1-3. ¿Tleka sekimej tokniuan noneki kikauaskej kampa kitekichiuiliaj toTajtsin?

ROBERT niman Mary Jo kilnamikij ika yopanoka 21 xiuitl ika tlapaleuiayaj ken misioneros ijkuak intajuan opeuj kualoj. Yejuamej kijtouaj: “Techyolpaktiaya tikintlajpiyaskej. San ika, otechyolkoko tijkauaskej kampa tinemiyaj pampa ompa tikmachiliayaj kentla tochan yeskia”.

² Okse tokniuj, William niman Terrie, techijliaj: “Ijkuak otikmatkej ika xok ueliskia tokuepaskej kampa tiktekichiuiliayaj Jehová pampa tikualouayaj, opeuj tichokaj. Tejuamej melak tiknekiyaj tiktekichiuiliskej Jehová ipan okse país, niman aman xok ueliskia tiaskej”.

³ Alexéi kijtoua: “Tikmatstoyaj ika akin techtlauelitaj kinekiyaj kitsakuaskej sucursal kampa tinemiyaj. Maski ijkon, melak otechyolajman ijkuak okichiujkej manotsakua niman ononek tijkauaskej Betel”.

4. ¿Tlenon tiknankiliskej ipan yejuin tlamachtijli?

⁴ Xsan yejuin tokniuan yononek nomatiskej kampa aman nemij. Noijki ijkon inpan yonochiuj miyekej betelitas niman oksekimej tokniuan. * Kanaj yejuin tokniuan akin melajkanemij kimachiliaj ouijtika kikauaskej kampa tlapaleuijtoyaj pampa melak kuelitayaj tlen ompa kichiuayaj. ¿Tlenon uelis kinpaleuis? ¿Kenon uelis tikinpaleuiskej? Ken tikinnankiliskej yejuin tlajtoltilistin tinochimej techpaleuis ijkuak itlaj nopatlas ipan tonemilis.

5. ¿Kenon uelis tomachiliskej tla oksekan techtitlanij?

⁵ Tla titlapaleuiyaj Betel noso tla okse tekitl tikchiuaj ipan ikalpan Jehová, tikintlasojtlaj tlaltikpakchanejkej niman hasta tomatij kampa titlapaleuiyaj. Yejua ika, melak toyolkokouaj ijkuak noneki oksekan tiaskej. Tikintemouaj akin yotikimixmatkaj niman tajmanaj inpampa, niman más ijkon tikmachiliaj tla kampa tinemiyaj xok notekauilia makiueyichiuakan Jehová (Mat. 10:23; 2 Cor. 11:28, 29). Noijki, ijkuak oksekan tajsis, aman noneki ompa timomatis, maski tla se yauj kampa achtopa chantiya. Robert niman Mary Jo kijtouaj: “Maski otokuepkej kampa tichantiyaj, xok tomatiyaj niman xmás kuajli tomachiliayaj ijkuak titenojnotsayaj ika totlajtol. Xok kuajli tomachiliayaj ompa”. Noijki, kanaj tikmachiliskej ouijtika tla xtikpiyaj tomin. Kanaj tajmanaskej niman xika toyojlo tomachiliskej. ¿Tlenon uelis techpaleuis?

6. ¿Kenon tinemiskej nisiuj itech Jehová?

⁶ Matinemikan nisiuj itech Jehová (Sant. 4:8). Niman yejon uelis tikchiuaskej tla titlaneltokaj ika Jehová nochipa techkakis ijkuak tiknotsaskej (Sal. 65:2). “Xkijlikan nochi tlinon mechajmana”, ijkon kijtoua Salmo 62:8. Jehová “uelis kichiuas miyek más de on yejuan tejuamej tiktlajtlaniaj noso on yejuan tiknemiliaj” (Efes. 3:20). Jehová xsan kichiua tlen tiktlajtlaniliaj ipan teoyotl. Yejua kichiua tlen nion xtikchiaj niman ijkon techpaleuis ika tlen techajmana.

