1-3. Ke mabaka afe a mangwe ao a ka dirago gore bao ba lego tirelong ya nako e tletšego ba hwetše dikabelo tše difsa?

BANYALANI ba bangwe bao ba bitšwago Robert le Mary Jo, ba re: “Ka morago ga gore re fetše mengwaga e 21 re ipshina ka kabelo ya rena ya boromiwa, batswadi ba rena ba ile ba thoma go babja. Re be re thabela go ba hlokomela, eupša re be re kwešwa bohloko ke gore re tlogetše kabelo ya rena ya boromiwa.”

² Banyalani ba bangwe bao ba bitšwago William le Terrie bona ba re: “Ka morago ga gore re tsebe gore bolwetši bo tla re palediša go tšwela pele ka kabelo ya rena, re ile ra lla kudu. Re be re dutše re thabela go hlankela Jehofa nageng e šele, eupša gona bjale go be go se sa kgonega.”

³ Aleksey yena o re: “Re be re dutše re tseba gore batho bao ba re ganetšago ba be ba nyaka go tlo tswalela ofisi ya rena ya lekala ya moo ke bego ke hlankela gona. Eupša ge ofisi yeo e be e tswalelwa gomme re swanetše go boela gae, re ile ra nyama kudu.

4. Re tlo araba dipotšišo dife sehlogong se?

⁴ Bana babo rena le dikgaetšedi ba bantši bao ba bego ba le Bethele ba ile ba newa dikabelo tše difsa. * Bana babo rena le dikgaetšedi ba, ba ka thatafalelwa ke go tlogela dikabelo tša bona tšeo ba bego ba di rata kudu. Ba ka thušwa ke’ng gore ba lebeletšane le diphetogo tše? Re ka ba thuša bjang? Go hwetša dikarabo tša dipotšišo tše go tla re thuša go lebeletšana le diphetogo tšeo di ka re tlelago.

5. Go hwetša dikabelo tše difsa go ka re kgoma bjang?

⁵ Go sa šetšwe gore re hlankela re le tšhemong goba Bethele, re ka thoma go rata kudu batho bao re šomago le bona goba lefelo leo re hlankelago go lona. Ge go ka direga gore re tlogele kabelo yeo re bego re e dira ka mabaka a itšego, goba ra tloga moo re bego re hlankela gona, re ka nyama kudu. Re hlologela bana babo rena le dikgaetšedi le go tshwenyega ka bona, kudukudu ka ge re tla be re tlogile moo re bego re hlankela gona ka baka la kganetšo. (Mat. 10:23; 2 Bakor. 11:28, 29) Go oketša moo, go ka ba thata go tlwaela lefelo le lefsa goba setšo sa moo ka ge re tla be re šetše re tlwaetše lefelo leo re bego re hlankela go lona. Se ke seo se ilego sa diragalela Robert le Mary Jo. Ba re: “Ge re be re boela gae ka ge re be re hweditše kabelo e mpsha, re ile ra ikwa eka re batho bašele nageng ya gabo rena.” Ba bangwe ge ba hwetša dikabelo tše difsa, ba ka thoma go ba le mathata a ditšhelete. Ba ka thoma go ba le dipelaelo, ba ikwa ba se na mohola e bile ba ikwa ba nyamile. Ke’ng seo se ka ba thušago?

6. Re ka batamela bjang kgauswi le Jehofa?

⁶ Batamela kgauswi le Jehofa. (Jak. 4:8) Re ka batamela bjang kgauswi le Jehofa? Re ka dira seo ka go mmota ka ge e le “Mokwi wa thapelo.” (Ps. 65:2) Psalme 62:8 e re: “Tšhollang dipelo tša lena le le pele ga gagwe.” Jehofa a ka re direla ‘go feta ka kua ga dilo tšohle tšeo re di kgopelago goba re di naganago.’ (Baef. 3:20) A ka dira seo bjang? Ga a no re fa feela dilo tšeo re mo kgopelago tšona. Eupša o re fa le dilo tšeo re bego re se ra mo kgopela tšona. Ka mohlala, a ka re rarollela mathata ka tsela yeo re bego re sa e nagane.

7. (a) Ke’ng seo se tla re thušago gore re dule re batametše kgauswi le Jehofa? (b) Go ya ka Baheberu 6:10-12, re tlo hwetša ditšhegofatšo dife ge e ba re tšwela pele re hlankela Jehofa ka go botega?

