EKICWEKA EKY’OKWEGA 34
Okumanyiira Embeera Obuheereza Bwawe Bwahinduka
“Ruhanga t’otahikiriire kwebwa emirimo yaanyu n’okukunda oku mwayorekire aha iziina rye.”—HEB. 6:10.
EKYESHONGORO 38 Naija Kukugumya
EBIRAAGAMBWEHO *
1-3. Ni nshonga ki ezimwe ezirikureetera abaheereza b’obutwire kuhindura obuheereza bwabo?
“BWANYIMA y’okumara emyaka 21 omu bumiisani tushemereirwe, abazaire baitu boona bana bakarwara baanyangarara,” Robert na Mary Jo nikwo barikugira. “Tukaba nitwenda kubareeberera. Kwonka nabwo, kikatureetera obusaasi kuruga omu mwanya ogu twabaire nitureeba nk’owaitu.”
2 William na Terrie nibashoboorora bati: “Ku twamanyire ngu tituragarukye omu buheereza bwaitu ahabw’amagara mabi, tukarira. Ekirooto kyaitu eky’okuheereza Yehova omu ihanga erindi kikagarukira aho.”
3 Aleksey naagira ati: “Tukaba nitumanya ngu abarikutuhiiganisa nibenda kukiinga ofiisi y’eitaagi ahu naabaire nimpeereza. Kwonka nabwo ku kyabaireho tukagira ekyekaango, ahakuba tukaba twine kuruga aha Beseeli.”
4. Nituza kugarukamu bibuuzo ki omu kicweka eki?
4 Hariho n’abandi baingi abarugire omu buheereza obw’obutwire bakaza omu buheereza obundi otwariiremu n’ababeseeli. * Ab’eishe-emwe na banyaanyazi-itwe aba abeesigwa nikibaasa kubagumira kuruga omu buheereza obu barikukunda. Niki ekirikubaasa kubahwera kumanyiira empinduka nk’ezi? Noobaasa kubahwera ota? Eby’okugarukamu by’ebibuuzo ebyo nibibaasa kutuhwera twena kumanyiira empindahinduka nsya.
OKU ORIKUBAASA KUMANYIIRA EMPINDUKA
Ahabw’enki abari omu buheereza obw’obutwire kirikubaasa kubagumira kutsigaho obuheereza bwabo? (Reeba akacweka 5) *
5. Empindahinduka ezirikubaho omu buheereza bwaitu nizibaasa kutukwataho mu miringo ki?
5 Yaaba nituheereza aha Beseeli nari omu buheereza bw’okubuurira, nitubaasa kukunda abantu n’ahu turikuheereza. Haagira ekyatureetera kuruga omu buheereza obwo, nitugira obusaasi bwingi. Nitugirira orushusho abu twatsigireyo, kandi nituguma twerarikiriire yaaba bari gye na munonga twaba twarugireyo ahabw’okuhiiganisibwa. (Mat. 10:23; 2 Kor. 11:28, 29) Ekindi, tikyorobi kuza omu buheereza busya n’obu kwakuba okugaruka omuka, ahakuba nikimanyisa okumanyiira entwaza nsya. Robert na Mary Jo nibagira bati: “Tukaba twayebirwe entwaza y’owaitu, kandi kikaba nikitugumira kubuurira omu rurimi rwaitu. Tukaba turi nk’abashuhuuki omu ihanga ryaitu. Bamwe abu obuheereza bwabo burikuhinduka ahonaaho nibabaasa kugira oburemeezi omu by’entatsya. Nibabaasa kutamanya ekiraababeho, beehurire bataine burinzi, kandi bahwemu amaani. Niki ekirikubaasa kubahwera?
Ni kikuru kwirira haihi Yehova kandi tukamwesiga (Reeba akacweka 6-7) *
6. Nitubaasa kuguma tuta haihi na Yehova?
6 Guma haihi na Yehova. (Yak. 4:8) Ekyo nitubaasa kukikora tuta? Turikwesigira kimwe ogwo ‘orikuhurira okushaba.’ (Zab. 65:2) “Mumugambire byona, mumare omu kashansha,” nikwo Zaaburi 62:8 harikugira. Yehova naabaasa kukora ‘ebirikukirira kimwe ebi turikushaba nari ebi turikuteekateeka.’ (Efe. 3:20) Yehova naatuha ebirikukira aha bi turikuba tumushabire. Naabaasa kukora eki tutarikuteekateeka, kukirira kimwe ekintu kyona eki turikubaasa kuteekateekaho kumaraho oburemeezi bwaitu.
