1-3. Łaʼ full-time servants haʼátʼíísh biniyé náánáłahjigo naanish baa náá dahiditʼaah?

ROBERT dóó Mary Jo ájíní, “21 nááhai nizhónígo naanish nihaa deitʼánígíí bíniidlı̨́įgo íilyaa dóó bikéédę́ę́ʼ, tʼáá áníidla nihizhéʼé dóó nihimá bichʼįʼ anáhóótʼiʼ silı̨́ı̨́ʼ. Baa áhwiilyą́ągo baa nihił hózhǫ́. Ndi, kéyahdi nihighan ayóóʼííníiʼnínę́ę bąąh nihíniʼ.”

² William dóó Terrie ájíní, “Nihitsʼíís bee nihichʼįʼ anáhóótʼiʼgo baa ákoniidzı̨́ı̨́ʼ, éí biniinaa nihinaanish íílʼínę́ę doo nátʼą́ą́ʼ bichʼįʼ nihá bíighah da silı̨́ı̨́ʼ, tʼóó bikʼee yiicha. Jiihóvah náánáłaʼ kéyahdi bá neiilʼaʼ yę́ę ninítʼiʼ.”

³ Aleksey ání, “Bílaʼashdlaʼii binahatʼaʼ éí branch office nihitsʼą́ą́ʼ dah deididoołkałgo nihił bééhózin. Ákótʼée ndi, Bétheldóó dahidiikaigo doo bikʼee ákódaniitʼée da, tʼóó bikʼeh dadiilyiz.”

4. Haʼátʼíísh baa nídadíitʼįįł?

⁴ Náá ałdóʼ, ląʼí full-time servants dóó Bétheldi nidaalnishígíí náánáłahjigo ániid naanishígíí baa náá dahideestʼą́. * Nihibrothers dóó nihisisters binaanish ayóóʼádeiyóʼnínę́ę bitsʼą́ąjįʼ náá dabiʼdilʼáahgo bá ndanitłʼa łeh. Haʼátʼíí bíká adoolwoł? Haitʼéego bíká adiilwoł? Niheʼiinaʼ łahgo átʼéego íilnéehgo éí díí naʼídíkidígíí baa nitsíikeesgo nihíká adoolwoł.

5. Nihinaanish łah átʼįįhgo, haash hoołʼįįh?

⁵ Azhą́ nidahwiilneʼé niidlı̨́ doodaiiʼ Bétheldi nideilnish ndi, diné dóó kéyah ayóóʼííníiʼní yiidleeh. Áko nihinaanish ííłʼínę́ę bitsʼąą dah diidaahgo ayóó bąąh nihíniʼ łeh. Atídabiʼdilʼı̨́įgo biniinaa nihibrothers dóó nihisisters bídahwiilzaah áádóó bąąh danihíniʼ łeh. (Matt. 10:23; 2 Cor. 11:​28, 29) Áádóó, náánáłahjigo hóʼdílʼáahgo áadi kéédahatʼíinii łahgo átʼéego dahiináago bízhdínóoldı̨́įłgi tʼáá nantłʼago átʼé. Tʼáá kééhoniitʼínígi neidáahgo ałdóʼ ákótʼé. Robert dóó Mary Jo ájíní, “Háálá nízáágóó kéyah náánáłahdi neiilnishgo nihoolzhiizh, nániitʼáazhgo déʼéyóní nahalin siidlı̨́ı̨́ʼ lá.” Łaʼ náánáłahjigo adabiʼdiilʼáahgo éí doo nideiyolí yę́ę yikʼeh nidaʼiileeh. Éí biniinaa łaʼ bąąh ninádahakaʼ, áádóó doo ádaa hojídlíi da, doodaiiʼ bił naaki nilı̨́ yileeh. Áko haʼátʼíísh nihíká adoolwoł?

6. Haitʼéego Jiihóvah áhánígo ííníilzin doo?

⁶ Jiihóvah áhánígo ííníilzin doo. (Jas. 4:8) Éísh haitʼéego ádiilnííł? “Sodizin yidiitsʼaʼii nílíinii” baʼíínílí. (Ps. 65:2) Psalm 62:8gi ání, “Bídin danohłíinii tʼáá ałtso danihijéí tłʼááhdę́ę́ʼ bee bił dahołneʼ.” Jiihóvah éí “bídeíníikeedii índa baa nitsídeiikeesígíí nidi tʼáá ałtso tʼáá íiyisí yilááh neelʼą́ągo” yíneelʼą́. (Eph. 3:20) Jiihóvah éí bíká sodiilzinii doo tʼáá éí tʼéiyá nihichʼįʼ kwííłʼı̨́į da. Haʼátʼíhída bee nihichʼįʼ anáhóótʼiʼígíí éí tʼáadoo baa ákoniidzindę́ę́ʼ tʼáadoo hooyání nihá hashtʼeyiiłʼįįh.