7. a) ¿Tlenon techpaleuis nisiuj matinemikan itech Jehová? b) Ken kijtoua Hebreos 6:10-12, ¿tlenon panos tla nochipa kuajli tiktekichiuiliaj Jehová?

⁷ Tla mojmostla tikpouaj Biblia niman itech titlanemiliaj, yejon noijki techpaleuis nisiuj matinemikan itech Jehová. Se tokniuj akin misionero katka kijtoua: “Noneki nochipa tikueyichiuaskej Jehová iuan tochanejkauan niman tomachtiskej tlen tikitaskej ipan tlanechikoltin, ijkon ken tikchiuayaj kampa titlapaleuiayaj”. Noijki, matokojtilikan melak matitenojnotsakan iuan tlanechikojli kampa aman tinemij. Jehová xkimilkaua akin kuajli kitekichiuiliaj, maski xok miyek uelij kichiuaj ken yeuejkaui (xpoua Hebreos 6:10-12).

8. ¿Kenon techpaleuiya 1 Juan 2:15-17 matinemikan san ika tlen noneki?

 ⁸ Matinemikan san ika tlen noneki. Maka matijkauilikan ika tlen onka ipan tlaltikpaktli tlen kiyekana Satanás makichiua maka sa matiktekichiuilikan Jehová (Mat. 13:22). Maka matikinkakikan akin imiuan touikaj, tochanejkauan noso oksekimej tla techijliaj ika noneki más tiktlaniskej tomin niman ijkon tinemiskej ika toyojlo (xpoua 1 Juan 2:15-17). Matitlaneltokakan itech Jehová, pampa yejua techijlia ika techpaleuis “ijkuak itlaj techpolos”. Kema, techpaleuis machikaui totlaneltokil, matinemikan ika toyojlo niman matikpiyakan tlen techpoloua (Heb. 4:16; 13:5, 6).

9. Ken kijtoua Proverbios 22:3, 7, ¿tleka noneki tokojtiliskej xtotlaneuiskej, niman tlenon uelis techpaleuis matiktlapejpenikan tlen kuajli?

⁹ Matokojtilikan xtotlaneuiskej (xpoua Proverbios 22:3, 7). Kemantika, patioj kisa oksekan tonchantis, ika yejon, kanaj tiknekiskej totlaneuiskej. Kuakon, maka matotlaneuikan niman ijkon tijkouaskej itlaj tlen xnoneki. Ijkuak tikixnamikij itlaj, ken ijkuak noneki tiktlajpiyaskej se akin tiktlasojtlaj, kanaj ouijtika tikitaskej kech tomin totlaneuiskej. Ijkuak ijkon topan nochiuas, matikilnamikikan ika tla tiknotsaj Jehová, yejua uelis techpaleuis matiktlapejpenikan tlen kuajli. Jehová kichiuas matinemikan ika toyojlo, niman techpaleuis kuajli matitlanemilikan (Filip. 4:6, 7; 1 Ped. 5:7).

10. ¿Tlenon techpaleuis matikinpiyakan yenkuikej amigos?

¹⁰ Matikinpiyakan amigos. Matikimijlikan toamigos tlenon tikmachiliaj niman tlenon topan nochiua, niman más tla yejuamej yokixnamijkej tlen tikixnamiktokej. Yejon kichiuas kuajli matomachilikan (Ecl. 4:9, 10). Maski ok uelis imiuan touikaskej akin otikimixmatkej kampa tinemiyaj, noneki tikintejtemoskej oksekimej amigos. Tla tiknekij tikinpiyaskej akin imiuan touikaskej, noneki kuajli titenotsaskej. Matikimijlikan kenon Jehová yotechteochiuj niman ijkon makitakan ika melak tiyolpakij pampa tiktekichiuilijtokej. Maski sekimej tokniuan xkasikamatij tleka melak techyolpaktia tiktekichiuiliskej Jehová, kanaj oksekimej kuelitaskej tlen tikchiuaj niman kinekiskej touan nouikaskej. San ika, matotlajpiyakan maka melak titlajtoskej itech nochi tlen yotikchiujkej noso itech tlen xkuajli topan nochiua.

