1-3. Ko e heigoa falu kakano ne liga hiki e tau kotofaaga he tau fekafekau gahua mau?

“KUA mole e 21 e tau he fekafekauaga misionare ha maua, ne fai matalekua e tau malolō tino he tau matua tokofā ha maua,” he ui e Robert mo Mary Jo. “Fiafia a maua ke leveki a lautolu. Ka e mamahi lahi agaia ke toka e mena ne mua atu e fiafia he tau loto ha maua.”

² “Ko e magaaho ne iloa e maua kua nakai liliu ke he kotofaaga ha maua ha kua nakai malolō e tau tino, ne tagi a maua,” he ui e William mo Terrie. “Ko e miti ha maua ke fekafekau ki a Iehova he motu kehe kua oti tuai.”

³ “Iloa e mautolu ko e tau tagata favale ne manako ke pā e la ofisa ne fekafekau ai au,” he ui e Aleksey. “Ka e ofomate agaia ke he mena ne tupu he toka e mautolu e Peteli.”

4. Ko e heigoa e tau hūhū ka fakatutala a tautolu he vala tala nei?

⁴ Lafi ki ai foki e tau mena ne tutupu ke he afe mo afe he tau matakainaga he magafaoa Peteli mo e falu ne moua e tau kotofaaga foou. * Ko e tau matakainaga tua fakamooli nei ne liga uka ke toka e tau kotofaaga ne ofania e lautolu. Ko e heigoa ka lagomatai a lautolu ke fehagai mo e hikiaga? Maeke fēfē a koe ke lagomatai a lautolu? Ko e tau tali ke he tau hūhū ia ka lagomatai a tautolu oti ke fehagai mo e hikiaga he tau tutūaga he moui.

5. Ko e tau puhala fe ka lauia a tautolu he hiki e kotofaaga?

⁵ He fekafekau a tautolu he fonua po ke Peteli, maeke a tautolu ke feaki e fiafia lahi ma e tau tagata mo e matakavi ne fekafekau ai a tautolu. Kaeke kua fai kakano ati lata a tautolu ke hiki, to momoko a tautolu. Misi e tautolu a lautolu ne toe hifo, ti tupetupe a tautolu hagaao ki a lautolu, mua atu kaeke kua ō kehe a tautolu ha ko e favaleaga. (Mata. 10:23; 2 Kori. 11:28, 29) Pihia foki ko e taute e kotofaaga foou, po ke liu ki kaina kua fa uka ke hiki ke he tuaga. “Kua nakai mahani a maua mo e aga fakamotu ni ha maua mo e fakamatala ke he vagahau ni ha maua,” he ui e Robert mo Mary Jo. “Tuga kua logona hifo e maua ko e tau tagata motu kehe a maua.” Falu ne hiki e kotofaaga ne amanaki ti fehagai mo e tau paleko fakatupe. Liga logona hifo e lautolu e fakauaua, kapaletū, mo e loto lolelole. Ko e heigoa ka lagomatai?

6. Maeke fēfē a tautolu ke pipiki mau ki a Iehova?

⁶ Pipiki mau ki a Iehova. (Iako. 4:8) Taute fēfē e tautolu e mena ia? He falanaki ki a Ia ‘ko e Fanogonogo liogi.’ (Sala. 65:2) “Kia fakatokanoa e mutolu ha mutolu a tau loto ki mua hana,” he talahau he Salamo 62:8. Ko Iehova “ke eke e tau mena oti kua mua ke he tau mena ke ole atu, po ke manamanatu ai a tautolu.” (Efeso 3:20) Nakai fakakaupā a ia ke he mena ne ole pauaki e tautolu he tau liogi. Liga taute e ia e mena ne nakai amanaki ki ai, ke mua atu ke he ha mena ne manamanatu a tautolu ki ai he fakamafola e tau lekua ha tautolu.

7. (a) Ko e heigoa ka lagomatai a tautolu ke fakatata tumau ki a Iehova? (e) Hagaao ke he Heperu 6:10-12, ko e heigoa e fua he fakatumau ke fekafekau fakamooli ki a Iehova?