7. (a) Haʼátʼíísh nihíká adoolwołgo Jiihóvah áhánígo ííníilzin doo? (b) Hebrews 6:​10-12 binahjįʼ, Jiihóvah náásgóó bikʼeh honiilʼı̨́ dóó bá neiilʼaʼgo éí nihił haa hootʼéii doo?

⁷ Tʼáá ákwíí jı̨́ Diyin Bizaad yíníłtaʼ dóó hazhóʼó nabikʼítsíníłkees áko Jiihóvah áhánígo ííníilzin doo. Łaʼ missionary jílı̨́ı̨́ ńtʼéeʼgo kójíní, “Tʼáá ałhąąh family worship dóó áłah náʼádleeh biniyé hashtʼeʼánídiilʼįįh doo, tʼáá áłtséédą́ą́ʼ yę́ę átʼéego áńjiilʼįįh doo.” Naa ałdóʼ, áłah náʼádleehígíí tʼáá áłahjįʼ hootahgóó nahólneʼgo bee bíká anánílwoʼ.  Jiihóvah bá nidaashnishígíí yéénálniih. Azhą́ éí doo ląʼí yídaneelʼą́ą da ndi, éí doo yee yoonéeh da.—Hebrews 6:​10-12 yíníłtaʼ.

8. 1 John 2:​15-17 haitʼéego níká adoolwoł?

⁸ Tʼóó bikiinígo neʼiinaʼ áníłʼı̨́į doo. Séítan binahatʼaʼígíí biniinaa diné bił ade ádahootʼé. Éí áhootʼéhígíí biniinaa tʼááká Jiihóvah bá nanilʼaʼígíí neʼ kóólééh lágo. (Matt. 13:22) Nikʼis dóó nikʼéí Jiihóvah doo yá nidaalʼaʼígíí, éí díí átʼéego béeso ádíílííł daniłníigo tʼáadoo yíísíníłtsʼą́ʼí. (1 John 2:​15-17 yíníłtaʼ.) Jiihóvah baʼííníidlíigo, éí “bikʼi hoolzhiizhgo” haʼátʼíí shı̨́ı̨́ bídin niidlı̨́įgi niháí dooleeł. Niheʼoodląʼ bidziil áádóó nihił hasih ánihósin doogo yee nihíká adoolwoł.—Heb. 4:​16, NW; 13:​5, 6.

9. Proverbs 22:​3, 7 bikʼehgo, haʼátʼíísh biniyé ąąh hááʼá bitsʼą́ą́ʼ ánítʼé, áádóó hódzą́ bee ádá nahwiitʼáago haash yitʼéego nihíká adoolwoł?

⁹ Ąąh hááʼá bitsʼą́ą́ʼ ánítʼé. (Proverbs 22:​3, 7 yíníłtaʼ.) Náánáłahgo dashdiinéehgo ąąh hááʼá haleehgo átʼé. Doo ąąh hááʼá da doogo, éí credit bee ádaa áhólyą́ą doo, áko naalyée doo choidiilʼįįłígíí doo nahidííłnih da. Nihide áhootʼįįhgo, nihighan hazʼą́ą́dóó łaʼ bitah honiigahgo, éí haa néelą́ąʼgo béeso nihá dooʼniłígíí nihá nantłʼa łeh. Béénílniih, kóhootʼįįhgo, “sodizin índa náʼookąąh” áádóó hódzą́ bee ádá nahwiitʼáa doo. Jiihóvah sodizin yidiitsʼaʼgo éí bee ádahodíníilzééʼ.—Phil. 4:​6, 7; 1 Pet. 5:7.