11. ¿Kenon uelis ok tiyolpakiskej iuan toixnamik?

¹¹ Tla oksekan otechtitlankej pampa toixnamik opeuj kualo, maka matiktlajtlakoltikan. Niman tla tejuamej opeuj tikualoj, maka matotlajtlakoltikan nion maka matiknemilikan ika tikchiuaj manoyolkoko toixnamik. Matikilnamikikan ika tejuamej tochiuaj “san se tlalnakayotl” niman ika otikijlikej Jehová ika  totlajpiyaskej maski san tlenon mapano (Mat. 19:5, 6). Noijki, tla oksekan otechtitlankej pampa tosiuauj okoneuajtiak, matikijlikan tokoneuj ika yejua melak ueyi kijtosneki xijkon ken kampa tinemiyaj. Nochipa matikijlikan ika tikitaj ken se itetlayokolil Jehová (Sal. 127:3-5). Noijki, matiknojnotsakan itech nochi tlen kualtsin topan yonochiuj, yejon uelis kichiuas ika yejua noijki makineki kitekichiuilis Jehová, ken tejuamej otikchiujkej.

12. a) ¿Kenon uelis tikinpaleuiskej akin chikauak kitekichiuiliaj Jehová matlapaleuijtokan kampa nemij? b) ¿Tlenon uelis tikchiuaskej niman ijkon tikinpaleuiskej akin kemach yejkoj ipan totlanechikol?

¹² Miyekej tokniuan, kichiuaj nochi tlen uelij niman ijkon akin chikauak kitekichiuiliaj Jehová matlapaleuijtokan kampa nemij. Sekimej kinyolchikauaj ompa manokauakan, kinmakaj tomin noso okseki tlen kinpoloua, noso kintlajpiliaj inchanejkauan. Nochi yejuin tlen kichiuaj melak ueyi kijtosneki (Gál. 6:2). ¿Tlenon uelis tikchiuaskej tla ipan totlanechikol yejko se tokniuj akin chikauak kitekichiuilia Jehová? Maka matiknemilikan ika ompa oajsik pampa xkuajli okichiuj itekiyo noso pampa okichiuj itlaj tlen xkuajli. * Melak kuajli tla tikpaleuiyaj manomati kampa tinemij. Kuajli matikselikan niman matikijlikan ika melak kuajli nochi tlen yokichiuj, maski aman xmiyek ueli kichiua pampa kualo. Matokojtilikan kuajli tikixmatiskej. Matokauilikan matechmachti nochi tlen kimati.

13. ¿Kenon uelis tikpaleuiskej se tokniuj akin yejko ipan totlanechikol?

¹³ Kachtopa, kanaj nonekis ika tokniuj makipaleuikan makinexti kanon chantis, kanon  konajsis carro, kanon tekitis noso okseki tlen noneki. Kanaj nonekis tikijliskej okseki tlemach, kenon kitlaxtlauas impuestos noso kenon kipiyas se seguro. San ika, más noneki matikasikamatikan yejon tokniuj. Kanaj yejua noso se ichanejkauj kualo. Noso kanaj tlajyouijtika pampa omik yakaj akin kitlasojtla. * Niman maski xkijtoua, kanaj najmana pampa kintemoua iamigos. Ijkuak yakaj ijkon ipan nochiua, uejkaui ika ijkon nomachilia.

14. ¿Kenon tokniuan okipaleuijkej se tokniuj akin oajsik ipan intlanechikol?

