mu elukuluku yoophwanelela.”—Ahe. 4:16; 13:5, 6.
9. Mwawiiwanana ni Masiposipo 22:3, 7, ntakhara heeni oryaaya woochuneya ohipaka ivaale mwaapure mwaapure, nave tiheeni enahaala onikhaviherya opaka soolakelela saphaama?
9 Musepe opoleya ikhorowa mwaapure mwaapure. (Mwaalakhanye Masiposipo 22:3, 7.) Matorokelo ananwerya oweerihaani omaliha ikhorowa, nave onamukhala wookhweya opaka ivaale. Wi muhipake ivaale sincipale, munaphwanela okhalano ekaasoope wi muhithume ichu soohichuneyasa wa nyuwaano. Vaavaa nnakumanaahu ni mikhalelo sawuukhula, ntoko yootakiherya, omukhapelela muchu oniiceliwa—onamukhala woovila olakelela ikhorowa kavi nnaphwanelaahu opoleya. Mmikhalelo sintoko seiho, muupuwele wi ‘mavekelo’ awiiseela anamookhaviheryaani opaka soolakelela saphaama. Yehova onahaala waakhula mavekelo anyu oovahakaani murecele yoowo onahaala “waakiha murima anyu ni muupuwelo anyu.”—Fil. 4:6, 7; 1 Ped. 5:7.
10. Nni naapake hai asinthamwene avyaani?
10 Mutikitherye onthamwene waphaama. Echu yaphaama okawana moonelo ni mavyakelo ni asinthamwene, xaxaxa ni yaale ahoolenle mikhalelo ni makacamiho oolikana ni awihu. Eyo enamunikhaviherya wiisoona phaama. (Ekle. 4:9, 10) Asinthamwene yaawo mwaaraanyuno mu orummwa anyu wakhalai, anahaala otitelela okhala asinthamwene anyu. Nyenya vano, mu orummwa anyu muvyaani, munaphwanela waapaka asinthamwene avyaani. Muupuwele ela, wi mukhalano asinthamwene, nyuwotho munaphwanela okhala nthamwene. Muni mwaapake hai asinthamwene? Muloce mareeliho yaawo mwaakhenlaanyu wa Yehova nave mweerihe wi akina yoone ohakalala wanyu mu omurumeela Yehova. Naamwi akina mmulokoni ehiiwexexaka ohakalala wanyu ntakhara muteko wa elukuluku yoothene, akina akhweya anamusiveliwa ni yootakiherya anyu nave anamukhala asinthamwene aphaama. Mu elukuluku emohamoha, mukhaleno ekaasoope wi muhiivuwihe vancipale ni ichu mpankaanyu ntakhara Yehova, nave muhiloce moonelo woohiphwanelela yoowo mwaaraanyuno.
11. Tiheeni munaphwanelaanyu opaka wi othela wanyu otitelele okhala woohakalala?
11 Ikwaha ikina, mutheli onamukhuma mmuteko wa elukuluku yoothene nthowa nawi munna naari murokora onamwiiceliwa. Wakhala wi eyo yoheereya ni nyuwo, muhimphwanyere mathowa iyanyu naari mwaarinyu oniiceliwa ntakhara matorokelo. Mmakupa makina, wakhala wi ti nyuwaano muniiceliwa, muhisoone okhalano nthowa, muupuwelaka wi moomuhiciha iyanyu naari mwaarinyu. Muupuwele wi nyuwo mwa “mwiili mmoha” nave moopaka nlakano ni Yehova wi munahaala okhapelelana mukina ni mukhwaawe moohipwacha yeeyo enahaala weereya. (Mat. 19:5, 6) Enanweryeya tho wi mutheli ahiye orummwa awe nthowa na orupala woohilakelela. Wakhala wi munnahoolela yeeyo, mmooniherye mwaninyu wi yene tookhweleyaxa wa nyuwo opwaha orummwa anyu wakhalai. Mmuleeleke mwaninyu wi munamoona ntoko “yamahala yoorweela” wa Muluku. (Sal. 127: 3-5) Mu elukuluku emohamoha mmuleele saweereya soothene saphaama mwaaraanyuno mu orummwa anyu. Eyo enammuceenyerya tho ovolowa mmuteko wa elukuluku yoothene hiiha ntoko nyuwo mwaapankaanyu.
MUKHALELO AKINA ANEERAAYA EKHAVIHERYE
12. (1) Nni naakhaviherye hai yaale ari mmuteko wa elukuluku yoothene wi etitelele mmuteko aya? (2) Nni nikhweihe hai matorokelo a muteko aya?