10. Haash yitʼéego akʼis ániidígíí ádíílííł?

¹⁰ Akʼis yáʼádaatʼéhígíí íinisin. Tʼáá íiyisíí áhą́dígo danikʼisígíí, tʼáá nigi átʼéego bedaʼdiiłʼáhígíí bee dahólǫ́, éí baa nitsíníkeesígíí dóó niʼdiiłʼáhígíí bee bił hólneʼ. Ákóhootʼįįhgo, éí bee nihitah yáʼáhootʼéeh doo. (Eccl. 4:​9, 10) Nikʼis ádeinilaa yę́ę bitsʼąą dah díníyáa ndi tʼah danikʼis doo. Kʼad éí akʼis ániidíii ánáádíídlííł. Díí béénílniih: nikʼis hólǫ́ǫ doo nínízingo, ni ałdóʼ akʼis nilı̨́į doo. Haash yitʼéego akʼis ániidígíí ádíílííł? Jiihóvah bá nanilʼaʼígíí yáʼádaatʼéehgo íinilaii baa hólneʼgo éí binahjįʼ łaʼ yaa bił dahózhǫ́ǫ doo. Bił yah anáníjahígíí ła shı̨́ı̨́ full-time service áníłʼínígíí doo hazhóʼó yikʼidaʼdiitįįh da. Ndi náánáłaʼ éí ninaanish shił bééhodoozįįł danízin dóó nikʼis yáʼátʼéehii danilı̨́į doo. Tʼáadoo ayóó Jiihóvah bá nisíníłʼaʼgo bee ádaa dzíínídlíigo yáníłtiʼí, índa tʼáadoo doo yáʼátʼééhgóó tsíhodeeskééz bá hosíníłʼání.

11. Ahísółkéhígíí haitʼéego baa nihił hózhǫ́ǫ doo?

¹¹ Nahastiin doodaiiʼ neʼasdzą́ą́ bichʼįʼ  anáhóótʼiʼ hazlı̨́įʼgo áádóó ninaanish bitsʼąą dah dooʼáazhgo, tʼáadoo bee ałkʼeh hootʼaahí. Tʼáá ni nichʼįʼ anáhóótʼiʼgo tʼáadoo bee akʼi hootʼaahí. Béénílniih, “atsʼíís tʼááłáʼí” nohłı̨́, dóó Jiihóvah bichʼįʼ bee ádee hadíínídzííʼ azhą́ nihichʼįʼ nahwiiʼnáa ndi, ałhąąh áhółyą́ą doo. (Matt. 19:​5, 6) Niheʼawééʼ hazlı̨́ı̨́ʼ biniinaa ninaanish bitsʼánohʼaazhgo éí niheʼawééʼ aláahgo ayóóʼíínóʼnínígíí hazhóʼó bee bił hodoołnih. Niheʼawééʼ tʼáá ałhąąh God ‘nihainíláhígíí átʼé’ bee bił nahółnih doo. (Ps. 127:​3-5) Áádóó, ninaanish yáʼátʼéehgo íinilaaígíí bee bił hodiilnih. Éí niheʼawééʼ yíká adoolwoł áko Jiihóvah tʼáá áłahájįʼ yá naalʼaʼgo ádiʼdoolnííł.

12. (a) Full-time servants haitʼéego tʼáá náásgóó binaanish ádeiłʼı̨́įgo bee bíká adiilwoł? (b) Haitʼéego binaanish ániidígíí doo nantłʼagóó bá ííníilzin doo?

¹² Ląʼí áłah nídaʼadleehígíí éí full-time servants yee yíká anídaajah áko tʼáá náásgóó binaanish ádeiłʼı̨́. Haʼahóní, béeso, dóó naalyéhé yee yíká anídaajah, dóó haghan hazʼą́ągi yá yaa ádahályą́. (Gal. 6:2) Full-time servants áłah nídaahdleehjįʼ ádabiʼdiisʼaʼgo, éí doo haada yitʼéego baa nitsídaakeesí. * Ákondi bíká anídaałwoʼgo doo bá nantłʼa da doo. Azhą́ doo bitah hatsʼíid da ndi, hazhóʼó bichʼįʼ naa áhwiinítʼı̨́ʼígo wóshdę́ę́ʼ bididííniił, dóó naanish baa ahééh nisin bidiní. Bééhonísįįh áádóó bibee naʼnitinígíí, yíhoołʼą́ą́ʼígíí, dóó binaanish áyiilaaígíí bitsʼą́ą́dóó íhoołʼaah.

13. Naanish ániid baa dahideestʼánígíí, haash yitʼéego bíká adiilwoł?

 ¹³ Áłtsé naanish ániidíiidi jiníyáago éí hooghan, chidí, naanish, doodaiiʼ náánáłaʼ yídin nilínígíí bee bíká adiilwoł. Bílaʼashdlaʼii binahatʼaʼ bibee hazʼáanii, éí taxes nahalyé dóó insurance nahaniih ádaatʼéii bił ííshjání ádíílííł. Íiyisíí deinízinígíí éí bił hazʼą́ągi baa ákonínízin doo, danízin. Tʼáá bí doodaiiʼ bighan hazʼą́ągi dah, bitsʼíís bichʼįʼ anídahaztʼiʼgo átʼé. Chʼééná dah shı̨́ı̨́ yikʼee nidaakai. * Azhą́ doo yaa yádaałtiʼ da ndi, bikʼis danilínę́ę yidahasáahgo dabiyiʼdi chʼééná danilı̨́. Áko doo tʼáá łahjįʼ łaʼ yineeh da.