7. (a) Niki ekirikwija kutuhwera kuguma haihi na Yehova? (b) Kurugiirira aha Abaheburaayo 6:10-12, nihaija kubaho ki twagumizamu nituheereza Yehova omu bwesigwa?
7 Kubaasa kuguma haihi na Yehova, shoma Ebyahandiikirwe buri izooba kandi obiteekateekyeho. Omwe owaabaireho omumiisani naagira ati: “Hamira aha ntebeekanisa yaawe ey’okuramya kw’eka n’okutebeekanisiza enteerane nk’oku waabaire nookora okiri omu buheereza bwawe.” Kandi gumizamu nooyejumbira kimwe omu kubuurira amakuru marungi omu kibiina kyawe ekisya. Yehova tarikwebwa abo abarikugumizamu nibamuheereza omu bwesigwa, n’obu baakuba batakibaasa kukora bingi nka ira.—Shoma Abaheburaayo 6:10-12.
8. Ebiri omuri 1 Yohaana 2:15-17 nibibaasa kukuhwera bita kuta omutima aha bintu ebikuru?
8 Ta omutima aha birikukira obukuru. Otaikiriza amaganya g’ensi ya Sitaane kukuremesa kugumizamu nooheereza Yehova. (Mat. 13:22) Otaikiriza abantu abatarikuheereza Yehova, abanywani, nari abanyabuzaare kukugyemesereza kwebembeza okusherura sente omu nsi ya Sitaane egi. (Shoma 1 Yohaana 2:15-17.) Yesigye Yehova orikuturaganisa kutureeberera omu by’omwoyo n’omu by’omubiri omu bwire obuhikire.—Heb. 4:16; 13:5, 6.
9. Kurugiirira aha Enfumu 22:3, 7, ahabw’enki ni kikuru kwetantara amabanja agatarikwetengyesa, kandi niki ekiraakuhwere kucwamu gye?
9 Yetantare amabanja agatarikwetengyesa. (Shoma Enfumu 22:3, 7.) Okukora empindahinduka kuza omu buheereza obundi nikibaasa kutwara esente nyingi, n’ahabw’ekyo kyorobi kugira amabanja. Kubaasa kwetantara amabanja oteeguza esente kugura ebintu ebitarikwetengyesa. Waaba oine embeera egumire nk’okureeberera omukundwa waawe orwaire, noobaasa kutandika kweguza esente otarikwebariirira. Omu mbeera nk’ezi, ijuka ngu ‘okushaba n’okweshengyereza’ Yehova nikubaasa kukuhwera kucwamu gye. Yehova naija kugarukamu okushaba kwawe, arikukuha obusingye oburaije ‘kurinda omutima gwawe n’obwengye bwawe,’ kuguma oikaikaine reero ocwemu gye.—Fil. 4:6, 7; 1 Pet. 5:7.
10. Nitubaasa kugira tuta abanywani basya?
10 Gira emikago mirungi. Gambira banywani baawe ebi orikurabamu n’oku orikwehurira, na munonga abarikubaasa kuba baarabireho omu mbeera nk’ezaawe. Waakora otyo nikibaasa kukuhwera kwikaikana. (Mub. 4:9, 10) Abanywani abu waabaire nooheereza nabo nibaija kuguma bari banywani baawe. Hati, obu ori omu buheereza busya oine kusherura abanywani abasya. Ijuka ngu kubaasa kutunga abanywani, iwe wenka oine kuba ori omunywani murungi. Mbwenu shi noobaasa kusherura ota abanywani basya? Gaaniira nabo aha migisha ei Yehova akuhaire, kandi abandi baine kureeba ngu oshemereirwe ahabw’okuheereza Yehova. N’obu abamwe omu kibiina baakuba bateetegyereize ahabw’enki nookikunda obuheereza obw’obutwire, abandi nibabaasa kukunda eky’okureeberaho kyawe kandi babe banywani baawe. Kwonka yetantare kwetaho omutima munonga, orikugamba ekirenga aha bi obaasize kuhikiiriza, nari okuta omutima aha nyehurira mbi.
11. Noobaasa kureetera ota obushwere bwawe kuguma burimu okushemererwa?
11 Obuheereza bwawe ku buraabe buhindukire ahabw’ou ori nawe omu bushwere kurwara, otamucwera orubanja. Kandi waaba niiwe oine amagara mabi, reka kweshinja orikuteekateeka ngu oremeise omukundwa waawe obuheereza. Otakaayebwa ngu muri omubiri gumwe, kandi mukaragaana omu maisho ga Yehova kureebererana omu mbeera zoona. (Mat. 19:5, 6) Ku oraabe waarugire omu buheereza bw’obutwire ahabw’okutwara enda ei oteeteekateekire, hamiza omwana ngu n’ow’omuhendo munonga okukira obuheereza bwawe. Muhamize ngu noomutwara nk’ekiconco kuruga ahari Ruhanga. (Zab. 127:3-5) Kandi mugambire n’ebirungi ebi waatungire omu buheereza bwawe. Waakora otyo nikiija kuhiga omwana waawe kukutooreza arikuheereza Yehova ashemereirwe.