¹⁴ Ijkuak ijkon panos, tlen tikchiuaskej niman ken titlapaleuiskej uelis kichiuas ika tokniuj akin kemach oajsik manomati. Se tokniuj siuatl akin ouejkauj miyek xiuitl ika otlapaleui ipan okse país kijtoua: “Kampa ninemiya, mojmostla nitemachtiaya itech Biblia. San ika, kampa onajsik ouijtika katka niktepouilis se tlaxelojli itech Biblia noso nikteititis se video ijkuak nitenojnotsaya. San ika, tokniuan itech yenkuik tlanechikojli kampa oniaj nechnotsayaj manikinuika kampa ontetlajpalouayaj niman kampa ontemachtiayaj. Ijkuak nikitaya kenon yejuin yolchikaujkej tokniuan temachtiayaj itech Biblia, melak nechyolchikauaya. Onikmat kenon uelis nitenojnotsas. Nochi yejon onechpaleui oksejpa maniyolpaki”.

15. ¿Kenon uelis tiyolpakiskej kampa techtitlaniskej?

¹⁵ Uelis tiyolpakiskej kampa techtitlaniskej. Maka matiknemilikan ika xkuajli tla oksekan techtitlanij, xkijtosneki tla xkuajli ken titlapaleuijtoyaj. Matikitakan kenon Jehová techpaleuijtok niman nochipa matitenojnotsakan. Matikchiuakan ijkon ken tokniuan akin onenkej ipan kachtopa siglo akin maski san kanon yayaj “kiteijlijtiayaj on kuajli tlajtojli” (Hech. 8:1, 4). Tla nochipa titenojnotsaj, kuajli onkisas tlen tikchiuaj. Se neskayotl, sekimej precursores okinkixtijkej ipan se país niman oyajkej oksekan kampa tlajtouayaj intlajtol niman  kampa nonekiyaj tenojnotskej. Nion xouejkauj, onochiujkej yenkuikej grupos kampa miyekej nosentlaliayaj.

16. ¿Tlenon kichiuas matiyolpakikan kampa techtitlaniskej?

¹⁶ Nehemías okimijli judíos ika “on pakilistli yejuan toTEKO techmaka, yejua tochikaualis” (Neh. 8:10). Kanaj melak yotomatkej kampa titlapaleuiyaj. San ika, pampa touikaj iuan Jehová yejon tlen kichiua melak matiyolpakikan. Yejua ika, matonisiuikan itech toTajtsin niman matikneltokakan ika yejua techmakas tlamachilistli, techyekanas niman techpaleuis. Matikilnamikikan ika otomatkej kampa tinemiyaj pampa techyolpaktiaya tikinpaleuiskej oksekimej. Jehová techpaleuis oksejpa ijkon matomachilikan kampa techtitlaniskej tla tejuamej tokojtiliaj titlapaleuiskej (Ecl. 7:10).

17. ¿Tlenon noneki tikilnamikiskej?

¹⁷ Noneki tikilnamikiskej ika nochipa tiktekichiuilijtoskej Jehová, san ika, xnochipa tinemiskej kampa techontitlanij. Ipan yenkuik tlaltikpaktli, kanaj okse tekitl tikchiuaskej ijkuak tiktekichiuiliskej Jehová. Alexéi, akin otikteneujkej ijkuak opeuj tlamachtijli, kinemilia ika tlen ipan nochiujtok kipaleuis ika tlayekapan. Kijtoua: “Maski nikmatstoya ika Jehová melauak nemi, nikitaya ika uejka nemiya, niman maski nikmatstoya ika ajsis tonajli ijkuak onias se yenkuik tlaltikpaktli, nikmachiliaya ika yejon nochiuaskia más ika tlayekapan. San ika, aman nikita ika Jehová nixpan nemi niman ika xok uejkauis kuajkuis yenkuik tlaltikpaktli” (Hech. 2:25). Maski san kanon tiktekichiulijtoskej Jehová, nochipa iuan matouikakan. Yejua xkeman techkauas; techpaleuis matiyolpakikan maski san kanon tiktekichiuiliskej (Is. 41:13).