14. Áłah náʼádleehígíí éí haitʼéego łaʼ sister naanish ániid bee bíká ajííjééʼ?

¹⁴ Hootahgóó bił nahólneʼ dóó haʼahóní bee bíká adiilwoł. Nihisister náánáłaʼ kéyahdi ląʼí nááhaigo nahalneʼ, éí ání, “Tʼáá ákwíí jı̨́ Diyin Bizaad bíhooʼaah áshʼı̨́ı̨́ ńtʼééʼ. Kʼad éí, Diyin Bizaad baa hashneʼ doodaiiʼ video nideeshkiłgi shá nantłʼa. Ákondi shibrothers dóó shisisters nínáájídááh dóó Diyin Bizaad bíhooʼaahgóó dashiłní. Níshʼı̨́įgo shibrothers dóó shisisters yídaneedlı̨́įgo yéigo nidaalnishgo Diyin Bizaad yídahoołʼaahii yee nidaʼnitin, díí binahjįʼ doo naaki shił nilı̨́ı̨́góó nahashneʼ. Saad doo nantłʼagóó bee yáshtiʼ sélı̨́ı̨́ʼ. Díí tʼáá átʼé baa shił hózhǫ́ áshiilaa.”

15. Naanish ániidíii haitʼéego nizhónígo ádíílííł?

¹⁵ Naanish ániidíii nizhónígo ádíílííł. Naanish íinilaa yę́ę tʼáadoo biniyéhí da níníziní doodaiiʼ doo ílı̨́į da nínízingo baa nitsíníkeesí. Jiihóvah níká eelwodgo baa nitsíníkees, áádóó hootahgóó tʼáá nahólneʼ. First-century Oodlání bedaʼiilʼı̨́. Tʼáá nidaakaigo “saad baa dahojilneʼgo tádazhdookai.” (Acts  8:​1, 4) Tʼáá náásgóó nahólneʼ yáʼátʼéehii bitsʼą́ą́dóó nídidíílééł. Díí baa nitsíníkees: Pioneers náánáłahgo ádadoonééł dabidooʼniidígíí éí saad bee yádajiłtiʼígíí bídį hwiindzingóó ahíneeh. Áko áadi tʼáadoo hodiinaʼí ląʼí groups dahazlı̨́ı̨́ʼ.

16. Naanish ániidíii haash yitʼéego baa nił hózhǫ́ǫ doo?

¹⁶ Jiihóvah “bibee ił hózhóonii bee danihidziil.” (Neh. 8:10) Azhą́ nihinaanish ayóóʼádeíníiʼníi ndi, Jiihóvah bił kʼé ahidiiʼnííjígo aláahgo baa nihił hózhǫ́. Jiihóvah tʼáá bił yiʼash dóó hódzą́ yee nanitingo áádóó éí níká análwoʼgo baʼíínílíi doo. Béénílniih, ninaanish yę́ę ayóóʼííníʼníigo biniinaa áadi diné yéigo bíká íínílwod. Áko yéigo binanilnish áádóó Jiihóvah níká adoolwołgo ninaanish ayóóʼííníiʼníi doo.—Eccl. 7:10.

17. Kʼad nihinaanishígíí haitʼéego béédeilniih doo?

¹⁷ Béénílniih, Jiihóvah éí ahóyéelʼáágóó bá neiilʼaʼ, ndi kʼad nihinaanish ádeilʼínígíí éí tʼóó kóníshgháníjįʼ átʼé. Kéyah ayóó áhonóolingi, tʼáá áníiltso nihinaanish łahgo átʼée doo. Aleksey baa chʼíhootʼánę́ę, hweʼiinaʼ łahgo átʼéego ájiilaa éí binahjįʼ náasdi áhodooníiłii biniyé hashtʼeʼázhdílnééh. Aleksey ájíní, “Shił bééhózin, Jiihóvah dóó kéyah ayóó áhonóolingi éí tʼáá aaníí, ákondi tʼáá shił naaki nilı̨́ı̨́ ńtʼééʼ. Ákondi kʼad éí Jiihóvah áhą́dígo bikééʼ yishááł, dóó kéyah ayóó áhonóolingi koshídę́ę́ʼ bichʼįʼ hoolzhish.” (Acts 2:25) Ákondi, tʼáá haʼátʼíí shı̨́ı̨́ nihinaanish ndi, Jiihóvah ahánígo bikééʼ yiidáał doo. Doo nihitsʼá doogáał da. Jiihóvah éí bá neiilnishii baa nihił hózhǫ́ǫgo yee nihíká análwoʼ.—Isa. 41:13.