⁷ Ke pipiki mau ki a Iehova, totou e Tohi Tapu he tau aho takitaha ti manamanatu fakahokulo ki ai. Taha e misionare fakamua ne pehē: “Fakatumau e fakaholoaga he tapuakiaga he magafaoa mo e mautauteute ma e tau feleveiaaga, tuga ni he taute e koe he kotofaaga fakamua haau.” Matutaki foki ke putoia katoatoa ke fakamatala e tala mitaki he fakapotopotoaga foou haau. Manatu e Iehova a lautolu ne fakatumau ke fekafekau fakamooli ki a ia, pete kua nakai maeke a lautolu ke taute oti e tau mena tuga he magaaho fakamua.​—Totou Heperu 6:10-12.

8. Lagomatai fēfē he tau kupu ia 1 Ioane 2:15-17 a koe ke fakamukamuka tumau e moui haau?

 ⁸ Fakamukamuka tumau e moui haau. Ua fakaatā e tau fakaatukehe he lalolagi ha Satani ke “apitia” e tau matagahua fakaagaaga haau. (Mata. 13:22) Tiaki e peehiaga mai he lalolagi po ke mai he tau kapitiga po ke tau magafaoa manamanatu mitaki ke tutuli e tuaga fakatupe he fakatokaaga ha Satani. (Totou 1 Ioane 2:15-17.) Falanaki ki a Iehova ne mavehe ke leveki e tau manako fakaagaaga, logonaaga, mo e fakatino ha tautolu “ke he aho kua lata ai.”​—Hepe. 4:16; 13:5, 6.

9. Hagaao ke he Tau Fakatai 22:3, 7, ko e ha kua aoga ke kalo kehe he kaitalofa fakahanoa, mo e ko e heigoa ka lagomatai a tautolu ke taute e tau fifiliaga pulotu?

⁹ Kalo kehe he kaitalofa fakahanoa. (Totou Tau Fakatai 22:3, 7.) Liga ko e hiki kua tauuka lahi ti mukamuka ke lauia he tau kaitalofa. Ke fakatote hifo e kaitalofa, mataala ke ua kaitalofa he fakatau e tau mena ne nakai aoga lahi ki a koe. Ka pehia e tau logonaaga ha tautolu he leveki he tau fakahele ne gagao, liga uka ia tautolu ke fifili e lahi he tupe ka ole. Ke he tau tuaga pihia, manatu ko e “liogi, mo e ole” ka lagomatai a koe ke taute e tau fifiliaga pulotu. He tali ke he tau liogi haau, to foaki atu e Iehova ki a koe e mafola ka ‘leveki ai e loto haau, katoa mo e manatu haau,’ he lagomatai a koe ke manamanatu fakamitaki ke he tau tuaga.​—Filipi 4:6, 7; 1 Pete. 5:7.

10. Moua fēfē e tautolu e tau kapitiga foou?

¹⁰ Fakatumau e tau fakafetuiaga mitaki. Tutala mo e tau kapitiga mitaki ke he tau logonaaga mo e tau mena ne tutupu ki a koe, mua atu ki a lautolu ne moua e fiafia mo e tau paleko pihia. He taute pihia ka lagomatai ke fakaholo ki mua e logonaaga haau. (Fakama. 4:9, 10) Ko e tau kapitiga he kotofaaga fakamua haau to fakatumau mo tau kapitiga haau. He kotofaaga foou haau mogonei, lata a koe ke moua e tau kapitiga foou. Manatu ke maeke ke moua e kapitiga, lata a koe ke eke mo kapitiga. Moua fēfē e koe e tau kapitiga foou? Talahau e tau iloaaga atihake ne foaki atu e Iehova ki a koe, ti fakaatā e falu ke mailoga e fiafia haau he fekafekau ki a Iehova. Pete ka nakai maama he falu he fakapotopotoaga e makutu haau he fekafekauaga mau, liga to futia e falu ke he fakafifitakiaga haau ti eke mo tau kapitiga mitaki. Ka e mataala ke nakai futia noa e onoonoaga ke he tau mouaaga ni haau, ti ua hagaaki ke he tau logonaaga kelea.