⁷ E le gore re dule re batametše kgauswi le Jehofa, re swanetše go bala Beibele ka mehla le go naganišiša ka seo re se balago. Ngwanabo rena yo mongwe yoo e bego e le moromiwa o re: “Gore o dule o na le tswalano e botse le Jehofa, o swanetše go tšwetša pele lenaneo leo o bego o na le lona la go swara borapedi bja lapa le la go lokišetša diboka ge o be o sa le kabelong ya gago.” Ka gona, tšwela pele o bolela ditaba tše dibotse ka mafolofolo phuthegong e mpsha yeo o lego go yona. Jehofa a ka se tsoge a lebetše batho bao ba mo hlankelago ka go botega, gaešita le ge gona bjale ba se sa kgona go mo hlankela wa go tlala seatla go swana le peleng.—Bala Baheberu 6:10-12.

8. Go ya ka Johane wa Pele 2:15-17, ke’ng seo se ka re thušago go etiša go hlankela Jehofa pele?

 ⁸ Etiša go hlankela Jehofa pele. O se ke wa dumelela dipelaelo tša lefase le la Sathane di go thibela go hlankela Jehofa. (Mat. 13:22) O se ke wa theetša batho bao ba sa hlankelego Jehofa goba bagwera le ba leloko bao ba ipotšago gore ba a go thuša. Ka mohlala, ba ka go kgothaletša gore o šome e le gore o tle o hwetše tšhelete e ntši yeo e tlago go go thuša gore o phele gabotse. (Bala 1 Johane 2:15-17.) Bota Jehofa ka ge e le yena a re holofetšago go re fa dilo tšeo re di hlokago “ka nako e swanetšego.” O tla go thuša gore o tšwele pele o tia tumelong le go ikwa o sa tšhoge selo.—Baheb. 4:16; 13:5, 6.

9. Go ya ka Diema 22:3, 7, ke ka baka la’ng go le bohlokwa go phema go itsenya dikolotong, gona re ka thušwa ke’ng gore re dire diphetho tše bohlale?

⁹ O se ke wa itsenya dikolotong. (Bala Diema 22:3, 7.) Ge e ba motho a hudugela lefelong le itšego, go ka ba bonolo gore a tsene dikolotong. E le gore o se tsene dikolotong, phema go adima tšhelete go sa hlokagale. Gantši ga go be bonolo go tseba gore re swanetše go adima tšhelete e kaakang ge re le maemong a thata, go swana le ge re hlokometše setho sa lapa seo se babjago. Maemong a bjalo, re swanetše go gopola gore ‘go rapela le go lopa’ Jehofa go ka re thuša go dira diphetho tše bohlale. Jehofa a ka araba dithapelo tša gago ka go go thuša gore o iše maswafo fase, gomme seo sa dira gore o kgone go dira phetho ya maleba.—Bafil. 4:6, 7; 1 Pet. 5:7.

10. Re ka dira’ng gore re be le bagwera ba bafsa?

¹⁰ Dula o gwerane le batho bao ba go kgothaletšago go dira dilo tše dibotse. Botša bagwera ba gago ka mokgwa wo o ikwago ka gona e bile o ba botše le mathata ao o lebeletšanego le wona, kudukudu bao ba kilego ba ba le mathata a go swana le a gago. Ge o ka dira bjalo, o ka ikwa o le kaone. (Mmo. 4:9, 10) Ke therešo gore bagwera ba gago ba kabelong yeo o bego o le go yona peleng e tla dula e le bagwera ba gago. Eupša go na bjale ka ge o le kabelong e mpsha, o swanetše go dira bagwera ba bangwe. Dula o gopola gore e le gore o be le bagwera, le wena o swanetše go ba yo botho go ba bangwe. Re ka dira’ng gore re be le bagwera ba bafsa? Botša ba bangwe diphihlelo tšeo di thabišago tšeo di bontšhago kamoo Jehofa a go šegofaditšego ka gona kabelong ya gago. Seo se tla ba dira gore ba bone gore ge e le gabotse o be o ipshina kabelong yeo. Ke therešo gore ba bangwe ba ka no se kwešiše gore ke ka baka la eng o rata tirelo ya nako e tletšego, eupša ba bangwe ba ka rata seo o se dirago gomme ba nyaka go ba bagwera ba gago. Eupša hlokomela gore o se ke wa bolela kudu ka wena goba ka dilo tšeo o di fihleletšego tirelong ya Jehofa, goba wa dulela go bolela ka dipelaelo tšeo o ka bago o na le tšona.