12 Ti yaphaama woona mukhalelo miloko soohiyanahiyana ni anna ni arokora anapakaaya wi yaakhaviherye yaale yaari mmuteko wa elukuluku yoothene otitelela mmuteko aya. Akina annasiveliwa waaceenyerya moohihiyererya yaale ari mmuteko wa elukuluku yoothene ootitelela mmuteko yoola. Akina aakhalano owerya wa waakhaviherya ni soothowa soomwiilini. Nave aakhalavo akina aniivaha wi yaakhaviherye amusi ahanle owaani a anna yaawo. (Gal. 6:2) Waakhala wi anna ni arokora yaala ari mmuteko wa elukuluku yoothene aarumiheliwa mmuloko anyu muhuupuwele wi aapanke muteko naari echu yoonanara. * Ohiya yeeyo, mpake soothene munaweryaanyu wi matorokelo awe ekhale ooveya wa yoowo. Nwaakhele ni mata meeli nave mwaathamalele ntakhara muteko apankaaya, naamwi ekumi aya ehiweemereryaka opaka sincipale. Mwaasuwele phaama. Nyuwaano munanwerya ohuserya sincipale orweela mu saweereya saya, masuwelelo, ni mavyakelo aya.
13. Nikhaviheryo taani nnaphwanelaahu waavaha yaale yaakhenle orummwa ovyaani?
13 Woopaceryani, anna ni arokora yaala anakhuma mu orummwa wavameekhaaya annachuna nikhaviheryo nanyu wi ewerye ophwanya empa, opaka mukwaha, muteko ni ichu ikina soochuneya. Akhweya awo anamuchuna sooleeliherya ivyaani wi esuwele miyaha sa nihiku ti nihiku— ntoko yootakiherya, mukhalelo wa oliva misokho ni waakhela nikhaviheryo wakhala wi yoheereya epahu. Nave echu anachunaaya vancipale ori wi nyuwo mweererye wiiwexexa mikhalelo saya. Akhweya awo naari amusi aya akina aakhalano makacamiho a okumi. Naari awo annathanana vancipale ntakhara omuyeleela mookhwani muchu yaamusivelaaya. * Akhweya, naamwi ehooniwaka ni akina, awo aninla nthowa na okhalano munkhela ni asinthamwene yaapankaaya mu orummwa yoowo yaaraayano khalai. Awo annachuna elukuluku wi evilele ni miyoonelo seiya, yeeyo enahaala okhala yawiicelasa.
14. Ti mwawiihai alaleeryi akina yaawenryaaya omukhaviherya murokora mmoha wiikhoveleliha mu orummwa awe ovyaani?
14 Mu elukuluku emohamoha, nikhaviheryo ni yootakiherya anyu enanwerya waakhaviherya opaka matorokelo. Murokora mmoha yoowo aarumeenle mu iyaakha sincipale mu elapo yookhopela ooloca: “Mu orummwa aka wakhalai, miyaano kaaneeciha soohuserya sa Piipiliya nihiku noothene. Nyenya mu orummwa aka ovyaani, waari woovila omuhula Piipiliya naari wooniha exilema mmuteko woolaleerya. Nyenya Alaleeryi a muloko aka muvyaani yaanakiwopa wi napake osekurya ni weeciha soohuserya saaya sa Piipiliya. Vaavaa kawoonaka anna ni arokora yaala amvai ni oolipa murima yeecihaka soohuserya sa Piipiliya inaya vahoolo, kaapacerya okhalano moonelo woophwanelela. Kaahuserya opaceryiha ovaanela ni achu mu ekulucu evyaani. Soothene seiya saakikhaviherya okhalano ohakalala wanawiili.”
MUTITELELE OPAKA OWETHA WANYU
Mweererye ophwanya meerelo wi munnuwihe muteko anyu woolaleerya mu ekulucu ya nipuro muyariwaanyuwo (Moone iparakrafo 15-16) *
15. Muni nwerye hai okhumelela phaama mu orummwa anyu ovyaani?
15 Nyuwaano munanwerya okhumelela phaama mu orummwa anyu ovyaani. Muhuupuwele wi moopaka echu yoonanara mu orummwa anyu wakhalai naari wi vano mooyeleela esisapo. Munaphwanela opwacha mukhalelo Yehova onookhaviheryeiyeni nave mutitelele olaleerya. Mwaatakiherye Akristu ororomeleya a nsana noopacerya. Moohipwacha nipuro yaaryaayavo, “weiwo yaayaayawo, yaanalaleeryawo masu a michaka yaphaama.” (Saw. 8:1, 4) Wiilipixerya wanyu otitelela olaleerya onanwerya okhalano sookhumelela saphaama. Ntoko yootakiherya, mapiyoneero yaawo yiikariwe mu elapo, yaahithaamela mu elapo yawaacamela weiwo waariwo othowa otokweene mu elocelo aya. Nyenya mu miyeeri vakhaani, yaahihuliwa makhuuru oohiyanahiyana ni otikitheryeya mwawaakuveya.