11. Maeke fēfē a koe ke tumau e fiafia he fakamauaga?

¹¹ Kaeke ke toka e koe e kotofaaga ha ko e malolō tino he hoa haau, ua tukupau a ia. He taha faahi, ka nakai malolō e tino haau, ua logona hifo e tokihala he manamanatu kua fakatolalo e koe e hoa haau. Manatu, ko e “tino taha” a mua ti mavehe a mua ki a Iehova ke felevekiaki  i lalo hifo he tau tutūaga oti. (Mata. 19:5, 6) Ka toka e kotofaaga ha mua ha ko e fatu ne nakai amanaki ki ai, eketaha ke iloa he tama kua aoga lahi a ia ki a mua ke he kotofaaga. Fakamafana ke he tama haau kua onoono a koe ki a ia “ko e taui” mai he Atua. (Sala. 127:3-5) He magaaho taha, tala age ki a ia hagaao ke he tau iloaaga mitaki lahi ne moua e koe he kotofaaga haau. Ko e taute pihia ka fakalagalaga e tama haau ke fakaaoga e moui haana ke he fekafekauaga fiafia ha Iehova tuga ni he taute e koe.

12. (a) Lagomatai fēfē e tautolu a lautolu he fekafekauaga mau ke matutaki ke he tau kotofaaga ha lautolu? (e) Taute fēfē e tautolu e hiki ha lautolu ke he kotofaaga foou ke mukamuka lahi?

¹² Loga e fakapotopotoaga mo e tau matakainaga takitokotaha ne lagomatai ki a lautolu he fekafekauaga mau ke matutaki he tau kotofaaga ha lautolu. Taute pihia he tau matakainaga he fakamafana age ki ai ke matutaki ke he gahua ha lautolu he lalago fakatupe po ke tau koloa fakatino, po ke lagomatai a lautolu ke leveki e tau tagata he magafaoa ha lautolu i kaina. (Kala. 6:2) Ka moua e lautolu he fekafekauaga mau e kotofaaga foou ke he fakapotopotoaga haau, ua onoono ke he hikiaga he kotofaaga kua kaumahala a lautolu po ke ko e akonakiaga. * Ka e lagomatai a lautolu ke mukamuka lahi e hiki. Fakafeleveia mafanatia mo e nava ki a lautolu ke he gahua ne taute e lautolu, pete ka fakakaupā e mena ka taute e lautolu mogonei ha kua nakai malolō mitaki e tino. Lali ke iloa a lautolu. Fakaako mai he iloilo, fakamahani, mo e iloaaga lahi ha lautolu.

13. Ko e heigoa e lagomatai ka foaki e tautolu ma lautolu ne moua e kotofaaga foou?

 ¹³ Fakamua, ko lautolu kua moua e kotofaaga foou ne lata a koe ke lagomatai ke moua e fale, peleōafi, gahua, mo e falu mena kua lata. Liga lata foki a lautolu ke moua e tau vala tala foou ke he tau mena he tau aho takitaha, tuga e totogi e tau tukuhau mo e moua e tau inisua. Mua atu, manako a lautolu ke maama e koe e tuaga. Liga taufetului a lautolu ke fehagai mo e nakai malolō e tino ha lautolu ni po ke he magafaoa ha lautolu. Liga maanu a lautolu ha ko e mate e fakahele. * Liga maanu foki a lautolu ki a lautolu ni ha ko e galo he fakalatahaaga mo e magafaoa fakaagaaga ha lautolu he kotofaaga fakamua. Lata a lautolu ke fai magaaho ke manamanatu fakahokulo ke he tau logonaaga fiofio nei.

14. Lagomatai fēfē he tau tagata fakailoa he fakapotopotoaga e taha matakainaga fifine ke hiki ke he kotofaaga foou haana?