11. O ka dira’ng gore o dule o thabile lenyalong?

¹¹ Ge go ka direga gore o tlogele kabelo yeo o lego go yona ka ge molekane wa gago a babja, o se ke wa mmea molato. Ka lehlakoreng le lengwe ge e ka ba wena o babjago, o se ke wa ipea molato, wa  nagana gore o nyamišitše molekane wa gago. Gopola gore le “nama e tee,” le gona ge le be le nyalana le ile la holofetša Jehofa gore le tla dula le hlokomelana go sa šetšwe seo se ka diregago. (Mat. 19:5, 6) Ge e ba le tlogetše kabelo ya lena ka baka la go tlo ba le ngwana yoo le bego le se la mo letela, kgonthišetšang gore le botša ngwana yoo gore o bohlokwa kudu go feta kabelo yeo le bego le le go yona. Dula o botša ngwana wa gago gore ke “bohwa” bjo bo tšwago go Modimo. (Ps. 127:3-5) Le gona dula o mmotša ka diphihlelo tše di kgahlišago tšeo o bilego le tšona kabelong ya gago. Seo se ka dira gore ngwana wa gago le yena a tsenele tirelo ya nako e tletšego go swana le ge wena o kile wa dira bjalo.

12. (a) Re ka thuša bjang bao ba lego tirelong ya nako e tletšego gore ba tšwele pele ba le tirelong? (b) Re ka dira’ng go ba thuša gore ba tlwaele dikabelo tša bona tše difsa?

¹² Go a thabiša go bona gore bana babo rena le dikgaetšedi diphuthegong tše dintši ba leka ka thata go thuša bana babo rena bao ba lego tirelong ya nako e tletšego gore ba dule ba le go yona. Ba ba thuša gore ba tšwele pele tirelong ya bona ka go ba thekga ka tša ditšhelete le dilo tše dingwe, goba ba ba thuša ka go ba hlokomelela ditho tša lapa tšeo di dulago kgole le bona. (Bagal. 6:2) Ge e ba bao ba lego tirelong ya nako e tletšego ba ka hwetša kabelo e mpsha gomme ba tla phuthegong ya geno, o se ke wa nagana gore ba paletšwe moo ba tšwago gona, goba wa nagana gore ba dirile selo se sebe. * Go e na le moo, ba thuše go tlwaela maemo a bona a mafsa. Ba amogele ka borutho le go ba reta ka mošomo o mobotse woo ba o dirilego le ge gona bjale ba se sa kgona go dira mo gontši ka baka la ge ba babja. Ba tsebe gakaone. Ithute go bona.

13. Re ka thekga bjang bao ba sa tšwago go hwetša dikabelo tše difsa?

 ¹³ Mathomong, bao ba sa tšwago go hwetša dikabelo tše difsa ba ka hloka gore o ba thuše ka marobalo, dinamelwa, mešomo goba dilo tše dingwe tše bohlokwa. Le gona ba ka hloka go tseba dilo tše dingwe tše bohlokwa tša go swana le go lefa lekgetho, meetse le tše dingwe. Eupša selo se bohlokwa seo re swanetšego go se dira ke gore re kwešiše maemo a bona, e sego go no ba kwela bohloko. Mohlomongwe ba ka ba ba babja goba ditho tša malapa a bona di babja. Ba ka ba ba hlokofaletšwe ke ba leloko goba bagwera. * Goba ba ka ba ba kwešitšwe bohloko ke gore ga bjale ga ba sa na batho bao ba bego ba ba tlwaetše phuthegong yeo ba bego ba le go yona, le ge ba ka se le botše. Go ka ba tšea nako gore ba boele sekeng.

14. Bana babo rena le dikgaetšedi ba phuthegong e nngwe ba ile ba thuša bjang kgaetšedi yo mongwe gore a tlwaele kabelo ya gagwe e mpsha?