OKU ABANDI BARIKUBAASA KUHWERA
12. (a) Nitubaasa kuhwera tuta abari omu buheereza obw’obutwire kugumizamu omu buheereza bwabo? (b) Nitubaasa kuhwera tuta abu obuheereza bwabo buhindukire kumanyiira embeera nsya?
12 Ekirungi, ebibiina bingi n’ab’eishe-emwe nibateeraho kuhwera abari omu buheereza obw’obutwire kugumizamu n’obuheereza bwabo. Nibakikora barikubahiga kugumizamu nibaheereza, barikubaha esente nari ebintu, nari barikubahwera omu kureeberera abazaire baabo abu baatsigire omuka. (Gal. 6:2) Abari omu buheereza obw’obutwire baahindurwa bakaija omu kibiina kyanyu, otareeba okuhindurwa kwabo nk’okuremwa nari okuhanwa. * Omu mwanya gw’ekyo, bahwere kumanyiira embeera. Baakiire gye omu kibiina, kandi obasiime ahabw’okuheereza gye, n’obu baakuba batarikubaasa kukora bingi hati ahabw’amagara mabi. Teeraho kubamanya gye. Gira eki waayegyera aha kumanya kwabo, okutendekwa kwabo, n’ebi barabiremu.
13. Nitubaasa kuhwera tuta abu obuheereza bwabo buhindukire?
13 Omu kubanza, abu obuheereza bwabo buhindukire nibaba nibenda obuhwezi kutunga oburaaro, eby’engyenda, omurimo, n’ebindi bikuru ebirikwetengyesa. Nibabaasa n’okwenda kumanya ebikwatiraine n’okushashura omushoro, n’okutunga enshumbuushano. Okukira byona nibaba nibenda ngu twetegyereze embeera ei barimu omu mwanya gw’okubasaasibwa kyonka. Nibabaasa kuba baine amagara mabi nari abanyabuzaare baabo nibo baine amagara mabi. Nibabaasa kuba nibaganya ahabw’okufeerwa omukundwa. * Kandi n’obu baakuba batarikukigambaho nibabaasa kuba bainiire orushusho ab’eishe-emwe abu baabaire nibaheereza nabo. Nikitwara obwire kubaasa kweihamu enyehurira nk’ezi.
14. Ab’eishe-emwe omu kibiina kimwe bakahwera bata munyaanyazi-itwe kumanyiira obuheereza busya?
14 Kwonka, waabashagika kandi okabateeraho eky’okureeberaho kirungi, nikibaasa kubahwera kumanyiira embeera nsya. Munyaanyazi-itwe owaaheereize kumara emyaka mingi omu ihanga erindi, naagira ati: “Omu buheereza bwangye obw’enyima, nkaba ninyegyesa abeegi ba Baibuli buri izooba, kwonka hati kigumire n’okutunga omugisha gw’okwigura Baibuli nari kworeka omuntu vidiyo omu buheereza. Kwonka ababuurizi ab’omu kibiina eki ndimu bakaba baanyeta kugyenda nabo aha beegi baabo n’abu barikugarukira. Ku ndikureeba ab’eishe-emwe aba abeeziriki kandi emanzi barikwegyesa abeegi ba Baibuli abarikutunguuka, nikimpwera kugira emiteekateekyere mirungi. Nyegire kutandika kugaaniira n’abantu ab’omu kicweka ekisya. Ebi byona bimpwereire kugaruka kushemererwa.”
GUMIZAMU NOOHEEREZA YEHOVA!
Yongyera aha buheereza bwawe omu kicweka eki orimu hati (Reeba akacweka 15-16) *
15. Noobaasa kuba ota omusinguzi omu buheereza bwawe obusya?
15 Noobaasa kuba omusinguzi omu buheereza bwawe obusya. Otakaateekateeka ngu okahindura obuheereza ahabw’okuremwa nari ngu hati toine mugasho. Teekateeka aha miringo ei Yehova arikukuhweramu hati, kandi gumizamu noobuurira. Tooreza Abakristaayo abeesigwa ab’omu kyasha ky’okubanza. Ahu baabaire baza hoona, bakaba ‘bagyenda nibabuurira ekigambo.’ (Byak. 8:1, 4) Waagumizamu noobuurira n’obweziriki noobaasa kutunga emigisha. Nk’eky’okureeberaho, baapayoniya abaabingirwe omu ihanga rimwe, bakacwamu kuza omu rindi ahu ababuurizi b’orurimi rwabo baabaire nibeetengwa munonga. Omu meezi makye, guruupu nyingi zikatandikwaho omu kicweka ekyo.