¹⁴ Ka ko e magaaho nei, ko e lalago mo e fakafifitakiaga haau ka lagomatai a lautolu ke hiki. “He kotofaaga fakamua haaku, taute e au e tau fakaako Tohi Tapu he tau aho takitaha,” he ui he matakainaga fifine ne fekafekau ke he loga e tau tau he motu kehe. “He kotofaaga foou haaku, uka ke moua e magaaho ke hafagi e Tohi Tapu po ke fakakite e vitiō he gahua fakamatala. Ka e uiina he tau tagata fakailoa he fakapotopotoaga au ke he tau liu aahi atu mo e tau fakaako Tohi Tapu ha lautolu. He kitia e tau matakainaga fakamakutu mo e loto malolō ia ne taute e tau fakaako Tohi Tapu holo ki mua, ne foaki ki a au e onoonoaga mitaki lahi. Fakaako au ke kamata e tau fakatutalaaga he matakavi foou. Lagomatai he tau mena oti nei au ke liu moua e fiafia.”

15. Kautū fēfē a koe he kotofaaga foou haau?

¹⁵ Maeke a koe ke kautū ke he kotofaaga foou haau. Ua onoono ke he hikiaga ko e kaumahala po ke fakateaga. Manamanatu ke he  lagomatai ha Iehova ke he moui haau ti tumau ke fakamatala. Fifitaki e tau Kerisiano fakamooli he senetenari fakamua. He ha mena ni ne ha ha i ai a lautolu, “kua o fano foki a lautolu . . . mo e fakamatala atu e vagahau mitaki he kupu.” (Gahua 8:1, 4) Ko e tau laliaga haau ke tumau e fakamatala kua liga moua mai e tau fua mitaki. Ma e fakatai, ko e tau paionia ne vega mai he taha motu kua hiki atu ke he taha motu tata mai ne manako lahi foki ke lagomatai he vagahau ha lautolu. Fai mahina he mole, ne mafiti e tokologa he tau tagata ne o atu ke he tau matakau foou nei.

16. Moua fēfē e koe e fiafia he kotofaaga foou?

¹⁶ “Ko e fiafia kia Iehova ko e malolo ha mutolu haia.” (Nehe. 8:10) Lata a tautolu ke moua e fiafia pauaki ia Iehova ka e nakai he kotofaaga ha tautolu, pete ni e fiafia lahi a tautolu ki ai. Ko e mena ia, tumau ke ō mo Iehova, he ono ki a ia ma e pulotu, takitakiaga, mo e lalagoaga. Manatu kua fiafia a koe ke he kotofaaga fakamua haau ha kua eketaha a koe ke lagomatai e tau tagata i ai. Eketaha he kotofaaga haau mogonei mo e kitia e lagomataiaga ha Iehova ki a koe ke fiafia foki ki ai.​—Fakama. 7:10.

17. Ko e heigoa kua lata a tautolu ke manatu hagaao ke he kotofaaga ha tautolu mogonei?

¹⁷ Lata a tautolu ke manatu ko e fekafekauaga ha tautolu ki a Iehova kua tukulagi, ka ko e kotofaaga ha tautolu mogonei ko e mena kū. He lalolagi foou, igatia a tautolu oti mo e liga hiki e kotofaaga. Ko Aleksey ne totoku he kamataaga ne talia ko e tau mena ne iloa e ia mogonei kua tauteute a ia ke lata mo e magaaho ia. “Iloa tumau e au ko Iehova mo e lalolagi foou kua moolioli ka e tuga kua mamao,” he ui e Aleksey. “Iloa e au mogonei ko Iehova i mua he fofoga haaku ti ko e lalolagi foou e taha mena kua amaamanaki au ke fina atu ki ai.” (Gahua 2:25) Pete ni ko e heigoa e kotofaaga ha tautolu, kia tumau ke ō mo Iehova. To nakai tiaki e ia a tautolu, ka e to lagomatai e ia a tautolu ke moua e fiafia he taute e tau mena oti kua maeke ia tautolu he fekafekauaga haana, he mena fe ni.​—Isaia 41:13.