¹⁴ Ge o eya tšhemong le bana babo rena bao ba sa tšwago go hwetša dikabelo tše difsa e bile o ba beela mohlala o mobotse, seo se ka ba dira gore ba tlwaele lefelo le lefsa. Kgaetšedi yoo a hlanketšego nageng e šele ka mengwaga e mentši o re: “Kabelong ya ka e fetilego ke be ke swara dithuto tša Beibele letšatši le letšatši. Eupša kabelong ya ka e mpsha ke be ke sa hwetše le ge e ka ba sebaka sa go balela motho lengwalo goba go mmontšha bidio. Bana babo rena le dikgaetšedi ba phuthegong yeo ba ile ba ntaletša gore ke ye le bona maetong a bona a go boela le dithutong tša bona tša Beibele. Go bona bana babo rena bao le dikgaetšedi ba šoma ka thata go swara dithuto tša Beibele tšeo di tšwelago pele seo se ile sa ntira gore ke thome go ba le pono e botse ka tšhemo ya lefelong la moo. Ke ile ka ithuta ditsela tše dingwe tša go boledišana le batho ba tikologong yeo. Go dira seo go ile gwa nthuša gore ke thabele go ya tšhemong gape.”

15. O ka dira’ng gore kabelo ya gago e mpsha e be e thabišago?

¹⁵ O ka dira gore kabelo ya gago e mpsha e be e thabišago. O se ke wa nagana gore kabelong ya gago e fetilego o ile wa palelwa ke go phetha boikarabelo bja gago goba wa nagana gore ga o sa le bohlokwa. Nagana ka ditsela tše dintši tšeo Jehofa  a go thušago ka tšona gona bjale gomme o tšwele pele o bolela ditaba tše dibotse ka mafolofolo. Ekiša Bakriste ba botegago ba lekgolong la pele la mengwaga. Kae le kae moo ba bego ba eya gona ba be ba “sepela le naga ka moka ba tsebatša ditaba tše dibotse tša lentšu la Modimo.” (Dit. 8:1, 4) Ge o ka tšwela pele o dira maiteko a go bolela ditaba tše dibotse ka mafolofolo, o tlo ba le mafelelo a mabotse. Ka mohlala, babulamadibogo bao ba bego ba rakilwe nageng yeo ba bego ba bula madibogo go yona, ba ile ba hudugela nageng ya kgauswi le nageng yeo, moo le gona go bego go na le tlhokagalo ya batho ba go bolela leleme leo. Ka dikgwedi tše sego kae feela, ke ge go šetše go thomile go ba le dihlopha tša leleme leo.

16. O ka dira’ng gore o thabele kabelo ya gago e mpsha?

¹⁶ Beibele e re: “Lethabo leo Jehofa a le neago lona ke sebo [goba matla] a lena.” (Neh. 8:10) Re swanetše go thabišwa kudu ke tswalano yeo re nago le yona le Jehofa, e sego dikabelo tšeo re nago le tšona, le ge re ka ba re di rata kudu. Ge e ba re nyaka go dula re thabile, re swanetše go dula re na le tswalano e botse le Jehofa le go dula re ithekgile ka yena. Gopola gore kabelong yeo o bego o le go yona o bile go yona ka gobane o nyaka go thuša batho. Ka gona, dira sohle seo o ka se kgonago gore o rate le kabelo yeo o lego go yona gona bjale gomme o bone kamoo Jehofa a šegofatšago maiteko ao o a dirago.—Mmo. 7:10.

17. Re swanetše go dula re gopola eng ka dikabelo tšeo re lego go tšona gona bjale?

¹⁷ Re swanetše go dula re gopola gore go hlankela Jehofa go ka se tsoge go fedile, eupša dikabelo tša rena di ka fela. Lefaseng le lefsa ka moka ga rena re ka no hwetša dikabelo tše difsa. Aleksey, yoo re boletšego ka yena mathomong, o re: “Diphetogo tšeo ke di hwetšago gona bjale di ntokišeletša gore ke se tlo ba le bothata ge ke tlo hwetša diphetogo lefaseng le lefsa. Ke be ke dutše ke tseba gore Jehofa ke wa kgonthe le gore lefase le lefsa ke la kgonthe, eupša nengneng ke be ke fela ke ikwa ke sa kgodišege ka seo. Eupša gona bjale ke batametše kgauswi kudu le Jehofa, gomme ke bona lefase le lefsa le le kgauswi kudu.” (Dit. 2:25) Go sa šetšwe gore dikabelo tša rena ke dife, anke re tšweleng pele re hlankela Jehofa ka go botega. A ka se tsoge a re tlogetše, eupša o tla re thuša gore re dule re thabile tirelong ya gagwe, go sa šetšwe kabelo yeo re e dirago.—Jes. 41:13.