16. Noobaasa kukutunga ota okushemererwa omu buheereza bwawe obusya?
16 “Okushemerererwa omuri [Yehova] nigo maani gaanyu.” (Neh. 8:10) Enshonga nkuru eine kutureetera kushemererwa n’okugira omukago murungi na Yehova, beitu butari obuheereza bwaitu n’obu twakuba nitubukunda munonga. N’ahabw’ekyo, gumizamu noogyenda na Yehova orikumwesiga kukuha obwengye, obuhabuzi n’obushagiki bwe. Ijuka ngu ekyakureeteire kukunda obuheereza bwawe obw’enyima n’okuta omutima aha kuhwera abantu. Ta omutima aha buheereza obu orimu hati, reero oreebe oku Yehova araakuhwere kubukunda.—Mub. 7:10.
17. Twine kwijuka ki aha bikwatiraine n’obuheereza obwa hati?
17 Twine kwijuka ngu obuheereza bw’omutaano obu turimu hati tiburikugumaho ebiro byona, kwonka okuheereza Yehova n’okw’ebiro byona. Omu nsi ensya twena obuheereza bwaitu nibubaasa kwija kuhinduka. Aleksey, owaagambwaho aha kutandika kw’ekicweka eki, naikiriza ngu ebi arikurabamu hati nibimutebeekanisiza empinduka eziraabeho omu biro by’omumaisho. Aleksey naayongyera agira ati: “Nkaba nimmanya ngu Yehova n’owaabuzima, kandi n’ensi ensya nayo n’eyaabuzima, kwonka nkatandika kubireeba nk’ebiri hare. Hati nindeeba Yehova ari haihi munonga naanye, kandi nindeeba ngu ensi ensya eri haihi kubaho.” (Byak. 2:25) Yaaba turi mu buheereza ki, ka tugumizemu nitugyenda na Yehova. Tarikwija kututsigaho, kureka naija kutuhwera kugira okushemererwa twakora eki turikubaasa kumuheereza hoona ahu turi.—Isa. 41:13.
EKYESHONGORO 90 Tugumyane
^ kacw. 5 Obumwe, ab’eishe-emwe na banyaanyazi-itwe abari omu buheereza obw’obutwire nibabaasa kuburugamu, nari obuheereza bwabo nibubaasa kuhinduka. Ekicweka eki nikyoreka embeera ezigumire ezi barikurabamu, n’oku barikubaasa kumanyiira empindahinduka ezi. Nikyoreka n’eki abandi barikubaasa kukora kubagumya n’okubashagika, n’emisingye ya Baibuli erikubaasa kutuhwera twena haabaho empindahinduka.
^ kacw. 4 Kandi, n’ab’eishe-emwe abamwe abaine obujunaanizibwa ku barikukura, obujunaanizibwa bwabo nibaburekurira abato. Reeba ekicweka “Abakristaayo ab’Emyaka ya Bukuru—Yehova Naabasiima Ahabw’okumuhamiraho,” omu Watchtower eya Seputemba 2018, na “Guma Oine Obusingye n’Obu Embeera Zaakuhinduka,” omu Omunaara gw’Omurinzi ogwa Okitoba 2018.
^ kacw. 12 Abareeberezi b’ekibiina eki babaire nibaheerezamu, ahonaaho bashemereire kuhandiika ebaruha erikubanjura omu kibiina ekisya, kugira ngu babaase kugumizamu bari baapayoniya, abareeberezi nari abaheereza.
^ kacw. 13 Reeba ebicweka ebikurataine “Obuhwezi bw’Abaine Amaganya” omu Awake! No. 3 eya 2018.
^ kacw. 57 ENSHOBOORORA Y’EBISHUSHANI: Omushaija n’omukazi we bariyo nibaruga omu bumiisani omu ihanga erindi, nibasiibura ab’ekibiina kyabo barikurira.
^ kacw. 59 ENSHOBOORORA Y’EBISHUSHANI: Bwanyima y’okugaruka owaabo, nibagumizamu kwezirika kushaba Yehova kubahwera kwemera embeera nsya.
^ kacw. 61 ENSHOBOORORA Y’EBISHUSHANI: Ahabw’okuhwerwa Yehova, bakagaruka omu buheereza obw’obutwire. Nibakoresa orurimi oru baayegire omu ihanga erindi kubuurira abashuhuuki abari omu kicweka ky’ekibiina kyabo.