16. Muni mphwanye hai ohakalala mu orummwa ovyaani?
16 “Ohakalala wa Apwiya [Yehova] ti ikuru sahu.” (Neh. 8:10) Eparipari wi hiyaano ninnasiveliwa vancipale ni orummwa ahu. Nyenya mathipelo a ohakalala wahu ti Yehova ohiya muteko nnapakaahu. Mwa yeeyo, mutitelele olipiha onthamwene anyu ni Yehova nave mumveke miruku, ohoolela ni nikhaviheryo. Muupuwele wi mwaanasivela orummwa anyu wakhalai nthowa nawi mwaahiilipiserya waakhaviherya achu a weiwo. Titelelani wiilipiserya mu orummwa anyu ovyaani nave moone mukhalelo Yehova onahaaleiye wookhaviheryaani osivela orummwa owo.—Ekle. 7:10.
17. Tiheeni nnaphwanela wuupuwelela vooloca sa orummwa nryaahuno olelo?
17 Nnaphwanela wuupuwela wi omurumeela Yehova ti weelukuluku yoothene, nave yeeyo nnapakaahu ntakhara yoowo hiihaano akhweya tahi yeeyo nnahaalaahu opaka ntakhara yoowo mu elapo yahiihaano. Aleksey, yoowo aromoliwe woopaceryani wa mwaha yoola, olonce wi matorokelo ohoolenleiye mu orummwa awe anamukhaviherya okhala oorehererya wa matorokelo a muhoolo. Owo oothariha: “Miyaano kaahisuwela wi Yehova ni elapo yahiihaano ti seeparipari, nyenya yaakhala ntoko siri ocai wene wa miyaano. Vano kinnamoona Yehova ohoolo waka nave elapo yahiihaano ntoko nipuro noocharela na mukwaha aka.” (Saw. 2:25) Moohiphwacha orummwa ahu, hankooni ntitelele weeca ni Yehova. Owo harwa anihiya, nyenya onamunikhaviherya ophwanya ohakalala mu weerano yoothene nnaweryaahu opaka mmuteko awe—moohiphwacha nipuro nene.—Isa. 41:13.
NCIPO 90 Nlipixaneke Mukina ni Mukhwaawe
^ par. 5 Ikwaha ikina, anna ni arokora ari mmuteko wa elukuluku yoothene onamuchuneya ohiya muteko aya naari waakhela muteko muvyaani. Mwaha ola onathokororya makacamiho yaawo anahoolelaaya ni yeeyo awo anaphwanelaaya opaka wi ekhumelele phaama mmatorokelo yaala. Navetho onnaloca yeeyo akina anaphwanelaaya opaka wi yaalipihe ni waakhaviherya, hiiha ntoko malakiheryo eni enikhaviherye oothene ahu ovilela ni makacamiho.
^ par. 4 Vaavaa anuuluvalaaya, anna ancipale yaawo arino mirici annaahiyerya mirici yaawo ari amiravo. Moone mwaha “Irmãos mais velhos—Jeová dá muito valor à lealdade de vocês”, mu Mulipeleli a Setempuru a 2018 (a Ekunya), ni “Mukhapelele Murecele wa Mpuwa Moohipwacha Otorokeya wa Mikhalelo”, mu Mulipeleli a Otupuru a 2018.
^ par. 12 Vaavaa anna ari mmuteko wa elukuluku yoothene anaakhelaaya orummwa muvyaani, Atokweene a muloko anaphwanela orumiha ekaarata ya waasuwanyeiha mwawaakuveya mmuloko muvyaani. Hiiha awo anawerya okookela orumeelaka ntoko piyoneero, mutokweene naari murummwa oorumeela.
^ par. 13 Moone miyaha “Nikhaviheryo wa yaale akhweliwe,” mu Vinyani! a Marsu a 2018.
^ par. 57 ERUKU VA EPAAXINA: Mutheli mmoha onnakhinyereryeya ohiya orummwa awe ntoko misiyonaariyo mu elapo yookhopela nave onnaalaanya achu a muloko awe athananaka.
^ par. 59 ERUKU VA EPAAXINA: Ekookenle elapo ayariwaayawo, mutheli mmohamoha onnatitelela ovekela wa Yehova wi amukhaviherye ovilela ni makacamiho anahoolelaaya.
^ par. 61 ERUKU VA EPAAXINA: Nnikhaviheryo na Yehova, mutheli onnakookela muteko wa elukuluku yoothene. Awo anapharihela elocelo ahusenryaaya mmuteko wa omisiyonaario wi elaleerye michaka saphaama wa namarwa mu ekulucu ya muloko aya muvyaani.
